Kapitulo 20

Ano nga Sahi sang Kabuhi ang Luyag Ninyo?

 Kon may mamangkot sa inyo, ‘Paano ko matigayon ang kalipay karon?’ ano ang isabat ninyo? Ayhan masinaligon nga magasiling kamo: ‘Agod makatigayon sing bug-os, malipayon kag mapinadayunon nga kabuhi, himua ang tanan suno sa paagi sang Dios! ’

² Sa nagligad nga kapitulo nabinagbinag naton nga ang Manunuga tunay nga nagaluntad, nga nagaaman sia sa Biblia sing impormasyon kag tuytoy nga kinahanglan naton tanan, kag nga ang pag-aplikar sang iya Pulong praktikal karon. Ang pagkabuhi subong Cristiano magabulig sa aton nga atubangon ang mga palaligban subong sang kahuol kag kasubo. Ang tuytoy sang Biblia magaamlig sa aton batok sa masakit nga palaligban nga dala sang pagpahubog, imoralidad, pagkadibunayag kag iban pa nga mga bisyo. (Hulubaton 4:​11-13) Ang pag-aplikar sa pagtamod sang Biblia nahanungod sa kuwarta magahimo sa aton nga mangin mas kontento kag “makapanguyapot sing hugot sa matuod nga kabuhi.”​—⁠1Timoteo 6:⁠19.

³ Kon nagapamati kita sa ginasiling sang Manunuga, makatigayon sing kahulugan kag tulumuron ang aton kabuhi. Nahangpan naton kon ngaa ginatugutan sang Dios ang kalautan kag pag-antos. Kag samtang ginatun-an naton ang katumanan sang mga tagna sang Biblia sa mga hitabo karon, nahibaluan naton nga nagakabuhi kita sa “katapusan nga mga adlaw” sang karon malaut nga sistema sang mga butang. (2 Timoteo 3:​1-5) Nagakahulugan ina nga sa indi madugay laglagon sang Dios ang tanan nga ginharian sang tawo upod ang ila malawig nga maragtas sang politikanhon nga kalautan kag mga armadong kusog nga ginasakdag sang mabug-at nga mga buhis. (Daniel 2:44; Bugna 16:​14, 16) Sa amo tapuson sang Dios ang paagisod nga pagtinguha sang tawo nga gamhan ang duta kag tuytuyan niya ang makalampuwas nga katawhan paagi sa iya langitnon nga ginharian.​—⁠Bugna 11:​17, 18; 21:​1-4.

 Amo Bala Sini ang Luyag Ninyo?

⁴ Madamo sa aton ang magasiling: ‘Matahom magkabuhi sa paraiso sa tunga sang mahigugmaon, mahinadlukon sa Dios nga mga tawo.’ (Isaias 11:⁠9) Apang agod mangin amo sini, ang gugma naton sa pagkamatarong kag ang handum naton nga magpahisuno sa mga talaksan sang Dios dapat nga mabaskog gid agod bag-uhon ang bug-os nga paagi sang pagkabuhi naton karon. (Mateo 12:34; 15:19) Amo gid bala sini ang luyag ninyo? Nahisuno sa sini, ang disipulo nga si Santiago gin-inspirar nga magsulat sa mga Cristiano:

 “Wala bala kamo makahibalo nga ang pagpakig-abyan sa kalibutan pagpakig-away sa Dios? Busa ang bisan sin-o nga MALUYAG magpakig-abyan sa kalibutan nagahimo sang iya kaugalingon nga kaaway sang Dios.”​—⁠Santiago 4:⁠4.

⁵ Ginpadaku man ni Santiago nga “ang sahi sang pagsimba nga putli kag walay dagta gikan sa pagtamod sang aton Dios” nagadalahig sing ‘paghupot sang aton kaugalingon nga walay dagta gikan sa kalibutan.’ (Santiago 1:27) Dapat naton tinguhaan nga himuon ini. Matuod, sanglit ang mga Cristiano nagakabuhi sa tunga sang kasingki kag kalautan sang kalibutan, sang imoral nga mga pahito sini, sang politika kag nasyonalismo, mabudlay ang magpabilin nga 100 porsiento nga indi maapektuhan. Bisan ang pinakamatutom nga Cristiano mahimo makadalin-as ukon makahimo sing mga sayop samtang nagalikaw nga madagtaan sang kalibutan. Gani dapat nga padayon nga magpanikasog ang mga Cristiano sa pag-uswag. (Colosas 3:​5-10) Apang ang punto amo, ano bala ang luyag naton?

 ⁶ Subong ilustrasyon, handurawon naton ang duha ka tawo nga nagakaon. Dihungod nga namantsahan sing sarsa ang kurbata sang isa ka tawo. Ang isa naman naghukas sang iya kurbata kag hungod nga gintusmaw ini sa sarsa; amo sina ang luyag niya. Diin sa duha ang katulad naton? Paagi sa kon ano ang ginatugot naton nga mag-impluwensia sa aton kag sa kon ano ang ginapili naton nga himuon, ginapakita bala naton nga luyag naton mangin abyan sang kalibutan? ukon abyan sang Dios?

⁷ Ang pagpakig-abyan sa kalibutan sarang mapakita sa madamong paagi. Ang iban nga mga tawo malapit gid sa ila mga pamilya ukon mga isigkatawo nga, nagapakigbahin sila bisan sa mga butang nga nahibaluan nila wala ginakahamut-an sang Dios, subong sang indi makasulatanhon nga mga selebrasyon, sobra nga pag-inom, binastos nga paglahugay ukon pagpakita sing aligutgot sa rasa. (1 Pedro 4:​3, 4; Efeso 5:​3-5; Binuhatan 10:​34, 35) Kon luyag naton nga pahamut-an ang Dios, nian ang pag-agom sang iya kahamuot mangin mas importante sa aton sangsa kahamuot sang aton mga paryente.​—⁠Lucas 14:​26, 27; 11:⁠23.

⁸ Sing kaanggid, ang kalingawan nga ginapili naton mahimo nga magapakita kon bala luyag naton mangin abyan sang kalibutan. Ang unang mga Cristiano nagdumili sa pagtan-aw sing mapintas nga pag-away sang mga glad­iator ukon sing mga palaguwaon nga nagapadaku sing imoralidad. Kamusta naman kita karon? Dapat naton binagbinagon ang mga huyog naton sa isport, telebisyon, pelikula ukon balasahon. Kon mahantop naton nga ginakondisyon kita agod maluyagan ang ginadumili sang Dios, dapat naton panikasugan nga bag-uhon ang aton mga huyog. Ang pangganyat sang kalibutan makaapektar bisan sa kabataan nga nagdaku sa Cristianong mga pamilya kag sa mga Cristiano nga madugay na nga nagatuon sing Biblia.

⁹ Ang pagpakig-abyan sa Dios ukon pagpakig-abyan sa kalibutan nagakahulugan sing kabuhi ukon kamatayon. (1 Juan 2:​15-17)  Indi kita makatindog nga ang mga tiil nagabika sa duha ka bahin kon paano nga ang isa ka tawo nga yara sa ginsang-an sang dalan indi makalakat sa duha ka magkatuhay nga banas.

¹⁰ Sang kaadlawan ni Elias, may mga Hebreo nga naapektuhan sang pagsimba kay Baal sang mga nagapalibot sa ila. Bisan pa may kaangtanan sila sa matuod nga Dios, nga si Jehova, wala sila magmatutom sa iya sing bug-os. Ginsiling ni Elias nga sila “nagpiniang sa tunga sang duha ka panghunahuna.” Dapat sila mamat-od kon bala magpabilin sila kay Jehova kag sa iya mga paagi ukon indi. Isa yadto ka pagpili nga nagkahulugan sing kabuhi ukon kamatayon.​—⁠1 Hari 8:​21-40; Deuteronomio 30:​19, 20.

¹¹ Indi naton mapaisol ang pagpamat-od nahanungod sa kon ano gid ang luyag naton. Sang una nga siglo C.E., ginpalig-on ni apostol Pedro ang mga Cristiano nga ‘hunahunaon ang presensia sang adlaw ni Jehova’ nga sa amo nga tion laglagon niya ang kalautan sa duta. Ang pagbatyag nila sing pagkahilingagawon mapabanaag sa ila “balaan nga mga pagginawi kag mga buhat sang diosnon nga debosyon,” lakip na ang mapagsik nga pagbantala sing Cristianong mensahe. (2 Pedro 3:​11, 12) Samtang ang iban nga mga Cristiano huwaran sa ila pagkabuhi subong mga minyo, ginapakamaayo sang iban nga magpabilin nga diminyo agod makahatag sila sing ‘bug-os nga igtalupangod sa Ginuo nga wala sing sablag.’​—⁠1 Corinto 7:​29-35.

¹² Kon ang sahi sang kabuhi nga luyag ikabuhi sang mga Cristiano importante sang nahaunang siglo, labi pa gid sa karon! Makita na naton nga ang ginharian sang Dios nagagahom na sa langit kag “diutay na lamang nga tion” ang nabilin antes dugmukon sang Dios ang mga pungsod kag gapuson si Satanas nga Yawa paagi kay Cristo. (Bugna 12:12; 19:​11–20:⁠2) Gani karon na ang tion agod mamat-od kon ano nga sahi sang kabuhi ang luyag naton.

 Ang Sahi sang Kabuhi nga Iaman sang Dios

¹³ Ang sahi sang kabuhi nga ginapili naton karon amo ang basihan kon bala tugutan kita sa pag-agom sing sahi sang kabuhi nga iaman sang Dios sa nagapakari nga bag-ong kalibutan.

¹⁴ Madali nga hunahunaon sing una ang madamong pisikal nga pagpakamaayo sa ginpasag-uli nga paraiso. Sa orihinal nga paraiso, sanday Adan kag Eva nakatigayon sing bugana kag masustansia nga pagkaon. (Genesis 2:​9, 16) Busa, sa bag-ong kalibutan makatigayon kita sang bugana, manamit, masustansia nga pagkaon.​—⁠Salmo 72:16; 67:⁠6.

¹⁵ Sanday Adan kag Eva nag-agom sing maayo nga panglawas, bangod gintuga sila sang Dios nga himpit. Ginapadaku sini ang pasalig sang Biblia nga sa bag-ong kalibutan, ang balatian, kasakit nga tuga sang mga balatian kag ang mga luha sang kasubo mangin butang nga nagligad. (Bugna 21:​1-4) Ang katawhan mangin himpit sa pisikal.

¹⁶ Sanglit wala na ginaupangan sang mga problema kag sang kamatayon pagligad sang 70 ka tuig, ang mga lalaki kag mga babayi malipay sa pagpangusisa sa madamo nga patag sang kaalam kag eksperiensia. Magamit ninyo sing bug-os ang inyo mga ikasarang, lakip na ang pagpauswag sang iban nga ikasarang nga sa banta ninyo wala sa inyo. Pagluto, pagpatindog sing balay, paghimo sing mga muwebles, pagdekorasyon, paghardin, pagtokar sing mga instrumento sa musika, pagpanahi, pagtuon sa masangkad nga mga patag sang ihibalo​—⁠Walay katapusan ang mahimo ninyo nga listahan nahanungod sa makahalangkat kag mapuslanon nga mga butang nga inyo mahimo. Ginsiling anay ni Jehova: “Ang akon pinili makabenepisyo sing daku sa hinimuan sang ila mga kamot.”​—⁠Isaias 65:⁠22.

¹⁷ Subong man, ginasiling sang Biblia nga sa katamnan sang Eden ang pagkaon sang mga kasapatan amo ang ulutanon. (Genesis 1:30) Gani, mahimo ninyo paabuton ang mga pagpasibu nga himuon sang Dios agod nga ang mga kasapatan indi na mangin mapintas kag makatalagam;  mangin mahidaiton na sila sa isa kag isa kag sa mga tawo. Ang mga bata kag mga tigulang malipay sing bug-os sa pagpakig-upod sa ila.​—⁠Ipaanggid ang Isaias 11:​6-8; 65:25; Oseas 2:18.

¹⁸ Apang wala ginalaragway sang Biblia sing detalyado ang tanan nga materyal nga pagpakamaayo sa bag-ong kalibutan. Nahibaluan ni Jehova, nga aton Manunuga, kon ano ang kinahanglanon naton. Amo sini ang ginapasalig sa aton sang Biblia nahanungod sa Dios: “Ginahumlad mo ang imo kamot kag ginapaayawan ang luyag sang tagsa ka buhi nga butang.”​—⁠Salmo 145:⁠16.

¹⁹ Nagakaigo nga ginapadaku sang Kasulatan, indi ang materyal nga kabuganaan ukon mga pagpakamaayo, kundi ang espirituwal kag mental nga mga butang nga magahatag sing kalipay sa ginpasag-uli nga paraiso.  Halimbawa, mapaabot naton ang mga kahimtangan nga ginlaragway sing subong sini:

 “Ang binuhatan sang pagkamatarong mangin paghidait; kag ang patubas sang katarungan, kalinong kag pagkalig-on nga dayon. Kag ang akon katawhan magapabilin sa puluy-an nga makidaiton kag sa mga puluy-an nga malig-on kag sa mga palahuwayan nga malinong.”​—⁠Isaias 32:17, 18.

²⁰ Mahangpan naton nga bisan pa may maayo kita nga panglawas, matahom nga puluy-an kag bugana nga pagkaon, indi kita mangin kontento gid kon ginapalibutan kita sang inaway, kahuol, hisaay kag kasingkal. (Hulubaton 15:17; 21:⁠9) Walay sapayan, ang mga tawo nga tugutan sang Dios nga magkabuhi sa nagapakari nga paraiso amo ang hanuot nga nagapanikasog sa paglandas sina nga mga kakulangan sang tawo. Magahuman sila sing bug-os kalibutan nga pamilya sang mga Cristiano nga nagapalambo sing mga bunga sang espiritu sang Dios, subong sang gugma, paghidait, kalulo kag pagpugong sa kaugalingon. (Galacia 5:​19-23) Panikasugan nila sing hanuot nga matigayon ang personalidad nga nagahisanto sa personalidad sang Dios.​—⁠Efeso 4:​22-24.

Pagkabuhi Agod Pahamut-an kag Dayawon si Jehova

²¹ Ang gintagna nga materyal kag espirituwal nga pagpakamaayo nagahatag sa aton sing rason nga hulaton ang bag-ong kalibutan. Walay sapayan, kon amo sini ang himuon naton nga nahauna nga rason sa pagsimba sa Dios kag pagkabuhi subong Cristiano, wala kita sing kinaliwan sa karon nga rasa nga wala sing ginauna kundi ang kaugalingon kag nagakabalaka lamang sa kon ano ang ila luyag kag maagom.

²² Sa baylo, dapat naton palambuon ang handum nga magkabuhi subong Cristiano​—⁠sa karon kag sa palaabuton​—⁠bangod luyag sang Dios nga himuon naton ini. Dapat nga sia ang mauna, indi kita. Ginapakita ni Jesus ang panimuot nga kinahanglan naton, nga nagasiling: “Nagkari ako . . . agod himuon ang imo kabubut-on, O Dios,” kag, “Ang akon pagkaon amo  ang paghimo sang kabubut-on niya nga nagpadala sa akon kag tapuson ang iya buluhaton.” (Hebreo 10:7; Juan 4:34) Ang pag-apresyar sa ginhimo sang Dios dapat nga magapahulag sa aton nga unahon sia pirme.​—⁠Roma 5:⁠8.

²³ Nagakaigo lamang nga wala ginapadaku sa Biblia ang kaluwasan kag pagpakamaayo nga maagom naton subong amo ang pinakaimportante. Sa baylo, ginapadaku sini ang pagbindikar sa ngalan sang Dios kag ang pagkanagakaigo nga dayawon naton ang Dios bangod sa kon ano sia kag kon ano ang nahimo niya. Si David nagsulat:

 “Dayawon ko ikaw, Dios nakon nga Hari, kag pakamaayuhon ko ang imo ngalan sa gihapon kag sa gihapon. Daku si Jehova kag dayawon sing daku kag ang iya pagkadaku dimatungkad. Sang mahimayaon nga pagkari sang imo kadungganan kag sang imo makatilingala nga mga binuhatan, magapamalandong ako.”​—⁠Salmo 145:​1, 3, 5.

²⁴ Ang pag-una sa Dios kag ang aktibo nga pagdayaw sa iya nangin nagakaigo para kay Jesus kag kay David. Kag nagakaigo man ini para sa aton. Kon itingob naton ini sa praktikal nga Cristianong paagi sang pagkabuhi, kon amo matigayon naton ang kalipay​—⁠karon kag sa walay katapusan nga palaabuton.

[Mga Pamangkot sa Pagtinuon]

Ngaa ang paghimo sang mga butang sa paagi sang Dios amo ang labing maayo nga paagi agod matigayon ang kalipay? (1-3)

Ngaa dapat kita mamat-od kon bala luyag naton mangin abyan sang kalibutan ukon sang Dios? (4-6)

Sa ano nga paagi mapakita sang isa kon bala luyag niya mangin abyan sang kalibutan? (7, 8)

Daw ano ka importante para sa aton ang mamat-od kon ano gid ang luyag naton? (9-12)

Anong sahi sang kabuhi ang iaman sang Dios sa bag-ong kahimusan? (13-18)

Ano ang importante pa nga mga pagpakamaayo ang ginsaad para sa ginpasag-uli nga paraiso? (19, 20)

Paano kita makatigayon sing matuod nga kalipay? (21-24)