Ang Cristianong Kongregasyon sang Nahaunang Siglo

Sang Pentecostes 33 C.⁠E., ang balaan nga espiritu ginpasagahay sa 120 ka gintoton-an ni Jesus, kag naghambal sila sa madamo nga hambal nahanungod sa dalayawon nga mga butang sang Dios. Amo ini ang pagtukod sa Cristianong kongregasyon. Mga 3,000 ka bag-ong gintoton-an ang nabawtismohan sadto nga adlaw.—Binuhatan, kapitulo 2.

Nagdamo ang mga kongregasyon sa nanuhaytuhay nga mga duog samtang ang mga apostoles kag ang iban pa nagpadayon sa paghambal sang Pulong sang Dios nga may kasidla. Subong narekord sa tolon-an sang Mga Binuhatan, ang pagbantala madasig nga naglapnag sa bug-os nga Mediterraneo, gikan sa Babilonia kag Naaminhan nga Aprika tubtob sa Roma kag ayhan sa Espanya.—Roma 15:​18-29; Colosas 1:​23; 1 Pedro 5:​13.

Sa bisan diin nga ang katawhan mangin mga gintoton-an, nagporma sila sing mga kongregasyon. Ang sangkol, hamtong nga mga lalaki gintangdo subong mga gulang, ukon mga manugtatap, agod magtipig sang talaksan sang husto nga panudlo kag paggawi sa mga kongregasyon. Apang wala sila nagahuman sing isa ka klero nga klase; mga ministro sila kag mga masigkamanugpangabudlay para sa Ginharian sang Dios.—Binuhatan 14:​23; 20:28; 1 Corinto 3:​5; 5:​13; Colosas 4:​11; 1 Timoteo 3:​1-15; Hebreo 13:​17; 1 Pedro 5:​1-4.

Ang mga apostoles kag ang iban pa sang suod nga masigkamanugpangabudlay nag-alagad subong nagadumala nga hubon. Nanguna sila sa pagbantala nga hilikuton. Ginlubad nila ang mga palaligban sa kongregasyon sang Jerusalem. Nagpadala sila sing sangkol nga mga utod sa Samaria kag sa Antioquia agod palig-unon ang bag-ohan nga mga tumuluo didto. Ginlubad nila ang sinuay nahanungod sa pagpatuli, kag ginpadala nila ang ila desisyon sa tanan nga kongregasyon agod sundon nila. Apang ining mga lalaki indi mga agalon kundi mga alagad kag masigkamanugpangabudlay sang bug-os nga kongregasyon.​—⁠Binuhatan 4:​33; 6:​1-7; 8:14-25; 11:22-24; 15:​1-32; 16:​4, 5; 1 Corinto 3:​5-9; 4:​1, 2; 2 Corinto 1:​24.

Ang unang mga gintoton-an gintawag nga mga Cristiano, subong amo ang ngalan nga ginhatag sa ila sang Dios. May mga panudlo man sila nga nagpatuhay sa ila; gintawag ini ang mga panudlo sang mga apostoles, ukon ang sulundan sang  maayo nga mga pulong. Ining Makasulatanhon nga mga panudlo gintawag man ang kamatuoran.—Juan 17:​17; Binuhatan 2:​42; 11:​26; Roma 6:​17; 1 Timoteo 4:​6; 6:​1, 3; 2 Timoteo 1:​13; 2 Pedro 2:​2; 2 Juan 1, 4, 9.

Isa sila anay ka katilingban sang mga mag-ulutod sa bug-os nga kalibutan nga nahiusa sa gugma. Nagpakita sila sing interes sa ila mga masigkatumuluo sa iban nga mga pungsod. Kon maglakbay sa luwas, ang mga masigkatumuluo nagaabiabi sa ila sa mga puluy-an nila. Naghupot sila sing isa ka mataas nga talaksan sang moral nga paggawi, bangod isa sila ka balaan nga katawhan nga nabulag sa kalibutan. Gindumdom nila ang tion sang pag-abot ni Jehova kag makugi nga ginwali nila sa publiko ang ila pagtuo.—Juan 13:​34, 35; 15:​17-19; Binuhatan 5:​42; 11:​28, 29; Roma 10:​9, 10, 13-15; Tito 2:​11-14; Hebreo 10:​23; 13:​15; 1 Pedro 1:​14-16; 2:​9-12; 5:​9; 2 Pedro 3:​11-14; 3 Juan 5-8.

Apang, subong gintagna, ang daku nga apostasya nagsugod sa paglutaw, sang ikaduha kag ikatlo nga siglo. Nagresulta ini sa daku nga mga sistema sang iglesia nga wala maghupot sang kaputli sang unang Cristianong kongregasyon tuhoy sa mga panudlo, paggawi, organisasyon, kag tindog sa kalibutan.—Mateo 13:24-30, 37-43; 2 Tesalonica, kapitulo 2.

Apang, gintagna ni Jesus nga magaabot ang pagpasag-uli sang matuod nga pagsimba sa katapusan sang sistema sang mga butang. Ang mga Saksi ni Jehova nagapati nga ining pagpasag-uli makita sa ila mga hilikuton sa bug-os nga kalibutan sa aton tion, mga 1,900 ka tuig sa tapos sang tagna ni Jesus. Ang masunod nga mga pahina magapaathag kon ngaa.

● Paano gintukod ang Cristianong kongregasyon, kag paano ini nag-uswag?

● Paano gindumalahan ang kongregasyon sadto?

● Ano nga mga butang ang maathag nga nagpatuhay sa mga Cristiano sang unang siglo?

[Mapa sa pahina 7]

(Para sa aktual nga pormat, tan-awa ang publikasyon)

Black Sea

Caspian Sea

Great Sea

Red Sea

Persian Gulf

Duog nga nalab-ot sang maayong balita sang unang siglo

ITALY

Rome

GREECE

MALTA

CRETE

CYPRUS

BITHYNIA

GALATIA

ASIA

CAPPADOCIA

CILICIA

SYRIA

ISRAEL

Jerusalem

MESOPOTAMIA

Babylon

Ang iban gikan sa sining mga duog nangin mga tumuluo

ILLYRICUM

MEDIA

PARTHIA

ELAM

ARABIA

LIBYA

EGYPT

ETHIOPIA

[Mga piktyur sa pahina 7]

Ang unang mga Cristiano nagbantala sang Pulong sang Dios nga may kasidla

Ang mga Cristiano gin-abiabi sa mga puluy-an sang mga masigkatumuluo bisan diin sila maglakbay