Ano ang Kahulugan Sini Tanan?

SI Jesucristo nagsiling: Ang tanda sang “katapusan sang panuigon” amo ang inaway, tiggulutom, kamatay, kag mga linog.—Mateo 24:1-8; Lucas 21:10, 11.

Halin sang 1914 ang kabuhi sang tawo ginhalitan sang pag-ilinaway sang mga pungsod kag sang mga tribo, sa masami bangod sang pagpasilabot sang mga klero sa politika kag karon naman bangod sang lapnag nga pag-atake sang mga terorista.

Walay sapayan sang mga pag-uswag sang siensia, minilyon gihapon sa bug-os nga duta ang nagakagutman. Kada tuig minilyon ka tawo ang nagakapatay bangod sang kakulang sing pagkaon.

Ang kamatay ukon peste, buot silingon, ang lapnag nga epidemia sang makalalaton nga balatian, bahin man sang tanda nga ginhatag ni Jesus. Pagkatapos sang Bug-os Kalibutan nga Inaway I, kapin sa 21,000,000 ka tawo ang napatay sa epidemia sang trangkaso. Indi kaangay sang mga peste nga nagdunggo sa pila lamang ka lugar sang una, naapektuhan sini ang mga pungsod sa bug-os nga kalibutan subong man ang nabaw-ing nga mga isla. Ang AIDS nagaapektar karon sa madamo nga mga tawo sa bug-os nga kalibutan, kag ang mga peste subong sang TB, malaria, tipos, kag dengue nagaapektar gihapon sa mga tawo sa nagapauswag pa lang nga mga pungsod.

Suno sa report, linibo ka linog nga may nanuhaytuhay nga kabaskugon ang nagakatabo kada tuig. Walay sapayan sang mga kasangkapan kag sang napauswag nga mga metodo sa pagreport tuhoy sa mga linog kag sa kabaskugon sini, pirme gihapon ginabalita ang mga kalamidad nga nagakatabo sa madamo sing tawo nga mga duog.

Ang Biblia nagtagna man: “Hibalua ini, nga sa katapusan nga mga adlaw magaabot ang makahalanguyos nga mga tion nga mabudlay pakigbagayan. Kay ang mga tawo mangin mga mahigugmaon sang kaugalingon, mga mahigugmaon sang kuarta, mga bugalon, mga palabilabihon, mga mapasipalahon, mga malalison sa mga ginikanan, mga di-mapinasalamaton, mga di-matutom, mga wala sing kinaugali nga gugma, mga indi tampad sa bisan anong kasugtanan, mga mapatupatuon, mga wala sing pagpugong sa kaugalingon, mga mabangis, mga wala sing gugma sa kaayuhan, mga maluib, mga matig-a sing ulo, mga nagahabok sa pagpadayaw, mga mahigugmaon sa kinasadya sa baylo sangsa Dios, nga may dagway sang diosnon nga debosyon apang nagapanghiwala sang gahom sini; kag likawi ini sila.”​—2 Timoteo 3:​1-5, NW.

Wala ka bala nagaugyon nga nagakabuhi kita sa “makahalanguyos nga mga tion nga mabudlay pakigbagayan”?

Napanilagan mo bala nga ang mga tawo mahigugmaon gid sa kaugalingon, mahigugmaon sa kuarta, kag bugalon?

Sin-o ang manghiwala nga ang mga tawo karon sa kalibutan mahangyuon apang indi mapinasalamaton, indi tampad sa kasugtanan, di-matutom?

Nahibaluan mo bala nga ang pagkamalalison sa mga ginikanan kag ang makapakibot nga kakulang sing gugma naglala pa gid, indi lamang sa pila ka duog kundi sa bug-os nga kalibutan?

 Walay duhaduha nga narealisar mo nga nagapuyo kita sa isa ka kalibutan nga may sobra nga gugma sa pagpangalipay apang wala sing gugma sa pagkaayo. Amo sina ang paglaragway sang Biblia sa mga panimuot nga magaluntad sa “katapusan nga mga adlaw.”

Kinahanglan pa bala ang dugang nga pamatuod agod makilala ang tion nga ginakabuhian naton? Gintagna man ni Jesus nga sa sini man nga tion, ang maayong balita sang Ginharian sang Dios ibantala sa bug-os napuy-an nga duta. (Mateo 24:14) Ginahimo bala ini?

Ang Lalantawan, isa ka napasad sa Biblia nga balasahon nga nagabantala sing maayong balita sang Ginharian ni Jehova, regular nga ginaimprinta sa mas madamo nga mga lenguahe sangsa bisan ano nga balasahon.

Kada tuig, ang mga Saksi ni Jehova nagahinguyang sing kapin sa isa ka bilyon ka oras sa pagpanaksi sing personal sa iban tuhoy sa Ginharian sang Dios.

 Ginabalhag nila karon ang mga literatura nga nagapaathag sang Biblia sa mga 400 ka lenguahe, bisan sa mga lenguahe nga ginabasa sang nabaw-ing kag diutay lamang nga mga pumuluyo. Nabantala na sang mga Saksi ni Jehova ang maayong balita sa tanan nga pungsod; nakabantala man sila sa madamo nga mga isla kag sa magagmay kaayo nga mga teritoryo nga wala gani ginasapak sa kalibutan sang politika. Sa kalabanan nga kadutaan, ginapadayon nila ang isa ka regular nga programa sa pagtudlo tuhoy sa Biblia.

Sa pagkamatuod, ang maayong balita sang Ginharian sang Dios ginabantala sa bug-os napuy-an nga duta, indi agod kumbertihon ang kalibutan, kundi agod manaksi. Ang katawhan bisan diin ginahatagan sing kahigayunan sa pagpakita kon bala importante para sa ila kon sin-o ang nagtuga sing mga langit kag duta kag kon bala magapakita sila sing pagtahod sa iya mga kasuguan kag sing gugma sa ila isigkatawo.​—Lucas 10:25-​27; Bugna 4:​11.

Sa indi madugay, dulaon sa duta sang Ginharian sang Dios ang tanan nga malauton kag himuon ini nga isa ka bug-os kalibutan nga paraiso.​—Lucas 23:43.

[Kahon sa pahina 6]

Ang Katapusan nga mga Adlaw Sang Ano?

Indi ang katapusan nga mga adlaw sang katawhan. Para sa mga nagahimo sang kabubut-on sang Dios, ginatanyag sang Biblia ang paglaum nga mabuhi sing dayon.​—Juan 3:​16, 36; 1 Juan 2:​17.

Indi ang katapusan nga mga adlaw sang duta. Ang Pulong sang Dios nagasaad nga ang napuy-an nga duta magapabilin sing dayon.​—Salmo 37:29; 104:5; Isaias 45:18.

Sa baylo, katapusan nga mga adlaw ini sining masingki, walay gugma nga sistema sang mga butang kag sang mga nagahimo sang mga dalanon sini.​—Hulubaton 2:​21, 22.

[Kahon/Retrato sa pahina 7]

Pulong Gid Bala Sang Dios ang Biblia?

Ang mga manalagna sang Biblia sulitsulit nga nagsulat: “Amo ini ang ginasiling sang GINUO.” (Isaias 43:14; Jeremias 2:2) Bisan gani si Jesucristo, ang Anak sang Dios, nagsiling nga sia ‘wala magpamulong gikan sa iya kaugalingon.’ (Juan 14:10) Ang Biblia mismo maathag nga nagasiling: “Ang bug-os nga kasulatan ginbugna sang Dios.”​—2 Timoteo 3:​16.

Wala na sing iban pa nga libro ang ginbalhag nga may subong sini kadamo nga lenguahe—kapin sa 2,200, suno sa ginreport sang United Bible Societies. Wala na sing iban pa nga libro ang may subong sini kadaku nga sirkulasyon—kapin sa apat ka bilyon ka kopya karon. Indi bala nga amo sini ang dapat mo paabuton sa isa ka mensahe halin sa Dios nga para sa tanan nga tawo?

Para sa mas maid-id pa nga paathag tuhoy sa mga ebidensia nga ang Biblia ginbugna sang Dios, tan-awa ang libro nga The Bible​—God’s Word or Man’s?, nga ginbalhag sang mga Saksi ni Jehova.

Kon basahon mo ang Biblia kag batunon nga ini Pulong gid sang Dios, makabenepisyo gid ikaw.

[Kahon/Retrato sa pahina 8]

Ano ang Ginharian Sang Dios?

Amo ini ang gobierno sa langit nga nagapabutyag sang paggahom sang matuod nga Dios, si Jehova, ang Manunuga sang langit kag duta.—Jeremias 10:10, 12.

Ginapakilala sang Biblia si Jesucristo subong amo ang pagahumon sang Dios. (Bugna 11:15) Sang yari sia sa duta, ginpakita ni Jesus nga natigayon na niya ining makatilingala nga gahom gikan sa Dios—ang gahom sa pagkontrol sa kinaugali nga mga puersa, sa pagpaayo sa tanan nga sahi sang balatian, kag bisan gani sa pagbanhaw sa mga patay. (Mateo 9:​2-8; Marcos 4:​37-​41; Juan 11:​11-​44) Ang inspirado nga tagna sang Biblia nagtagna nga hatagan man sia sang Dios sing “pagbulut-an kag himaya kag ginharian, agod nga ang tanan nga mga katawhan, mga pungsod, kag mga hambal mag-alagad sa iya.” (Daniel 7:​13, 14) Ini nga gobierno ginatawag nga Ginharian sang langit; nagagahom karon si Jesucristo gikan sa langit.

[Retrato sa pahina 7]

Ang maayong balita ginabantala sa bug-os nga kalibutan