Kapitulo 18

“Ang Katapusan sang Kalibutan” Malapit Na!

1. Paano nahibaloan sang dutan-on nga mga sumulunod ni Cristo kon san-o sia nagsugod sa paggahom sa langit?

 SANG GINTABOG ni Jesucristo si Satanas kag ang iya mga anghel gikan sa langit kag nagsugod sa paggahom sa Ginharian, nagkahulugan yadto nga ang katapusan ni Satanas kag sang iya malauton nga sistema malapit na. (Bugna 12:​7-12) Apang paano ang mga sumulunod ni Cristo sa duta nakahibalo nga ining hitabo sa langit, nga indi makita sang ila mga mata, natabo na? Paano nila nahibaloan nga si Cristo dimakita nga naggahom sa Ginharian kag nga “ang katapusan sang kalibutan” malapit na? Nahibaloan nila ini paagi sa pag-usisa kon bala ang “tanda” nga ginhatag ni Jesus natuman.

2. Ano ang ginpamangkot sang mga disipulo ni Cristo sa iya?

² Sa wala pa mapatay si Jesus, samtang nagalingkod sia sa Bukid sang mga Olivo, ang apat sang iya mga apostoles nagpalapit sa iya kag nangayo sing “tanda.” Ang ila pamangkot mabasa sang minilyon ka tawo sa ­King ­James Ver­sion sing subong sini: “Sugiri kami, san-o matabo ining mga butang? kag ano ang mangin tanda sang imo pagkari, kag sang katapusan sang kalibutan?” (Mateo 24:3) Apang ano ang buot silingon sining mga ekspresyon, “imo pagkari” kag “katapusan sang kalibutan”?

3. (a) Ano gid ang buot silingon sang mga ekspresyon nga “imo pagkari” kag “katapusan sang kalibutan”? (b) Paano, nian, ang sibu nga pagbadbad sa pamangkot nga ginpamangkot sang mga disipulo ni Cristo?

³ Ang Griegong tinaga nga ginbadbad diri “pagkari” amo ang parousia, kag nagakahulugan ini sing “presensia.” Gani, kon makita na ang “tanda,” nagakahulugan ini nga mahibaloan naton nga si Cristo yari na bisan pa indi makita, nga sia nagagahom na sa Ginharian. Ang ekspresyon nga “katapusan sang kalibutan” makapatalang man. Wala ini nagakahulugan sing katapusan sang duta, kundi, sa baylo, katapusan sang sistema sang mga butang ni Satanas. (2 Corinto 4:4) Busa ang pamangkot sang mga apostoles sibu nga mabasa sing subong sini: “Sugiri kami, San-o matabo ining mga butang, kag ano ang mangin tanda sang imo presensia kag sang katapusan sang sistema sang mga butang?”​—⁠Mateo 24:​3, ­New World Trans­la­tion.

4. (a) Ano ang mga bahin sang “tanda” nga ginhatag ni Jesus? (b) Sa anong paagi ang “tanda” mapaanggid sa marka sang tudlo?

 ⁴ Wala si Jesus maghatag sing isa lamang ka hitabo subong “tanda.” Nagtagna sia sing madamu nga hitabo kag mga kahimtangan. Ang iban pa nga manunulat sang Biblia luwas kay Mateo nagsambit sing dugang pa nga mga hitabo nga magatanda sa “katapusan nga mga adlaw.” Ining tanan nga butang nga gintagna mahanabo sa sulod sang tion nga ginatawag sang mga manunulat sang Biblia ang “katapusan nga mga adlaw.” (2 Timoteo 3:​1-5; 2 Pedro 3:​3, 4) Ining mga hitabo mangin subong sang lainlain nga mga linya nga nagahuman sa marka sang tudlo sang isa ka tawo, marka nga indi mapanag-iya sang bisan sin-o nga iban nga tawo. Ang “katapusan nga mga adlaw” may kaugalingon nga mga tanda, ukon mga hitabo. Nagaporma ini sing positibo nga “marka sang tudlo” nga indi mapanag-iya sang bisan anong iban pa nga hut-ong sang tion.

5, 6. Samtang ginausisa mo ang 11 ka pamatuod sang “katapusan nga mga adlaw” sa masunod nga mga pahina, ano ang nahangpan mo tuhoy sa “katapusan sang sistema sang mga butang”?

⁵ Sa kapitulo 16 sining libro nabinagbinag naton ang pamatuod sang Biblia nga si Cristo nagbalik na kag nagsugod sa paggahom sa tunga sang iya mga kaaway sang tuig 1914. Usisaa sing maayo karon ang nanuhaytuhay nga bahin sang “tanda” sang presensia ni Cristo kag ang dugang pa nga pamatuod sang “katapusan nga mga adlaw” sang malauton nga sistema sang mga butang ni Satanas. Samtang ginausisa mo ining gintagna nga mga butang sa masunod nga apat ka pahina, talupangda kon paano sila nagakatuman sugod sang 1914.

  “ANG PUNGSOD MAGATINDOG BATOK SA PUNGSOD KAG ANG GINHARIAN BATOK SA GINHARIAN.”​—⁠Mateo 24:7.

 Pat-od nga nakita mo ining bahin sang “tanda” nga nagakatuman sugod sang 1914! Nagsugod sadto nga tuig ang Inaway Kalibutanon I. Wala pa gid matabo sa maragtas ang subong sadto ka makakulugmat nga inaway. Isa yadto ka bug-os nga inaway. Ang Inaway Kalibutanon I daku pa sa tanan dalagku nga inaway nga natabo sa sulod sang 2,400 ka tuig antes sang 1914. Apang pagligad lamang sang 21 ka tuig sa tapos sadtong inaway, nagsugod ang Inaway Kalibutanon II. Kag apat ka beses nga malaglagon ini sang sa Inaway Kalibutanon I.

 Nagapadayon ang makakulugmat nga mga inaway. Kutob sang matapos ang Inaway Kalibutanon II sang 1945, kapin sa 25 milyones ka tawo ang napatay sa mga 150 ka inaway sa bilog nga globo. Sa promedyo, 12 ka inaway ang nagakatabo sa isa ka adlaw sa iban nga bahin sang kalibutan. Kag yara gihapon ang katalagman sa isa pa ka kalibutanon nga inaway. Ang Estados Unidos lamang may bastante nga nuklear nga mga hinganiban sa paglaglag sa tagsa ka lalaki, babayi kag bata sa duta sing 12 ka beses!

 “MAY KAKULANG SA KALAN-ON.”​—⁠Mateo 24:7.

 Natabo ang pinakamalala nga tiggulutom sa bug-os nga maragtas pagkatapos sang Inaway Kalibutanon I. Sa naaminhan nga China lamang 15,000 ang napatay kada adlaw bangod sa gutom. Apang daku pa ang kakulang sa kalan-on pagkatapos sang Inaway Kalibutanon II. Ikap-at nga bahin sang kalibutan sadto ang nagutman! Kag sugod sadto, nangin maiwat ang kalan-on para sa madamu nga katawhan sa duta.

 “Sa kada 8.6 segundo may isa sa indi mauswagon nga pungsod nga nagakapatay bangod sang balatian nga ginatuga sang malnutrisyon,” siling sang ­New ­York ­Times sang 1967. Minilyon gihapon ang nagakapatay sa gutom​—⁠mga 50 milyones kada tuig! Sang 1980, mga ikap-at nga bahin sang katawhan sa duta (1,000,000,000 ka tawo) ang ginagutom bangod wala sila sing bastante nga makaon. Bisan sa mga duog nga bugana ang kalan-on, madamu ang tuman kaimol sa pagbakal sini.

  “MAY PISTE SA NAGAKALAINLAIN NGA MGA DUOG.”​—⁠Lucas 21:​11.

 Pagkatapos gid sang Inaway Kalibutanon I mas madamu nga tawo ang napatay bangod sa trangkaso Espanyola sang sa bisan anong balatian sa maragtas sang katawhan. Mga 21 milyones ka tawo ang napatay! Apang padayon ang pagsalakay sang mga piste kag balatian. Minilyon ang nagakapatay kada tuig bangod sa balatian sa tagipusuon kag kanser. Ang balatian sa kinatawo madasig nga nagalapta. Ang iban pa sang makakulugmat nga balatian subong sang malaria, ­snail fe­ver kag riv­er blind­ness, nagakatabo sa lainlain nga pungsod, labi na sa Asia, Aprika kag Latin Amerika.

 “MAY LINOG SA NAGAKALAINLAIN NGA MGA DUOG.”​—⁠Mateo 24:7.

 Kutob sang 1914 tubtob karon, mas madamu ang mabaskog nga mga linog sang sa bisan anong iban pa kaangay nga tion sa narekord nga maragtas. Sa sulod sang kapin sa 1,000 ka tuig, kutob sang tuig 856 C.⁠E. tubtob sang 1914, may yara lamang 24 ka mabaskog nga linog, nga gintunaan sing mga 1,973,000 ka kamatay. Apang sa sulod sang 63 ka tuig kutob sang 1915 tubtob sang 1978, mga 1,600,000 tanan ka tawo ang napatay sa 43 ka mabaskog nga mga linog.

 “MAGABUAD ANG PAGKAMALINAPASON.”—⁠Mateo 24:12.

 Gikan sa bug-os nga kalibutan nagahalin ang mga report tuhoy sa nagabuad nga pagkamalinapason kag krimen. Ang masingki nga mga krimen, subong sang pagpatay, paglugos kag pagpangawat, indi na matapna. Sa Estados Unidos lamang, ang isa ka mabug-at nga krimen ginahimu, sa promedyo, nga halos kada segundo. Sa madamu nga duog wala sing isa nga nagabatyag sing kasigurohan sa mga kalye, bisan kon adlaw. Kon gab-i ang mga tawo nagapabilin sa ila mga balay nga nakandadohan kag natrangkahan ang mga puertahan, kag nahadlok sila sa pagguwa.

  “ANG MGA TAWO NAGAKAPUNAW SA KAHADLOK.”​—⁠Lucas 21:26.

 Mahimu nga ang kahadlok amo ang nagapangibabaw nga balatyagon sa kabuhi sang mga tawo karon. Wala madugay sa tapos ginpalupok ang nahauna nga mga nuklear nga bomba, ang sientipiko sa atomiko nga si Har­old C. ­Urey nagsiling: “Magakaon kita sing kahadlok, magatulog nga may kahadlok, magakabuhi sa kahadlok kag mapatay sa kahadlok.” Amo sini ang nagakatabo sa kalabanan nga katawhan. Kag indi lamang ini bangod sa katalagman sa nuklear nga inaway. Ginakahadlokan man sang katawhan ang krimen, pagdagta, balatian, implasyon kag madamu pa nga butang nga nagabutang sa katalagman sang ila kalig-onan kag sang ila mismo kabuhi.

 “MALALISON SA MGA GINIKANAN.”​—⁠2 Timoteo 3:2.

 Indi karon makontrol sang mga ginikanan ang ila kabataan. Nagarebelde ang mga pamatan-on sa tanan nga awtoridad. Gani apektado ang tagsa ka pungsod sa duta sang kalalat-an nga krimen sang mga pamatan-on. Kapin sa katunga sang tanan mabug-at nga krimen sa pila ka pungsod ang ginahimu sang kabataan nga 10 pa 17 ka tuig ang edad. Pagpatay, paglugos, pagsalakay, pagpangawat, pagpamungkal, pagpangawat sing awto​—⁠ini tanan ginahimu sang kabataan. Wala pa gid matabo sa maragtas nga ang pagkamalalison sa mga ginikanan tuman ka kinaandan.

 “MAHIGUGMAON SA KUARTA.”​—⁠2 Timoteo 3:2.

 Bisan diin ka magtulok karon makakita ka sing makagud nga mga buhat. Madamu ang magahimu sing bisan ano para lamang sa kuarta. Mangawat sila ukon magapatay pa gani. Indi tumalagsahon nga ang makagud nga mga tawo nagapatubas kag nagabaligya sing mga produkto nga nakilal-an, sa pila ka paagi, nga makahalit sa iban ukon makapatay sa ila. Sing dayag, ukon paagi sa ila pagkabuhi, ang mga tawo nagasiling sa kuarta: ‘Amo ini ang dios ko.’

  “MAHIGUGMAON SA KINASADYA SA BAYLO SANG SA DIOS.”​—⁠2 Timoteo 3:4.

 Ang ginahunahuna lamang sang kalabanan karon amo ang paghimu sang nagapahamuot sa ila ukon sa ila pamilya, indi ang nagapahamuot sa Dios. Ginahigugma labi na sang madamu ang ginapakamalaut sang Dios, lakip ang pagpakighilawas, panghilahi, pagpahubog, pag-abuso sa droga kag iban pa sang ginatawag nga kinasadya. Bisan gani ang mga kinasadya nga, sa ila kaugalingon, mahimu nga maayo ginauna sa bisan anong panikasog sa pagtuon tuhoy sa Dios kag mag-alagad sa iya.

 “MAY DAGWAY SANG PAGKADIOSNON APANG NAGAPANGHIWALA SANG GAHOM SINI.”​—⁠2 Timoteo 3:5.

 Ang mga lider sang kalibutan kag ang kinaandan nga mga tawo masami nga nagapakunokuno subong mga diosnon. Nagasimba sila kag nagaamot para sa relihioso nga mga katuyoan. Ang mga yara sa pangulohan mahimu nga nagapanumpa sa Biblia kon magpungko sila sa palangakoan. Apang sa masami isa lamang ini ka “dagway sang pagkadiosnon.” Subong gintagna sang Biblia, ang matuod nga pagsimba indi gid isa ka puersa sa kabuhi sang kalabanan nga tawo karon. Wala sila ginapahulag sang matuod nga gahom para sa kaayohan.

 “NAGALAGLAG SANG DUTA.”​—⁠Bugna 11:18.

 Ang hangin nga aton ginahaklo, ang tubig nga aton ginainum kag ang duta nga ginatamnan sang aton kalan-on ginahigkuan. Tuman ini ka serioso amo kon ngaa ang sientipiko nga si Bar­ry Com­mo­ner nagpaandam: “Nagapati ako nga ang padayon nga paghigku sa duta, kon indi matapna, magalaglag sa ulihi sang pagkanagakabagay sining planeta subong isa ka duog para sa tawhanon nga kabuhi.”

 ⁶ Sa tapos mabinagbinag ang nagligad nga mga pahina, indi bala maathag nga ang “tanda” nga ginhatag ni Cristo kag ang mga pamatuod nga gintagna sang iya mga disipulo nagakatuman karon? Bisan pa may yara iban nga pamatuod, ang mga ginlista diri bastante na sa pagpakita nga nagakabuhi gid kita sa tion nga gintagna sang Biblia subong ang “katapusan nga mga adlaw.”

7. (a) Ano ang nagahimu sa mga tagna sang Biblia tuhoy sa presensia ni Cristo kag sang “katapusan nga mga adlaw” nga tuman ka talalupangdon? (b) Kabaliskaran sang gintagna sang Biblia, ano ang gintagna sang mga lider sang kalibutan sa wala pa ang 1914?

⁷ Apang mahimu magasiling ang iban: ‘Ang mga butang subong sang inaway, tiggulutom, mga piste kag mga linog masami nga nagakatabo sa bug-os nga maragtas. Gani indi mabudlay tagnaon nga matabo sila liwat.’ Apang hunahunaa: Wala lamang gintagna sang Biblia ining mga butang, kundi ginpakita sini nga ini sila matabo sa bug-os kalibutan nga kasangkaron. Nagsiling man ang Biblia nga ining tanan nga butang matabo sa kaliwatan nga nabuhi sang 1914. Apang ano ang gintagna sang kilala nga mga lider sang kalibutan sa wala pa ang 1914? Nagsiling sila nga ang mga kahimtangan nga nagapanaad sing paghidait sa kalibutan maayo gid sadto sang sa bisan anong tion. Apang ang makakulugmat nga mga kagamu nga gintagna sang Biblia nagsugod sing sibu sa tion, sang 1914! Sa kamatuoran, ang mga lider sang kalibutan nagasiling karon nga ang 1914 isa ka daku nga pagbaylo sa maragtas.

8. (a) Diin nga kaliwatan ang siling ni Jesus makakita sa katapusan sining sistema sang mga butang? (b) Gani ano ang aton mapat-od?

⁸ Sa tapos mapatalupangod ang madamung butang nga nagtanda sang tion kutob sang 1914 padayon, si Jesus nagsiling: “Ining kaliwatan indi magataliwan tubtob nga tanan ining butang [lakip ang katapusan sining sistema] matabo.” (Mateo 24:​34, 14) Diin nga kaliwatan ang buot silingon ni Jesus? Buot niya silingon ang kaliwatan sang katawhan nga nabuhi sang 1914. Ang mga tawo nga nabilin sa sina nga kaliwatan tigulang na karon. Apang, ang iban sa ila mabuhi pa sa pagsaksi sa katapusan sining malauton nga sistema. Gani mapat-od naton ini: Sa dili madugay karon ang hinali nga katapusan magaabot sa tanan nga kalautan kag malauton nga katawhan sa Armagedon.

[Mga Pamangkot sa Pagtinuon]

[Piktyur sa pahina 149]

Ginsugid ni Jesus sa iya mga disipulo ang kitaon nga pamatuod sang iya dimakita nga presensia nga may gahom sa Ginharian

[Piktyur sa pahina 154]

1914—ARMAGEDON

Ang iban sa kaliwatan nga nabuhi sang 1914 makakita sa katapusan sang sistema sang mga butang kag makalampuwas sa sini