Simbahon Bala Ninyo ang Dios suno sa Iya Paagi?
Kapitulo 19
Simbahon Bala Ninyo ang Dios suno sa Iya Paagi?
Sa “katapusan nga mga adlaw,” ginatagna sang Biblia nga ang mga tawo mangin “mahigugmaon sa kaugalingon, . . . matinaastaason, bugalon, . . . nga may dagway sang diosnon nga debosyon apang nagapanghiwala sa gahom sini.” (2 Timoteo 3:1-5) Indi bala nga amo gid sini ang makita naton sa aton palibot karon?
2 Huo, sa tagsa ka bahin sang kabuhi nagahulag ang katawhan sa isa ka paagi nga nagasiling, “Ako anay”—kon sila nagapamalaklon ukon nagamaneho, sa ila pamayo kag pagpamustora, sa ila panaot. Apang ini tanan wala maghatag sing matuod nga kalipay.
3 Madamo nga tawo ang nagatamod pa gani sa relihion suno sa luyag nila ukon suno sa ginabatyag nila nga kinahanglanon nila. Daku gid ini nga sayop! Indi kita ang magasiling kon paano dapat simbahon ang Dios. Subong Manunuga kag Manughatag-Kabuhi, si Jehova ang dapat magsiling kon paano sia simbahon. (Roma 9:20, 21) Kag para sa aton kaayuhan ang ginapatuman niya sa aton. Nagahatag ini sing kaayawan karon, kag ginapatuhoy ang aton hunahuna kag tagipusuon sa makatilingala nga mga butang nga ginatigana niya para sa aton palaabuton.—Isaias 48:17.
4 Wala ginapabug-atan ni Jehova ang mga Cristiano sing dikinahanglanon nga mga seremonya ukon ginapatuman niya ang walay pulos nga pagdumili. Apang nahibaluan sang Dios nga ang pagpabilin nga buhi nasandig sa pagtigayon sing maayo nga kaangtanan sa iya, kag kon luyag naton makasapo sang matuod nga kaayawan sa kabuhi, kinahanglan nga magkabuhi kita suno sa iya mga talaksan kag magpakita sing pag-ulikid sa iban. Kon ginasimba naton ang Dios suno sa paagi nga luyag niya, ang kabuhi mangin labi nga makaalayaw kag magatigayon sing kahulugan.
Paghimo sing mga Butang suno sa Paagi sang Dios
5 Si Noe maayo gid nga huwaran subong isa ka tawo nga nagsunod sang paagi sang Dios. Ginasiling sang Biblia: “Si Noe tawo nga matarong. Himpit sa iya mga kadungan. Si Noe naglakat upod sa matuod nga Dios.” Sa tapos sia ginsugo sang Dios nga magpatindog sing daku gid nga nagaluwas-kabuhi nga arka, “Ginhimo ini ni Noe suno sa tanan nga ginsugo sang Dios sa iya. Amo ang ginhimo niya.” (Genesis 6:9, 22) Ang paghimo sing mga butang suno sa paagi sang Dios nagluwas sang kabuhi ni Noe, kag sang kabuhi sang iya pamilya nga nag-unong sa iya bilang manalagna sang Dios sa duta.—2 Pedro 2:5.
6 Ang isa pa ka tawo nga nagsunod sa paagi sang Dios amo si Abraham. Ginsugo sia sang Dios nga bayaan ang iya tumandok nga duta. Nagtuman ayhan kamo? Si Abraham “naglakat suno sa napamulong sa iya ni Jehova,” bisan pa nga “wala sia makahibalo kon diin sia makadto.” (Genesis 12:4; Hebreo 11:8) Bangod sang matutom nga paghimo sing mga butang suno sa paagi sang Dios, ginkabig si Abraham nga “abyan ni Jehova.”—Santiago 2:23; Roma 4:11.
Pagpakig-upod sa Katawhan sang Dios
7 Sang ulihi ginpakamaayo sang Dios nga makig-angot sa daku nga grupo, ang pungsod sang Israel. Sila nangin “iya katawhan, isa ka pinasahi nga pagkabutang, gikan sa tanan nga katawhan nga yara sa kadaygan sang duta.” (Deuteronomio 14:2) Sa pagkamatuod, ang tagsa ka Israelinhon dapat mangamuyo sa Dios kag maghupot sing isa ka suod, personal nga kaangtanan sa iya. Apang dapat man nila kilalahon nga ang Dios amo ang nagapalakat sang isa ka kongregasyon; dapat nila sundon ang paagi sang pagsimba nga ginbalay sa kasuguan sang Dios para sa ila subong isa ka katawhan. Sa amo matigayon nila ang proteksion kag pagpakamaayo nga gin-aman sang Dios para sa kongregasyon. (Deuteronomio 28:9-14) Hunahunaa lamang ang pribilehiyo nga mangin bahin sang katawhan nga gintawag sang Labing Gamhanan nga “akon pungsod nga Israel.”—2 Samuel 7:8.
8 Kamusta naman ang mga di-Israelinhon nga luyag magsimba sa matuod nga Dios? Ini nga sahi sang mga tawo naghuman sing “isa ka salakot nga kadam-an” nga namat-od nga mag-upod sa Israel sang pangunahan ni Moises ang pungsod paguwa sa Egipto. (Exodo 12:38) Kon didto kamo anay sa Egipto, sa banta bala ninyo mahimo kamo makapabilin kag magsimba sa Dios nga nagaisahanon suno sa kaugalingon ninyo nga paagi?
9 Bisan sang nagpuyo na ang Israel sa Ginsaad nga Duta, ang mga dumuluong nga nagkilala kay Jehova ginpahanugutan man nga magsimba sa iya. Walay sapayan, dapat nila apresyahon nga ang Dios nagapakig-angot sa isa ka kongregasyon sang katawhan kag nga ang Iya pagsimba nasentro sa isa ka templo sa Jerusalem. (1 Hari 8:41-43; Numeros 9:14) Ang mga tawo indi mangin kalahamut-an sa Dios kon tugutan nila ang pagkamatinaastaason ukon pagkaindependiente nga magpahulag sa ila sa paghimuhimo sang ila kaugalingon nga paagi sang pagsimba.
Pagbag-o sa mga Kongregasyon
10 Sang ginhimo ni Jesus ang iya ministeryo sa duta, nagapakig-angot pa gihapon ang Dios sa Israel subong katawhan nga dedikado sa iya. Sa amo indi kinahanglanon para sa tagsatagsa nga nagbaton sa Mesias nga makigkita sing tayuyon kay Jesus kag maglakbay kaupod niya subong sang ginhimo sang mga apostoles. (Marcos 5:18-20; 9:38-40) Apang ang pungsod sa kabilugan nagsikway sa Mesias ni Jehova, gani napahulag si Jesus nga magsiling sini antes sia mapatay: “Bawion sa inyo ang ginharian sang Dios kag ihatag sa isa ka katawhan nga nagapatubas sang iya bunga.”—Mateo 21:43, Jerusalem Bible.
11 Sin-o ining bag-ong pungsod, sang indi na kinahanglanon ang paagi sang pagsimba nga ginbalay sa kasuguan sang Dios sa Israel? (Colosas 2:13, 14; Galacia 3:24, 25) Sang adlaw sang Pentecostes, 33 C.E., gintukod ang Cristianong kongregasyon kag gin-athag sang Dios sa bunayag sing tagipusuon nga mga manugpanilag nga katuyuan niya ini. (Binuhatan 2:1-4, 43-47; Hebreo 2:2-4) Una, ang mga Judiyo kag dumuluong nga nagbaton sa Judaismo, kag, sang ulihi, ang mga Gentil ukon mga tawo sang mga pungsod, nangin “katawhan para sa iya ngalan.” Ginakabig sila karon sang Dios nga “isa ka pinili nga kaliwatan, harianon nga pagkasaserdote, balaan nga pungsod, katawhan nga ginapanag-iyahan sing pinasahi.”—Binuhatan 15:14-18; 1 Pedro 2:9,10.
12 Kon nabuhi kamo sadto kag luyag ninyo makatigayon sing kaangtanan sa Dios, pat-od nga tuytuyan kamo sa Cristianong kongregasyon. Amo sini ang natabo sa Italyano nga si Cornelio kag sa iya panimalay. (Binuhatan 10:1-48) Ang mga tumuluo sa bug-os nga kalibutan amo ang naghuman sa Cristianong kongregasyon. (1 Pedro 5:9) Ang tanan nga lokal nga mga kongregasyon, nga nagtipon sa puluy-an ukon publiko nga mga tinukod, bahin sining isa ka kongregasyon nga ginagamit karon sang Dios.—Binuhatan 15:41; Roma 16:5.
13 Subong Dios sang kahim-ong, gin-organisar ni Jehova ang mga kongregasyon. Sa pag-aman sing kinahanglanon nga igtalupangod sa indibiduwal nga mga sumilimba, nagtangdo sia sing mga lalaki nga mag-alagad subong mga manugbantay ukon mga manugtatap. Sila eksperiensiado, kalipikado nga mga lalaki nga makatudlo sang Pulong sang Dios kag makahanas sa mga katapo sang kongregasyon sa pagpaambit sing kamatuoran sang Biblia sa iban, agod makabulig sa importante nga hilikuton sang pagbantala sing “maayong balita.”—2 Timoteo 2:1, 2; Efeso 4:11-15; Mateo 24:14; Binuhatan 20:28.
14 Makabenepisyo man ang mga kongregasyon gikan sa sining mga manugtatap sa madamo pa nga paagi. Indi sila makig-angot sa estrikto ukon mapiguson nga paagi. Sa baylo, ang ila katungdanan amo ang mahigugmaon nga pagbulig sa mga masigka-Cristiano nga pabakuron ang ila kaangtanan sa Dios. (Binuhatan 14:21-23; 1 Pedro 5:2, 3) Ang bisan sin-o nga may problema sarang makapalapit sa sining espirituwal nga mga gulang agod mangayo sing malulo, Makasulatanhon nga bulig. (Santiago 5:13-16; Isaias 32:1, 2) Bangod ang mga Cristiano indi pa himpit, mahimo magautwas kon kaisa ang mga palaligban sa kongregasyon. Dapat mangin alisto ang mga manugtatap sa pagbulig sa mga masigka-Cristiano, kag mag-andam batok sa bisan kay sin-o nga mahimo makahalit sa espirituwalidad sang kongregasyon.—Filipos 4:2, 3; 2 Timoteo 4:2-5.
15 Nakabaton ang mga kongregasyon sing kinahanglanon nga tuytoy gikan sa Cristianong nagadumala nga hubon sang mga apostoles kag mga gulang sang kongregasyon sa Jerusalem. Gintun-an kag ginpamat-uran nila ang mga palaligban nga gindangop sang mga kongregasyon. Kag nagpadala ang nagadumala nga hubon sing mga tiglawas agod magduaw sa mga kongregasyon.—Binuhatan 15:1-3.
16 Nagapakig-angot gihapon si Jehova sa iya katawhan subong isa ka kongregasyon. Sa bug-os nga duta may linibo ka kongregasyon sang mga Saksi ni Jehova. Kon luyag ninyo makighiusa sa paagi sang Dios sa pagsimba, batuna ang iya pangagda nga makigtipon sa kaupod nga Cristiano:
“Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob, . . . kundi maglinaygayay ang isa kag isa, kag labi pa gid sa ginatan-aw ninyo nga nagapalapit ang adlaw.”—Hebreo 10:24, 25.
Pagsimba sa Dios sing Bug-os Kalag
17 Maayo nga binagbinagon ang tanan nga nahimo ni Jehova para sa inyo. Gikan sa iya nabaton ninyo ang kabuhi kag ang mga aman nga nagasakdag sang inyo kabuhi adlaw-adlaw. Labi pa sa sini, ginpadala sang Dios ang iya Anak sa duta agod mapatay subong halad. Pagpakita ini sing hanuot nga gugma sang Dios, gugma nga matutom kag wala nagabag-o. (Roma 5:8; 8:32, 38, 39) Sa sina nga paagi ginpahanabo sang Dios nga makabaton kamo sing kapatawaran sang sala kag sing ginalauman nga kabuhi nga walay katapusan sa kalipay.—Juan 3:17; 17:3.
18 Paano naton sabton ang iya gugma? Dapat nga indi naton pagtalikdan ang Dios kag ang iya gugma. Si apostol Pedro naglaygay:
“Busa hinulsol kamo, kag magliso agod mapanas ang inyo mga sala, kag mag-abot ang mga panag-on sang pagpaumpaw.”—Binuhatan 3:19.
19 Kita tanan dapat ‘maghinulsol,’ kay kita tanan nakasala, nagkulang sa mga talaksan sang Dios sa pagginawi, panghambal kag panghunahuna. (Roma 2:4; 7:14-21; Santiago 3:2) Ang aton paghinulsol nagakahulugan nga kilalahon naton ang aton pagkamakasasala kag magkasubo nga napaslawan kita sa pagkabuhi nga nahisuno sing bug-os sa kabubut-on ni Jehova. Amo bala sina ang imo ginabatyag? Pagkatapos, kinahanglan nga “magliso” kita ukon magbag-o sang aton paagi sang pagkabuhi, nga sugod karon nagatinguha nga ipabanaag ang mga kinaiya ni Jehova kag himuon ang tanan suno sa iya paagi. Sa paghimo sina, makasalig kita nga patawaron kag batunon kita sang Dios.—Salmo 103:8-14; 2 Pedro 3:9.
20 Sanglit ginakilala naton nga si Jesus nagbilin sing modelo agod sundon naton ang iya mga tikang sa pag-alagad sa Dios, dapat nga tinguhaan naton nga ilugon ang iya huwaran. (1 Pedro 2:21) Ginasiling sa aton sang Hebreo 10:7 nga ang panimuot ni Jesus amo sini: “Yari karon! Nagkari ako . . . agod himuon ang imo kabubut-on, O Dios.” Nahisuno sa sini, ang aton gugma kag apresasyon sa Dios dapat nga magpahulag sa aton nga idedikar ang aton kaugalingon sa iya, agod himuon ang iya kabubut-on sing bug-os kalag. Sa pagkamatuod, sa gihapon magakaon kita, magatulog, magaatipan kag magahigugma sa aton pamilya, magalingawlingaw kag sa iban pa nga mga paagi magapakigbahin sa normal nga mga hilikuton sang kabuhi. Apang ang pagdedikar sang kaugalingon sa Dios nagakahulugan nga ang iya kabubut-on kag pagsimba mangin ang pinakaimportante sa tanan, kag bisan diin man kita kag bisan ano man ang aton ginahimo, hanuot gid nga tinguhaan naton nga iaplikar ang laygay sang Dios kag sundon ang huwaran nga ginbilin ni Jesus.—Colosas 3:23, 24.
21 Ginaathag sang kasulatan nga ang isa nga nagdedikar sang iya kabuhi sa Dios dapat maghimo sing publiko nga pagpahayag sini paagi sa pagpabawtismo. Ginsiling ni Jesus sa iya mga alagad:
“Busa lakat kamo kag himuon nga mga disipulo ang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo”—Mateo 28:19, 20.
Kon ang mga mapabawtismo dapat nga nakatuon na sang Pulong sang Dios kag nangin disipulo ni Cristo, maathag nga indi sila mga lapsag lamang. Subong man, ang ila bawtismo, subong simbulo sang ila pagdedikar sa Dios, dapat nga himuon paagi sa bug-os nga pagtum-oy sa tubig, katulad sang ginbawtismuhan si Jesus sa Suba sang Jordan.—Marcos 1:9-11; Binuhatan 8:36-39.
22 Paagi sa inyo pagpabawtismo subong disipulo ni Cristo matigayon ninyo ang bug-os kag malipayon nga kabuhi sang tunay nga Cristianismo. Indi ini kabuhi nga puro mga sugo kag mga pagdumili. Sa baylo, isa ini ka kabuhi sang makaalayaw nga pagkabuhi. Padayon ninyo nga mapauswag ang inyo espirituwal nga pagtamod kag pag-aplikar sang Pulong sang Dios, sa amo labi kamo nga mapasuod sa huwaran nga ginbilin ni Jesus.—Filipos 1:9-11; Efeso 1:15-19.
23 Magaapektar ini sa inyo adlaw-adlaw nga paghunahuna kag paggawi. Samtang ginasakdag ninyo ang Cristianong paagi, magalig-on ang inyo pagtuo nga sa indi madugay laglagon sang Dios ang tanan nga kalautan, agod hatagan sing dalan ang ‘mga bag-ong langit kag bag-ong duta diin magapuyo ang pagkamatarong.’ Ini, man, magapalig-on sang inyo handum nga pauswagon ang Cristianong personalidad kag himud-usan ang paagi sang pagkabuhi nga magadul-ong sa inyo sa pagsapo sing duog sa palaabuton nga bag-ong kalibutan. (Efeso 4:17, 22-24) Si apostol Pedro gin-inspirar sa pagsulat:
“Hunahunaa kon ano nga sahi sang mga tawo mangin amo kamo, sa balaan kag dedikado nga pagkabuhi! Samtang nagahulat kamo sang [bag-ong kalibutan], tinguhai nga masapwan kamo nga nagapakighidait sa iya, nga walay dagta kag kasawayan sa iya itululok.”—2 Pedro 3:11, 14, New English Bible.
24 Daku gid nga pagpakamaayo kon ang bug-os nga kabuhi sang isa nagapakita nga nagasimba sia kay Jehova nga Dios! Walay sapayan nga sa karon madamo ang nagakabuhi agod lamang pahamut-an ang ila kaugalingon kag may kakagod nga nagapaduyog sa kalipayan tubtob masarangan nila, sarang kamo magkabuhi kag magsimba sa matuod nga Dios suno sa iya paagi. Amo ini ang labing maayo nga paagi sang pagkabuhi.
[Mga Pamangkot sa Pagtinuon]
Sin-o ang ginauna sang kalabanan nga tawo, kag ngaa indi ini maalamon? (1-4)
Paano nga lain sanday Noe kag Abraham gikan sa kalabanan nga tawo karon? (5, 6)
Sang panahon sang dumaan nga Israel, paano nakig-angot ang Dios sa mga tawo? (7-9)
Ano nga pagbag-o ang ginhimo sang Dios sa iya mga pagpakig-angot? (10-12)
Paano gin-organisar kag gindumalahan sang Dios ang mga Cristiano? (13-15)
Ano ang dapat nga mangin kahulugan para sa inyo sang paagi sang pagpakig-angot sang Dios sa mga Cristiano? (16)
Ang gugma sa Dios dapat magapahulag sa aton nga himuon ang ano? 17-19)
Ngaa ang bawtismo isa ka importante nga tikang, kag ano ang ginasimbuluhan sini? (20-21)
Gindedikar na bala ninyo ang inyo kabuhi sa Dios kag luyag bala ninyo magpabawtismo? Magakahulugan ini sing ano para sa inyo? (22-24)
