“Wala Sila Magsapak”

ANG indi pagsapak sa mga paandam mahimo magresulta sa kapahamakan.

Ang Darwin, Australia, nagahanda para sa isa ka selebrasyon sang 1974 sang nagpaandam ang sirena tuhoy sa nagahilapit nga buhawi. Apang 30 ka tuig na nga wala mahaliti sang buhawi ang Darwin. Ngaa karon pa? Wala ginsapak sang kalabanan nga mga residente ang katalagman tubtob nag-abot ang mamadlos nga hangin nga naglalas sang mga atop kag mga dingding sang mga balay nga ginapanaguan sang mga tawo. Pagkaaga, ang siudad nahapay sing bug-os.

Sa Colombia sang Nobiembre 1985, naglupok ang bulkan. Ang natunaw nga niebe kag yelo nagresulta sa nagailig nga lahar nga naglubong sa kapin sa 20,000 ka pumuluyo sang banwa sang Armero. Wala bala sing abanse nga paandam? Ang bukid nagtay-ug sa sulod sang mga binulan. Apang, bangod naanad na sa kabuhi malapit sa bulkan, wala magsapak ang kalabanan nga mga tawo sa Armero. Nakabaton ang mga opisyal sing paandam nga ang kalamidad magaabot sa indi madugay, apang halos wala sila sing ginhimo agod paandaman ang publiko. Ginhimo ang mga anunsio sa radyo agod pasaligon ang mga pumuluyo. Ang loudspeaker sa sulod sang simbahan gingamit agod palig-unon ang mga tawo nga magpabilin nga kalma. Sang gab-i, duha ka mabaskog kaayo nga paglupok ang natabo. Kon ikaw didto sadto, ginbiyaan mo ayhan ang imo mga pagkabutang kag nagpalagyo? Atrasado na nga nagpanikasog ang pila lamang ka tawo nga himuon ini.

Masami nga ang mga geologo sibu sa ila pagpakot kon diin mahanabo ang mga linog. Apang talagsa nila mapaktan sing sibu kon san-o gid mahanabo ang linog. Sang 1999, mga 20,000 ang napatay sa linog sa bug-os nga kalibutan. Madamo sang mga napatay ang nagdumdom nga indi gid ini mahanabo sa ila.

Paano Mo Ginatamod ang mga Paandam nga Nagagikan sa Dios Mismo?

Madugay na kag maathag nga ginalaragway sang Biblia ang mga hitabo nga magatanda sa katapusan nga mga adlaw. May kaangtanan sa sina, ginapalig-on kita sini nga binagbinagon ‘ang mga adlaw ni Noe.’ “Sadtong mga adlaw sa wala pa ang anaw,” masako ang mga tawo sa kinaandan nga mga butang sang kabuhi, apang walay duhaduha nga nabalaka sila sa lapnag nga kasingki sadto. Tuhoy sa paandam sang Dios paagi  sa iya alagad nga si Noe, “wala sila magsapak tubtob nga nag-abot ang anaw kag nag-anod sa ila nga tanan.” (Mateo 24:37-39, NW) Nagpamati ka ayhan sa paandam sadto? Amo ka bala sini karon?

Ano kon nagapuyo ka sadto sa Sodoma, malapit sa Patay nga Dagat, sang mga adlaw ni Lot nga hinablos ni Abraham? Daw isa ka paraiso ang palibot sini. Matin-ad ang siudad. Daw wala sing problema ang mga tawo. Sang mga adlaw ni Lot, “nagkalaon sila, nag-ilinom sila, nagpamakal sila, nagpamaligya sila, nagpananom sila, nagpatindog sila.” Tuman man ka imoral ang katilingban nga ila ginapuy-an. Ginbinagbinag mo ayhan ang paandam sang nagpamulong si Lot batok sa malaut nga mga buhat? Nagpamati ka ayhan sang ginsugiran ka niya nga nagpamat-od ang Dios nga laglagon ang siudad sang Sodoma? Ukon ginkabig mo ayhan ini nga isa lang ka lahog, kaangay sang mga umagaron ni Lot? Mahimo ayhan nga nalagyo ka na apang nagbalikid pa, subong sang ginhimo sang asawa ni Lot? Bisan pa wala ginpamatian sang iban ang paandam, sang adlaw nga naggua si Lot sa Sodoma, “nag-ulan sing kalayo kag asupre gikan sa langit kag naglaglag sa ila tanan.”—Lucas 17:28, 29.

Ang kalabanan karon wala nagasapak. Apang ini nga mga halimbawa gintipigan sa Pulong sang Dios subong paandam sa aton, agod palig-unon kita nga MAGPADAYON SA PAGBANTAY!

[Kahon/Retrato sa pahina 22]

Natabo Gid Bala ang Bug-os Kalibutan nga Anaw?

Madamo nga kritiko ang nagasiling nga Wala. Apang ang Biblia nagasiling nga Huo.

Ginsambit ini mismo ni Jesucristo, kag buhi sia sang matabo ini, amo nga ginatan-aw niya ini gikan sa mga langit.

[Kahon/Retrato sa pahina 23]

Ginlaglag Gid Bala ang Sodoma kag Gomorra?

Ginapamatud-an sang arkeolohiya ini nga hitabo.

Ginasambit ini sang sekular nga maragtas.

Ginpamatud-an ni Jesucristo ini nga hitabo, kag ginapatuhuyan ini nga hitabo sa 14 ka tulun-an sang Biblia.