Diin Nagapadulong ang Imo Kabuhi?

• Madamo nga tawo ang masako gid sa ila adlaw-adlaw nga pagkabuhi amo kon ngaa daw wala nila ginapamensaran kon diin sila nagapadulong.

• Ang Biblia nagapahibalo sang matahom nga mga butang nga matabo sa palaabuton. Nagapaandam man ini tuhoy sa pagbag-o sang mga institusyon sang tawo sa bug-os nga kalibutan. Agod makabenepisyo kita kag malikawan ang kalamidad, kinahanglanon gid ang positibo nga aksion.

• May mga tawo nga nakahibalo sang ginasiling sang Biblia kag nagatinguha sa pag-aplikar sini apang ginatugutan nila ang mga kabalaka sa kabuhi nga mag-upang sa ila.

• Nalipay ka bala sa direksion sang imo kabuhi? Kon nagaplano ka sang imo mga hilimuon, ginabinagbinag mo bala kon paano ini makaapektar sa imo mga tulumuron sa kabuhi?

[Kahon/Mga retrato sa pahina 9]

Ano ang Labing Importante sa Imo?

Paano mo hatagan sing balor ang masunod? Numeruhi ini.

Ang madamo sini may nagakaigo nga duog sa kabuhi, apang kon dapat ka magpili, ano ang una? ikaduha? kag masunod.

― Kalingawan/dibersion

― Ang akon trabaho ukon ang akon karera

― Ang akon ikaayong-lawas

― Ang akon kalipay

― Ang akon tiayon

― Ang akon mga ginikanan

― Ang akon mga kabataan

― Matahom nga balay, malahalon nga mga panapton

― Ang mangin maayo gid sa bisan ano nga ginahimo ko

― Pagsimba sa Dios

 [Kahon sa pahina 10, 11]

Ang Imo Bala Ginapili Nagadul-ong sa Kon Ano Gid ang Luyag Mo?

BINAGBINAGA INING MGA PAMANGKOT

KALINGAWAN/DIBERSION: Nagapapagsik bala sa akon ang kalingawan nga ginapili ko? Nagadalahig bala ini sing mga pagpasimpalad nga makabutang sang akon panglawas sa katalagman ukon makapabaldado sa akon tubtob-buhi? Isa bala ini ka sahi sang “paglipaylipay” nga nagahatag sing ayhan pila ka oras lamang nga kakunyag apang mahimo bangdan sang akon madugay nga pag-antos? Bisan pa mapuslanon ang kalingawan nga akon ginapili, nagapatuyang bala ako sa sini amo nga wala na ako sing bastante nga tion para sa mas importante nga mga butang?

ANG AKON TRABAHO UKON ANG AKON KARERA: Paagi bala ini agod masakdag ko ang akon kaugalingon, ukon ulipon gid bala ako sini? Nagakinahanglan bala ini sing sobra nga tion kag panikasog amo nga mahimo mahalitan ang akon lawas? Mas luyag ko bala nga mag-obertaym sa akon obra sangsa maghinguyang sing tion upod sa akon tiayon ukon sa akon mga kabataan? Kon ang trabaho nga ipahimo sang akon amo nagatublag sang akon konsiensia ukon pirme nagapahigad sang akon espirituwal nga mga intereses, himuon ko bala ina agod indi ako pahalinon?

ANG AKON IKAAYONG-LAWAS: Ginapasapayanan ko bala ini, ukon pirme ko ini ginaamligan? Amo bala ini pirme ang topiko sang akon pagpakigsugilanon? Ang akon bala pag-atipan sa sini nagapakita nga nagakabalaka ako sa akon pamilya?

ANG AKON KALIPAY: Amo bala ini ang akon una nga ginakabalak-an? Ginauna ko bala ini sangsa kalipay sang akon tiayon ukon sang akon pamilya? Ang akon bala paglipaylipay nagahisanto sa akon pagsimba sa matuod nga Dios?

ANG AKON TIAYON: Ginatamod ko bala ang akon tiayon subong akon kaupod kon kinahanglan ko lang sia? Ginapadunggan ko bala ang akon tiayon, subong isa nga dapat pakitaan sing dignidad? Ang akon bala pagtuo sa Dios may impluwensia sa kon paano ko ginatamod ang akon tiayon?

ANG AKON MGA GINIKANAN: Kon menor-de-edad pa, matinumanon bala ako sa akon mga ginikanan—matinahuron nga nagasabat, nagahimo sang ila ginasugo sa akon, nagapauli sa oras nga ila gintalana, nagalikaw sa mga kaupod kag mga butang nga ila ginapalikawan sa akon? Kon hamtong na, nagapamati bala ako sa akon mga ginikanan nga may pagtahod, nagabulig sa ila kon kinahanglanon? Ang akon bala pagpakig-angot sa ila ginagiyahan sang kon ano ang kombeniente sa akon ukon sang laygay sang Pulong sang Dios?

ANG AKON MGA KABATAAN: Ginabatyag ko bala nga ako ang may responsibilidad sa pagtudlo sa akon mga kabataan sing nagakaigo nga mga prinsipio sa moral, ukon ginatugyan ko bala ini sa eskwelahan? Nagahinguyang bala ako sing tion upod sa akon mga kabataan, ukon ginatugutan ko bala ang mga hampanganan, TV, ukon kompyuter nga amo ang ila atupagon? Ginadisiplina ko bala ang akon mga kabataan kon ginasikway nila ang mga pahanumdom sang Dios, ukon ginahimo ko lang bala ini kon maakig ako?

MATAHOM NGA BALAY, MALAHALON NGA MGA PANAPTON: Ano ang akon motibo sa atension nga ginapakita ko sa akon panagway kag mga pagkabutang—amo bala ang impresyon nga luyag ko matigayon gikan sa mga kaingod? ang kaayuhan sang akon pamilya? ang katunayan nga ako isa ka sumilimba sang Dios?

ANG MANGIN MAAYO GID SA BISAN ANO NGA GINAHIMO KO: Ginabatyag ko bala nga importante nga himuon ang mga butang sing maayo? Nagatinguha bala ako nga mangin ang pinakamaayo gid? Indi bala ako mapahamtang kon mas maayo ang nahimuan sang iban sangsa akon?

PAGSIMBA SA DIOS: Mas importante bala sa akon nga matigayon ang kahamuot sang Dios sangsa kahamuot sang akon tiayon, sang akon mga kabataan, sang akon mga ginikanan, ukon sang akon amo? Agod mahuptan ang isa ka komportable nga estilo sang pagkabuhi, handa bala ako nga himuon nga ikaduha lamang ang akon pag-alagad sa Dios?

 BINAGBINAGA SING MAAYO ANG LAYGAY SANG BIBLIA

Daw ano ka importante sa imo kabuhi ang imo pagsimba sa Dios?

Manugwali 12:13: “Magkahadlok sa Dios, kag magbantay sa iya mga sugo. Kay amo ini ang bug-os nga katungdanan sang tawo.”

PAMANGKUTA ANG IMO KAUGALINGON: Ginapakita bala sang akon pagkabuhi nga amo sini ang akon pagtamod sa mga butang? Ang akon bala pagtuman sa mga sugo sang Dios amo ang nagaimpluwensia sa akon kon paano ko ginaatipan ang akon mga responsibilidad sa puluy-an, sa trabaho, ukon sa eskwelahan? Ukon ang iban bala nga mga intereses ukon ang mga pag-ipit sang kabuhi amo ang nagaimpluwensia kon bala nagatigana ako sing tion para sa Dios?

Daw ano ka suod ang imo kaangtanan sa Dios?

Hulubaton 3:5, 6: “Salig sa GINUO sa bug-os mo nga tagipusuon kag dili magsandig sa imo kaugalingon nga paghangop. Sa tanan mo nga dalanon kilalaha sia, kag magatuytoy sia sa imo mga banas.”

Mateo 4:10: “Magsimba ka sa Ginuo nga imo Dios kag sa iya lamang mag-alagad ka.”

PAMANGKUTA ANG IMO KAUGALINGON: Amo gid bala sina ang ginabatyag ko sa Dios? Ang akon bala pagpanghikot sa adlaw-adlaw, subong man ang akon pag-atubang sa mga problema, nagapakita sina nga pagsalig kag debosyon?

Daw ano ka importante sa imo ang pagbasa kag pagtuon sa Biblia?

Juan 17:3: “Ini amo ang kabuhi nga walay katapusan, nga pagkilalahon ka nila nga ikaw lamang ang matuod nga Dios, kag ang imo ginpadala nga si Jesucristo.”

PAMANGKUTA ANG IMO KAUGALINGON: Ang importansia bala nga ginahatag ko sa pagbasa sa Pulong sang Dios kag sa pagpamalandong sa sini nagapakita nga nagapati gid ako sa sina?

Daw ano ka importante sa imo ang pagtambong sa mga miting sang Cristianong kongregasyon?

Hebreo 10:24, 25: “Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob, . . . kag labi pa gid sa ginatan-aw ninyo nga nagapalapit ang Adlaw.”

Salmo 122:1: “Nagkasadya ako sang nagsiling sila sa akon, ‘Magkadto kita sa balay sang GINUO!’ ”

PAMANGKUTA ANG IMO KAUGALINGON: Ang akon bala pagkabuhi nagapakita sing apresasyon sa sini nga instruksion nga masapwan sa Pulong sang Dios? Sang nagligad nga bulan, nagpalya bala ako sa mga miting para sa pagsimba bangod gin-una ko ang iban nga butang?

Ikaw bala makugi nga nagapakigbahin sa pagpakighambal sa iban tuhoy sa Dios kag sa iya katuyuan?

Mateo 24:14: “Iwali ining maayong balita sang ginharian sa bug-os nga kalibutan, subong nga saksi . . .  kag ugaling magaabot ang katapusan.”

Mateo 28:19, 20: “Busa lakat kamo kag himuon nga mga gintutun-an ang tanan nga kapungsuran, . . . nga nagapanudlo sa ila sa pagtuman sang tanan nga ginsugo ko sa inyo.”

Salmo 96:2: “Amba sa GINUO, pakamaayuhon ang iya ngalan; ipakita ang iya kaluwasan sa adlaw-adlaw.”

PAMANGKUTA ANG IMO KAUGALINGON: Ginahatagan ko bala sing nagakaigo nga duog sa akon kabuhi ini nga hilikuton? Ang akon bala pagpakigbahin sa sini nagapakita nga kumbinsido ako sa pagkaserioso sang aton tion karon?