Ginahingabot Bangod sang Pagkamatarong

Mahimo mabatian ninyo gikan sa mga abyan kag mga paryente nga ang mga Saksi ni Jehova may problema sa kasugoan, nga sila ginadumilian sang pila ka pangulohan, ukon nga sila malain nga mga tawo. Ngaa may amo sini nga hambal batok sa ila?

Indi bangod wala ginatahod sang mga Saksi ang kasugoan kundi bangod ginasunod nila ang mga tikang ni Jesus. Si Jesus nagsiling sa iya mga gintoton-an nga pakahuy-an sila sang mga tawo, hingabuton sila, kag binutig nga hambalan sing tanan nga sahi sang malaut nga butang. Amo sini bangod ang puno nga manugpamatok sang Dios, si Satanas, amo ang dios sining kalibutan, kag luyag niya nga ang mga tawo magtalikod gikan sa pag-alagad sa Dios.—Mateo 5:​10-12; 10:​16-22, 34-39; 24:​9, 10; Juan 15:​17–16:​3; 2 Timoteo 3:​12; 1 Pedro 5:​8; Bugna 12:​17.

Sang gindakop ang mga apostoles kag gindala sa korte, ang kabangdanan indi bangod mga kriminal sila, masingki nga mga tawo, ukon mga rebelde. Ang kabangdanan amo nga ginbantala nila ang maayong balita. Sang gin-apelar ni apostol Pablo ang iya kaso sa mataas nga korte, ang katuyoan amo agod apinan kag tukuron sing legal ang kinamatarong sang mga Cristiano sa pagbantala sing maayong balita.—Binuhatan 4:​18-20; 5:​28-32; Filipos 1:​7.

Sa karon, ang mga Saksi ni Jehova masinulundon sa kasugoan nga mga Cristiano nga nagabayad sang ila buhis kag nagatahod sa awtoridad. Ginabayad nila kay Cesar ang mga butang nga iya ni Cesar kag sa Dios ang mga butang nga iya sang Dios. Kon sila nagapamatok sa awtoridad sang pangulohan, ang kabangdanan amo nga wala ginakilala sang pangulohan ang ila pagbantala nga hilikuton, ukon bangod sang ila neutral nga tindog sa mga hulusayon sa ulot sang mga pungsod. Apang sa sini dapat nga ilugon sang mga Saksi ni Jehova ang tindog anay sang mga apostoles, nga nagsiling: “Dapat namon tumanon ang Dios subong manuggahom sa baylo sang mga tawo.”—Binuhatan 5:​29; Marcos 12:​17; Juan 18:​36; Tito 3:​1, 2.

Wala ginapangita sang mga Saksi ni Jehova ang paghingabot kundi mas luyag nila nga mangin kalma kag malinong ang ila pagkabuhi. Apang, kon bangod sang ila pagsunod sa kasugoan sang Dios kag sa huwaran ni Jesucristo ginahingabot sila, malipay sila sa pagbatas sini.—Mateo 5: 10-12; Binuhatan 5:​40, 41; 1 Corinto 4:​12; 1 Timoteo 2:​2; 1 Pedro 3:​14, 15; 4:​12-16.

● Ngaa ginapakahuy-an kag ginahingabot ang mga alagad ni Jehova?

● Ngaa kon kaisa ginapamatokan sang awtoridad sang pangulohan ang mga Saksi ni Jehova, subong anay sa Cristianong mga apostoles?

● Paano ginatamod sang mga alagad ni Jehova ang paghingabot?

[Mga piktyur sa pahina 29]

Si Jesus gindala sa atubangan ni Pilato kag si apostol Pablo ginbilanggo bangod sang pagbantala sang Ginharian sang Dios