Kapitulo 1

Ang Mabuhi sing Dayon Indi Damgo Lamang

1, 2. Ngaa mabudlay patihan nga ang tawo mahimu mabuhi sing dayon sa kalipay sa duta?

 KALIPAY sa duta​—⁠daw imposible ina bisan sa makadali lamang. Ang balatian, pagtigulang, gutom kag krimen pila sa palaligban nga masami nagapabudlay sang kabuhi. Gani, mahimu magasiling ka nga ang pagpati sa dayon nga kabuhi sa paraiso sa duta pagpiyong sang imo mga mata sa kamatuoran. Mahimu kabigon mo nga uyang sa tion ang paghambal tuhoy sini, nga ang dayon nga kabuhi damgo lamang.

² Pat-od nga madamu ang magaugyon sa imo. Kon amo, ngaa mapat-od naton nga mahimu ikaw mabuhi sing dayon sa paraiso sa duta? Ngaa makapati kita nga ang walay katapusan nga kabuhi indi damgo lamang?

KON NGAA MAKAPATI KITA

3. Ano ang nagapakita nga luyag sang Dios nga magmalipayon ang tawo sa duta?

³ Bangod ang Supremo nga Manuggahom, ang Dios nga Labing Gamhanan, naghanda sa duta nga kompleto sing tanan nga kinahanglanon naton. Ginhimu niya ang duta nga bagay gid para sa aton! Kag gintuga niya ang lalaki kag babayi agod magkalipay sing bug-os sa pagkabuhi sa sining dutan-on nga puluy-an​—⁠tubtob san-o.​—⁠Salmo 115:16.

4. Ano ang naton-an sang mga sientipiko sa lawas sang tawo nga nagapakita ginhimu ini agod mabuhi sing dayon?

⁴ Madugay na nahibal-an sang mga sientipiko nga ang lawas makabag-o sang iya kaugalingon. Ang mga selula sang lawas makatilingala nga ginaislan ukon ginakay-o. Kag daw walay katapusan ini nga ikasarang. Apang indi amo sini ang nagakatabo, kag indi ini mapaathag sang mga sientipiko. Indi gihapon nila mahangpan kon ngaa nagatigulang ang tawo. Nagasiling sila nga, kon  maayo ang kahimtangan, ang tawo dapat mabuhi tubtob san-o.​—⁠Salmo 139:14.

5. Ano ang ginasiling sang Biblia tuhoy sa tuyo sang Dios para sa duta?

⁵ Apang, tuyo gid bala sang Dios nga magkalipay ang mga tawo sa duta tubtob san-o? Kon huo, nian ang kabuhi nga walay katapusan indi damgo lamang​—⁠magaabot gid ini! Ano ang ginasiling sang Biblia, ang tolon-an nga nagasugid sang mga katuyoan sang Dios, tuhoy sini? Ginatawag sini ang Dios “ang Manughuman sang duta kag ang Magbubuhat sini,” kag nagdugang: “Sia nga nagpalig-on sini, nga wala magtuga sini sa walay pulos, nga naghuman sini agod puy-an.”​—⁠Isaias 45:18.

6. (a) Ano ang mga kahimtangan karon sa duta? (b) Amo bala sini ang luyag sang Dios nga matabo?

⁶ Sa banta mo ayhan ginapuy-an karon ang duta suno sa tuyo sang Dios? Matuod, may tawo sa halos tanan nga bahin sang duta. Apang malipayon bala sila subong isa ka nahiusa nga pamilya, suno sa tuyo sang Manunuga para sa ila? Ang kalibutan karon nabahinbahin. May dumot. May krimen. May inaway. Minilyon ang ginagutom kag may balatian. Ang iban nagapalibog sa adlaw-adlaw bangod sa ilistaran, trabaho kag mga gasto. Wala sing isa sini nga nagapadungog sa Dios. Maathag kon amo nga ang duta wala ginapuy-an suno sa tuyo sang Dios sa ginsuguran.

7. Ano ang tuyo sang Dios para sa duta sang gintuga niya ang unang mag-asawa?

⁷ Sa tapos gintuga ang unang mag-asawa, ginbutang sila sang Dios sa isa ka dutan-on nga paraiso. Luyag niya nga magkalipay sila tubtob san-o. Tuyo niya nga ila pasangkaron ang paraiso sa bug-os nga duta. Gani ginsugo sila: “Magmabungahon kag magbuad kag magtugob sang duta kag magpakaagalon sa iya.” (Genesis 1:28) Huo, tuyo sang Dios nga sa ulihi ang bug-os nga duta gamhan sang isa ka matarong nga pamilya sang tawo nga nagakabuhi sa paghidait kag kalipay.

8. Bisan pa naglalis ang unang mag-asawa sa Dios, ngaa mapat-od naton nga ang tuyo sang Dios para sa duta wala magbaylo?

 ⁸ Bisan pa naglalis ang unang mag-asawa sa Dios, sa amo indi na bagay nga mabuhi sing dayon, ang orihinal nga tuyo sang Dios wala magbaylo. Dapat matuman ini! (Isaias 55:11) Ang Biblia nanaad: “Ang mga matarong magapanag-iya sang duta, kag magapuyo dira tubtob sa walay katubtuban.” (Salmo 37:29) Ang Biblia masami nagasugid nga hatagan sang Dios ang tawo nga nagaalagad sa iya  sing walay katapusan nga kabuhi.​—⁠Juan 3:14-16, 36; Isaias 25:8; Bugna 21:​3, 4.

ANG HANDUM NGA MABUHI​—⁠DIIN?

9. (a) Ano ang kinaandan nga handum sang tawo? (b) Ano ang buot silingon sang Biblia sang magsiling ini ‘ginbutang sang Dios ang walay katubtuban sa ila hunahuna’?

⁹ Malipay gid kita bangod tuyo sang Dios nga mabuhi kita sing dayon. Kay hunahunaa: Kon papilion ka, san-o mo luyag mapatay? Mabudlay sabton, indi bala? Indi mo luyag mapatay, ni sang bisan sin-o nga tawo nga normal kag mapagros. Ginhimu kita sang Dios nga may handum nga mabuhi, indi mapatay. Tuhoy sa pagtuga sang Dios sa tawo, ang Biblia nagasiling: “Ginbutang niya ang walay katubtuban sa ila hunahuna.” (Manugwali 3:11, Byington) Ano ang buot silingon sini? Nga sa kinaandan handum sang tawo nga mabuhi sing padayon, indi mapatay. Bangod sining handum para sa walay katapusan, ang mga tawo madugay na nga nagapangita sing paagi sa pagpabilin nga batan-on.

10. (a) Sa diin kinaugali nga luyag sang tawo mabuhi sing dayon? (b) Ngaa mapat-od naton nga pahanabuon gid sang Dios nga mabuhi kita sing dayon sa duta?

¹⁰ Sa diin luyag sang tawo mabuhi sing dayon? Sa naandan na nila nga puy-an, diri sa duta. Ang tawo ginhimu para sa duta, kag ang duta para sa tawo. (Genesis 2:8, 9, 15) Ang Biblia nagasiling: “Iya [Dios] ginpasad ang mga sadsaran sang duta; agod nga ini indi mationg tubtob san-o.” (Salmo 104:5) Sanglit gintuyo ang duta nga magluntad tubtob san-o, amo man ang tawo. Pat-od nga ang isa ka mahigugmaon nga Dios indi magtuga sa tawo nga may handum nga mabuhi sing dayon kag pagkatapos indi gali matuman!​—⁠1 Juan 4:8; Salmo 133:3.

ANG SAHI SANG KABUHI NGA IMO GINAHANDUM

11. Ano ang ginasiling sang Biblia sa pagpakita nga ang tawo mahimu mabuhi sing dayon nga may himpit nga panglawas?

¹¹ Tan-awa ang masunod nga mga pahina. Ano ang pagkabuhi sining mga tawo? Luyag mo bala mangin isa sa ila? Siempre, huo, isiling mo! Toloka kon daw ano sa ila kapagros kag kabataon! Kon sugiran ka nga ining mga tawo nabuhi na sing linibo ka tuig, mapati ka bala? Suno sa Biblia ang tigulang mangin bata liwat, ang balatianon magaayo kag ang piang, bulag, bungol kag apa magaayo tanan. Sang si Jesucristo yari sa duta naghimu sia sing madamung  milagro paagi sa pag-ayo sa balatianon nga mga tawo. Ginpakita niya sadto kon paano, sa sining mahimayaon nga tion nga malapit na, ang tanan nga nagakabuhi ipasag-uli sa himpit nga panglawas.​—⁠Job 33:25; Isaias 33:24; 35:5, 6; Mateo 15:​30, 31.

12. Ano nga mga kahimtangan ang makita naton sa sining mga laragway?

¹² Tan-awa kon daw ano katahom ining hardin nga puluy-an! Subong ginsaad ni Jesus, isa ini ka paraiso, kaanggid sa nadula sang malalison nga unang lalaki kag babayi. (Lucas 23:43) Kag talupangda ang paghidait kag paghiusa. Ang tanan nga rasa sang  tawo​—⁠itom, puti, dalag​—⁠nagakabuhi subong isa ka pamilya. Bisan gani ang mga sapat mahidaiton. Tan-awa ang bata nga nagapakighampang sa leon. Apang wala sing kahadlokan. Tuhoy sini ang Manunuga nagsiling: “Ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila. . . . Kag ang leon magakaon sing dagami kaangay sang baka. Kag ang bata nga nagasoso magahampang sa ibabaw sang boho sang dalitan nga man-ug.”​—⁠Isaias 11:​6-9.

13. Ano ang madula sa duta kon matuman na ang mga katuyoan sang Dios?

 ¹³ Sa paraiso nga ginaaman sang Dios para sa tawo, may madamu nga rason sa pagkalipay. Ang duta magapatubas sing bugana nga kalan-on. Wala na sing magutman. (Salmo 72:16; 67:6) Ang inaway, krimen, kasingki, dumot kag kakagud nagligad na. Huo, madula na sila sing dayon! (Salmo 46:8, 9; 37:9-11) Nagapati ka bala nga mahimu ini tanan?

14. Ano ang nagapapati sa imo nga tapuson sang Dios ang pag-antos?

¹⁴ Bueno, binagbinaga ini: Kon may gahom ikaw, tapuson mo bala ang tanan nga nagapaantos sa tawo? Kag paluntaron mo bala ang mga kahimtangan nga ginakalangkagan sang tawo? Siempre. Amo gid ina ang himuon sang aton mahigugmaon langitnon nga Amay. Ihatag niya ang aton mga kinahanglanon kag handum, kay ang Salmo 145:16 nagasiling tuhoy sa Dios: “Ginahumlad mo ang imo kamut kag ginabusog ang handum sang tagsa ka butang nga buhi.” Apang san-o?

MALAPIT NA ANG DAKUNG MGA PAGPAKAMAAYO

15. (a) Ano ang kahulugan sang katapusan sang kalibutan para sa duta? (b) Ano ang kahulugan sini para sa mga malaut? (c) Ano ang kahulugan sini para sa mga nagahimu sang kabubut-on sang Dios?

¹⁵ Agod mangin posible ining mga pagpakamaayo, nanaad ang Dios nga dulaon niya ang kalautan kag ang nagahimu sini. Sa amo man nga tion, amligan niya ang mga nagaalagad sa iya, kay ang Biblia nagasiling: “Ang kalibutan nagataliwan kag ang kailigbon sini, apang ang nagahimu sang kabubut-on sang Dios magapabilin sa walay katubtuban.” (1 Juan 2:17) Daw ano nga pagbag-o! Ang katapusan sang kalibutan indi katapusan sang aton duta. Sa baylo, subong sang bug-os kalibutan nga anaw sang adlaw ni Noe, katapusan lamang ini sang mga malaut kag sang ila pagkabuhi. Apang maluwas ang mga nagaalagad sa Dios. Nian, sa isa ka duta nga natinloan, wala na sing magamasakit kag magapigos sa ila.​—⁠Mateo 24:3, 37-39; Hulubaton 2:​21, 22.

16. Anong mga hitabo ang gintagna para sa “katapusan nga mga adlaw”?

¹⁶ Apang mahimu may magasiling: ‘Nagalain ang kahimtangan, wala nagaayo. Paano naton mapat-od nga malapit na ining pag­bag-o?’ Nagtagna si Jesucristo sing madamung butang nga bantayan sang iya mga sumulunod agod mahibal-an nila kon san-o laglagon sang Dios ang kalibutan. Si Jesus nagsiling nga ang katapusan nga mga adlaw sining sistema tandaan sing dalagku nga  mga inaway, kakulang sing kalan-on, mabaskog nga mga linog, nagadugang nga pagkamalinapason kag pagbugnaw sang gugma. (Mateo 24:3-12) Nagsiling sia nga may “kasisit-an sang kapungsoran sa kalisang.” (Lucas 21:25) Ang Biblia dugang pa nga nagsiling: “Sa katapusan nga mga adlaw magaabot ang makahalanguyos nga mga tion.” (2 Timoteo 3:1-5) Indi bala nga amo gid sini karon ang aton kahimtangan?

17. Ano ang ginasiling sang may pensar nga mga tawo tuhoy sa mga kahimtangan karon?

¹⁷ Madamu nga tawo nga nagatuon sa mga hitabo sa kalibutan ang nagasiling nga may daku nga pagbag-o. Halimbawa, ang editor sang Herald sang Miami, E.U.A. nagsulat: “Bisan sin-o nga tawo nga may pensar makakita pasad sa mga kapahamakan sang nagligad nga tinuig nga ang kalibutan yara sa maragtason nga pagbaylo. . . . Bag-uhon sini ang paagi sang pagkabuhi sang tawo.” Ang Amerikanong manunulat nga si Lewis Mumford nagsiling man: “Ang sibilisasyon nagalugdang. Pat-od ini. . . . Sang una, natabo ini sa isa lamang ka lugar. . . . Karon, bangod nagdiutay ang kalibutan paagi sa modernong mga komunikasyon, kon ang sibilisasyon maglugdang, ang bug-os nga planeta magalugdang man.”

18. (a) Ano ang ginapakita sang mga kahimtangan karon tuhoy sa palaabuton? (b) Ano ang magabulos sa mga pangulohan karon?

¹⁸ Ang mga kahimtangan sa kalibutan karon nagapakita nga nagakabuhi kita sa tion nga matabo ang pagkalaglag sining bug-os nga sistema sang mga butang. Huo, sa dili madugay laglagon sang Dios ang nagalaglag sa duta. (Bugna 11:18) Laglagon niya ang mga pangulohan karon kag ibulos ang iya matarong nga pangulohan agod maggahom sa bug-os nga duta. Amo ining Ginharian nga pangulohan nga gintudlo ni Cristo sa iya mga sumulunod nga ipangamuyo.​—⁠Daniel 2:44; Mateo 6:​9, 10.

19. Kon luyag naton mabuhi sing dayon, ano ang dapat naton himuon?

¹⁹ Kon luyag ninyo mabuhi sing dayon sa duta sa idalom sang paggahom sang Dios, dapat nga magdali kamo sa pagkuha sing sibu nga ihibalo tuhoy sa Dios, sa iya mga katuyoan kag sa iya mga ginapahimu. Sa pangamuyo sa Dios si Jesucristo nagsiling: “Ini amo ang kabuhi nga walay katapusan, nga pagkilalahon ka nila nga ikaw lamang ang matuod nga Dios, kag ang imo ginpadala, si Jesucristo.” (Juan 17:3) Makalilipay nga mahimu kita mabuhi sing dayon​—⁠nga indi ini damgo lamang! Apang agod maagom ini gikan sa Dios dapat nga makilala naton ang kaaway nga nagaupang sa aton.

[Mga Pamangkot sa Pagtinuon]

[Piktyur sa pahina 8, 9]

Gintuyo bala sang Dios nga mangin subong sini ang kalibutan?

 [Bug-os-pahina nga piktyur sa pahina 11]