Ini Bala Nga Kalibutan Makalampuwas?

Wala sing iban nga kaliwatan ang madamo sing nabatian nahanungod sa katapusan sang kalibutan. Madamo ang nahadlok nga basi ang kalibutan matapos sa isa ka nuklear nga kalaglagan. Nagahunahuna ang iban nga basi ang polusyon magalaglag sang kalibutan. Nabalaka ang iban pa nga basi ang kagamo sa palangabuhian mangin kabangdanan sang pag-ilinaway sang katawhan.

Matapos gid bala ining kalibutan? Kon ini matapos, ano ang kahulugan sini? Natapos na bala anay ang kalibutan?

Ang Kalibutan Nagakatapos—Nagabulos ang Lain

Huo, natapos na anay ang kalibutan. Binagbinaga ang kalibutan nga nangin tuman kalain sang mga adlaw ni Noe. Ang Biblia nagapaathag: “Ang kalibutan nga sadto anay ginlapawan sang tubig kag nawala.” Ang Biblia nagasiling man: “Wala [sang Dios] pagpaiwaya ang daan nga kalibutan, kundi gintipigan si Noe, nga manugbantala sang pagkamatarong, kaupod sang iban nga pito sang gin-anaw niya ang kalibutan sang mga didiosnon.”—2 Pedro 2:5; 3:6.

Talupangda kon ano ang kahulugan sang katapusan sadto nga kalibutan kag kon ano ang wala ginakahulugan sini. Wala ini nagakahulugan sang katapusan sang katawhan. Si Noe kag ang iya pamilya nakalampuwas sa tugob-globo nga Anaw. Amo man ang planeta nga Duta kag ang matahom nga mabituunon nga mga langit. “Ang kalibutan sang mga didiosnon” amo ang nalaglag, ang malaut nga sistema sang mga butang.

Sang ulihi, sang nagdamo ang mga anak ni Noe, isa pa ka kalibutan ang nagluntad. Inang ikaduhang kalibutan, ukon sistema sang mga butang, nagluntad tubtob sa aton adlaw. Ang maragtas sini puno sing inaway, krimen, kag kasingki. Ano ang mahanabo sa sining kalibutan? Makalampuwas bala ini?

Ang Palaabuton Sining Kalibutan

Sa tapos nagsiling nga ang kalibutan sang adlaw ni Noe ginlaglag, ang kasaysayan sang Biblia nagapadayon: “Sa amo nga pulong ang mga langit kag ang duta nga amo karon gintigana sa kalayo.” (2 Pedro  3:7) Sa pagkamatuod, subong sang ginpaathag sang isa pa ka manunulat sang Biblia: “Ang kalibutan [ang isa nga nagaluntad karon] nagataliwan.”—1 Juan 2:17.

Indi buot silingon sang Biblia nga ang literal nga duta ukon ang mabituunon nga mga langit ang magataliwan, subong nga wala man ini magtaliwan sang adlaw ni Noe. (Salmo 104:5) Sa baylo, ining kalibutan, kag ang “mga langit,” ukon mga gumalahom sang panguluhan sini sa idalom sang impluwensia ni Satanas, kag ang “duta,” ukon tawhanon nga katilingban sini, pagalaglagon nga daw sa kalayo. (Juan 14:30; 2 Corinto 4:4) Ining kalibutan, ukon sistema sang mga butang, malaglag subong gid sang natabo anay sa kalibutan antes sang Anaw. Bisan si Jesucristo nagpamulong nahanungod sa kahimtangan sang “mga adlaw ni Noe” subong halimbawa sang kon ano ang mahanabo antes sang katapusan sining kalibutan.—Mateo 24:37-39.

Sing importante, sang nagpamulong si Jesus nahanungod sa mga adlaw ni Noe, pagsabat niya ini sa pamangkot sang iya mga apostoles: “Ano bala ang tanda sang imo pagkari, kag sang katapusan sang kalibutan?” (Mateo 24:3, King James Version) Ang mga sumulunod ni Jesus nakahibalo nga ining kalibutan matapos. Hinadlukan bala sila sini nga palaabuton?

Sa kabaliskaran, sang ginlaragway ni Jesus ang mga hitabo nga mahanabo antes sang katapusan sang kalibutan, ginpalig-on niya sila nga magkasadya ‘kay ang pagtubos sa ila nagapalapit.’ (Lucas 21:28) Huo, pagtubos gikan kay Satanas kag sa iya malaut nga sistema sang mga butang pakadto sa mahidaiton nga bag-ong kalibutan!—2 Pedro 3:13.

Apang san-o bala matapos ining kalibutan? Anong “tanda” ang ginhatag ni Jesus tuhoy sa ‘pagkari [niya], kag sa katapusan sang kalibutan’?

“Ang Tanda”

Ang Griegong tinaga diri nga ginbadbad “pagkari” amo ang pa·rou·siʹa, kag nagakahulugan ini sang “presensia,” kon sayuron,  subong yari na. Gani kon makita ang “tanda,” wala ini nagakahulugan nga si Cristo magakari sa dili madugay kundi nga nakabalik na sia kag yari na. Nagakahulugan ini nga nagsugod na sia sa paggahom sing dikitaon subong langitnon nga hari kag nga sa dili madugay pagalaglagon niya ang iya mga kaaway.—Bugna 12:7-12; Salmo 110:1, 2.

Indi lamang isa ka hitabo ang ginhatag ni Jesus subong “tanda.” Ginlaragway niya ang madamong hitabo kag kahimtangan sa kalibutan. Mahanabo ini tanan sa tion nga ginatawag sang mga manunulat sang Biblia nga ang “katapusan nga mga adlaw.” (2 Timoteo 3:1-5; 2 Pedro 3:3, 4) Binagbinaga ang pila sa mga butang ­nga gintagna ni Jesus nga magatanda sang “katapusan nga mga adlaw.”

“Ang pungsod magatindog batok sa pungsod kag ang ginharian batok sa ginharian.” (Mateo 24:7) Ang inaway sa modernong tion mas daku sing kasangkaron sang sa nagligad. Ang isa ka istoryador nagsiling: “Ang Unang Inaway Kalibutanon [sugod sang 1914] amo ang nahaunang ‘kabilugan’ nga inaway.” Apang, ang ikaduhang inaway kalibutanon mas labi ka malaglagon. Kag ang inaway padayon nga nagalaglag sang duta. Huo, ang pinamulong ni Jesus natuman sa dramatiko nga paagi!

“May mga tiggulutom.” (Mateo 24:7) Nagsunod sa Inaway Kalibutanon I ang ayhan pinakadaku nga tiggulutom sa bug-os nga maragtas. Nagsunod man sa Inaway Kalibutanon II ang grabe nga tiggulutom. Apektado sang halit sang malnutrisyon ang ikalima nga bahin sang populasyon sang duta, nagapatay sang mga 14 milyones ka bata kada tuig. Sa pagkamatuod, may “tiggulutom” gid!

“May mabaskog nga mga linog.” (Lucas 21:11) Sa promedyo, mga napulo ka pilo kadamo ang nagakapatay kada tuig bangod sang  mga linog sugod sang 1914 subong sang nagligad nga mga siglo. Binagbinaga lamang ang pila ka dalagku: 1920, Tsina, 200,000 ang napatay; 1923, Hapon, 99,300 ang napatay; 1939, Turkey, 32,700 ang napatay; 1970, Peru, 66,800 ang napatay; kag 1976, Tsina, mga 240,000 (ukon, suno sa iban nga ginhalinan, 800,000) ang napatay. “Mabaskog [gid] nga mga linog”!

“Sa nagakalainlain nga mga duog mga kamatay.” (Lucas 21:11) Pagkatapos sang Inaway Kalibutanon I, mga 21 milyones ka tawo ang napatay sa trangkaso Espanyol. Ang Science Digest nagreport: “Sa bug-os nga maragtas wala na sing mas mapintas, mas madasig nga pagduaw sang kamatayon.” Sugod sadto, ang balatian sa tagipusuon, kanser, AIDS, kag madamo iban pa nga kamatay nagpatay sa ginatos ka milyon.

“Ang kalautan magabuad.” (Mateo 24:12) Sugod sang 1914 ang aton kalibutan nakilal-an subong puno sang krimen kag kasingki. Sa madamong lugar peligruso para sa isa ang mangin sa mga dalan bisan sa adlaw. Kon gab-i ang mga tawo nagatener sa ila balay nga nakandaduhan kag natrangkahan ang mga ganhaan, nahadlok magguwa.

Madamong iban pa nga butang ang gintagna nga mahanabo sa katapusan nga mga adlaw, kag ini tanan natuman man. Nagakahulugan ini nga ang katapusan sang kalibutan malapit na. Apang, sing makalilipay, may mga makalampuwas. Sa tapos nagsiling nga “ang kalibutan nagataliwan,” ang Biblia  nagasaad: “Ang nagahimo sang kabubut-on sang Dios nagapadayon sing dayon.”—1 Juan 2:17.

Gani kinahanglan naton tun-an ang kabubut-on sang Dios kag himuon ini. Nian makalampuwas kita sa katapusan sining kalibutan sa pag-agom sing dayon sang mga pagpakamaayo sang bag-ong kalibutan sang Dios. Ang Biblia nagasaad nga sa sina nga tion: “Pahiran [sang Dios] ang tagsa ka luha sa mga mata [sang katawhan], kag wala na sing kamatayon, ukon kalisud ukon paghibi ukon kasakit pa.”—Bugna 21:3, 4.

Luwas kon tuhay ang ginasambit, ang tanan nga mga ginbalikwat sa Kasulatan gikan sa New World Translation of the Holy Scriptures.

[Picture Credit Line sa pahina 6]

Photo Credits: Eroplano: Laragway sang USAF. Bata: Kuha ni W. Cutting para sa WHO. Linog: Y. Ishiyama, Hokkaido University, Japan.