Ginasakdag sa Pinansial sang Boluntaryo nga mga Amot

Ang tanan nga hilikuton nga ginlaragway na ginasakdag sang boluntaryo nga mga manugpangabudlay, sa amo indi daku ang gasto. Ang pamalaybalay nga ministeryo kag ang pagpanagtag sing literatura boluntaryo nga ginahimo sang mga Saksi ni Jehova. Sila ang nagabayad sang ila kaugalingon nga mga gasto. Ang mga gulang nga nagadumala sa mga kongregasyon, kag ginabuligan sang ministeryal nga mga alagad, wala ginasuweldohan sa ila serbisyo. Sila ang nagabayad sang ila kaugalingon nga mga gasto.

Bisan ang mga katapo sang Nagadumala nga Hubon kag ang tanan nga iban pa nga nagapangabudlay sing bug-os tion sa paghanda kag sa pagbalhag sing mga Biblia kag literatura sa Biblia nagabaton lamang sang ila hulot kag pagkaon kag diutay nga reimbursement para sa mga gasto. Amo man sa bug-os tion nga nagalakbay nga mga manugtatap.

Ang amon literatura ginabalhag agod buligan ang mga tawo nga nagapakita sing matuod nga interes sa Biblia. Ang mga bili sang mga materyales, pag-imprinta, kag pagpadala ginakobrehan sang boluntaryo nga mga donasyon sang interesado nga mga tawo kag ginadugangan sang mga amot, mga palanublion, kag iban pa nga mga butang, nga ginahatag sang mga Saksi ni Jehova.

Sa tanan nga miting sang mga Saksi ni Jehova, sa lokal ukon sa mga asambleya, may yara mga kahon alamutan para sa luyag mag-amot. Wala sing koleksion nga ginahimo. Wala sing buhis ukon paghatag sing ikapulo nga dapat bayaran. Subong ginasiling sa Kasulatan, ang tagsa makaamot suno sa iya ginpamat-od sa iya tagipusuon.—2 Corinto 8:​12; 9:​7.

● Paano ang tanan nga hilikuton sang mga Saksi ni Jehova ginasakdag sa pinansial?