Kapitulo 23

Ang Makita nga Organisasyon sang Dios

1. Ano ang ginasiling sang Biblia tuhoy sa dimakita nga organisasyon sang Dios?

 NGAA MAPAT-OD naton nga ang Dios may makita nga organisasyon? Ang isa ka rason amo nga may yara sia dimakita nga organisasyon. Nagtuga si Jehova sing mga kerubin, serapin kag madamu pa nga mga anghel agod maghimu sang iya kabubut-on sa langit. (Genesis 3:​24; Isaias 6:​2, 3; Salmo 103:​20) Si Jesucristo ang Arkanghel nga nagapangibabaw sa ila tanan. (1 Tesalonica 4:​16; Judas 9; Bugna 12:7) Ginalaragway sang Biblia ang mga anghel subong naorganisar sa “mga trono ukon mga kaginuohan ukon mga pangulohan ukon mga awtoridad.” (Colosas 1:​16; Efeso 1:​21) Sila tanan nagaalagad sa sugo ni Jehova nga may paghiusa.​—⁠Daniel 7:​9, 10; Job 1:​6; 2:1.

2. Paano ang paagi nga gintuga sang Dios ang aton materyal nga uniberso nagapakita nga ang organisasyon may daku nga importansia sa iya?

² Mahangpan man naton kon daw ano ka importante sa Dios ang organisasyon kon binagbinagon naton ang iya materyal nga mga tinuga. Halimbawa, linibolibo ka bilyon sang mga bituon sa uniberso ang naareglar sa dalagku nga mga grupo nga ginatawag galaksiya. Ining mga galaksiya mahim-ong nga nagalakbay sa kahawaan, subong man ang indibiduwal nga mga bituon kag mga planeta sa sulod sining mga galaksiya. Ang aton planeta nga Duta, halimbawa, nagalibot kada tuig sa adlaw, nga amo ang aton pinakamalapit nga bituon, sa eksakto nga 365 ka adlaw, 5 ka oras, 48 minutos kag 45.51 segundo. Huo, organisado gid ang materyal nga uniberso!

3. Ano ang ginatudlo sa aton sang mahim-ong nga organisasyon sa tunga sang dimakita nga mga tinuga sang Dios kag sa iya materyal nga uniberso?

³ May ginatudlo bala sa aton ining makatilingala nga organisasyon sa tunga sang dimakita nga mga tinuga sang Dios kag sang iya materyal nga uniberso? Huo, nagatudlo ini sa aton nga si Jehova isa ka Dios sang organisasyon. Pat-od, kon amo, nga indi pagpabay-an sina nga Dios ang mga tawo sa duta nga nagahigugma sa iya nga wala sing tuytoy kag organisasyon.

 ANG MAKITA NGA ORGANISASYON SANG DIOS—SANG UNA KAG KARON

4, 5. Paano naton mahibaloan nga ginpangunahan sang Dios ang iya katawhan sa organisado nga paagi sang mga adlaw ni Abraham kag sang pungsod sang Israel?

⁴ Ginapakita sang Biblia nga si Jehova pirme nga nagatuytoy sa iya mga alagad sa isa ka organisado nga paagi. Halimbawa, ang mga tawo sang pagtuo subong ni Abraham nanguna sa ila mga pamilya kag mga alagad sa pagsimba kay Jehova. Ginpahibalo ni Jehova kay Abraham ang iya kabubut-on paagi sa pagpakighambal sa iya. (Genesis 12:1) Kag ginsugo sia sang Dios nga ipaalinton ining impormasyon sa iban, nga nagasiling: “Nagpangilala ako [kay Abraham] agod nga suguon niya ang iya kabataan kag ang iya panimalay sa ulihi niya nga bantayan nila ang dalanon ni Jehova.” (Genesis 18:​19) Isa ini ka mahim-ong nga kahimusan para sa isa ka grupo sang katawhan sa pagsimba kay Jehova sing nagakaigo.

⁵ Sang ulihi, sang magdamu ang mga Israelinhon kag nangin minilyon, wala sia magtugot nga magsimba sila suno sa luyag sang kada isa, napain gikan sa isa ka organisado nga kahimusan. Wala, ang mga Israelinhon nangin isa ka pungsod sang organisado nga mga sumilimba. Ang pungsod sang Israel gintawag nga “kongregasyon ni Jehova.” (Numeros 20:​4; 1 Cronica 28:8) Kon ikaw isa sadto ka matuod nga sumilimba ni Jehova, dapat ikaw mangin bahin sadto nga kongregasyon sang mga sumilimba, indi napain sa sini.​—⁠Salmo 147:​19, 20.

6. (a) Paano ginpakita sang Dios nga ang iya nahamut-an amo ang mga sumulunod ni Cristo? (b) Ano ang pamatuod nga ang mga Cristiano organisado para sa pagsimba?

⁶ Ano ang kahimtangan sang nahaunang siglo? Ginapakita sang Biblia nga ginkahamut-an ni Jehova ang mga sumulunod sang iya Anak nga si Jesucristo. Ginbubo ni Jehova ang iya balaan nga  espiritu sa ila. Agod ipakita nga iya na sadto ginagamit ang Cristianong organisasyon sa baylo sang pungsod sang Israel, ginhatagan niya sing gahom ang iban sang mga Cristiano sadto sa pag-ayo sa balatianon, pagbanhaw sa patay kag sa paghimu sing iban pa nga milagro. Kon basahon mo ang Cristianong Griegong Kasulatan, mahamuot gid ikaw sa kamatuoran nga ang mga Cristiano gin-organisar para sa pagsimba. Ginsugo sila nga magtipon para sa sining katuyoan. (Hebreo 10:​24, 25) Gani kon ikaw isa ka matuod nga sumilimba ni Jehova sang nahaunang siglo, dapat ikaw nangin bahin sang iya Cristianong organisasyon.

7. Paano naton mahibaloan nga si Jehova wala maggamit sing kapin sa isa ka organisasyon sa bisan anong tion?

⁷ Nakagamit bala si Jehova sing kapin sa isa ka organisasyon sa bisan anong tion? Sang adlaw ni Noe si Noe lamang kag ang iya mga kaupod sa sulod sang arka ang gin-amligan sang Dios kag naluwas sa anaw. (1 Pedro 3:​20) Kag sang nahaunang siglo wala sing duha ukon kapin pa ka Cristianong organisasyon. Nakig-angot ang Dios sa isa lamang. May yara lamang sadto “isa ka Ginuo, isa ka pagtuo, isa ka bawtismo.” (Efeso 4:5) Gintagna man ni Jesucristo nga sa aton adlaw isa lamang ang halinan sang espirituwal nga instruksion para sa katawhan sang Dios.

8. Paano ginpakita ni Jesus nga mangin isa lamang ang makita nga organisasyon sang Dios sa duta sa aton adlaw?

⁸ Sang ginasambit ang iya presensia sa paggahom sa Ginharian, si Jesus nagsiling: “Sin-o gid ang matutom kag mainandamon nga ulipon nga ginpadumala sang agalon sa iya panimalay, sa paghatag sa ila sing pagkaon sa nagakaigo nga tion? Malipayon yadtong ulipon nga kon mag-abot ang iya agalon masapwan sia nga nagahimu sing subong. Sa pagkamatuod, nagasiling ako sa iya, padumalahon Niya sia sa tanan niya nga pagkabutang.” (Mateo 24:​45-47) Sang magbalik sia sa paggahom sa Ginharian sang tuig 1914, nakasapo bala si Cristo sing “matutom kag mainandamon nga ulipon” nga klase nga nagahatag sing espirituwal nga “pagkaon,” ukon impormasyon? Huo, nasapwan niya ina nga “ulipon” nga nahuman sang mga nagkalabilin sang iya 144,000 ka “kautoran.” (Bugna 12:​10; 14:​1, 3) Kag kutob sang 1914 minilyon ang nagbaton sa “pagkaon” nga ila ginaaman, kag nagsugod sa pagbuhat sang matuod nga relihion upod sa ila. Ining organisasyon sang mga alagad sang Dios kilala subong mga Saksi ni Jehova.

9. (a) Ngaa mga Saksi ni Jehova ang ngalan sang mga alagad sang Dios? (b) Ngaa ginatawag nila ang ila mga duog sang pagsimba nga mga Kingdom Hall?

⁹ Ang mga Saksi ni Jehova nagasandig sa Dios kag sa iya Pulong para sa tuytoy sa tanan nila nga ginahimu. Ang ila ngalan nga mga Saksi ni Jehova nagapakita nga ang ila panguna nga hilikuton amo  ang magpanaksi tuhoy sa ngalan kag ginharian ni Jehova nga Dios, subong sang ginhimu ni Cristo. (Juan 17:​6; Bugna 1:5) Kag ginatawag nila ang duog nga ila ginatiponan para sa pagsimba nga Kingdom Hall bangod ang ginharian sang Dios paagi sa Mesias, ukon Cristo, amo ang tema sang bug-os nga Biblia. Sanglit maathag nga ang nahaunang-siglo nga Cristianismo ginkahamut-an sang Dios, ginsunod sang mga Saksi ni Jehova ang ila organisasyon sa sini. Usisaon naton sa malip-ot ang Cristianong organisasyon sang una kag talupangda ang mga pagkaanggid sa makita nga organisasyon sang Dios karon.

ANG NAHAUNANG-SIGLO NGA SULUNDAN

10. Ano ang pila ka kinaiya sang unang-siglo nga Cristianong organisasyon?

¹⁰ Sa bisan diin man nga may mga Cristiano sang nahaunang siglo, nagtipon sila subong mga grupo para sa pagsimba. Ining mga kongregasyon tayuyon nga nagtipon agod maghiliupod kag magtuon. (Hebreo 10:​24, 25) Ang ila panguna nga hilikuton amo ang pagwali kag pagpanudlo tuhoy sa ginharian sang Dios, subong sang ginhimu ni Cristo. (Mateo 4:​17; 28:​19, 20) Kon ang isa ka katapo sang kongregasyon nagkabuhi sa malain nga paagi, ginapaguwa sia sa kongregasyon.​—⁠1 Corinto 5:​9-13; 2 Juan 10, 11.

11, 12. (a) Ano ang nagapamatuod nga ang unang Cristianong mga kongregasyon nagbaton sing tuytoy kag direksion gikan sa mga apostoles kag “mga gulang” sa Jerusalem? (b) Ano ang buot silingon sang “teokratiko” nga pagtuytoy? (c) Ano ang resulta sang pagbaton sang mga kongregasyon sina nga pagtuytoy?

¹¹ Napain bala gikan sa isa kag isa yadtong Cristianong mga kongregasyon sang nahaunang siglo, ang tagsatagsa nagahimu sang ila mga desisyon? Wala, ginapakita sang Biblia nga nahiusa sila sa isa ka Cristianong pagtuo. Ang tanan nga kongregasyon nagbaton sing tuytoy kag direksion gikan sa isa ka alagyan. Sa amo, sang mag-utwas ang pinuyas tuhoy sa sirkumsisyon, ang mga kongregasyon kag mga indibiduwal wala magdesisyon para sa ila kaugalingon. Wala, kundi, sa baylo, si apostol Pablo, si Bernabe kag ang iban ginsugo nga “magkadto sa mga apostoles kag mga gulang sa Jerusalem nahanungod sining kasuayon.” Sang makahimu sing desisyon ining hamtong nga mga lalaki upod sa bulig sang Pulong sang Dios kag sang iya “balaan nga espiritu,” ginpadala nila ang matutom nga mga lalaki sa pagpahibalo sa mga kongregasyon.​—⁠Binuhatan 15:​2, 27-29.

¹² Ano ang resulta sang pagbaton sang mga kongregasyon sining teokratiko, ukon hinatag-sang-Dios, nga tuytoy kag direksion? Ang Biblia nagasiling: “Samtang nagalakbay sila [si apostol Pablo kag ang iya mga kaupod] sa mga siudad ginhatag nila agod tumanon ang  mga mando nga ginpamat-oran sang mga apostoles kag mga gulang sa Jerusalem. Gani ang mga kongregasyon naglig-on sa pagtuo kag nagdugang sa kadamuon adlaw-adlaw.” (Binuhatan 16:​4, 5) Huo, ang tanan nga kongregasyon nagkooperar sa desisyon sang hubon sang mga gulang sa Jerusalem, kag naglig-on pa sila sa pagtuo.

ANG TEOKRATIKO NGA PAGTUYTOY KARON

13. (a) Gikan sa diin nga duog sa duta kag paagi sa ano nga hubon sang mga lalaki ang makita nga organisasyon sang Dios karon nagabaton sing tuytoy? (b) Ano ang kaangtanan sang nagagahom nga hubon sa “matutom kag mainandamon nga ulipon”?

¹³ Ang makita nga organisasyon sang Dios karon nagabaton man sing teokratiko nga tuytoy kag direksion. Sa ulong-talatapan sang mga Saksi ni Jehova sa Brooklyn, Nueva York, may yara isa ka nagagahom nga hubon sang gulang nga Cristianong mga lalaki gikan sa nanuhaytuhay nga bahin sang duta nga nagahatag sing kinahanglanon nga pagtatap sa bug-os-kalibutan nga hilikuton sang katawhan sang Dios. Ining nagagahom nga hubon ginahuman sang mga katapo sang “matutom kag mainandamon nga ulipon.” Amo ini ang humalambal para sa matutom nga “ulipon.”

14. Sa ano nagasandig ang nagagahom nga hubon sang katawhan sang Dios sa paghimu sing mga desisyon?

¹⁴ Ang mga lalaki sa nagagahom nga hubon, subong sang mga apostoles kag mga gulang sa Jerusalem, may madamu nga tinuig sang eksperiensia sa pag-alagad sa Dios. Apang wala sila nagasandig sa tawhanon nga kaalam sa paghimu sing desisyon. Wala, bangod ginagahuman sa paagi nga teokratiko, ginasunod nila ang halimbawa sang nagagahom nga hubon anay sa Jerusalem, nga ang mga desisyon ginpasad sa Pulong sang Dios kag ginhimu sa idalom sang pagtuytoy sang balaan nga espiritu.​—⁠Binuhatan 15:​13-17, 28, 29.

PAGTUYTOY SA TUGOB-KALIBUTAN NGA ORGANISASYON

15. Ngaa ang mga pulong ni Jesus sa Mateo 24:​14 nagapakita nga ang Dios magahupot sing daku nga organisasyon sa duta sa tion sang katapusan?

¹⁵ Naghatag si Jesucristo sing ideya kon daw mangin ano kadaku ang organisasyon sang Dios sa duta sa sining tion sang katapusan sang sia nagsiling: “Iwali ining maayong balita sang ginharian sa bug-os napuy-an nga duta subong panaksi sa tanan nga pungsod; kag ugaling magaabot ang katapusan.” (Mateo 24:​14) Hunahunaa kon daw ano kadaku nga hilikuton ang kinahanglanon sa pagsugid sa linibolibo ka milyon ka katawhan sang duta tuhoy sa natukod nga ginharian sang Dios. Nasangkapan bala sa paghimu sining daku nga hilikuton ang karon nga Cristianong organisasyon, nga nagasandig sa nagagahom nga hubon sini para sa tuytoy kag direksion?

16. (a) Ngaa nagtukod ang mga Saksi ni Jehova sing madamu dalagku nga mga imprintahan? (b) Ano ang ginaimprinta sa sining mga imprintahan?

 ¹⁶ Ginabantala karon sang mga Saksi ni Jehova ang mensahe sang Ginharian sa kapin sa 200 ka kadutaan kag mga isla sang dagat sa bilog nga duta. Agod mabuligan ang kapin sa 2,300,000 ka manugbantala sang Ginharian (sang 1981) sa pagtuman sining hilikuton, dalagku nga mga imprintahan ang gintukod sa madamung pungsod. Ginaimprinta diri ang mga Biblia kag mga literatura sa Biblia sa dalagku nga kadamuon. Kada adlaw, sa promedyo, kapin sa isa ka milyon ka Lalantawan kag Magmata! nga magasin ang ginaimprinta kag ginapadala halin sa sini nga mga imprintahan.

17. (a) Ngaa ginahanda ining mga literatura sa Biblia? (b) Ginaagda ka nga himuon ang ano?

¹⁷ Ginahanda ini tanan nga literatura sa Biblia agod buligan ang mga tawo nga mag-uswag sa ihibalo tuhoy sa dungganon nga mga katuyoan ni Jehova. Sa kamatuoran, ang mga pulong nga “Nagabantala sang Ginharian ni Jehova” bahin sang tig-ulo sang magasin nga Ang Lalantawan. Ginaagda ikaw sa pagpakigbahin sa pagpanagtag sining literatura sa Biblia kag ipaathag sa iban ang kamatuoran sang Biblia nga ginaunod sini. Halimbawa, may yara ka bala mapaambitan sang importante nga impormasyon nga imo naton-an gikan sa sining libro nga, Mahimu Ka Mabuhi sing Dayon sa Paraiso sa Duta?

18. (a) Ano nga sahi sang organisasyon ang organisasyon sang Dios karon? (b) Ngaa nagakinahanglan karon ang katawhan sang Dios sing daku nga pagpalig-on?

¹⁸ Subong sang sa nahaunang siglo,  ang organisasyon sang Dios karon isa ka organisasyon sang dedikado kag bawtismado nga mga manugbantala sang Ginharian. Kag gintukod ini agod buligan ang tanan nga katapo sini sa pagpakigbahin sa pagbantala nga hilikuton. Ini nga mga tawo nagakinahanglan sing daku nga pagpalig-on kag espirituwal nga pagpabaskog, bangod si Satanas kag ang iya mga naimpluensiahan nagapamatok sa mensahe sang Ginharian. Ginpapatay nila si Jesus bangod sang iya pagbantala sini, kag nagapaandam ang Biblia nga ang iya mga sumulunod pagahingabuton man.​—⁠Juan 15:​19, 20; 2 Timoteo 3:12.

19. (a) Sin-o karon ang ginaaman sa pagbulig kag sa pagpalig-on sa katawhan sang Dios? (b) Paano ginaamligan ang kongregasyon gikan sa malain nga mga impluensia nga makahigku sa sini?

¹⁹ Subong sang nahaunang siglo, ang “mga gulang” ukon mga “elder” sa karon ginatangdo agod magbulig kag magpalig-on sa tagsa ka kongregasyon. Makabulig man sila sa imo paagi sa laygay sang Biblia nga malandas ang lainlain nga mga palaligban. Ginaamligan man sining mga gulang “ang panong sang Dios.” Sa amo, kon ang isa ka katapo sang kongregasyon magliso sa malain nga pagkabuhi kag indi magbag-o, ginapat-od sang “mga gulang” nga ina sia madis­fel­low­shipped gikan sa kongregasyon. Sa amo mahuptan ang mapagros kag matinlo sa espirituwal nga kongregasyon.​—⁠Tito 1:5; 1 Pedro 5:​1-3; Isaias 32:​1, 2; 1 Corinto 5:13.

20. (a) Sin-o sang nahaunang siglo ang ginpadala sang nagagahom nga hubon sa Jerusalem, kag bangod sa anong rason? (b) Sin-o sa karon ang ginapadala sang nagagahom nga hubon?

 ²⁰ Subong nga ang nagagahom nga hubon sa Jerusalem anay nagpadala sing pinasahi nga mga tiglawas, subong nanday Pablo kag Silas, agod magdul-ong sing mga instruksion kag magpalig-on sa katawhan sang Dios, amo man ang ginahimu sang nagagahom nga hubon sa sining tion sang katapusan. (Binuhatan 15:​24-27, 30-32) Makaduha kada tuig ang isa ka eksperiensiado nga ministro, nga ginatawag manugtatap sa sirkito, ginapadala agod maghinguyang sing isa ka semana sa tagsa ka kongregasyon sa iya sirkito.

21. Paano ang manugtatap sa sirkito nagabulig sa mga kongregasyon sang katawhan sang Dios?

²¹ May yara kapin sa 43,000 ka kongregasyon sang mga Saksi ni Jehova sa bug-os nga kalibutan, kag nabahinbahin ini sa mga sirkito nga ginahuman sing mga 20 ka kongregasyon ang kada isa. Kon nagaduaw sa mga kongregasyon sa iya sirkito, ginapalig-on sang manugtatap sa sirkito ang mga saksi sang Ginharian paagi sa pag-upod sa ila sa pagbantala kag pagpanudlo nga hilikuton. Luwas sa pagpabaskog sa ila sa sining paagi, nagatanyag sia sing mga panugda agod mabuligan sila sa pagpauswag sang ila ministeryo.​—⁠Binuhatan 20:​20, 21.

22. (a) Ano pa nga kahimusan para sa pagpalig-on sa katawhan sang Dios ang ginahimu makaduha kada tuig? (b) Sa ano ikaw ginaagda?

²² Dugang pa nga pagpalig-on kag pagpabaskog ang ginaaman samtang, sa masami makaduha kada tuig, ang mga kongregasyon sa tagsa ka sirkito nagatipon para sa duha ka adlaw nga sirkito nga asambleya. Sa sining mga okasyon mahimu nga halin sa duha ukon tatlo ka gatos tubtob sa 2,000 ukon kapin pa ka tawo ang nagatambong. Ginaagda ikaw sa pagtambong sa masunod nga hiwaton sa inyo duog. Napat-od namon nga ang asambleya makapabaskog sa imo sa espirituwal kag mapuslanon.

23. (a) Ano pa nga mga pagtinipon ang ginahiwat makaisa kada tuig? (b) Ano ang kadakuon sang isa sining mga kombension?

²³ Nian, kada tuig, ang mas daku nga pagtinipon nga ginatawag distrito nga kombension ginahiwat sa pila ka adlaw. Ngaa indi panikasogan nga makatambong kag tan-awon para sa imo kaugalingon kon daw ano katahom kag makapaladya sa espirituwal ini nga kombension? Sa iban nga mga tuig, sa baylo sang distrito nga mga kombension, mas dalagku nga nasyonal ukon internasyonal nga mga kombension ang ginahiwat. Ang pinakadaku nga nahiwat sa isa ka lokasyon amo ang sa Yankee Stadium kag Polo Grounds sa Siudad sang Nueva York sa walo ka adlaw sang 1958. Sadto nga okasyon 253,922 ka tawo ang nagtambong sa miting publiko nga “Nagagahom  Na ang Ginharian sang Dios​—⁠Malapit Na bala ang Katapusan sang Kalibutan?” Kutob sadto wala na sing lugar para sa amo sadto kadaku nga kadam-an, gani ginhimu ang kahimusan nga ang mga pasilidad sa madamu sang dalagku nga mga siudad gamiton para sa dalagku nga mga kombension.

MGA MITING SA SULOD SANG MGA KONGREGASYON

24. Anong lima ka semanal nga miting ang ginahiwat sang mga kongregasyon sang katawhan sang Dios?

²⁴ Ang nagagahom nga hubon sang mga Saksi ni Jehova nagahimus man sing nahiusa nga programa sang pagtudlo sa Biblia nga ginahiwat sa tanan nga kongregasyon sang katawhan ni Jehova. Ang tagsa ka kongregasyon may lima ka miting kada semana. Amo ini ang Teokratikong Eskwelahan sa Ministeryo, Miting sa Serbisyo, Miting Publiko, pagtinuon sa Lalantawan kag pagtinuon sa libro sang kongregasyon. Sanglit mahimu nga wala pa ikaw sing ideya sa sining mga miting, ilaragway namon ini sa malip-ot.

25, 26. Ano ang katuyoan sang Teokratikong Eskwelahan sa Ministeryo kag sang Miting sa Serbisyo?

²⁵ Ang katuyoan sang Teokratikong Eskwelahan sa Ministeryo amo ang pagbulig sa mga estudyante nga mangin kapin pa ka epektibo sa paghambal sa iban tuhoy sa ginharian sang Dios. Sa tion kag tion, ang mga estudyante nagahatag sa bug-os nga grupo sing malip-ot nga pamulongpulong tuhoy sa Biblia. Nian ang isa ka eksperiensiado nga gulang nagapanugda para sa pag-uswag.

²⁶ Sa masami sa amo gihapon nga gab-i ang Miting sa Serbisyo ginahiwat man. Ang balayan para sa sini nga miting ginabalhag sa Ang Aton Ministeryo sa Ginharian, isa ka binulan nga publikasyon nga may duha ukon kapin ka pahina nga ginhanda sang nagagahom nga hubon. Sa sini nga miting ginapresentar ang praktikal nga mga panugda kag mga pasundayag tuhoy sa epektibo nga mga paagi sa pagpakighambal sa iban tuhoy sa mensahe sang Ginharian. Sa amo man nga paagi, ginpalig-on ni Cristo ang iya mga sumulunod kag gintudloan sila kon paano tumanon ang ila ministeryo.​—⁠Juan 21:​15-17; Mateo 10:​5-14.

27, 28. Ano nga sahi sang mga miting ang Miting Publiko, pagtinuon sa Lalantawan kag ang pagtinuon sa libro sang kongregasyon?

²⁷ Ang Miting Publiko kag ang pagtinuon sa Lalantawan masami nga ginahiwat kon Domingo. Ginapanikasogan sing labi nga maagda ang mga interesado sa Miting Publiko, nga isa ka pamulongpulong sang sangkol nga ministro tuhoy sa Biblia. Ang pagtinuon sa Lalantawan isa ka pamangkot-kag-sabat nga pagbinagbinag sa artikulo sa Biblia nga nabalhag sa bag-o nga guwa sang Lalantawan nga magasin.

 ²⁸ Samtang ang bug-os nga kongregasyon nagatipon sa Kingdom Hall para sa mga miting nga nasambit na, ang diutay nga mga grupo nagatipon sa pribado nga mga puluy-an para sa semanal nga pagtinuon sa libro sang kongregasyon. Ang isa ka bulig sa pagtuon sa Biblia, subong sining libro nga imo ginabasa, ginagamit subong sadsaran sina nga paghambalanay sa Biblia, sa isa ka oras.

29. (a) Ano nga memoryal ang ginasaulog sang matuod nga mga Cristiano kada tuig? (b) Sin-o ang may kinamatarong nga nagaambit sa tinapay kag alak?

²⁹ Dugang sa sining regular nga mga miting, ang mga Saksi ni Jehova nagahiwat sing pinasahi nga miting kada tuig sa anibersaryo sang kamatayon ni Jesus. Sang una nga ginhimus ining memoryal sang iya kamatayon, si Jesus nagsiling: “Padayon nga himua ninyo ini sa handumanan ko.” (Lucas 22:​19, 20) Sa tion sang simple nga seremonya naggamit si Jesus sing alak kag walay lebadura nga tinapay subong simbulo sang kabuhi nga iya buot sadto ihalad para sa katawhan. Gani sa sining tuigan nga Memoryal ang mga nabilin sa duta sang 144,000 ka hinaplas nga mga sumulunod ni Cristo nagapakita sang ila langitnon nga paglaum paagi sa pag-ambit sa tinapay kag alak.

30. (a) Sin-o pa ang nagatambong sa Memoryal, kag ano ang ila paglaum? (b) Paano ginlaragway ni Jesus ina nga mga tawo?

³⁰ Ang minilyon pa nga nagatambong sa sining Memoryal sa mga Kingdom Hall sa bug-os nga duta nalipay nga mangin mga tumalan-aw.  Ginapahanumdom man sila sang nahimu ni Jehova nga Dios kag ni Jesucristo agod mahilway sila sa sala kag kamatayon. Apang sa baylo nga maglaum sa langitnon nga kabuhi, nagakasadya sila sa paglaum nga mabuhi sing dayon sa paraiso sa duta. Kaangay sila ni Juan Bautista, nga nagpatuhoy sa iya kaugalingon subong “abyan sang nobyo” sa baylo nga bahin sang nobya ni Cristo nga ginahuman sang 144,000 ka katapo. (Juan 3:​29) Ining minilyon ka tawo bahin sang “iban nga mga karnero” nga ginsambit ni Jesus. Indi sila katapo sang “diutay nga panong.” Apang, subong ginsiling ni Jesus, nagaalagad sila nga nahiusa sa “diutay nga panong,” agod nga ang tanan “mangin isa ka panong.”​—⁠Juan 10:​16; Lucas 12:32.

PAG-ALAGAD SA DIOS UPOD SA IYA ORGANISASYON

31. Ano ang pamatuod nga wala ginakahamut-an sang Dios ang mga nagapabilin nga bahin sang dimatuod nga relihion kag nagatinguha man nga mangin bahin sang iya organisasyon?

³¹ Daw ano kaathag kon amo, nga subong sang una, si Jehova nga Dios may makita nga organisasyon karon! Ginagamit niya ini karon sa paghanas sa mga tawo para sa kabuhi sa iya matarong nga bag-ong sistema. Apang, indi kita mangin bahin sang organisasyon sang Dios kag, sa amo man nga tion, mangin bahin sang dimatuod nga relihion. Ang Pulong sang Dios nagasiling: “Dili kamo magpagota sing linibagon upod sa mga dimatinuohon. Kay ano bala ang pag-updanay sang pagkamatarong kag kalautan? Ukon ano bala ang paghiambit sang kapawa sa kadudulman? . . . Ukon ano bala ang kalabtanan sang matinuohon sa dimatinuohon?” Gani ang Dios nagasugo: “Busa guwa kamo sa tunga nila, kag magpain kamo gikan sa ila.”​—⁠2 Corinto 6:​14-17.

32. (a) Agod “magguwa sa tunga nila,” ano ang dapat naton himuon? (b) Anong pagpakamaayo ang batunon naton kon mag-alagad kita sa Dios upod sa iya makita teokratikong organisasyon?

³² Ano ang buot silingon sang ‘magguwa sa tunga nila’? Bueno, indi naton matuman ina nga sugo paagi sa pagpabilin nga bahin sang, ukon nagasakdag sa, isa ka relihioso nga organisasyon luwas sa isa nga ginagamit ni Jehova. Gani kon kita natungod pa sa sinang relihioso nga organisasyon, dapat kita magpahibalo nga nagaguwa kita gikan sa sini. Kon magguwa na kita karon gikan sa mga nagabuhat sing dimatuod nga relihion kag mag-alagad sa Dios upod sa iya makita nga teokratikong organisasyon, malakip kita sa mga ginsilingan sang Dios: “Magapuyo ako sa ila kag magalakat ako sa tunga nila, kag ako mangin ila Dios, kag sila mangin akon katawhan.”​—⁠2 Corinto 6:16.

[Mga Pamangkot sa Pagtinuon]

[Piktyur sa pahina 192]

Sa tion sang Anaw, may kapin bala sa isa ka organisasyon ang Dios?

 [Mga piktyur sa pahina 196]

BUG-OS KALIBUTAN NGA ULONG-TALATAPAN SANG MGA SAKSI NI JEHOVA

Ang MGA OPISINA

Mga Sistema sang Kompyuter

IMPRINTAHAN SA BROOKLYN

Pag-imprinta sa Rotary

Talahian sing Libro

Shipping

[Mga piktyur sa pahina 197]

PILA SANG MADAMU NGA IMPRINTAHAN SANG WATCH TOWER

Brazil

Inglaterra

Bagatnan nga Aprika

Wallkill, Nueva York

Canada

[Mga piktyur sa pahina 198]

Ang pila sa 253,922 sa kombension sang mga Saksi ni Jehova sa Nueva York

Polo Grounds

Yankee Stadium

[Piktyur sa pahina 201]

Ginatudlo ang Biblia sa mga miting sang mga Saksi ni Jehova