Ang Dios—Sin-o Sia?
Kapitulo 4
Ang Dios—Sin-o Sia?
1. (a) Ano nga mga dios ang ginasimba sang tawo? (b) Paano ginapatuhay sang Biblia ang “mga dios” kag ang “Dios”?
SA BUG-OS NGA KALIBUTAN madamu sing dios nga ginasimba. Sa relihion sang Shinto, Budhista, Hindu kag mga tribu minilyon ang Dios. Ang mga dios subong nanday Zeus kag Hermes ginasimba anay sang mga adlaw sang mga apostoles ni Jesus. (Binuhatan 14:11, 12) Gani nagaugyon ang Biblia nga “may madamu nga ‘dios,’ ” apang nagasiling man ini nga “sa aton may isa ka Dios, ang Amay, nga sa iya nagikan ang tanan nga butang.” (1 Corinto 8:5, 6) Kon pamangkuton ka, ‘Sin-o ining Dios?’ ano ang isabat mo?
2. Ano ang nanuhaytuhay nga pagtamod sang mga tawo tuhoy sa Dios?
2 ‘Ang Ginuo,’ sabat sang madamu. Ukon: ‘Sia Espiritu sa langit.’ Ang diksionaryo nagatawag sa Dios: “Ang Supremo nga Persona.” Kon pamangkuton: ‘Ano ang ngalan sang Dios?’ ang iban nagasabat, ‘si Jesus.’ Ang iban wala nagatamod sa Dios subong persona, kundi isa ka gamhanan nga kusog nga yara bisan diin. Kag ang iban nagaduhaduha pa gani kon bala may Dios. Mapat-od bala naton nga sia nagaluntad?
NAGALUNTAD GID ANG DIOS
3. Paano nagaluntad ang isa ka balay?
3 Kon nagatulok ka sa isa ka matahom nga tinukod, ginapaligban mo bala kon sin-o ang nagtukod sini? Kon sugiran ka nga wala sing nagtukod sini, kundi nagtuhaw lamang, mapati ka bala? Sa pagkamatuod indi! Suno sa isa ka manunulat sang Biblia: “Ang tagsa ka balay may nagtukod.” Nahibaloan ina sang tanan. Busa, indi bala naton mabaton ang makatarunganon nga konklusion sina nga manunulat: “Ang nagtukod sang tanan nga butang amo ang Dios”?—Hebreo 3:4.
4. Paano nagluntad ang binilyonbilyon ka bituon?
4 Binagbinaga ang uniberso upod ang binilyonbilyon ka bituon sini. Apang sila tanan mahim-ong nga nagalakbay sa kalangitan suno sa kasugoan para sa ila. “Sin-o ang nagtuga sining tanan?” amo ang pamangkot sadto pa. Ang sabat makatarunganon: “Sia nga nagapaguwa sang ila kasoldadosan sa isip, ginatawag niya sila tanan sa ngalan.” (Isaias 40:26) Binuang gid hunahunaon nga ang binilyonbilyon ka bituon nagtuhaw lamang, kag, bisan wala sing nagatuytoy, naghuman sing dalagku nga mga galaksiya nga nagalakbay sing tuman kahim-ong!—Salmo 14:1.
5. (a) Ano ang posibilidad nga ang mga piesa magasugponsugpon sang ila kaugalingon agod mangin inugtuktok sing karne? (b) Ano ang ginapakita sini tuhoy sa aton uniberso?
5 Ining organisado nga uniberso indi mahimu nga nagtuhaw lamang. Kinahanglan ang intelihente nga Manunuga nga may daku nga gahom. (Salmo 19:1, 2) Ang isa ka negosyante nga ginpamangkot kon ngaa nagatuo sia sa Dios nagpaathag nga sa iya pabrika duha ka adlaw ang kinahanglan agod maton-an ang pagtakud sa 17 ka piesa sang inugtuktok sing karne. “Manughimu lamang ako sini,” siling niya. “Apang napat-od ko nga uyog-uyogon mo man ang 17 ka piesa sang inugtuktok sing karne sa lababo sa sulod sang 17 ka bilyon ka tuig, indi gid ikaw makahuman sing isa ka inugtuktok sing karne.” Ining uniberso, lakip ang madamung porma sang kabuhi sa duta, kapin kasibud sang sa inugtuktok sing karne. Kon ina nga makina nagakinahanglan sing lantip nga manughimu, kinahanglan man ang Labing Gamhanan nga Dios sa pagtuga sa tanan nga butang. Indi bala dapat sia padunggan sa tanan nga iya nahimu?—Bugna 4:11; Binuhatan 14:15-17; 17:24-26.
ISA BALA KA MATUOD NGA PERSONA ANG DIOS?
6. Ngaa mapat-od naton nga ang Dios isa ka matuod nga persona?
6 Bisan pa madamu ang nagapati sa Dios, wala sila nagapati nga sia isa ka persona. Persona bala sia? Bueno, kon may kaalam may hunahuna man. Halimbawa, makasiling kita, ‘Nagbag-o ang akon hunahuna.’ Nahibaloan naton nga kon may hunahuna may utok man nga yara sa lawas nga may pat-od nga korte. Gani, ang daku nga Persona, ang Labing Gamhanan nga Dios amo ang may dakung hunahuna nga nagtuga sang tanan. Bisan pa wala sia sing materyal nga lawas, may yara sia espirituwal. May lawas bala ang espiritu nga persona? Huo, ang Biblia nagasiling: “Kon may lawas nga unodnon, may lawas man nga espirituwal.”—1 Corinto 15:44; Juan 4:24.
7. (a) Ano ang nagapakita nga ang Dios may duog nga puluy-an? (b) Ano ang nagapakita nga may lawas sia?
7 Sanglit ang Dios isa ka persona nga may espirituwal nga lawas, dapat nga may puluy-an sia. Ang Biblia nagasiling nga ang kalangitan amo ang “malig-on nga puluy-an” sang Dios. (1 Hari 8:43) Ginasiling man nga “si Cristo nagsulod . . . sa langit gid, karon sa pagpahayag sa atubangan sang Dios tungod sa aton.” (Hebreo 9:24) May mga tawo nga makaupod sang Dios sa langit kag magabaton sing espiritu nga lawas. Nian makita nila ang Dios, suno sa Biblia, kag mangin kaangay man niya. (1 Juan 3:2) Ginapakita man sini nga ang Dios persona kag may lawas.
8, 9. (a) Paano ang halimbawa sang planta sang koryente nagapakita sang malayo-malab-otan nga gahom sang Dios? (b) Ano ang balaan nga espiritu sang Dios, kag ano ang mahimu sini?
8 Apang mahimu may mamangkot: ‘Kon ang Dios persona nga nagapuyo sa langit, paano niya makita ang tanan nga nagakatabo bisan diin? Kag paano mabatyagan ang iya gahom bisan diin sa uniberso?’ (2 Cronica 16:9) Ang pagkapersona sang Dios wala nagalatid sang iya gahom ukon pagkadaku. Indi man mabuhinan ang aton pagtahod sa Iya. (1 Cronica 29:11-13) Agod mahangpan ini, binagbinaga ang malayo nga epekto sang planta sang koryente.
9 Ang isa ka planta sang koryente yara sa isa ka duog. Apang ang koryente makalab-ot sa bug-os nga palibot, nagahatag sing kapawa kag enerhiya. Amo man sa Dios. Didto sia sa langit. (Isaias 57:15; Salmo 123:1) Apang ang iya balaan nga espiritu, ang iya dimakita aktibo nga kusog, mabatyagan bisan diin, sa bug-os nga uniberso. Paagi sa iya balaan nga espiritu gintuga sang Dios ang langit, ang duta kag ang tanan buhi nga butang. (Salmo 33:6; Genesis 1:2; Salmo 104:30) Agod matuga ining mga butang, indi kinahanglan nga yara ang Dios sa lawas. Mapadala niya ang iya espiritu, ang iya aktibo nga kusog, sa paghimu sang luyag niya bisan pa malayo sia. Makadalayaw gid nga Dios!—Jeremias 10:12; Daniel 4:35.
KON ANO NGA SAHI SANG PERSONA ANG DIOS
10. Ano ang isa ka paagi nga makilala naton ang Dios?
10 Ang Dios bala amo ang sahi sang persona nga mahigugma naton kon aton sia makilala? ‘Siguro,’ isiling ninyo, ‘apang sanglit indi naton makita ang Dios, paano naton sia makilala?’ (Juan 1:18) Ginasambit sang Biblia ang isa ka paagi: “Kay ang iya dimakita nga mga kinaiya maathag nga makita kutob sa pagtuga sang kalibutan, bangod ginahantop sila paagi sa mga butang nga nahimu, bisan ang iya walay katapusan nga gahom kag pagka-Dios.” (Roma 1:20) Gani ang mga gintuga sang Dios makabulig sa aton sa paghangop kon ano ang Dios, kon usisaon gid naton sila kag binagbinagon sila.
11. Ano ang maton-an naton gikan sa mga tinuga sang Dios?
11 Subong nakita na naton, ang mabituon nga kalangitan nagasugid sa aton tuhoy sa pagkadaku kag gahom sang Dios! (Salmo 8:3, 4; Isaias 40:26) Nian binagbinaga ang duta. Ginplastar ini sang Dios sa kahawaan agod makabaton sing husto nga init kag kapawa gikan sa adlaw. Binagbinaga man ang siklo sang tubig. Ang ulan nagabunyag sa duta. Ang tubig nagailig sa mga suba, pakadto sa dagat. Ginasuyop sang adlaw ang tubig sa dagat subong alisngaw, nga nagatupa subong ulan agod bunyagan liwat ang duta. (Manugwali 1:7) Madamu gid sing makadalayaw nga mga siklo ang ginapahikot sang Dios agod mag-aman sing kalan-on, puluy-an kag tanan nga butang para sa tawo kag sapat! Kag ano ang ginasugid sa aton sining tanan tuhoy sa kon ano nga sahi sang persona ang Dios? Nga sia isa ka Dios nga may dakung kaalam kag sia labing maalwan kag nagaulikid sa iya mga tinuga.—Hulubaton 3:19, 20; Salmo 104:13-15, 24, 25.
12. Ano ang ginatudlo sang inyo kaugalingon nga lawas tuhoy sa Dios?
12 Binagbinaga ang inyo lawas. Maathag nga ginhimu ini indi agod mabuhi lamang. Gindesinyo ini agod magkalipay sa kabuhi. (Salmo 139:14) Indi lamang itom kag puti ang makita sang aton mga mata kundi de-kolor, kag ang kalibutan manggaranon sa kolor. Makapanimaho kita kag makapanabor. Gani ang pagkaon indi lamang kinahanglanon; kundi makalilipay. Mabuhi kita bisan wala sini nga mga igbalatyag, apang regalo sila gikan sa isa ka mahigugmaon, maalwan, madinumdumon nga Dios.—Genesis 2:9; 1 Juan 4:8.
13. Ano ang maton-an ninyo gikan sa pagpakig-angot sang Dios sa tawo?
13 Ang pag-usisa sa mga pagpakig-angot sang Dios sa katawhan nagapakita man kon ano nga sahi sia sang Dios. Makatarunganon gid sia. Wala sia sing paboritismo sa mga rasa tang tawo. (Binuhatan 10:34, 35) Maluluy-on man sia kag mabuot. Ang Biblia nagasugid sang iya mga pagpakig-angot sa pungsod sang Israel, nga iya ginluwas gikan sa pagkaulipon sa Egipto: “Maluluy-on sia; . . . pirme nagadumdom nga sila unod lamang.” Nangin malalison ang mga Israelinhon, gani nagkasubo ang Dios. Suno sa Biblia: “Ginpalain nila ang iya buot . . . kag ginsaklaw nila ang Balaan sang Israel.” (Salmo 78:38-41; 103:8, 13, 14) Sa pihak nga bahin, kon matinumanon ang iya mga alagad, nagakalipay ang Dios. (Hulubaton 27:11) Kag amo sini ang ginabatyag sang Dios kon ang iya mga alagad ginapaantos sang mga kaaway: “Ang nagatandog sa inyo nagatandog sang tawotawo sang akon mata.” (Zacarias 2:8) Wala ka bala napahulag sa paghigugma sa Dios nga nagahigugma sa manubo, diutay nga mga tawo sang tanan nga rasa kag katawhan?—Isaias 40:22; Juan 3:16.
ANG DIOS BALA SI JESUS UKON TRINIDAD?
14. Ano ang Trinidad nga panudlo?
14 Sin-o ining makatilingala nga Dios? Ang iban nagasiling nga Jesus ang iya ngalan. Ang iban nagasiling nga Trinidad sia, bisan pa wala sa Biblia ang tinaga nga “trinidad.” Suno sa panudlo sang Trinidad, may tatlo ka persona sa isa ka Dios, kon sayoron, may “isa ka Dios, Amay, Anak kag Balaan nga Espiritu.” Madamu nga relihiosong organisasyon ang nagatudlo sini, bisan pa ila ginabaton nga “tanhaga” ini. Husto bala ina nga mga pagtamod sa Dios?
15. Paano ginapakita sang Biblia nga ang Dios kag si Jesus duha ka magkatuhay nga persona nga indi tupong?
15 Nagsiling bala si Jesus nga sia ang Dios? Wala gid. Sa baylo, ginatawag sia sa Biblia nga “Anak sang Dios.” Sia nagsiling: “Ang Amay daku pa sa akon.” (Juan 10:34-36; 14:28) Ginpaathag man ni Jesus nga may yara mga butang nga wala niya nahibaloan bisan sang mga anghel kundi sang Dios lamang. (Marcos 13:32) Nangamuyo kis-a si Jesus: “Indi ang akon kabubut-on, kundi ang imo, paghimuon.” (Lucas 22:42) Kon si Jesus ang Dios nga Labing Gamhanan, wala sia kuntani nangamuyo sa iya kaugalingon, indi bala? Ang Kasulatan nagasiling nga pagkapatay ni Jesus: “Ining Jesus ginbanhaw sang Dios.” (Binuhatan 2:32) Sa amo maathag nga ang Dios nga Labing Gamhanan kag si Jesus magkatuhay nga persona. Bisan sa tapos sang iya pagkapatay, pagkabanhaw kag pagkayab sa langit, si Jesus indi gihapon tupong sa iya Amay.—1 Corinto 11:3; 15:28.
16. Bisan ginapatuhoyan si Jesus nga “Dios,” ano ang nagapakita nga indi sia Labing Gamhanan?
16 ‘Apang indi bala nga ginatawag si Jesus nga Dios sa Biblia?’ basi may mamangkot. Matuod ini. Apang si Satanas ginatawag man nga dios. (2 Corinto 4:4) Sa Juan 1:1, nga nagapatuhoy kay Jesus subong “ang Pulong,” amo sini ang pagbadbad sang iban nga Biblia: “Sa ginsuguran amo ang Pulong, kag ang Pulong kaupod sa Dios, kag ang Pulong Dios.” Apang talupangda, ang bersikulo 2 nagasiling nga ang Pulong “sa ginsuguran kaupod sa Dios.” Kag samtang si Jesus nakita sang tawo, ang bersikulo 18 nagasiling nga “wala gid sing tawo nga nakakita sa Dios.” (Authorized ukon King James Version) Gani mas husto ang iban nga pagbadbad sa bersikulo 1: “Ang Pulong kaupod sa Dios, kag ang Pulong balaan,” ukon “isa ka dios,” kon sayoron, ang Pulong tulad-sa-dios nga gamhanan. (An American Translation) Maathag, si Jesus indi ang Dios nga Labing Gamhanan. Gintawag pa gani ni Jesus ang iya Amay subong “Dios ko” kag subong “ang lamang matuod nga Dios.”—Juan 20:17; 17:3.
17. Paano ang pagpasagahay sing balaan nga espiritu sa mga sumulunod ni Jesus nagapamatuod nga indi ini persona?
17 Tuhoy sa “Balaan nga Espiritu,” ang ikatlo nga Persona sang Trinidad, nakita na naton nga indi ini persona kundi aktibo nga kusog sang Dios. Si Juan Bautista nagsiling nga si Jesus magabawtismo sa balaan nga espiritu, subong nga si Juan nagbawtismo sa tubig. Busa, subong nga ang tubig indi persona, ang balaan nga espiritu indi man persona. (Mateo 3:11) Ang gintagna ni Juan natuman sang, pagkatapos mapatay kag ginbanhaw si Jesus, ang balaan nga espiritu ginpasagahay sa iya mga sumulunod nga nagtipon sa Jerusalem. Ang Biblia nagasiling: “Napuno sila tanan sing balaan nga espiritu.” (Binuhatan 2:4) “Napuno” bala sila sing persona? Wala, kundi napuno sila sing aktibo nga kusog sang Dios. Maathag suno sa mga pamatuod nga ang Trinidad wala ginatudlo sang Biblia. Sa kamatuoran, madugay na sa wala pa magkari si Jesus sa duta ginasimba na ang mga dios sing tig-tatlotatlo, ukon trinidad, sa mga duog subong sang dumaan nga Egipto kag Babilonia.
ANG NGALAN SANG DIOS
18. (a) “Dios” bala ang personal nga ngalan sang Labing Gamhanan nga Dios? (b) Ano ang iya personal nga ngalan?
18 Pat-od nga ang tanan nga kilala ninyo may ngalan. Ang Dios may personal man nga ngalan nga nagapatuhay sa iya. ‘Indi bala “Dios” ang iya ngalan?’ pamangkot sang iban. Indi, kay ang “Dios” titulo lamang, subong sang “Presidente,” “Hari” kag “Hukom.” Maton-an naton ang ngalan sang Dios sa Biblia, sa diin nagalutaw ini sing mga 7,000 ka beses. Halimbawa, sa King James Version, ang Salmo 83:18 nagasiling: “Agod nga makilala sang mga tawo nga ikaw lamang, nga ang imo ngalan amo si JEHOVA, amo ang labing mataas sa bug-os nga duta.” Ang ngalan sang Dios makita man sa kalabanan nga Biblia sa Bugna 19:1-6 subong bahin sang “Alleluia” ukon “Hallelujah.” Nagakahulugan ini sing “dayawon si Jah,” ginpalip-ot nga porma sang Jehova.
19. (a) Ngaa nagakakibot ang iban kon mabasa nila ang ngalan sang Dios sa ila Biblia? (b) Sa diin makita ang ngalan sa King James Version?
19 Ang iban nagakakibot nga makita ang ngalan sang Dios sa ila Biblia. Ini bangod ang ila Biblia talagsa lang nagagamit sang ngalan sang Dios. Sa King James Version, halimbawa, makita lamang ang ngalan nga “Jehova” sa Exodo 6:3, Salmo 83:18 kag Isaias 12:2 kag 26:4. Apang, kon ginabadbad sini ang ngalan sang Dios sa titulo nga “Ginuo” ukon “Dios,” pirme dalagku nga mga letra ang ginagamit, subong sang “GINUO” kag “DIOS,” agod ipatuhay ini sa kinaandan nga “Ginuo” kag “Dios.” Talupangda ini sa Salmo 110:1.
20. (a) Ngaa malaka ginagamit ang ngalan sang Dios? (b) Dapat bala nga amo sini?
20 Basi ipamangkot ninyo, ‘Ngaa wala pirme ginagamit ang ngalan sang Dios subong sang sa orihinal nga teksto sang Biblia? Ngaa ginaislan ini sing titulo nga GINUO kag DIOS?’ Sa introduksion sini, ginapaathag sang American Standard Version kon ngaa ginagamit sini ang ngalan sang Dios nga Jehova, kag kon ngaa madugay nga wala ini paggamita sang una: “Sa tapos mausisa sing maayo, naghiliugyon ang Amerikano nga mga Rebisador nga ang Judiyo nga disparatis, nga nagtamod sa Balaan nga Ngalan subong tuman ka balaan sambiton, indi na dapat mangibabaw sa Ingles ukon iban nga bersion . . . Ining personal nga ngalan, lakip ang madamu balaan nga kahulugan sini, ginpasag-uli na karon sa sagrado nga teksto sa husto nga lugar sini.” Huo, nagpati ang mga manugbadbad sang Biblia sa Ingles nga indi maayo ang mga rason kon ngaa gindula ang ngalan sang Dios. Gani ginbalik nila ini sa Biblia sa husto nga mga lugar.
21. Ano ang ginasiling sang Katoliko nga Douay Version tuhoy sa ngalan nga Jehova?
21 Apang may mga nagabais nga ang tinaga nga “Jehova” indi dapat gamiton bangod indi ini ang ngalan sang Dios. Halimbawa, ang Katoliko nga Douay Version, nga wala nagagamit sa ngalan sang Dios sa teksto sini, nagasiling sa footnote sini sa Exodo 6:3: “Ginhimuhimu sang pila ka moderno ang ngalan nga Jehova . . . ang matuod nga pagmitlang sa ngalan sa Hebreong teksto, bangod madugay na nga wala ginagamit, nalimtan na karon.”
22. (a) Paano ginarepresentar ang ngalan sang Dios sa Hebreong hambal? (b) Ngaa may palaligban kon ano ang orihinal nga pagmitlang sa ngalan sang Dios?
22 Huo, ginabaton sang Katoliko nga Biblia nga ang ngalan sang Dios makita sa Hebreong teksto, bangod ginsulat sa Hebreo nga hambal ang nahauna nga 39 ka tolon-an sang Biblia. Ang ngalan ginrepresentar didto sang apat ka Hebreong letra, YHWH. Ang Hebreo nga hambal sang una ginasulat nga wala sing vowels, mga letra nga subong sang a, e, i, o kag u, nga nagabulig sa aton sa husto nga pagmitlang sa mga tinaga. Busa, ang palaligban amo nga wala kita nakahibalo sang sibu nga mga vowel nga gingamit sang mga Hebreo para sa mga consonant nga YHWH.
23. Paano ang “bldg” kag “building” nagabulig sa aton agod mahangpan ang palaligban sa pagmitlang sa ngalan sang Dios?
23 Agod mahangpan naton ang palaligban, binagbinaga ang Ingles nga tinaga nga “building.” Ibutang ta nga pirme ini ginasulat nga “bldg,” kag sang ulihi, wala na ginamitlang ang tinaga. Paano mahibaloan sang isa ka tawo nga mabuhi 1,000 ka tuig kutob karon ang pagmitlang sa “bldg” kon basahon niya ini? Sanglit wala pa gid niya ini mabatii kag wala sia nakahibalo kon ano nga mga vowel ang yara sa tinaga, indi niya mapat-od. Amo man sa ngalan sang Dios. Indi mahibaloan ang husto nga pagmitlang sini, apang ginahunahuna sang iban nga mga eskolar nga husto ang “Yahweh.” Apang, ang “Jehova” madugay na nga ginagamit sa sulod sang mga siglo kag amo ang pinakabantog.
24. (a) Agod wala sing sumpakilay, ngaa nagakaigo nga gamiton naton ang ngalan sang Dios? (b) Bangod sang Binuhatan 15:14, ngaa importante nga gamiton ang ngalan sang Dios?
24 Dapat pa bala naton gamiton ang ngalan sang Dios bisan pa wala naton nahibaloan ang husto nga pagmitlang sini? Bueno, ginagamit naton ang ngalan sang iban nga tawo sa Biblia, bisan pa ang pagmitlang naton sini indi suno sa orihinal nga Hebreo. Halimbawa, ang ngalan ni Jesus ginamitlang nga “Yesh’ua” sa Hebreo. Gani nagakaigo nga gamiton ang ngalan sang Dios, nga ginapahayag sa Biblia, sambiton man naton ini nga “Yahweh,” “Jehova,” ukon sa iban nga paagi nga kinaandan sa aton hambal. Ang malain amo ang indi paggamit sa sina nga ngalan. Ngaa? Bangod ang wala nagagamit sini indi maisip sa mga ginakuha sang Dios agod mangin “katawhan sa iya ngalan.” (Binuhatan 15:14) Indi lamang nga kilalahon naton ang ngalan sang Dios kundi dapat ini dayawon sa atubangan sang iban, subong sang ginhimu anay ni Jesus sa duta.—Mateo 6:9; Juan 17:6, 26.
DIOS SANG KATUYOAN
25. (a) Ano nga mga butang tuhoy sa Dios ang mabudlay naton hangpon? (b) Ano ang nagpahulag kay Jehova sa pagpanuga?
25 Bisan pa mahimu mabudlay naton mahangpan, si Jehova wala gid sing ginsuguran kag wala sing katapusan. Sia ang “Hari sang walay katubtuban.” (Salmo 90:2; 1 Timoteo 1:17) Antes sia magpanuga, isahanon lang si Jehova sa uniberso. Apang indi sia masubo, bangod kompleto sia sa iya kaugalingon kag wala sing kulang. Gugma ang nagpahulag sa iya nga magpanuga, agod ang iban makatigayon sing kabuhi. Ang una nga gintuga sang Dios amo ang espiritu nga mga persona kasubong niya. May yara sia daku nga organisasyon sang langitnon nga mga anak antes niya ginhanda ang duta para sa tawo. Tuyo ni Jehova nga magkalipay sila sa kabuhi kag sa hilikuton nga ginhatag niya sa ila.—Job 38:4, 7.
26. Ngaa mapat-od naton nga matuman ang katuyoan sang Dios para sa duta?
26 Sang mahanda na ang duta, ginbutang ni Jehova ang mag-asawa, sanday Adan kag Eva, sa isa ka bahin sang duta nga nangin paraiso na. Tuyo niya nga makatigayon sila sing mga anak nga magatuman kag magasimba sa iya, kag magapasangkad sang paraiso sa bug-os nga duta. (Genesis 1:27, 28) Apang, nahibaloan naton nga nasablagan ining daku nga katuyoan. Ginlalis nanday Adan kag Eva ang Dios, kag ang iya katuyoan wala matuman. Apang madayon ini, bangod mangin kalutosan kay Jehova nga indi tumanon ang iya katuyoan. Indi niya mahimu ina! “Ang tanan nga nahamut-an ko himuon ko,” siling niya. “Ginpamulong ko; akon man ini pahanabuon.”—Isaias 46:10, 11.
27. (a) Ngaa manabat kita sa Dios? (b) Gani ano nga pamangkot ang binagbinagon naton sing serioso?
27 Nahibaloan na bala ninyo kon paano kamo malakip sa katuyoan sang Dios? Indi sa paghimu sang luyag ninyo nga wala ginabinagbinag ang kabubut-on sang Dios. Amo sina ang ginhimu nanday Adan kag Eva. Nahibaloan nila ang kabubut-on sang Dios apang wala nila paghimua. Gani ginpapanabat sila sang Dios. Manabat man bala kita sa Dios? Huo, bangod ang Dios amo ang Tuburan sang aton kabuhi. Ang aton kabuhi nasandig sa iya. (Salmo 36:9; Mateo 5:45) Tubtob sa anong kasangkaron ipahisuno naton ang aton kabuhi sa katuyoan sang Dios para sa aton? Dapat kita mangin serioso sa sini, bangod nasandig sa sini ang aton kahigayunan para sa kabuhi nga walay katapusan.
KON PAANO SIMBAHON SI JEHOVA
28. Ano nga bulig ang ginagamit sang iban sa pagsimba sa Dios?
28 Importante kon paano naton ginasimba si Jehova. Dapat sia simbahon suno sa luyag niya, bisan pa tuhay ini sa aton namat-an. Halimbawa, kinabatasan na sang iban nga maggamit sing mga imahen sa ila pagsimba. Mahimu magasiling sila nga wala nila ginasimba ang imahen, kundi ang pagtan-aw kag pagtandog sa sini nagabulig sa ila sa pagsimba sa Dios. Apang luyag bala sang Dios nga simbahon naton sia upod sa bulig sang mga imahen?
29. Paano ginapakita sang Biblia nga sayop ang maggamit sing imahen sa pagsimba?
29 Indi, indi niya luyag. Amo gid kon ngaa siling ni Moises sa mga Israelinhon wala magpakita ang Dios sa ila. (Deuteronomio 4:15-19) Ang isa sa Napulo ka Sugo nagasiling: “Dili ka maghimu nga sa imo sing larawan nga tinigban ukon bisan ano nga kaangay sang bisan ano . . . dili ka magyaub sa ila ukon mag-alagad sa ila.” (Exodo 20:4, 5, sa Katoliko nga Jerusalem Bible) Si Jehova lamang ang simbahon. Sulitsulit nga ginapakita sang Biblia nga malain ang maghimu sing imahen ukon magyaub sa sini, ukon magsimba kay bisan sin-o ukon sa bisan ano luwas kay Jehova.—Isaias 44:14-20; 46:6, 7; Salmo 115:4-8.
30. (a) Ano ang ginsiling ni Jesus kag sang iya mga apostol agod ipakita nga sayop ang maggamit sing imahen? (b) Suno sa Deuteronomio 7:25, ano ang dapat himuon sa mga imahen?
30 Subong paabuton, si Jesus wala gid maggamit sing imahen sa pagsimba. “Ang Dios Espiritu,” paathag niya, “kag ang mga nagasimba sa iya kinahanglan magsimba sa espiritu kag kamatuoran.” (Juan 4:24) Sa pagsunod sa sini, ang mga sumulunod anay ni Jesus wala maggamit sing imahen subong bulig sa pagsimba. Sa kamatuoran, ang iya apostol nga si Pablo nagsulat: “Nagalakat kita sa pagtuo, indi sa panulok.” (2 Corinto 5:7) Kag ang iya apostol nga si Juan nagpaandam: “Maglikaw kamo sa mga diosdios.” (1 Juan 5:21) Ngaa indi manghulonghulong sa inyo balay kag pamangkota ang inyo kaugalingon kon bala ginasunod ninyo ining laygay?—Deuteronomio 7:25.
31. (a) Bisan pa indi naton mahangpan ang katuyoan sang isa ka sugo sang Dios, ano ang magapahulag sa aton sa pagtuman? (b) Ano ang dapat himuon naton, kag ano nga pangagda ang batunon naton?
31 Ang pagsimba kay Jehova suno sa luyag niya pat-od nga magahatag sa aton sing matuod nga kalipay. (Jeremias 14:22) Ang iya mga ginapangayo para sa aton kaayohan, sa aton dayon nga kaayohan. Kon kaisa, bangod sang limitado nga ihibalo kag eksperiensia, indi naton mahangpan kon ngaa importante ang isa ka sugo sang Dios, ukon kon paano ini para sa aton kaayohan. Apang ang aton pagpati nga kapin ang nahibaloan sang Dios sang sa aton dapat magpahulag sa aton sa pagtuman sing kinabubut-on. (Salmo 19:7-11) Gani, manikasog kita nga ton-an ang tanan tuhoy kay Jehova, kag batunon ang pangagda: “O kari, magsimba kita kag magyaub; magluhod kita sa atubangan ni Jehova nga aton Magbubuhat. Kay sia aton Dios, kag kita ang katawhan sang iya halalban kag ang mga karnero sang iya kamut.”—Salmo 95:6, 7.
[Mga Pamangkot sa Pagtinuon]
[Kahon sa pahina 42]
Makita diri ang apat ka lugar nga sa diin mabasa ang ngalan sang Dios sa King James Version
[Mga piktyur sa pahina 34, 35]
Kon may naghimu sa balay, . . . pat-od nga may Naghimu man sa kapin kasibud nga uniberso
[Piktyur sa pahina 39]
Sanglit nangamuyo si Jesus sa Dios nga himuon ang kabubut-on sang Dios, indi ang sa iya, indi mahimu nga sila nga duha isa ka persona
[Piktyur sa pahina 40, 41]
Paano mangin persona ang balaan nga espiritu, samtang mga 120 ka disipulo ang ginpun-an sini sing dungan?
[Piktyur sa pahina 45]
Husto bala nga maggamit sing imahen sa pagsimba?
