Pagkalipay kag Pagdayaw sa Dios sa mga Asambleya

Kutob sang maaga nga bahin sang katuigan 1880 nakita na sang mga Estudyante sang Biblia nga, dugang sa lokal nga mga miting, mapuslanon nga makilala man nila ang ila mga masigkatumuluo gikan sa iban nga mga duog. Gani naghimus sila sing tuigan nga mga kombension sang mga Estudyante sang Biblia gikan sa bug-os nga Estados Unidos, kag sang ulihi gikan man sa Canada. Mga tion ini sang espirituwal nga pagpabaskog; nga may bugana nga instruksion gikan sa Biblia nga ginaaman sa sulod sang pila ka adlaw, kag ang tanan makalilipay nga nagapalig-onay. Ang pagbawtismo sa bag-ohan nga mga tumuluo nangin regular nga bahin sang mga kombension. Ang mga kombension gingamit man sa paghatag sing kapin kasangkad nga pagpanaksi sa publiko.—Roma 1:​11, 12.

May yara man sa karon ang mga Saksi ni Jehova sing regular nga mga asambleya. Sa masami mga 18 pa 25 ka kongregasyon ang ginagrupo sa ginatawag nga mga sirkito, nga ginaduaw, ukon ginaalagdan, sang nagalakbay nga mga manugtatap. Makaduha kada tuig, ginahimus ang mga asambleya nga sa diin ang mga kongregasyon sa isa ka sirkito, ukon ang bahin sina nga sirkito, nagatipon sa Sabado kag/ukon Domingo.

Makaisa kada tuig, ang mas daku nga tatlo- ukon apat-ka-adlaw nga mga kombension, ginatawag nga distrito nga mga kombension, ginahimus sa tagsa ka pungsod, nga sa diin linibolibo ang makatipon sa isa ka duog. Ining mga kombension nagaaman sing espirituwal nga pagpalig-on para sa mga Saksi ni Jehova kag sa iban pa nga interesado sa ila hilikuton, kag nagahatag man ini sing panaksi sa publiko.

Ang programa para sa sining mga asambleya kag mga kombension ginahanda sang Nagadumala nga Hubon sang mga Saksi ni Jehova kag ginapasad sa mga kinahanglanon sang mga Saksi sa bug-os nga kalibutan. Ginahuman ini sing mga pamulongpulong, mga paghinun-anon, kag matuod-sa-kabuhi nga mga presentasyon nga ginatawag mga demonstrasyon, nga ginapresentar sang nagalakbay nga mga manugtatap kag kalipikado nga mga Saksi gikan sa mga kongregasyon. Ang iban nagasaysay man sang ila mga eksperiensia kon paano nila gin-atubang ang hangkat sang pagkabuhi subong mga Cristiano sa isa ka didiosnon nga kalibutan ukon kon ano nga mga resulta ang ila natigayon sa ministeryo. Sa distrito nga mga kombension may yara dugang nga bahin​—⁠buhi nga mga presentasyon sa porma sang mga drama sa Biblia ukon mga drama sa modernong-adlaw nga mga danyag, nga nagalaragway kon paano malandas sang mga Cristiano ang mga problema nga ila ginaatubang karon.

May yara man pagkaon kag mga pamahaw nga ginaaman. Nagatugot ini para sa makalilipay nga pag-upuray kon wala sing sesyon. Ang tanan nga hilikuton sa pagpalakat sini ginahimo sang mga boluntaryo gikan sa mga Saksi ni Jehova. Ang bili sang pasilidad kag sang iban pa nga gasto ginakobrehan sang boluntaryo nga mga amot. Wala sing bayad ang pagsulod, wala sing koleksion nga ginahimo.

Mahibaloan ninyo gikan sa lokal nga kongregasyon sang mga Saksi ni Jehova kon san-o kag sa diin ining mga pagtinipon ginaiskedyul sa inyo duog. Ihatag man ang impormasyon nahanungod sa mga kahimusan sa paglakbay, subong man kon paano makatigayon sing mga dalayonan.

Ining mga asambleya kag mga kombension nagabulig sa mga Saksi ni Jehova kag sa tanan nga nagapakig-upod sa ila nga makita ang sa guwa sang ila lokal nga kongregasyon kag apresyahon ang bug-os nga katilingban sang ila kauturan sa kalibutan.​—⁠1 Pedro 2:​17.

● Anong mga benepisyo ang natigayon sang unang mga Estudyante sang Biblia gikan sa ila mga kombension?

● Ilaragway ang kahimusan kag programa para sa sirkito nga mga asambleya kag distrito nga mga kombension.

 [Mga piktyur sa pahina 18]

Drama sa Biblia sa distrito nga kombension, Estados Unidos

Internasyonal nga kombension, Poland

Internasyonal nga kombension, Argentina

Sirkito nga asambleya, Hapon

Mga delegado nagakuha sing literatura sa Biblia, Switzerland

Bawtismo sa internasyonal nga kombension, South Africa

Pagpaguwa sing bag-o nga publikasyon sa Biblia, Canada

Mga delegado sa kombension nagaamba, Espanya