“Agod Indi Kamo Magsulod sa Pagsulay”

“Magpadayon kamo nga nagabantay kag mangamuyo sing padayon, agod indi kamo magsulod sa pagsulay.”—MATEO 26:41, NW.

 ANG pag-ipit tuman kabaskog—indi katulad sang iya naagihan na. Si Jesucristo, ang Anak sang Dios, malapit na sa katapusan sang iya dutan-on nga kabuhi. Narealisar ni Jesus nga sa indi madugay pagadakpon sia, pakamalauton sa kamatayon, kag ilansang sa usok sang pag-antos. Nahibaluan niya nga ang iya tagsa ka desisyon kag buhat magaapektar sa ngalan sang iya Amay. Nahibaluan man ni Jesus nga ang palaabuton sang katawhan nasandig sa iya himuon. Bangod sini tanan nga pag-ipit, ano ang iya ginhimo?

2 Nagkadto si Jesus sa hardin sang Getsemane upod ang iya mga disipulo. Amo ini anay ang paborito nga kaladtuan ni Jesus. Didto, nagpalayo sia diutay gikan sa iya mga disipulo. Sang isahanon na sia, nagpangayo sia sing kusog gikan sa iya langitnon nga Amay, nga ginapabutyag ang iya tagipusuon sa hugot nga pangamuyo—indi sing makaisa lamang kundi sing makatlo ka beses. Bisan pa himpit, wala ginbatyag ni Jesus nga maatubang niya ang pag-ipit sa iya kaugalingon lamang.—Mateo 26:36-44.

3 Sa karon, ginaipit man kita. Sa una nga bahin sini nga brosyur, ginbinagbinag naton ang pamatuod nga nagakabuhi na kita sa hingapusan nga mga adlaw sining malaut nga sistema. Nagabaskog pa ang mga pagsulay kag mga pag-ipit sang kalibutan ni Satanas. Ang mga desisyon kag mga buhat sang bisan sin-o sa aton nga nagapangangkon nga nagaalagad sa matuod nga Dios may epekto sa iya ngalan kag sa aton indibiduwal nga paglaum para sa kabuhi sa iya bag-ong kalibutan. Ginahigugma naton si Jehova. Luyag naton ‘magpadayon tubtob sa katapusan’—ang katapusan sang aton kabuhi ukon ang katapusan sining sistema, kon ano man ang mauna. (Mateo 24:13) Apang paano kita makapabilin nga alisto bangod sang pagkahilingagawon sang tion kag makapadayon sa pagbantay?

4 Bangod nahibaluan niya nga ang iya mga disipulo—sang una kag karon—mapaidalom man sa pag-ipit, si Jesus nagpalig-on: “Magpadayon kamo nga nagabantay kag mangamuyo sing padayon, agod indi kamo magsulod sa pagsulay.” (Mateo 26:41, NW) Ano ang kahulugan sadtong mga pulong para sa aton karon? Ano nga pagsulay ang ginaatubang mo? Kag paano ikaw ‘padayon nga makabantay’?

Pagsulay nga Himuon ang Ano?

5 Kita tanan nagaatubang sa adlaw-adlaw sang pagsulay nga madaug sang “siod sang Yawa.” (2 Timoteo 2:26) Ang Biblia nagapaandam sa aton nga ginatumod gid ni Satanas ang mga sumilimba ni Jehova. (1 Pedro 5:8; Bugna 12:12, 17) Sa anong katuyuan? Indi naman agod patyon kita. Indi mangin kadalag-an para kay Satanas kon mapatay kita nga matutom sa Dios. Nahibaluan ni Satanas nga sa sibu nga tion ni Jehova, dulaon Niya ang kamatayon paagi sa pagkabanhaw.—Lucas 20:37, 38.

6 Luyag laglagon ni Satanas ang bilidhon pa sangsa aton kabuhi karon—ang aton integridad sa Dios. Desperado na si Satanas sa pagpamatuod nga mapatalikod niya kita gikan kay Jehova. Busa, kon masulay niya kita nga mangin di-matutom—mag-untat sa pagbantala sing maayong balita ukon sikwayon ang Cristianong mga talaksan—mangin kadalag-an ina para kay Satanas!  (Efeso 6:11-13) Gani ginasulay kita sang Panulay.—Mateo 4:3.

7 Lainlain ang “malimbungon nga mga taktika” ni Satanas. (Efeso 6:11, Jewish New Testament) Mahimo nga sulayon niya kita paagi sa materyalismo, kahadlok, pagduhaduha, ukon pagpangita sing kalipayan. Apang ang isa sang iya epektibo gid nga mga metodo amo ang pagpaluya sang aton buot. Subong isa ka malalangon nga oportunista, nakahibalo sia nga mahimo magluya ang aton buot kon madulaan kita sing paglaum, sa amo madali kita masulay. (Hulubaton 24:10) Gani labi na kon ‘mahanog’ kita sa emosyon, ginasulay niya kita nga mag-untat.—Salmo 38:8.

8 Samtang nagalapit pa kita sa katapusan nga mga adlaw, daw nagadugang ang mga kabangdanan nga nagapaluya sang buot, kag indi kita puera sa sini. (Tan-awa ang kahon nga “Pila ka Kabangdanan Sang Pagluya Sang Buot.”) Bisan ano man ang kabangdanan, ang pagluya sang buot makaubos sang aton kusog. Ang ‘paghimulos sang kahigayunan’ para sa espirituwal nga mga obligasyon—lakip ang pagtuon sa Biblia, pagtambong sa Cristianong mga miting, kag pagpakigbahin sa ministeryo—mahimo mangin isa ka hangkat kon ikaw lapyo na sa pisikal, mental, kag emosyon. (Efeso 5:15, 16) Dumduma nga luyag sang Panulay nga mag-untat ka na. Apang indi karon ang tion nga maghinay ka ukon magbatyag nga ang aton tion indi gid hilingagawon! (Lucas 21:34-36) Paano mo mapamatukan ang pagsulay kag padayon nga magbantay? Binagbinaga ang apat ka panugda nga makabulig.

“Mangamuyo Sing Padayon”

9 Magsandig kay Jehova paagi sa pangamuyo. Dumduma ang halimbawa ni Jesus sa hardin sang Getsemane. Sang nagabatyag sing daku nga kahuol sa emosyon, ano ang iya ginhimo? Nagpangayo sia sing bulig kay Jehova, nga nagapangamuyo gid sing hugot amo kon ngaa “ang iya balhas nangin kaangay sang dalagkung tinulo sang dugo nga nagatupa sa duta.” (Lucas 22:44) Hunahunaa ina. Kilala gid ni Jesus si Satanas. Nakita ni Jesus gikan sa langit ang tanan nga mga pagsulay nga ginagamit ni Satanas sa pagsiod sa mga alagad sang Dios. Apang, wala ginbatyag ni Jesus nga mahapos niya atubangon ang bisan ano nga mahimo ibutang sang Panulay sa atubangan niya. Kon ginbatyag sang himpit nga Anak sang Dios ang kinahanglanon nga mangamuyo agod mangayo sa Dios sing bulig kag kusog, labi na gid kita!—1 Pedro 2:21.

10 Dumduma man nga sa tapos mapalig-on ang iya mga disipulo nga “mangamuyo sing padayon,” si Jesus nagsiling: “Ang espiritu matuod handa, apang ang unod maluya.” (Mateo 26:41) Kay sin-o unod ang ginapatuhuyan ni Jesus? Sa pagkamatuod indi ang iya kaugalingon; wala sing maluya sa iya himpit nga tawhanon nga lawas. (1 Pedro 2:22) Apang tuhay ang iya mga disipulo. Bangod sang napanubli nga pagkadihimpit kag makasasala nga mga huyog, nagakinahanglan gid sila sing bulig agod mapamatukan ang pagsulay.  (Roma 7:21-24) Amo kon ngaa ginpalig-on niya sila—kag ang tanan nga matuod nga mga Cristiano pagkatapos nila—nga mangamuyo agod mangayo sing bulig sa pag-atubang sa pagsulay. (Mateo 6:13) Ginasabat ni Jehova ina nga mga pangamuyo. (Salmo 65:2) Paano? Sa di-magkubos duha ka paagi.

11 Una, ginabuligan kita sang Dios nga makilala ang mga pagsulay. Ang mga pagsulay ni Satanas daw subong sang mga tiglapak sa madulom nga banas. Kon indi mo makita ini, mahimo nga masiod ka. Paagi sa Biblia kag pasad sa Biblia nga mga publikasyon, ginaiwagan ni Jehova ang mga siod ni Satanas, agod nga indi kita masiod. Sa sulod sang mga tinuig, ang naimprinta nga mga literatura kag mga programa sa mga kombension kag mga asambleya sulitsulit nga nagpaalisto sa aton sa mga katalagman subong sang kahadlok sa tawo, seksuwal nga imoralidad, materyalismo, kag iban pa nga mga pagsulay ni Satanas. (Hulubaton 29:25; 1 Corinto 10:8-11; 1 Timoteo 6:9, 10) Indi bala nga nagapasalamat ka kay Jehova bangod ginapaalisto niya kita sa mga pahito ni Satanas? (2 Corinto 2:11) Ina tanan nga mga paandam amo ang sabat sa imo mga pangamuyo nga buligan ka sa pagpamatok sa pagsulay.

12 Ikaduha, ginasabat ni Jehova ang aton mga pangamuyo paagi sa paghatag sa aton sing kusog nga mabatas ang pagsulay. Ang iya Pulong nagasiling: “Ang Dios . . . indi magtugot nga sulayon kamo labaw sa inyo masarangan, kundi kaupod sang pagsulay magahatag man sing lulutsan.” (1 Corinto 10:13) Indi gid magtugot ang Dios nga ang pagsulay mangin tuman kabudlay amo nga kulang kita sing espirituwal nga kusog sa pagpamatok—kon padayon kita nga magsandig sa iya. Paano sia ‘nagahatag sing lulutsan’ para sa aton? Nagahatag sia sing ‘balaan nga espiritu sa mga nagapangayo sa iya.’ (Lucas 11:13, NW) Ina nga espiritu mahimo makabulig sa aton sa pagdumdom sang mga prinsipio sa Biblia nga makapabakod sang aton determinasyon nga himuon ang husto kag makabulig sa aton sa paghimo sing maalamon nga mga desisyon. (Juan 14:26; Santiago 1:5, 6) Makabulig ini sa aton sa pagpakita sang mga kinaiya gid nga ginakinahanglan naton agod madaug ang malain nga mga huyog. (Galacia 5:22, 23) Ang espiritu sang Dios magapahulag pa gani sa mga masigkatumuluo nga ‘mangin nagapalig-on nga bulig sa aton.’ (Colosas 4:11, NW) Wala ka bala nagapasalamat nga ginasabat ni Jehova sa sining mahigugmaon nga mga paagi ang imo pagpangayo sing bulig paagi sa pangamuyo?

Mangin Realistiko sa Imo mga Ginapaabot

13 Agod padayon nga magbantay, dapat kita mangin realistiko sa aton mga ginapaabot. Bangod sang mga pag-ipit sang kabuhi, kita tanan ginatak-an na kon kaisa. Apang dapat naton dumdumon nga wala gid magsaad ang Dios nga ang aton kabuhi sa sining daan nga sistema wala sing mga problema. Bisan sang panahon nga ginsulat ang Biblia, ang mga alagad sang Dios nag-atubang sing mga problema, lakip ang paghingabot, kaimulon, depresyon, kag balatian.—Binuhatan 8:1; 2 Corinto 8:1, 2; 1 Tesalonica 5:14; 1 Timoteo 5:23.

14 May mga problema man kita sa karon. Mahimo nga ginahingabot kita, nagapalibog bangod sang kapigaduhon, nagapakigbato sa depresyon, nagamasakit, kag nagaantos sa iban nga mga paagi. Kon amligan kita ni Jehova sing milagruso gikan sa tanan nga kahalitan, indi bala ina magahatag kay Satanas sing basihan nga yagutaon si Jehova? (Hulubaton 27:11) Ginatugutan ni Jehova nga sulayon kag tilawan ang iya mga alagad, kon kaisa tubtob sa punto nga mapatay sila sa mga kamot sang mga manugpamatok.—Juan 16:2.

15 Ano, nian, ang ginsaad ni Jehova? Subong sang nasambit na kaina, nagsaad sia nga indi niya pagtugutan nga sulayon kita labaw sa aton masarangan, kon magsalig kita sa iya sing bug-os. (Hulubaton 3:5, 6) Paagi sa iya Pulong, iya espiritu, kag iya organisasyon, ginaamligan niya kita sa espirituwal, sa amo ginabuligan kita nga maamligan ang aton kaangtanan sa iya. Gani, bangod naamligan ina nga kaangtanan, magadaug kita gihapon bisan pa mapatay kita. Wala sing bisan  ano—bisan ang kamatayon—ang makapugong sa Dios sa pagpadya sa iya matutom nga mga alagad. (Hebreo 11:6) Kag sa bag-ong kalibutan, nga malapit na karon, pat-od nga tumanon ni Jehova ang tanan nga matahom nga mga pagpakamaayo nga ginsaad niya para sa mga nagahigugma sa iya.—Salmo 145:16.

Dumduma ang mga Hulusayon

16 Agod makabatas tubtob sa katapusan, dapat naton dumdumon ang importante nga mga hulusayon nga nadalahig sa pagtugot sang Dios sa kalautan. Kon ang aton mga problema daw indi na masarangan kon kaisa amo nga daw mangampo na kita, dapat naton pahanumdumon ang aton kaugalingon nga ginhangkat ni Satanas ang pagkamatarong sang pagkasoberano ni Jehova. Ginduhaduhaan man sang Manuglimbong ang debosyon kag integridad sang mga sumilimba sang Dios. (Job 1:8-11; 2:3, 4) Yadto nga mga hulusayon kag ang paagi nga ginpili ni Jehova sa paglubad sini mas importante sangsa bisan sin-o sa aton subong mga indibiduwal. Ngaa?

17 Ang temporaryo nga pagtugot sang Dios sa kabudlayan naghatag sing tion sa iban agod batunon ang kamatuoran. Hunahunaa ini: Nag-antos si Jesus agod makatigayon kita sing kabuhi. (Juan 3:16) Wala bala kita nagapasalamat sa sina? Apang handa bala kita nga magbatas sa diutay pa nga tion agod makatigayon man sing kabuhi ang iban? Agod makabatas kita tubtob sa katapusan, dapat naton kilalahon nga ang kaalam ni Jehova mas mataas sangsa aton kaalam. (Isaias 55:9) Tapuson niya ang kalautan sa tion nga sa banta niya amo ang pinakamaayo nga tion sa paghusay sa mga hulusayon sing dayon kag para sa aton dayon nga kaayuhan. Sa pagkamatuod, may mas maayo pa bala nga paagi sa paglubad sa mga hulusayon? Wala sing inhustisya sa Dios!—Roma 9:14-24.

“Magpalapit sa Dios”

18 Agod indi naton malipatan ang pagkahilingagawon sang tion, dapat kita magpabilin nga suod kay Jehova. Indi gid pagkalimti nga ginahimo ni Satanas ang tanan nga masarangan niya agod gub-on ang aton maayong kaangtanan kay Jehova. Ginapapati kita ni Satanas nga ang katapusan indi gid magaabot kag wala sing pulos ang pagbantala sing maayong balita ukon ang pagsunod sa mga talaksan sang Biblia. Apang “butigon sia kag amay sang kabutigan.” (Juan 8:44) Dapat kita mangin determinado nga ‘sumpungon ang yawa.’ Indi gid naton pagpasapayanan ang aton kaangtanan kay Jehova. Ang Biblia mahigugmaon nga nagapalig-on sa aton: “Magpalapit sa Dios kag sia magapalapit sa inyo.” (Santiago 4:7, 8) Paano ikaw makapalapit kay Jehova?

19 Importante ang mapangamuyuon nga pagpamalandong. Kon daw indi mo na masarangan ang mga pag-ipit sang kabuhi, mangamuyo sing tinagipusuon kay Jehova. Mas madali mo makita ang iya sabat sa imo mga pangabay kon mangin espesipiko ka. Ang sabat mahimo nga indi pirme ang ginahunahuna mo gid, apang kon handum mo nga padunggan sia kag huptan ang imo integridad, ihatag niya ang bulig nga ginakinahanglan mo agod makabatas ka sing madinalag-on. (1 Juan 5:14) Samtang makita mo ang iya pagtuytoy sa imo kabuhi, magasuod ka sa iya. Importante man ang pagbasa kag pagpamalandong tuhoy sa mga kinaiya kag mga dalanon ni Jehova nga ginapahayag sa Biblia. Ini nga pagpamalandong nagabulig sa imo nga makilala sia sing mas maayo pa; nagapahulag ini sang imo tagipusuon kag nagapadalom sang imo gugma sa iya. (Salmo 19:14) Kag ina nga gugma, labaw sa bisan ano pa, magabulig sa imo sa pagpamatok sa pagsulay kag magpadayon sa pagbantay.—1 Juan 5:3.

20 Agod magpabilin nga suod kay Jehova, importante man nga magpabilin nga suod sa mga masigkatumuluo. Binagbinagon ini sa hingapusan nga seksion sini nga brosyur.

MGA PAMANGKOT SA PAGTINUON

• Ano ang ginhimo ni Jesus sa idalom sang mabaskog nga pag-ipit sang nagahilapit na ang iya kamatayon, kag ano ang ginpalig-on niya sa iya mga disipulo nga himuon nila? (Par. 1-4)

• Ngaa ginatumod ni Satanas ang mga sumilimba ni Jehova, kag sa anong mga paagi ginasulay niya kita? (Par. 5-8)

• Agod mapamatukan ang pagsulay, ngaa dapat kita magpadayon sa pagpangamuyo (Par. 9-12), mangin realistiko sa aton mga ginapaabot (Par. 13-15), dumdumon ang mga hulusayon (Par. 16-17), kag ‘magpalapit sa Dios’ (Par. 18-20)?

[Kahon sa pahina 25]

Pila ka Kabangdanan Sang Pagluya Sang Buot

Panglawas/edad. Kon may balatian kita ukon bangod sang katigulangon, limitado na ang aton paghulaghulag, mahimo nga masubuan kita bangod diutay na lang ang aton mahimo sa pag-alagad sa Dios.—Hebreo 6:10.

Kapaslawan. Mahimo nga masubuan kita kon diutay lamang ang bunga sang aton mga panikasog sa pagbantala sing Pulong sang Dios.—Hulubaton 13:12.

Pagbatyag nga walay pulos. Bangod sang indi maayo nga pagtratar sa sulod sang mga tinuig, mahimo makumbinsi ang isa ka tawo nga wala sia ginahigugma, bisan ni Jehova.—1 Juan 3:19, 20.

Nasaklaw nga balatyagon. Kon ang isa nasaklaw sang isa ka masigkatumuluo, mahimo nga maligban sia amo nga masulay sia nga mag-untat sa pagtambong sa Cristianong mga miting ukon sa pagpakigbahin sa pagministeryo sa latagon.—Lucas 17:1.

Paghingabot. Ang iban nga indi mo karelihion mahimo mamatok, maghingabot, ukon magyaguta sa imo.—2 Timoteo 3:12; 2 Pedro 3:3, 4.

[Retrato sa pahina 26]

Ginpalig-on kita ni Jesus nga “mangamuyo sing padayon” agod mabuligan kita sa pagpakigbato sa pagsulay