Ang Katuyoan sang Dios Malapit Na Karon sa Iya Putukputukan

Ang katuyoan sang Dios sa pagtuga sang duta amo nga puy-an ini sang malipayon nga katawhan nga nagapuyo sa idalom sang matarong nga mga kahimtangan. Agod magpadayon sa pagkabuhi, dapat nga tumanon sang katawhan ang kasugoan sang Dios, apang naglalis ang unang mag-asawa kag nangin mga makasasala, ginpakamalaut sa kamatayon. Nagdala ini sing sala kag kamatayon sa tanan nila nga mga anak.​—⁠Genesis 1:​27, 28; 2:​16, 17; 3:1-19; Roma 5:​12.

Ang Dios, nga ang ngalan Jehova, determinado sa pagdula sang mga epekto sang paglalis kag sang sala gikan sa duta. Sang ulihi nagtan-aw sia sa duta kag nakita niya sa tunga sang katawhan ang matutom nga tawo, si Abram, nga gin-islan Niya sing ngalan nga Abraham. Nagsaad ang Dios kay Abraham nga ang iya mga anak mangin isa ka daku nga pungsod kag paagi sa sina nga pungsod ang Dios magaaman sing binhi nga paagi sa sini ang tanan nga pamilya sang duta magapakamaayo sang ila kaugalingon.​—⁠Genesis 12:1-3; 18:​18, 19;22:​18; Salmo 83:​18; Hebreo 11:​8-16.

Malapit sa katapusan sang ika-16 nga siglo B.⁠C.⁠E., ang mga anak sang apo ni Abraham nga si Jacob, ukon Israel, nangin 12 ka tribo nga naulipon sa Egipto. Ginluwas ni Jehova ining mga Israelinhon gikan sa Egipto kag ginhimo sila nga isa ka pungsod. Paagi kay Moises sa Bukid sang Sinai naghatag sia sa ila sing Kasugoan subong ila pungsodnon nga konstitusyon. Si Jehova amo ang ila Hari, Hukom, kag Manughatag-sing-Palatukuran. Ang pungsod sang Israel nangin pinili nga katawhan sang Dios, ang iya mga saksi, nga gin-organisar sa pagtuman sang iya katuyoan. Paagi sa ila magakari ang Mesias, nga magatukod sing walay katapusan nga ginharian para sa kaayohan sang katawhan sang tanan nga kapungsuran.​—⁠Exodo 19:​5, 6; 1 Cronica 17:​7-14; 1 Hari 4:​20,  25; Isaias 33:​22; 43:​10-12; Roma 9:4, 5.

Pagligad sang 15 ka siglo, ukon mga 2,000 ka tuig sang una, ginpadala sang Dios ang iya bugtong nga Anak gikan sa langit pa duta, agod matawo paagi sa isa ka Judiyo nga ulay nga si Maria. Gintawag sia nga Jesus kag panublion niya ang Ginharian nga ginsaad sang Dios sa iya katigulangan nga si David. Sa edad nga 30, si Jesus ginbawtismohan ni Juan Bautista kag nagsugod sia sa pagwali sang Ginharian sang Dios. Paagi sa pag-ayo sa mga masakiton, ginpakita niya kon paano pakamaayuhon sang nagapakari nga Ginharian ang katawhan. Paagi sa mga ilustrasyon, ginpaathag  niya kon ano ang kinahanglanon sa tanan nga maluyag sing kabuhi nga walay katapusan. Nian ginpatay si Jesus sa usok sang pag-antos, ang iya himpit nga kabuhi subong tawo nangin gawad para sa katawhan.​—⁠Mateo 1:18-24; 3:13-16; 4:​17-23; 6:9, 10; kapitulo 13; 20:​28; Lucas 1:​26-37; 2:​14; 4:​43, 44; 8:​1; Juan 3:​16; Binuhatan 10:​37-39.

Ginpaathag ni Jesus nga ang Mesianikong Ginharian tukuron sa malayo nga palaabuton, sa katapusan sang sistema sang mga butang. Sa amo nga tion sia dimakita nga magaabot sa mga langit subong ang nagagahom nga Hari kag ipakilala niya ang iya pag-abot paagi sa pagpatuhoy sang iya igtalupangod sa duta. Ginapakita sang mga hitabo sa kalibutan nga nagapuyo kita sa sining tion kutob sang 1914. Subong gintagna ni Jesus, ang maayong balita sang Ginharian ginabantala sa bug-os nga duta subong panaksi sa tanan nga kapungsuran. Subong resulta ang katawhan gikan sa tanan nga kapungsuran ginatipon padulong sa bahin sang Ginharian sang Dios. Ini sila maluwas sa katapusan sang karon nga sistema sang mga butang kag makatigayon sing kabuhi nga walay katapusan sa duta sa idalom sang Mesianikong Ginharian.​—⁠Mateo, kapitulo 24 kag 25; Bugna 7:​9-17.

Madamo nga iglesia ang nagapangangkon karon nga ginahimo nila ang kabubut-on sang Dios. Apang paano ninyo makilala ang matuod nga Cristianong kongregasyon? Paagi sa pag-usisa sang mga Kasulatan nahanungod sa Cristianong kongregasyon sang nahaunang siglo kag sa pagpanilag kon sin-o sa karon ang nagasunod sina nga sulundan.

● Ano ang bahin ni Abraham kag ni Israel sa katumanan sang katuyoan sang Dios?

● Ano ang nahimo ni Jesus paagi sa iya ministeryo kag paagi sa iya kamatayon?

● Ano nga mga hitabo ang gintagna nga magatanda sang aton tion karon?