Kapitulo 16

Isa ka Panguluhan nga Magadala sing Paghidait sa Bug-os nga Duta

 May panguluhan bala nga makadala sing walay katapusan nga paghidait sa duta? nga makaaman sing kalig-unan kag kahilwayan sa krimen? nga makatanyag sang bugana kag manamit nga pagkaon sa tanan? nga makatinlo sa palibot kag makalandas sa balatian?

² Binagbinaga ang nahimo sang tawo sa patag sang gobierno​—⁠mga monarkiya, demokrasya kag sosyalistiko ukon Komunista nga mga panguluhan. Wala man sing isa sa sini, ni ang tanan sa ila kon tingbon, ang nakahimo sang maayo nga mga butang nga bag-o lang masambit; bisan sa diutay nga kasangkaron lamang, indi na pagsilingon pa ang sa bug-os nga duta. Walay sapayan, may rason kamo nga maglaum.

 Ginatuyo sang Dios ang Isa ka Panguluhan—Ang Ginharian

³ Si Jehova nga Dios mismo nanaad nga ihatag niya ang aton kinahanglanon. Paano naton mapat-od ina? Tandai nga sang una gintuyo niya nga may tugob-globo nga paraiso nga sa sini ang mga tawo makaagom sing paghidait kag kalipay. (Genesis 1:​28; 2:​8, 9) Apang natabo ang pagrebelde sa katamnan sang Eden. Apang sa banta bala ninyo pahanugutan sang Dios nga paslawon sang dimainapresyaron nga mga tawo ang iya katuyuan? Indi gid. Sa katunayan, pagkatapos mismo nga magrebelde sanday Adan kag Eva, gintagna ni Jehova ang nagapakari nga manunubos, isa ka “binhi” nga magadugmok sa mga nagakuha sang paghidait sa langit kag sa duta. (Genesis 3:15) ‘Apang,’ isiling ninyo, ‘diin nagasulod diri ang “panguluhan”?’ Ina nga “binhi” amo ang Mesias, ang Prinsipe sang Paghidait, nga nahanungod sa iya gin-inspirar si manalagna Isaias nga magsulat: “Indi matapos ang kabuganaan sang [iya] prinsipenhon nga paggahom kag ang paghidait.”​—⁠Isaias 9:​6, 7; 11:​1-5.

⁴ Huo, nanaad si Jehova sing isa ka gobierno nga magapatuman sang katarungan kag magadala sing paghidait. Ginapatuhuyan sang Biblia ini nga panguluhan subong ang ginharian sang Dios. Minilyonmilyon ang nagapangamuyo: “Amay namon . . . pakariha ang imo ginharian.” (Mateo 6:​9, 10) Kon ginasambit mo ini nga pangamuyo, ginapangamuyo ninyo ang isa ka matuod nga gobierno​—⁠ang langitnon nga ginharian​—⁠nga magadala sing paghidait sa duta. (Salmo 72:​1-8) Apang san-o papanghikuton sang Dios ina nga panguluhan? Paano niya pilion kag hanason ang mga manuggahom sini?

⁵ Sa sulod sang mga siniglo ginpahibalo ang katuyuan sang Dios. Halimbawa, ginpakita niya nga ang Mesias magaabot paagi kay Abraham, paagi kay Jacob, kag magahalin sa tribo sang Juda. (Genesis 22:​18; 49:10) Pagkatapos gintukod ni Jehova sa Israel ang isa ka ginharian nga isa ka matagnaon nga talaksan sang mga butang nga magaabot. Ang Israel isa ka teokrasya (pagdumala sang Dios).  Ang ila hari ginasiling nga nagalingkod sa “trono ni Jehova.” (1 Cronica 29:23) Si Jehova amo ang labing mataas nga awtoridad; ang iya mga kasuguan kag mga talaksan nagatuytoy sa pungsod. Pag-abot sang panahon, ginsiling sang Dios kay Hari David nga paagi sa iya panimalay magahalin ang isa nga mangin permanente nga hari.​—⁠Salmo 89:​20, 21, 29.

⁶ Ina nga mga detalye kag ang iban pa nga impormasyon sa Biblia nahanungod sa maragtas sang Israel importante bangod ginapakita sini sa aton nga ang Dios nagpasad sing isa ka malig-on kag legal nga sadsaran para sa nagapakari nga ginharian. Nahisuno sa sini, sang ulihi ginpadala sang Dios ang isa ka manugtunda sa isa ka ulay sa panimalay ni David agod isiling sa iya:

 “Ikaw . . . magaanak sing isa ka lapsag nga lalaki, kag tawgon mo ang iya ngalan nga Jesus. Sia mangin daku kag pagatawgon nga Anak sang Labing Mataas; kag ihatag sa iya ni Jehova nga Dios ang trono ni David nga iya amay, kag magagahom sia subong hari sa panimalay ni Jacob sing dayon, kag indi matapos ang iya ginharian.”​—⁠Lucas 1:​28-33.

⁷ Amo ini ang gintagna nga Mesias, ang ginsaaran sang Dios nga hatagan sang walay katapusan nga pagginahom sa katawhan. Ano ang mapaabot naton kay Jesus subong manuggahom? Usisaon naton ang pila sang iya rekord.

⁸ Si Jesus lubos nga debotado sa Dios kag sa pagtuman sang Iya kabubut-on. (Hebreo 10:​9; Isaias 11:3) Ang isa ka paagi nga ginpakita niya ang iya katutom sa Dios amo ang paagi sa pagdumili sa mga hamham nga manggad ukon kabantugan, nga kabaliskaran sang ginahimo sang madamong nagagahom nga mga tawo. (Lucas 4:​5-8) Wala sia sing kahadlok sa pagsakdag sa kamatuoran, gani wala sia mag-isol sa pagbuyagyag sa relihioso nga pagkasalimpapaw.​—⁠Juan 2:​13-17; Marcos 7:​1-13.

⁹ May talalupangdon man nga gugma si Cristo sa katawhan, subong ginpasundayag sang katunayan nga ginhatag niya ang iya kabuhi para sa aton. (Juan 13:​34; 15:​12, 13)  Ginpahulag sang kaluoy, gin-ayo ni Jesus ang mga balatianon, ginbanhaw ang mga patay kag nag-aman sing pagkaon sa mga imol. (Lucas 7:​11-15, 22; 9:​11-17) May ikasarang man sia batok sa puwersa sang kinaugali kag gingamit ini sa kaayuhan sang tawo. (Mateo 8:​23-27) Apang madali sia palapitan; bisan ang mga bata komportable kaayo sa sining malum-ok sing panimuot nga tawo.​—⁠Mateo 11:​28-30; 19:​13-15.

¹⁰ Handurawa ang pagpakamaayo nga matigayon ang kasubong niya nga Manuggahom, upod ang iya mga kinaiya kag mga ikasarang! Amo ina ang daku nga paglaum sang mga sumilimba ni Jehova.

Pagginahom Gikan sa Langit

¹¹ Sang ginpamangkot si Jesus sang isa ka Romanong gobernador nahanungod sa iya pagginahom, nagsabat sia: “Ang akon ginharian indi bahin sining kalibutan.” (Juan 18:36) Si Jesus nagpabilin gid nga neutral kon nahanungod sa politika sang mga pungsod, nagpakita sing halimbawa sa iya mga sumulunod. (Juan 6:​15; 2 Corinto 5:20) Dugang pa, indi katuyuan sang Dios nga ang iya Anak maggahom gikan sa isa ka duog sa duta. Sia magagahom gikan sa langit, diin magamit niya ang labaw sa tawo, unibersal nga awtoridad.

¹² Pasad sa sinang paglaum, pagkatapos mapatay nga matutom sa Dios, si Jesus ginbanhaw sang iya Amay subong isa ka dimamalatyon nga espirituhanon nga tinuga. (Binuhatan 10:​39-43; 1 Corinto 15:45) Nagpakita si Cristo sa iya mga sumulunod kag ginpamatud-an sa ila nga buhi sia kag aktibo. Nian nagkayab si Jesus sa langit. Tuhoy sini, si apostol Pedro nagsulat: “Yara sia sa tuo nga kamot sang Dios, bangod nagkadto sia sa langit; kag ginpasakop sa iya ang mga manugtunda kag mga awtoridad kag mga kagamhanan.”​—⁠1 Pedro 3:​22; Mateo 28:⁠18.

 ¹³ Kutob sadto, sang 33 C.⁠E., nagsugod si Cristo sa paggahom sa Cristianong kongregasyon, kag bug-os kalipay nga ginkilala sang iya mga sumulunod ang iya pagkaginuo kag langitnon nga katungdanan. (Colosas 1:​13, 14) Apang indi katuyuan sang Dios para kay Jesus nga maggahom sadto sa bug-os nga kalibutan sang katawhan kag sa bug-os nga uniberso.

¹⁴ Ginhatagan sang Dios ang tawo sang panahon agod makita nila mismo kon ano ang mga bunga sang paggahom sang tawo. Gani, kinahanglan nga maghulat si Cristo tubtob sa gintangdo nga tion nga ang Ginharian magagahom sa bug-os nga kalibutan. Si apostol Pablo nagsulat: “Ini nga tawo naghalad sing isa ka halad nga sa gihapon tungod sa mga sala kag naglingkod sia sa tuo nga kamot sang Dios, kag sugod sadto naghulat tubtob nga ang iya mga kaaway himuon nga palatungan sang iya mga tiil.”​—⁠Hebreo 10:​12, 13.

¹⁵ Apang kon si Jesus indi makita kag didto sa langit, paano naton mahibaluan kon nag-abot na ang tion sang iya paghari? Subong sang ginhinun-anunan sa nagligad nga kapitulo, naghatag si Jesus sing kitaon nga “tanda” agod mahibaluan sang iya mga sumulunod sa duta nga nag-abot na ang tion. (Mateo 24:​3-31) Ang mga inaway, mga gutom, mga linog, paghingabot sa mga Cristiano kag ang tugob-globo nga pagbantala sang maayong balita sang Ginharian nga aton nasaksihan kutob sang Inaway Kalibutanon I (1914-1918) nagapamatuod nga nagakabuhi kita sa katapusan sining sistema sang mga butang. Ginapamatud-an man sining mga hitabo nga si Cristo nagagahom na karon sa langit, bangod, pagkatapos malaragway ang isa ka inaway sa langit batok kay Satanas, amo sini ang ginasiling sang Biblia:

 “Karon nag-abot ang kaluwasan kag ang kagamhanan kag ang ginharian sang aton Dios kag ang awtoridad sang iya Cristo. . . . Bangod sini magkalipay kamo, mga langit kag kamo nga nagapuyo didto! Kailo sa duta kag sa dagat, bangod ang Yawa nanaug sa inyo, nga may daku nga kaakig, nakahibalo nga malip-ot na lamang ang iya tion.”​—⁠Bugna 12:​7-12.

¹⁶ Busa, si Jesucristo nagagahom na.  Nagakahulugan ini nga “malip-ot na lamang nga tion” ang nabilin bag-o niya gamiton ang iya pagginahom agod laglagon ang tanan nga nagapamatok sa Ginharian, lakip ang Yawa kag ang tanan himo-tawo nga mga panguluhan. (Daniel 2:44) Nian magakalipay kita sa isa ka teokratiko nga ginharian nga magadala sing walay katapusan nga paghidait.

Mga Kaupod nga Gumalahom sa Ginharian

¹⁷ Ang isa pa ka makagalanyat nga kinaiya sang Ginharian ginapakita sang Biblia. Ginalaragway sa aton sang Daniel 7:​13, 14 ang pagbaton sang Anak sang Dios sing “pagginahom kag kadungganan kag sang ginharian.” Nian amo sini ang ginasiling sang palanan-awon:

 “Ang ginharian kag ang pagginahom kag ang kadungganan sang ginharian sa idalom sang bug-os nga langit ginhatag sa mga tawo nga mga balaan sang Isa nga Supremo. Ang ila ginharian walay katubtuban nga ginharian, kag ang tanan nga pagginahom magaalagad kag magatuman sa ila.”​—⁠Daniel 7:⁠27.

 Gani gintuyo sang Dios nga si Jesucristo may kaupod nga mga gumalahom. Nagakahulugan ina nga may mga tawo nga magakadto sa langit. Sang yari pa si Jesus sa duta ginsugdan niya ang pagpili sa mga lalaki kag babayi nga mangin kaupod niya nga magakadto sa langit agod handaan sila sing hulot.​—⁠Juan 14:​1-3.

¹⁸ Nagabulig ini agod athagon ang isa ka butang nga indi mahangpan sang madamo walay sapayan nga bug-os kabuhi sila nga nagasimba: Sa isa ka bahin, ginapakita sang Biblia nga tuyo sang Dios nga ang tawo mabuhi sa duta; apang, sa pihak nga bahin, ginasiling sang Biblia nga may mga tawo nga magakadto sa langit. Paano ini natabo? Buweno, nanaad ang Dios nga dalhon niya ang iban nga tawo sa langit agod mangin kaupod sang iya Anak sa panguluhan sang Ginharian. Apang ang duta mangin isa ka paraiso nga puno sang malipayon, mahidaiton nga mga tawo.​—⁠Tan-awa ang Salmo 37:​29; Isaias 65:​17, 20-25.

 ¹⁹ Pila ang magakadto sa langit subong bahin sang panguluhan sang Ginharian? Naghatag sing ideya si Jesus, nga nagasiling: “Indi magkahadlok, diutay nga panong, bangod nahamuot ang inyo Amay sa paghatag sa inyo sang ginharian.” (Lucas 12:32) Huo, limitado ang kadamuon. Ginapakita sang Bugna nga yadtong “mga ginbakal gikan sa katawhan” agod maghari kaupod sang “Kordero” (si Jesucristo) may kadamuon nga 144,000. (Bugna 14:​1-5) Indi ina mabudlay hangpon. Bisan ang pila ka panguluhan sang tawo may pinili nga grupo sang mga lalaki kag babayi nga yara sa kapital subong bahin sang gobierno.

²⁰ Wala gintugot sang Dios nga ang tawo ang mamat-od kon sin-o ang magakadto sa langit. Sia ang nagapili sa ila. (1 Pedro 2:​4, 5, 9; Roma 8:​28-30; 9:16) Sang ginpili sang Dios si apostol Pablo, ginhaplasan niya sia sang balaan nga espiritu, naghatag kay Pablo sing kasiguruhan nga mangin bahin sia sang “langitnon nga ginharian.” (2 Timoteo 4:18) Si Pablo nagsulat: “Ang espiritu mismo nagapanaksi kaupod sa aton espiritu nga mga anak kita sang Dios. Gani, kon kita mga anak, kita man mga manunubli: manunubli gid sang Dios, apang kaupod man nga manunubli ni Cristo.”​—⁠Roma 8:​16, 17; 2 Corinto 1:​22; 5:⁠5.

²¹ Diutay lamang nga bahin sang mga nagasimba sa Dios ang napilian para sa kabuhi sa langit, sanglit ang katuyuan sang Dios amo nga magkabuhi ang mga tawo nga malipayon sa duta. Si Jesus ang una nga ginadala sa langit. (Hebreo 6:​19, 20; Mateo 11:11) Sugod sadto ang Dios nagpadayon sa pagpili sang 144,000 nga iban. Ano ang matabo kon makompleto na ina nga kadamuon?

²² Pagkatapos makabaton sing palanan-awon nahanungod sa limitado nga kadamuon (144,000) nga makaupod ni Cristo sa langit, ginpakita kay apostol Juan ang “isa ka dakung kadam-an, nga indi maisip sang bisan sin-o nga tawo.” (Bugna 7:​4, 9, 10) Pagaamligan sila sang Dios sa malaglagon nga katapusan sang karon nga sistema sang mga butang.  May matahom sila nga paglaum nga mabuhi sing walay katapusan sa duta, nga amo man ang paglaum sang mga lalaki nga may pagtuo katulad nanday Noe, Abraham kag David, nga nagkalamatay bag-o ginbuksan sang Dios ang dalan sa langitnon nga kabuhi para sa 144,000.​—⁠Binuhatan 2:⁠34.

Mga Rason sa Pagsalig sa mga Gumalahom

²³ Ang kalabanan nga mga tawo sa karon wala sing pagsalig sa mga nagagahom sa ila. Walay sapayan, ang mga magagahom sa ginharian sang Dios tuhay gid sa mga kalibutanon nga mga gumalahom. Sa sulod sang mga siglo nagpili ang Dios sang mga tawo nga natilawan ang pagtuo. Sa idalom sang lainlain nga pagtilaw kag pagsulay, nagpabilin sila sa mga butang nga matarong kag makatarunganon. Natigayon nila ang pagsalig sang Dios, gani indi man bala naton sila masaligan?

²⁴ Subong man, bangod nangin tawo, mangin mas mahangpunon kag mahinuklugon sila sa aton. (Ipaanggid ang Hebreo 4:​15, 16.) Nahibaluan nila kon daw ano kabudlay ang kapuyon, mabalaka, maluyahan sing buot. Nahibaluan nila kon daw ano nga panikasog ang kinahanglanon agod mangin labi nga mabinatason, mabuot kag maluluy-on. Kag ang iban sa ila mga babayi; nahangpan nila ang mga balatyagon kag pinasahi nga mga kinahanglanon sang mga babayi sa duta.​—⁠Galacia 3:⁠28.

²⁵ Minilyon sang mga Saksi ni Jehova karon ang nagapamatuod sang ila pagsalig kay Cristo kag sa iya mga kaupod nga gumalahom, kag ginapakita kon daw ano ka matuod ang Ginharian para sa ila. Ginahimo nila ini paagi sa pagpabilin nga matutom nga mga sakop sang ginharian sang Dios. (Hulubaton 14:28) Ginabaton kag ginarekomendar nila ang mga kasuguan sini nga nasulat sa Biblia, hanuot nga nagapati nga ang Cristianismo amo ang labing maayo nga dalanon sang pagkabuhi.  Nagapakigbahin sila sa edukasyunal nga programa sining panguluhan. Ang Biblia amo ang panguna nga tulun-an, nga ginagamit kaupod sang iban pa Cristianong mga reperensia kag mga bulig sa pagtuon. Sa mga miting sang kongregasyon natun-an nila sing labi pa ang nahanungod sa Ginharian kag sa Cristianong pagkabuhi. Kag ginapalab-ot nila sa iban ang edukasyonal nga programa paagi sa pagtudlo sing dayag kag sa mga puluy-an.​—⁠Binuhatan 20:⁠20.

²⁶ Ginsiling ni Jesus nga ang isa ka bahin sang tanda sang “katapusan nga mga adlaw” amo: “ining maayong balita sang Ginharian ibantala sa bug-os napuy-an nga duta nga panaksi sa tanan nga kapungsuran; kag ugaling magaabot ang katapusan.” (Mateo 24:14) Antes magkayab sa langit ginpadaku ni Jesus ang kinahanglanon para sa iya mga disipulo nga makigbahin sing aktibo sa sining hilikuton sa pag-ebanghelyo.​—⁠Mateo 28:​19, 20; Binuhatan 1:⁠8.

²⁷ Narealisar sang mga Cristiano karon nga ang pagpakigbahin sa hilikuton nga pagbantala kag pagtudlo amo ang isa ka importante nga paagi agod mapakita nila ang ila gugma sa Dios kag sa isigkatawo. (Marcos 12:​28-31) Nadalahig ang mga kabuhi, gani serioso ini nga katungdanan. (Binuhatan 20:​26, 27; 1 Corinto 9:16) Amo man ini ang ginahalinan sang daku nga kalipay kag kaayawan. (Binuhatan 20:35) Ang mga Saksi ni Jehova nalipay nga buligan kamo sa inyo pagtudlo sa iban nahanungod sa nagagahom nga Ginharian sang Dios.

[Mga Pamangkot sa Pagtinuon]

Anong halandumon nga mga bagay ang wala mahimo sang mga panguluhan sang tawo? (1, 2)

Paano naton mahibaluan nga gintuyo sang Dios ang isa ka panguluhan nga magadala sing paghidait? (3, 4)

Anong mga tikang ang ginhimo sang Dios nahanungod sa pagkabun-ag sang Ginharian? (5, 6)

Ngaa makapat-od kita nga si Jesus mangin pinasahi nga manuggahom? (7-10)

Ano ang mga kabangdanan agod mahibaluan nga si Jesus indi magagahom gikan sa duta? (11, 12)

Ano ang pamatuod sa kon san-o magsugod ang paggahom ni Cristo sa katawhan? (13-16)

Sin-o ang makaupod ni Jesus sa paghari sa Ginharian? (17, 18)

Pila ang magakadto sa langit, kag ngaa indi ang bug-os nga katawhan? (19-22)

Ano ang aton rason agod magsalig sa sining kaupod nga mga gumalahom? (23, 24)

Paano naton mapakita ang aton pagsakdag sa Ginharian? (25-27)

[Kahon sa pahina 151]

“Ang kapaslawan sa pagtuga sing matuod nga sadsaran para sa paghidait sang kalibutan . . . direkta nga mabasol sa pagdumili sang mga pungsod, labi na yadtong dalagku, sa pagbaton sa isa ka awtoridad nga makasiling sa ila kon ano ang dapat himuon sa pungsudnon nga arena.

“Kon amo, amo ini ang sadsaran nga hangkat karon​—⁠kon paano makatuga sing isa ka bug-os kalibutan nga awtoridad nga may pagsalig sang mga banwahanon sang kalibutan.”​—⁠Nor­man Cous­ins, editor sang “Saturday Review.”

 [Kahon sa pahina 159]

REALISTIKO TUHOY SA PANGULUHAN

“Ang amon mga hinganiban mga batuta, mga inuglampos nga ginputos sang tingga, mga kadena kag pusil,” panugiron ni Stelvio, nga sang katuigan 1970 isa ka aktibista sa nabagatnan nga Europa. Sa mga tago tulad-militar nga mga kampo nakatuon sia sa pag-organisar sang mga pagsalakay kag sang pagpakig-away sa mga siudad.

Apang pagligad sang pila ka tuig isa ka pagbalhin ang natabo. Isa sa mga Saksi ni Jehova ang nagduaw sa puluy-an ni Stelvio, kag nagtudlo sang Biblia. Ang epekto? “Nabuksan ang akon mata agod makita nga ang nasyonalismo kag ang mga binangig sa politika nagabahinbahin sa mga tawo. Natun-an ko sa Biblia nga ginhimo sang Dios gikan sa isa ka tawo ang tagsa ka pungsod, agod magpuyo sa duta. (Binuhatan 17:26) Ini nga paghibalo isa ka kusog nga nagahiusa. Ginhilway ako sini sa pagkaugot sa iban bangod lamang lain ang ila mga ideya sa politika.”

Gindugang sining masingki anay nga aktibista: “Padayon ko nga ginapamangkot ang akon kaugalingon: Paano malubad sang tawo ang mga palaligban niya paagi sa politika, sanglit ang politika mismo amo ang kabangdanan sang pagbinahinbahin sang katawhan? Nakita ko sa tunga sang mga Saksi ni Jehova ang mga itom kag puti nga ginbawtismuhan sing dulungan sa tubig, ang mga Protestante kag Katoliko anay sa Irlandia wala na nagadumtanay, ang mga Arabo kag mga Judiyo nagtilipon sing tingob sa tion sadtong Anom ka Adlaw nga Inaway. Natun-an ko nga higugmaon yadtong ginakaugtan ko anay.

“Wala sang bisan sin-o ang makasiling nga ang Ginharian sang Dios, nga amo ang ginahandum sang mga Saksi ni Jehova, isa lamang ka damgo, bangod nagaluntad na karon ang isa ka pungsudnon nga komunidad nga nagahiusa sa idalom sina nga ginharian. Ang mga pag-aplikar sa mga prinsipio sang Biblia nagpatubas sang mga bunga nga kutob san-o wala pa matigayon sang bisan anong relihioso, politiko ukon sosyal nga grupo.

“Sa mga nagatinguha nga paluntaron ang katarungan, paghidait kag kahim-ong sosyal, katulad ko man sadto, masiling ko: ‘Mangin realistiko kag batuna nga napaslawan ang tawo sa pagpaluntad sini. Walay sapayan, tan-awa ninyo ang mga Saksi ni Jehova. Indi bala nga nalandas nila ang mga palaligban may kahilabtanan sa inaway, pagbinahinbahin sa politika, pagkamaynadampigan bangod sa duag, paghidait kag paghiusa? Ang mga tawo nagasalig sa mga tawo amo kon ngaa may problema sila. Ang mga Saksi ni Jehova nagapasakop sa ginharian sang Dios amo kon ngaa nalubad nila ang panguna nga mga palaligban sang kabuhi.’ ”