Ang Ila Paghatag Sing Igtalupangod Nagluwas Sang Ila Kabuhi

ABANSE nga nagpaandam si Jesucristo tuhoy sa katapusan sang Judiyong sistema sang mga butang nga nasentro sa templo sa Jerusalem. Wala sia maghatag sing petsa kon san-o ini mahanabo. Apang ginlaragway niya kon ano anay ang mga matabo antes sina nga kalaglagan. Ginpalig-on niya ang iya mga disipulo nga magpadayon sa pagbantay kag maggua gikan sa makatalagam nga duog.

Si Jesus nagtagna: “Kon makita ninyo ang Jerusalem nga nalikupan sing mga hangaway, nian kilalaha ninyo nga yara na ang iya kamusmusan.” Nagsiling man sia: “Kon makita ninyo ang makamulusmos nga pagtampalas . . . nga nagatindog sa duog nga balaan, . . . nian ang mga yara sa Judea magpalagyo sa mga bukid.” Ginpalig-on ni Jesus ang iya mga disipulo nga indi magbalik agod salbahon ang ila materyal nga mga pagkabutang. Ang pagpalagyo hilingagawon agod maluwas sila.—Lucas 21:20, 21; Mateo 24:15, 16.

Agod tapuson ang madugay na nga pagribok, ginpangunahan ni Cestius Gallus ang Romanong mga hangaway batok sa Jerusalem sang 66 C.E. Nagsulod pa gani sia sa siudad kag ginlikupan ang templo. Nagkinagula sa sulod sang siudad. Nakita sang mga padayon nga nagbantay ang kapahamakan nga nagahilapit. Apang posible bala ang pagpalagyo? Sa wala ginpaabot, ginpaisol ni Cestius Gallus ang iya mga tropa. Ginlagas sila sang Judiyo nga mga insurekto. Karon na ang tion nga malagyo gikan sa Jerusalem kag sa bug-os nga Judea!

Pagkasunod nga tuig, nagbalik ang Romanong mga tropa sa idalom ni Vespasian kag sang iya anak nga si Tito. Ang bug-os nga pungsod nadalahig sa inaway. Sang temprano nga bahin sang 70 C.E., ginlambayan sang mga Romano sing mataliwis nga mga usok ang palibot sang Jerusalem. Indi na posible ang pagpalagyo. (Lucas 19:43, 44) Nagpinatyanay ang nagakontrahanay nga mga grupo sa sulod sang siudad. Ang nabilin nga katawhan ginpatay sang mga Romano ukon gindala nga mga bihag. Ginlaglag sing bug-os ang siudad kag ang templo sini. Suno sa Judiyong istoryador nga si Josephus sang nahauna nga siglo, kapin sa isa ka milyon ka Judiyo ang nag-antos kag napatay. Yadto nga templo wala na gid matukod liwat.

Kon ang mga Cristiano nagpabilin sa sulod sang Jerusalem sang 70 C.E., napatay sila kuntani ukon ginbihag upod sa tanan nga didto pa.  Apang, nagasugid ang dumaan nga mga istoryador nga ginpamatian sang mga Cristiano ang paandam sang Dios kag nagpalagyo sila gikan sa Jerusalem kag sa bug-os nga Judea padulong sa kabukiran sa sidlangan sang Suba Jordan. Ang iban nagpuyo sa Pella, sa probinsia sang Perea. Ginbiyaan nila ang Judea kag wala na magbalik. Ang ila pagpamati sa paandam ni Jesus nagluwas sang ila kabuhi.

Ginapamatian Mo Bala ang mga Paandam Gikan sa Masaligan nga Tiliman-an?

Sa tapos mabatian ang madamo nga mga paandam nga wala magmatuod, madamo na nga mga tawo ang nagapasapayan sa tanan nga mga paandam. Apang, ang pagpamati sa mga paandam mahimo magluwas sang imo kabuhi.

Sa China sang 1975, ginhatag ang mga paandam nga may linog nga maabot. Naghulag ang mga opisyal. Nagkooperar ang mga tawo. Linibo ang naluwas.

Sang Abril 1991 sa Pilipinas, ang mga pumuluyo sa mga minuro sa banglid sang Mount Pinatubo nagreport nga nagbuga ang bukid sing alisngaw kag abo. Sa tapos panilagan ang kahimtangan sa sulod sang duha ka bulan, ang Philippine Institute of Volcanology and Seismology nagpaandam tuhoy sa nagahilapit nga katalagman. Sa gilayon, linibo ka tawo ang gin-ibakwit gikan sa sadto nga duog. Sang kaagahon sang Hunyo 15, upod ang mabaskog nga paglupok, kapin sa walo ka kilometro kubiko sang daw abo nga materyal ang nagpatimbuok sa langit kag nagtupa sa mga banwa sa palibot sini. Ang paghatag sing igtalupangod nagluwas sang linibo ka kabuhi.

Ang Biblia nagapaandam tuhoy sa katapusan sang sistema sang mga butang karon. Nagakabuhi kita karon sa katapusan nga mga adlaw. Samtang nagahilapit ang katapusan, ikaw bala padayon nga nagabantay? May ginahimo ka bala agod magpabilin ka nga yara sa gua sang makatalagam nga duog? Nagahingagaw ka bala nga paandaman man ang iban?

[Retrato sa pahina 20]

Ang paghatag sing igtalupangod sa paandam nagluwas sang kabuhi sang madamo sang nagbuga sing abo ang Mount Pinatubo

[Retrato sa pahina 21]

Ang mga Cristiano nga nagpamati sa paandam ni Jesus naluwas sang ginlaglag ang Jerusalem sang 70 C.E.