May Maayo Bala sa Tanan nga Relihion?
Kapitulo 18
May Maayo Bala sa Tanan nga Relihion?
Kon ginahambalan ang relihion, madamo ang nagasiling, ‘May maayo sa tanan nga relihion,’ ukon ‘Ang tanan nga relihion lainlain lamang nga dalan pakadto sa Dios.’
2 Madali mahangpan kon ngaa mahimo kita makasapo sing maayo sa halos bisan ano man nga relihion, bangod ang kalabanan nagahambal nahanungod sa gugma kag nagatudlo nga sayop ang pagpatay, pagpangawat kag pagbutig. Nagapadala sing mga misyonero ang mga relihioso nga grupo agod magpatindog sing mga ospital kag buligan ang mga imol. Kag labi na gid sang nagligad nga duha ka siglo nakigbahin sila sa pagbadbad kag sa pagpanagtag sang Biblia, gani dugang pa nga mga tawo karon ang nakabenepisyo sa Pulong sang Dios. (2 Timoteo 3:16) Apang dapat kita mamangkot: Paano ginatamod ni Jehova kag ni Jesucristo ang nanuhaytuhay nga mga relihion?
Ang Husto nga Dalan—Isa ka Makitid nga Dalan
3 Ginakabig sang iban nga nagapati nga may maayo sa tanan nga relihion nga makitid ang panghunahuna sang isa kon nagapati sia nga indi pagbatunon sang Dios ang kalabanan nga tawo bisan ano man ang ila relihion. Apang si Jesus, nga nakahibalo kag nagpabanaag sang panghunahuna sang iya Amay, may lain nga pagtamod. (Juan 1:18; 8:28, 29) Wala sang bisan sin-o sa aton ang magasumbong nga ang Anak sang Dios makitid sing panghunahuna. Binagbinaga ang ginsiling niya sa Sermon sa Bukid:
“Sulod kamo sa gawang nga makitid; kay masangkad ang gawang kag malapad ang dalan, nga nagapadulong sa kalaglagan, kag madamo ang mga nagasulod sa sini; kay makitid ang gawang kag masipot ang dalan nga nagapadulong sa kabuhi, kag pila lamang ang nakatultol sa sini.”—Mateo 7:13, 14.
4 Ano ang kinahanglan agod mangin yara sa makitid nga dalan kag maagom ang kahamuot sang Dios? Ang iban, nahisuno sa modernong liberal ukon ekumenikal nga pagtamod, nagasabat: ‘Basta maghimo ka sing maayo kag indi paghaliti ang iban,’ ukon, ‘Kinahanglan lamang nga batunon si Jesus subong imo Ginuo.’ Apang ginsiling ni Jesus nga kapin pa ang kinahanglanon:
“Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang langit, kundi ang NAGAHIMO SANG KABUBUT-ON SANG AKON AMAY nga yara sa langit. Madamo ang magasiling sa akon sadtong adlaw, ‘Ginuo, Ginuo, wala bala kami . . . maghimo sing madamong mga buhat nga gamhanan sa imo ngalan?’ Kag nian pahayagan ko sila: Wala gid ako makakilala sa inyo! Palayo sa akon, kamo nga mga manugbuhat sing kalautan.”—Mateo 7:21-23.
5 Matuod nga naglaygay si Jesus batok sa paghukom sa diutay nga pagsayop sang iban. (Mateo 7:3-5; Roma 14:1-4) Apang tuhoy sa importante nga butang sang relihion, naghatag sia sing halimbawa nga dapat sundon ang Biblia, kag himuon ang kabubut-on sang Amay. Ginpakamalaut ni Jesus ang mga buhat kag panudlo nga supak sa Pulong sang Dios. Ngaa? Bangod nahibaluan niya nga ginagamit ni Satanas ang relihion agod sulayon ang mga tawo. (2 Corinto 4:4) Si Satanas nagagamit sing kabutigan sa iya pagpanghikot, apang ginapresentar ini sa makagalanyat nga paagi. (Genesis 3:4, 5; 1 Timoteo 4:1-3) Bisan sa tunga sang nagapangangkon nga mga Cristiano may mga lider sang relihion nga nagapangalagad sa mga handum sang Yawa. (2 Corinto 11:13-15) Ang ila mga panudlo nagapatiko sa mahigugmaon kag maawaon nga mga paagi ni Jehova. Makatilingala bala, nian, nga ginbuyagyag ni Jesus ang mga lider sang relihion nga nagpanudlo sing supak sa kasulatan?—Mateo 15:1-20; 23:1-38.
6 Madamo nga tawo ang daw nagpanubli lang sang ila relihion. Ang iban nagaupod-upod lamang sa kon ano ang relihion sang kalabanan sa palibot nila. Apang bisan pa ginahimo ini sing sinsero, makapahamtang ini sa isa sa ‘malapad nga dalan nga nagapadulong sa kalaglagan.’ (Juan 16:2; Hulubaton 16:25) Si apostol Pablo (nga gintawag man nga Saulo) makugi anay sa iya relihion tubtob sa punto nga ginhingabot niya ang mga Cristiano. Apang agod mangin kalahamut-an sa Dios, dapat sia magbag-o padulong sa isa ka bag-ong paagi sang pagsimba. (1 Timoteo 1:12-16; Binuhatan 8:1-3; 9:1, 2) Sang ulihi, gin-inspirar sia sa pagsulat nga ang pila ka relihioso gid nga mga tawo sadto may “kakugi para sa Dios; apang indi suno sa sibu nga ihibalo.” (Roma 10:2) May yara bala kamo sing sibu nga ihibalo nahanungod sa kabubut-on sang Dios nga yara sa Biblia? Nagahulag bala kamo nahisuno sa sini?
7 Dili ini pagpasapayani, ayhan nagadumdom nga bisan pa wala kamo sa husto nga banas mangin mahinangpanon ang Dios bisan pa indi kamo maghimo sing mga pagbag-o. Ginasiling sang Kasulatan nga kabubut-on sang Dios nga ang tawo “magadangat sa sibu nga ihibalo sang kamatuoran,” kag magkabuhi nahisuno sa sini. (1 Timoteo 2:3, 4; Santiago 4:17) Gintagna sang Dios nga sa “katapusan nga mga adlaw” madamo nga tawo ang ‘may dagway sang diosnon nga debosyon apang nagapanghiwala sang gahom sini.’ Nagmando sia: “Likawi ang subong nga mga tawo.”—2 Timoteo 3:1-5.
Paano Ninyo Mahibaluan?
8 Walay sapayan nga ang pagsimba nga kalahamut-an sa Dios dapat nga nahisuno sa “sibu nga ihibalo,” ginapakita sang pag-usisa nga kalabanan sang mga iglesia nagatudlo sing mga doktrina nga supak sa Biblia. (Roma 10:2) Halimbawa, nagapati sila sa dimakasulatanhon nga doktrina nga ang tawo may dimamalatyon nga kalag. (Ezequiel 18:4, 20; tan-awa ang pahina 115 sang libro nga Happiness.) ‘Malain gid bala ina nga panudlo?’ mahimo ipalibog sang iban. Indi pagkalimti nga ang una nga binutig ni Satanas amo nga ang sala indi magaresulta sa kamatayon. (Genesis 3:1-4) Bisan pa nga ang kamatayon indi karon malikawan, ang panudlo nga ang tawo may dimamalatyon nga kalag daw nagasakdag sa kabutigan ni Satanas. Gindul-ong sini ang minilyon ka tawo pakadto sa makahaladlok nga pagpakig-angot sa demonyo nga nagapakunokuno nga kalag sang napatay. Kag ginapakawalay pulos sini nga panudlo ang kamatuoran sang Biblia nahanungod sa palaabuton nga pagkabanhaw.—Binuhatan 24:15.
9 Nadalahig man ang paggawi, bangod madamo nga relihion ang nagasaulog ukon nagapalig-on sang mga kapiestahan kag mga kinabatasan nga pasad sa pagpati sa pagkadimamalatyon sang kalag. Ang subong sini nga mga kapiestahan amo ang Halloween, ang Piesta Minatay kag iban pa, nga nagasamo sing mga buhat nga ginkuha sa di-Cristiano nga mga relihion.
10 Ang pagsamo sa di-Cristiano kag sa ginapatihan nga Cristianong relihion makita man sa iban pa nga kapiestahan, subong sang Paskuwa. Ginsugo sang Dios ang mga Cristiano nga saulugon ang kamatayon ni Jesus, indi ang iya pagkatawo. (1 Corinto 11:24-26) Kag ginapakita sang Biblia nga si Jesus wala ginbun-ag sang Disiembre, nga isa ka matugnaw kag maulanon nga panahon sa Israel. (Lucas 2:8-11) Mahimo ninyo usisaon ang bisan ano nga insiklopedia kag makita ninyo nga ang Disiembre 25 ginpili bangod isa na ini ka Romano nga kapiestahan. Si Sir James Frazer nagkomento:
“Sa kabilugan, ang pag-anggid sang [Paskuwa kag Easter] sa paganong mga kapiestahan tuman kalapit kag tuman kadamo nga indi masiling nga natabuan lamang ini. . . . Nahangpan sang [mga klero] nga agod madaug sang Cristianismo ang kalibutan halugan lamang sini ang tuman ka estrikto nga mga prinsipio sang Tagtukod sini, paagi sa pagpasangkad diutay sa gawang padulong sa kaluwasan.”—The Golden Bough.
11 Sa tapos niya matun-an ang kamatuoran, sin-o nga tawo nga nagahigugma sing sinsero kay Jehova ang padayon nga magabaton sa mga pagpati kag mga buhat nga napasad sa pagkompromiso sa pagano nga pagsimba? Para sa iban nga mga tawo, ini nga mga panudlo ukon mga buhat mahimo nga daw diutay lamang nga mga butang. Apang maathag nga nagasiling ang Biblia: “Ang diutay nga lebadura nagapakumbo sa bug-os nga linamas.”—Galacia 5:9.
Inaway kag Moralidad
12 Ginsambit ni Jesucristo ang isa pa ka bulig agod makilala ang relihion nga kalahamut-an kay Jehova sang magsiling sia sa iya mga alagad: “Paagi sini makilala sang tanan nga mga disipulo ko kamo, kon kamo nagahigugmaanay sa isa kag isa.” (Juan 13:34, 35) Kalabanan nga mga iglesia nagahambal nahanungod sa pagpakita sing gugma, apang tunay bala nga ginapadaku nila ang pagpakita sang sahi sang gugma nga ginpakita ni Jesus?
13 Nakita na naton kon paano ang mga Cristiano sang unang mga siglo nagkabuhi nahisuno sa matagnaon nga paglaragway sa Isaias 2:4. Ila ‘ginsalsal nga mga punta sang arado ang ila mga espada kag wala na sing magbayaw sing espada batok sa isa kag isa ukon magtuon sing inaway.’ (Tan-awa ang pahina 166, 167 sa libro nga Happiness.) Ano nga tindog ang ginpili sang mga simbahan kag sang klero? Pasad sa personal nga eksperiensia nahibaluan sang madamo kon paano ang mga simbahan nag-ugyon kag nagbulahan sa inaway—ang mga Katoliko nagpatay sa Katoliko, mga Protestante sa Protestante. Indi gid ini pagsunod sa huwaran nga ginbilin ni Jesus. Sing makatilingala, gin-aprobahan sang Judiyo nga mga relihiosong lider ang pagpatay kay Jesus kay nadalahig kuno ang kaayuhan sang pungsod.—Juan 11:47-50; 15:17-19; 18:36.
14 Subong dugang pa nga bulig sa pagpat-od kon bala ang isa ka relihioso nga grupo ginakahamut-an sang Dios, binagbinaga kon bala ginasakdag sini ang iya mga talaksan sa moral sa baylo nga pasapayanan lamang ang paghimo sing mga sala. Gintinguhaan ni Jesus nga buligan ang mga tawo nga ulipon sang sala, lakip na ang mga palahubog kag mga bigaon. Dapat man ini himuon sang iya mga disipulo. (Mateo 9:10-13; 21:31, 32; Lucas 7:36-48; 15:1-32) Kon ang isa ka tawo nga nangin Cristiano na nakasala, mabuligan sia sang iban nga mga Cristiano, nga magatinguha nga ipasag-uli sia sa kahamuot sang Dios kag sa espirituwal nga kusog. (Galacia 6:1; Santiago 5:13-16) Apang ano kon ang isa ka tawo dimahinulsulon nga nagapadayon sa paghimo sing sala?
15 Amo sina ang natabo sa isa ka tawo anay nga taga-Corinto. Nagsulat si Pablo:
“Dili kamo magpakig-upod sa bisan kay sin-o nga ginhingalanan nga utod kon sia makihilawason ukon mahamkunon ukon diwatahan ukon mapasipalahon ukon palahubog ukon malugos, bisan sa pagkaon dili kamo magpakig-upod sa iya. . . . ‘Isikway ninyo ang tawo nga malaut sa tunga ninyo.’ ”—1 Corinto 5:11-13.
Ginasunod sang mga Saksi ni Jehova ang sugo sang Dios sa sini nga bagay. Kon ang isa nga nakasala sing daku indi magbaton sing bulig kag indi magbiya sa iya imoral nga dalanon, dapat paguwaon ukon sikwayon ina nga tawo gikan sa kongregasyon. Ayhan magapamaradmad ini sa iya. Apang, matabo man ini ukon indi, ini nga tikang magaamlig sa sinsero nga mga katapo sang kongregasyon nga, bisan pa dihimpit, nagatinguha sa pagsunod sa mga talaksan sang Dios.—1 Corinto 5:1-8; 2 Juan 9-11.
16 Ayhan may kilala kamo nga mga palasimba apang dayag nga nagahimo sing sala, kag ayhan nagabaton pa sing pinasahi nga kadungganan sa simbahan bangod sang ila manggad ukon kabantugan. Bangod sa indi pagsunod sa sugo sang Dios nga paguwaon ang indi mahinulsulon nga mga makasasala, ginapahunahuna sang mga simbahan ang iban nga puede man sila magpakasala. (Manugwali 8:11; 1 Corinto 15:33) Indi mahimo nga kahamut-an sang Dios ang mga nagapatubas sina nga bunga.—Mateo 7:15-20; Bugna 18:4-8.
Pagpabilin sa Dalan Padulong sa Kabuhi
17 Kon masapwan na ang “dalan padulong sa kabuhi,” kinahanglan nga magpadayon kamo sa pagtuon sang Biblia agod makapabilin diri. Tinguhai nga basaha ang Biblia adlaw-adlaw; palambua ang kalangkag sa sini. (1 Pedro 2:2, 3; Mateo 4:4) Sangkapan kamo sini para sa “tagsa ka maayo nga buhat.”—2 Timoteo 3:16, 17.
18 Kaupod sa maayo nga mga buhat amo ang pagkabuhi suno sa talaksan sa moral sang Dios, lakip ang pagkamaluluy-on kag pagkamabuligon sa iban, labi na sa mga kauturan naton sa pagtuo. (Santiago 1:27; Galacia 6:9, 10) Amo sini ang ginhimo ni Jesus. Luwas sa paghatag sing isa ka maayo nga huwaran sa moral, gin-ayo niya ang masakiton, ginpakaon ang ginagutom kag ginpahalipay ang mga nagakasubo. Labi na nga gintudluan kag ginpabakod niya ang iya mga disipulo. Bisan pa indi naton mailog ang iya mga milagro, mahimo naton, suno sa masarangan naton, mahatagan sing praktikal nga bulig ang iban, nga mahimo magapahulag sa iban sa paghimaya sa Dios.—1 Pedro 2:12.
19 Apang ang maayo nga buhat ni Jesus nagadalahig sing kapin pa. Nahibaluan niya nga ang labing maayo nga buhat amo ang pagbulig sa iban nga mahibaluan kon ano nga pagsimba ang kalahamut-an sa Dios kag tudluan sila nahanungod sa mga katuyuan sang Ginharian sang Dios. Makabulig ini sa ila agod malab-ot nila ang tulumuron nga kabuhi nga walay katapusan sa kalipay.—Lucas 4:18-21.
20 Ang mga Cristiano karon dapat man magpanikasog nga mangin mga saksi para kay Jehova. Makapanaksi sila paagi sa ila mga pagginawi, nga nagalakip sang pagbulig sa iban kag pagpabilin nga “wala sing mantsa gikan sa kalibutan.” (Isaias 43:10-12; Santiago 1:27; Tito 2:14) Subong man, mahimo nila madala ang “maayong balita” sa puluy-an mismo sang mga tawo, nga nagapadayon sa sini nga buluhaton tubtob isiling sang Dios nga natapos na ini. (Lucas 10:1-9) Indi bala ninyo luyag nga magbulig sa inyo mga isigkatawo, lakip na sa inyo pamilya, nga mahibaluan ang nahanungod sa pagsimba nga ginakahamut-an ni Jehova? Kon amo, dapat man kamo makigbahin sa dayag nga pagpahayag sang inyo pagtuo; ang paghimo sini magabulig sa iban nga masapwan ang dalan padulong sa kabuhi.—Roma 10:10-15.
[Mga Pamangkot sa Pagtinuon]
Ngaa dapat naton binagbinagon kon bala may maayo sa tanan nga relihion? (1, 2)
Ano ang pagtamod ni Jesus sa relihion, kag ngaa? (3-5)
Ngaa importante nga makatigayon kita sing sibu nga ihibalo? (6, 7)
Paano ang pila ka kinaandan nga mga panudlo kag mga buhat nagasumpakil sa Biblia? (8-11)
Ano ang kinatuhayan sang mga iglesia kag sang tunay nga Cristianismo may kaangtanan sa inaway? (12, 13)
Ano ang tindog sang tunay nga Cristianismo kon tuhoy sa pagsunod sa mga talaksan sa moral sang Dios? (14-16)
Paano kamo makapabilin sa dalan padulong sa kabuhi? (17, 18)
Anong dugang nga hilikuton ang importante para sa mga Cristiano? (19, 20)
[Kahon sa pahina 173]
“PRINSIPIO KAG KASINGKI SA AUSCHWITZ”
Sa iya sulat nga may amo sini nga titulo, ang Polako nga sosyologo nga si Anna Pawelczynska nagsiling nga sa Nazi nga Alemanya “naghimo ang mga Saksi ni Jehova sing hipos nga pagpakig-away para sa ila pagpati, nga supak sa tanan nga sahi sang inaway kag kasingki.” Ano ang resulta? Nagpaathag sia:
“Ining diutay nga grupo sang mga bilanggo nangin malig-on nga puwersa ideolohikal kag nagdaug sila sa pagpakig-away batok sa Nazismo. Ang Aleman nga grupo sini nga sekta nangin isa ka diutay nga pulo nga maisog nga nagapamatok sa tunga sang isa ka ginahadlukan nga pungsod, kag sa amo man nga espiritu nga wala ginahadlukan nagapanghikot sila sa kampo sa Auschwitz. Natigayon nila ang pagtahod sang ila kaupod nga mga bilanggo . . . sang mga bilanggo nga may katungdanan, kag bisan sang mga opisyales sang SS. Nakahibalo ang tanan nga wala sing isa ka Saksi ni Jehova ang magatuman sa sugo nga supak sa iya relihioso nga pagtuluuhan.”
