Magkalipay sa Pagkabuhi Subong Pamilya

Mangin malipayon gid bala ang mga pamilya?

Paano ini posible?

 May nahibaluan ka bala nga pamilya nga subong ka nahiusa kag malipayon sa nakita mo sa sining tract? Ang mga pamilya bisan diin wala nahiusa. Ang diborsio, pagkawalay kalig-unan sa trabaho, mga problema sang nagaisahanon nga ginikanan, kapaslawan​—ini tanan nagaamot sa krisis. Ang isa ka eksperto tuhoy sa pagkabuhi subong pamilya nagpanalabiton: “Sa karon, ang mga tagna tuhoy sa pagkalusod sang pamilya nahibaluan sang tanan.”

Ngaa ang mga pamilya sa karon ginatublag sang mabug-at nga mga problema? Paano kita magkalipay sa pagkabuhi subong pamilya?

Kon Paano Nagsugod ang Pamilya

Agod masabat ining mga pamangkot, dapat naton mahibaluan ang ginhalinan sang pag-asawahay kag sang pamilya. Kon ini may Ginhalinan​—isa ka Manunuga—​ang mga katapo sang pamilya dapat magkadto sa iya para sa panuytoy, bangod pat-od gid nga nakahibalo sia sang labing maayo sa kon paano magkalipay sing bug-os sa pagkabuhi subong pamilya.

Sing makawiwili, madamo ang nagapati nga ang kahimusan sa pamilya wala sing Ginhalinan. Ang The Encyclopedia Americana nagasiling: “Ang iban nga mga eskolar nahuyog sa pag-usoy sang ginhalinan sang pag-asawahay sa mga kahimusan sang pagparis sa mga hayop nga kubos sa tawo.” Apang, si Jesucristo nagpamulong tuhoy sa pagtuga sa lalaki kag babayi. Ginbalikwat niya subong awtoridad ang  naunang rekord sa Biblia kag nagsiling: “Ang gintingob sang Dios dili pagbulagon sang tawo.”​—Mateo 19:​4-6.

Gani husto si Jesucristo. Ang intelihente nga Dios nagtuga sang nahaunang mga tawo kag naghimos sing malipayon nga pagkabuhi subong pamilya. Ginkasal sang Dios ang nahaunang mag-asawa kag nagsiling nga ang lalaki “magahiusa sa iya asawa kag mangin isa sila ka unod.” (Genesis 2:​22-24) Mahimo bala, nian, nga ang kabangdanan sang mga problema karon sa pamilya amo ang pagpangita sing estilo sang kabuhi nga nagalapas sang mga pagsulundan nga ginpahamtang sang Manunuga sa iya Pulong, ang Biblia?

Diin ang Dalan Padulong sa Kadalag-an?

Subong sang nahibaluan mo sa walay duhaduha, ang modernong kalibutan  nagapadaku sang interes sa kaugalingon kag pagkanaayawan sa kaugalingon. “Ang kakagod maayo,” siling sang isa ka financier sa manuggradwar nga klase sa kolehiyo sa Estados Unidos. “Mahimo ka magmakagod kag sa gihapon magabatyag sing maayo tuhoy sa imo kaugalingon.” Apang ang pagpangita sing materyal nga mga pagkabutang wala nagadul-ong sa kadalag-an. Ang materyalismo, sa katunayan, amo ang isa sang pinakadaku nga katalagman sa pagkabuhi subong pamilya bangod nagaguba ini sang tawhanon nga mga kaangtanan kag nagaubos sang tion kag kuwarta sang mga tawo. Sa kabaliskaran, binagbinaga kon paano ang duha lamang ka hulubaton sa Biblia nagabulig sa aton nga makita kon ano ang importante sa kalipay.

“Maayo pa ang pagkaon nga mga utan diin may gugma sangsa pinatambok nga baka kag may dumot sa sini.”

“Maayo pa ang hungit nga mamala kag may kalinong sa sini sangsa balay nga puno sang sinalusalo nga may sinuay.”

Hulubaton 15:​17; 17:​1, “Today’s English Version.”

Epektibo, indi bala? Hunahunaa lamang kon daw ano ka tuhay ang kalibutan kon amo ini ang ginauna sang tagsa ka pamilya! Ang Biblia nagahatag man sang hamili nga panuytoy sa kon paano dapat magtamdanay sa isa kag isa ang mga katapo sang pamilya. Binagbinaga lamang ang pila ka panuytoy nga ginahatag sini.

Mga Bana: ‘Higugmaa ang inyo mga asawa subong sang inyo kaugalingon nga mga lawas.’​—Efeso 5:​28-30.

Simple lamang, apang praktikal katama! Ang Biblia nagasugo man sa bana nga ‘hatagan sing dungog ang iya asawa.’ (1 Pedro 3:7) Ginahimo niya ini paagi sa paghatag sa iya sing pinasahi nga igtalupangod, lakip ang pagpalangga, paghangop, kag pagpasalig. Ginapabilihan man niya ang iya mga opinyon kag ginapamatian sia. (Ipaanggid ang Genesis 21:12.) Wala ka bala nagaugyon nga magabenepisyo ang pamilya kon ginatamod sang bana ang iya asawa nga may kabalaka, subong sang luyag niya nga tamdon sia?​—Mateo 7:12.

 Mga Asawa: ‘Tahura ang [imo] bana.’​—Efeso 5:33.

Ang asawa nagaamot sa kalipay sang pamilya paagi sa pagbulig sa iya bana sa pagtuman sang iya mga salabton. Amo gid sini ang katuyuan, kay gin-aman sang Dios ang asawa nga mangin “kabulig nga bagay sa iya, subong timbang niya.” (Genesis 2:18) Maapresyar mo bala ang pagpakamaayo sa pagkabuhi subong pamilya kon ang asawa nagapakita sing pagtahod sa iya bana paagi sa pagsakdag sa iya mga desisyon kag pagkooperar sa iya nga malab-ot ang mga tulumuron sang pamilya?

Mga Magtiayon: “Ang mga bana kag mga asawa dapat magmatutom sa kada isa.”​—Hebreo 13:​4, TEV.

Kon sila matutom, ang pagkabuhi subong pamilya magabenepisyo gid. Ang panglahi masami nagaguba sang pamilya. (Hulubaton 6:​27-29, 32) Maalamon, nian, nga ang Biblia nagalaygay: “Magkalipay sa imo asawa kag magkasadya sa babayi nga ginpakaslan mo . . . Ngaa bala ihatag mo ang imo gugma sa iban nga babayi?”​—Hulubaton 5:​18-20, TEV.

Mga Ginikanan: “Hanasa [ang imo mga anak] sa dalanon nga dapat [nila] paglaktan.”​—Hulubaton 22:6.

Kon ang mga ginikanan magahatag sing tion kag igtalupangod sa mga kabataan, ang pagkabuhi subong pamilya pat-od nga magauswag. Busa, ang Biblia nagalaygay sa mga ginikanan nga tudluan ang ila mga kabataan sing husto nga mga prinsipio ‘sa nagalingkod sila sa ila balay kag sa nagalakat sila sa dalanon kag sa nagahigda sila kag sa nagabangon sila.’ (Deuteronomio 11:19) Ang Biblia nagasiling man nga ang mga ginikanan dapat magpakita sang ila gugma sa ila kabataan paagi sa pagdisiplina sa ila.​—Efeso 6:4.

Mga Anak: “Mga anak, tumana ang inyo mga ginikanan sa Ginuo.”​—Efeso 6:1.

Matuod, sa sining malinapason nga kalibutan, indi pirme mahapos ang magtuman sa inyo mga ginikanan. Apang, wala ka bala nagaugyon nga maalamon nga himuon kon ano ang ginasugo sa aton sang Ginhalinan sang pamilya? Nakahibalo sia sang labing maayo agod ang pagkabuhi sang aton pamilya labi nga magmalipayon. Gani maghimulat sa pagtuman sa inyo mga ginikanan. Mangin determinado sa paglikaw sang madamong pagsulay sa kalibutan nga himuon ang malain.​—Hulubaton 1:​10-19.

 Kon tubtob diin ginasunod sang tagsa ka katapo sang pamilya ang laygay sang Biblia, ang pagkabuhi subong pamilya magabenepisyo. Indi lamang ang pamilya magakalipay sing maayo pa nga kabuhi sa karon kundi may paglaum ini sang isa ka makalilipay nga palaabuton sa bag-ong kalibutan nga ginsaad sang Dios. (2 Pedro 3:​13; Bugna 21:​3, 4) Gani himua nga batasan ang pagtuon sing tingob sa Biblia! Nasapwan sang minilyon ka pamilya sa bug-os nga duta ang panuytoy nga ginhatag sa libro nga Ang Sekreto sang Kalipay sa Pamilya nga isa ka daku nga bulig.

Luwas kon tuhay ang ginasambit, ang tanan nga mga ginbalikwat sa Kasulatan gikan sa New World Translation of the Holy Scriptures.