Diin Nagapadulong Ining Kalibutan?

Ang mabug-at nga mga problema kag makakulugmat nga mga hitabo kinaandan na sa bug-os nga kalibutan! Ano ang kahulugan sini?

PERSONAL NGA KASIGURUHAN: Mga bomba ginpalupok sa mga tiendahan. Mga manunudlo kag mga estudyante ginluthang sa eskwelahan. Mga lapsag ginkidnap sang malingat ang mga ginikanan. Mga babayi kag tigulang nga mga lalaki gin-atake kag ginkawatan bisan masanag pa ang adlaw.

KAHIMTANGAN SANG MGA RELIHION: Mga simbahan nagasuportar sa mga paksion nga nagailinaway. Mga klero ginsumbong sa pagpapas sa isa ka kaliwat sang mga tawo. Mga pari nagahimulos sa mga pamatan-on; mga simbahan ginahipsan ini. Mga nagasimba nagadiutay; mga simbahan ginapamaligya.

ANG PALIBOT: Mga kagulangan ginkalbo para sa komersial nga mga proyekto. Mga kakahuyan ginpamulod sang mga imol agod may panggatong. Tubig sa idalom-duta mahigko, indi na puede imnon. Pagpangisda ginahalitan sang mga higko sang industriya kag pila ka modernong mga metodo sa pagpangisda. Polusyon sa hangin makapuluot.

 PANGABUHI: Suno sa report, mga $480 (U.S.) ang ginakita kada tuig sang tagsa ka tawo sa nabagatnan sang desyerto sang Sahara sa Aprika. Kakagod sang mga korporasyon nagamusdok sang mga negosyo, amo kon ngaa linibo ang nagakadulaan sing trabaho. Bangod sang mga pagdaya, nadula sang mga imbestor ang ila bug-os kabuhi nga sinuptan.

MGA KAKULANG SING PAGKAON: Mga 800,000,000 ka tawo sa bug-os nga kalibutan ang regular nga nagatulog nga gutom.

INAWAY: Kapin sa 100,000,000 ka tawo ang napatay subong resulta sang inaway sa ika-20 nga siglo. Nuklear nga mga armas bastante nga makalaglag sa tanan nga katawhan sing madamo nga beses. Mga inaway sibil. Ang terorismo nagaapektar sa bug-os nga kalibutan.

MGA PESTE KAG IBAN PA NGA MGA BALATIAN: Sugod sang 1918, 21,000,000 ka tawo ang napatay sa trangkaso Espanyola. Ang AIDS amo karon “ang labing makahalapay nga pandemiko sa maragtas sang tawo.” Ang kanser kag balatian sa tagipusuon ginatunaan sang kasubo sa bug-os nga kalibutan.

Binagbinaga ang mga balita. Talagsahon lamang bala ini nga mga hitabo? Ukon nagakatabo bala ini sa bug-os nga kalibutan nga may buot ipahangop?

 [Kahon/Retrato sa pahina 5]

Nagaulikid Gid Bala ang Dios?

Bangod sang kasubo sa makakulugmat nga nagakatabo ukon sang daku nga personal nga kadulaan, madamo nga tawo ang nagakatingala kon ngaa wala ini ginapunggan sang Dios.

Nagaulikid gid ang Dios. Nagahatag sia sing masaligan nga laygay kag matuod nga paumpaw karon. (Mateo 11:28-​30; 2 Timoteo 3:​16, 17) Napasad na niya ang sadsaran sa pagdula sa kasingki, balatian, kag kamatayon. Ang mga kahimusan nga nahimo na niya para sa aton kaayuhan nagapamatuod nga nagaulikid sia indi lamang sa katawhan sang isa ka pungsod kundi sang tanan nga kapungsuran, mga tribo, kag mga hambal.—Binuhatan 10:34, 35.

Daw ano kadaku ang pagtamod naton sa Dios? Nahibaluan mo bala kon sin-o ang Manunuga sang langit kag duta? Ano ang iya ngalan? Ano ang iya katuyuan? Ginasabat niya ini sa Biblia. Ginasugiran niya kita diri kon ano nga mga tikang ang ginahimo niya agod tapuson ang kasingki subong man ang balatian kag kamatayon. Agod makabenepisyo kita, ano ang dapat naton himuon? Dapat kita magtuon tuhoy sa iya kag sa iya katuyuan. Paano kita makabenepisyo sa iya mga kahimusan kon indi kita magtuo sa iya? (Juan 3:​16; Hebreo 11:6) Dapat man naton tumanon ang iya mga ginapatuman. (1 Juan 5:3) Luyag mo bala himuon ina?

Agod mahangpan kon ngaa ginatugutan sang Dios ang mga kahimtangan karon, dapat naton mahangpan ang isa ka importante nga hulusayon. Ginapaathag ini sang Biblia. Mahibaluan mo kon ano ini nga hulusayon sa pahina 15 sini nga publikasyon.