Gin-organisar ang mga Kongregasyon sa Pagbantala sang Ginharian sang Dios

Sang sa duta, ginbantala ni Jesucristo ang Ginharian sang Dios, sa minuro kag minuro kag sa siudad kag siudad. Ginhanas man niya kag ginpadala ang iya mga gintoton-an sa paghimo sini man nga hilikuton. Sa wala pa magkayab sa langit, ginsugo niya ang iya mga sumulunod nga maghimo sing mga gintoton-an sa katawhan sang tanan nga kapungsuran. Sugod sang umpisa sini, ang nahaunang Cristianong kongregasyon gin-organisar agod magbantala sing maayong balita. Sa bisan diin nagkadto ang mga gintoton-an, ginbantala nila ang Ginharian sang Dios.—Mateo 4:​17, 23; 10:​1-16; 28:​19, 20; Lucas 4:​43, 44; 8:​1; 10:​1-9; Binuhatan 1:​8; 4:​31; 5:​42; 8:​12; 19:​8; 28:​23, 30, 31; Roma 10:​9, 10, 14.

Sa tagna ni Jesus tuhoy sa katapusan sang sistema sang mga butang, sia nagsiling: “Iwali ining maayong balita sang Ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” Ining pagbantala amo ang una nga obligasyon sang Cristianong kongregasyon karon.—⁠Mateo 24:​14; Marcos 13:​10.

Sa bug-os nga kalibutan, ang tanan nga kongregasyon sang mga Saksi ni Jehova naorganisar sa pagtuptop sang ila lokal nga duog sing sistematiko paagi sa pagbantala sing maayong balita sang Ginharian sang Dios. Agod mahimo ini sing mahim-ong, sa tagsa ka pungsod ang sanga talatapan sang Watch Tower Society nagaasayn sa tagsa ka kongregasyon sing duog nga panaksihan. Ginabahinbahin sang kongregasyon ina nga teritoryo nga gin-asayn, kag ginahatag sa mga may salabton agod mapat-od nga ang mga tawo maduaw.—1 Corinto 14:​33, 40.

Masami nga ginakadtoan sang mga Saksi ang mga tawo paagi sa pagpamalaybalay. Sa ila mga miting sa kongregasyon, ang mga Saksi ni Jehova ginahanas sa paghimo sing malip-ot nga pagtanyag sang mensahe sang Ginharian sa mga balay, nga ginagamit ang ila Biblia. Ang mga Saksi nagadala sing literatura sa Biblia agod ibilin sa mga tagbalay nga luyag  makahibalo sing dugang pa tuhoy sa Pulong sang Dios.

Agod mahatagan ang tanan sa teritoryo sing kahigayunan sa pagpamati sa importante nga mensahe sang Ginharian, ang mga Saksi nagatipig sing detalyado nga rekord samtang nagapamalaybalay sila, ginapakita kon sa diin ang mga tawo wala sa balay ukon sa diin nga bangod sa pila ka rason indi posible ang pagpanaksi sing maid-id. Ang pagduaw himuon sa iban nga tion. Kon may interes nga ginpakita, ginalista ini, kag ang mga Saksi nagabalik agod maghatag sing dugang pa nga impormasyon tuhoy sa Kasulatan. Kon ginahandum, ang regular nga pagtuon sa Biblia hiwaton. Ini tanan ginahimo nga wala sing bayad.

Ang mga Saksi ni Jehova nagatanyag man sing mga magasin sa mga nagalalabay sa kalye. Sa sining paagi mahambal nila ang madamo nga tawo nga mahimo indi nila maabtan sa balay. Ginahimo ang matuod gid nga panikasog agod malab-ot ang tanan nga magapamati.—Binuhatan 17:17; Bugna 14:​6, 7; 22:​17.

Ngaa padayon sa pagduaw ang mga Saksi bisan pa indi interesado ang kalabanan? Nasapwan nga ang kahimtangan sang mga indibiduwal masami nga nagabalhin kag nagabaton sila sa masunod nga pagduaw, ukon mahimo nga mahambal ang iban nga katapo sang panimalay nga magapakita sing interes.

Si Jesus nagsiling sa iya mga disipulo: “Padayon, nian, nga pangitaa anay ang ginharian kag ang iya pagkamatarong.” Ang pagbantala sing Ginharian sang Dios importante gid sa aton pagpangita anay sa Ginharian, kag ginahimo ini sang mga Saksi ni Jehova subong importante gid nga tulumuron sa ila kabuhi.—Mateo 6:​33; 2 Timoteo 4:2.

● Ano nga hilikuton ni Jesus kag sang unang mga Cristiano ang gintagna nga himuon man sa aton adlaw?

● Paano ginaorganisar ang pagbantala nga hilikuton sang mga Saksi ni Jehova?

● Ngaa padayon nga nagaduaw ang mga Saksi sa mga tawo bisan pa indi interesado ang kalabanan?

[Mga piktyur sa pahina 16, 17]

Mga Saksi ni Jehova nga nagabantala sing Ginharian sang Dios sa nanuhaytuhay nga mga pungsod

Thailand

Mexico

Netherlands

Korea

Curaçao

Ghana

Britanya

Australia