Kapitulo 10

Gamhanan ang Malauton nga mga Espiritu

1. Ngaa madamu nga tawo ang nagapati nga mahambal nila ang patay?

 MASAMI nga nagasiling ang mga tawo nga nahambal na nila ang patay. Si anhing ­James A. ­Pike, kilala nga obispo sang Episkopal, nagsiling nga nahambal niya ang iya napatay nga anak, si Jim. Suno kay ­Pike, nagsiling kuno ang iya anak: “Ginalibotan ako sang madamung tawo, kag daw ginahakwat ako . . . Masubo gid ako sang wala ko pa ikaw mahambal.”

2. (a) Ngaa wala sing bisan sin-o nga makahambal sa patay? (b) Gani anong mga pamangkot ang ginapautwas?

² Sanglit kinaandan ina nga mga eksperiensia, maathag nga madamu na ang nakahambal sa isa gikan sa kalibutan sang espiritu. Apang wala sila makahambal sa patay. Ang Biblia maathag nga nagasiling: “Ang patay wala makahibalo sang bisan ano.” (Manugwali 9:5) Gani kon indi ang patay ang nagahambal gikan sa espiritu sang kalibutan, sin-o gali ang nagahambal? Sin-o ang nagapakunokuno subong patay?

3. (a) Sin-o ang nagapakunokuno subong tawo nga napatay, kag ngaa? (b) Sa kay sin-o ang malauton nga mga espiritu masami nga nagahatag sing impormasyon?

³ Amo ang malauton nga mga espiritu. Ining mga espiritu, ukon demonyo, amo ang mga anghel nga nagbuylog kay Satanas sa pagrebelde sa Dios. Ngaa nagapakunokuno sila subong patay? Agod papatihon kita nga ang patay nagakabuhi gihapon. Ginpatalang man sang malauton nga mga espiritu ang madamu sa pagpati nga ang kamatayon isa lamang ka pagbalhin padulong sa lain nga kabuhi. Agod palapnagon ining binutig, nag-aman ang malauton nga mga espiritu sa mga espiritista, manugpakot kag diwatahan sing pinasahi nga ihibalo nga kuno daw nagahalin sa mga tawo nga napatay.

NAGAPAKUNOKUNO SUBONG ANG NAPATAY NGA SI SAMUEL

4. (a) Ngaa indi mapahamtang si Hari Saul? (b) Ano ang sugo sang Dios tuhoy sa espiritista kag manugpakot?

⁴ May yara isa ka halimbawa sa Biblia sang isa ka malauton nga espiritu nga nagpakunokuno subong ang napatay nga manalagna  sang Dios, si Samuel. Natabo ini sang ika-40 ka tuig sang paghari ni Hari Saul. Nagtipon ang gamhanan nga hangaway sang Filistinhon batok sa Israelinhon nga hangaway ni Saul, kag hinadlokan gid si Saul. Nahibaloan ni Saul ang sugo sang Dios: “Dili kamo magliso sa mga espiritista, kag magkadto sa mga manugpakot, agod magpadagta paagi sa ila.” (Levitico 19:​31) Apang, sang ulihi, nagtalikod si Saul kay Jehova. Busa si Samuel, nga buhi pa sadto, nagdumili na sa pagpakigkita kay Saul. (1 Samuel 15:​35) Kag karon, sa sining tion sang katalagman, indi mapahamtang si Hari Saul bangod indi mamati si Jehova sa iya pagpangayo sing bulig.

5. (a) Sa diin si Saul nangayo sing bulig? (b) Ano ang mahimu sang espiritista?

⁵ Luyag ni Saul mahibaloan kon ano ang matabo gani nagkadto sia sa isa ka espiritista sa En-dor. Napalutaw sang espiritista ang porma sang isa ka tawo nga sia lamang ang makakita. Pasad sa iya paglaragway sa porma, nagsiling si Saul nga si “Samuel” yadto. Sa sini ang espiritu nga nagapakunokuno subong si Samuel, naghambal: “Ngaa gintublag mo ako sa pagpaguwa sa akon?” Si Saul nagsabat: “Nagakalisod ako sing tama, kay ang mga Filistinhon nagaaway batok sa akon.” Ang espiritu nagsabat: “Ngaa, nian, nagapamangkot ka sa akon, kon si Jehova mismo nagbiya sa imo kag nangin imo kasumpong?” Ang malauton nga espiritu, nga nagapakunokuno subong ang napatay nga si Samuel, nagsugid nian kay Saul nga sia pagapatyon sa inaway batok sa mga Filistinhon.​—⁠1 Samuel 28:​3-19.

6. Ngaa indi mahimu nga si Samuel ang naghambal kay Saul?

⁶ Maathag nga indi gid si Samuel ang gintawag sang espiritista. Patay na si Samuel, kag ang tawo kon mapatay “nagabalik sa iya duta;  sa amo nga adlaw nagakawala ang iya mga hunahuna.” (Salmo 146:4) Ang dugang pa nga paghunahuna nagapakita man nga ang tingog indi iya sang napatay nga si Samuel. Si Samuel manalagna sang Dios. Gani batok sia sa mga espiritista. Kag, subong nakita na naton, sang buhi pa sia nagdumili na sia sa pagpakighambal sa malalison nga si Saul. Gani, nian, kon buhi pa si Samuel, tugutan niya ayhan ang isa ka espiritista sa paghimus sang ila pagkitaay ni Saul? Hunahunaa man: wala paghatagi ni Jehova si Saul sang bisan anong impormasyon. Mapilit ayhan sang isa ka espiritista si Jehova sa paghatag kay Saul sing mensahe paagi sa napatay nga si Samuel? Kag kon mahambal gid sang mga buhi ang ila napatay nga mga hinigugma, pat-od nga indi magsiling ang Dios sang gugma nga sila “nadagtaan” bangod sang ila pagliso sa espiritista.

7. Anong paandam ang ginhatag sang Dios agod amligan ang iya katawhan batok sa malauton nga mga espiritu?

⁷ Ang matuod amo nga luyag halitan sang malauton nga mga espiritu ang mga tawo, gani nagahatag si Jehova sing mga paandam agod amligan ang iya mga alagad. Basaha ang masunod nga paandam sa pungsod sang Israel. Magahatag ini sa imo sing ideya sa mga paagi nga ginagamit sang mga demonyo sa pagpatalang sa tawo. Ang Biblia nagasiling: “Dapat nga wala sing makita sa inyo . . . nga bisan sin-o nga manugbabaylan, ang nagahimu sing madyik ukon bisan sin-o nga manuglagpat ukon diwatahan, ukon manughiwit ukon bisan sin-o nga espiritista ukon manugpakot sang mga hitabo ukon bisan sin-o nga nagapamangkot sa mga patay. Kay ang bisan sin-o nga nagahimu sini kangil-aran kay Jehova.” (Deuteronomio 18:​10-12) Dapat naton hibaluon kon ano ang ginahimu sang malauton nga mga espiritu sa paghalit sa tawo karon kag kon paano naton maamligan ang aton kaugalingon gikan sa ila. Apang sa wala pa ini, binagbinagon naton kon san-o kag kon paano nagluntad ang malauton nga mga espiritu.

 ANG MGA ANGHEL NGA NANGIN MALAUTON NGA MGA ESPIRITU

8. (a) Sin-o pa ang nahaylo ni Satanas sa pagrebelde sa Dios? (b) Sa tapos gin-untatan ang ila hilikuton sa langit, sa diin sila nagkadto?

⁸ Paagi sa pagbinutig kay Eva sa katamnan sang Eden, ang isa ka tinuga nga anghel nangin malauton nga espiritu nga amo si Satanas nga Yawa. Pagkatapos ginhaylo niya ang iban nga mga anghel sa pagrebelde man sa Dios. Nagmadinalag-on sia sang ulihi. Gin-untatan sang iban nga mga anghel ang hilikuton nga ginpahimu sa ila sang Dios sa langit, kag nagpanaug sila sa duta kag nagpakatawo. Ang Cristianong disipulo nga si Judas nagsulat tuhoy sa ila sang ginsambit niya “ang mga anghel nga wala magtipig sang ila gid duog kundi nagbiya sang ila kaugalingon nga puluy-an.” (Judas 6) Ngaa nagkari sila sa duta? Anong malain nga handum ang gintanum ni Satanas sa ila tagipusuon agod mahaylo sila sa pagbiya sang ila matahom nga duog sa langit?

9. (a) Ngaa nanaug sa duta ang mga anghel? (b) Paano ginapakita sang Biblia nga ang ila ginhimu sala?

⁹ Ang Biblia nagasugid sini sa aton: “Nakita sang lalaki nga mga anak sang Dios ang babayi nga mga anak sang tawo, nga matahom sila; kag ginpangasawa nila ang tanan nga ila napilian.” (Genesis 6:2) Huo, nagsul-ob ang mga anghel sing undanon nga lawas, kag nanaug sila sa duta agod maghulid sa matahom nga mga babayi. Apang ginadumilian ini nga gugma sa mga anghel. Paglalis ini. Ginapakita sang Biblia nga ang ila ginbuhat subong ka sala sa homoseksuwal nga buhat sang mga taga-Sodoma kag Gomorra. (Judas 6, 7) Ano ang resulta?

10, 11. (a) Ano ang nangin mga anak sang mga anghel? (b) Ano ang natabo sa mga higante sang mag-abot ang Anaw? (c) Ano ang natabo sa mga anghel sa tion sang Anaw?

 ¹⁰ Bueno, may mga lapsag nga natawo sa sining mga anghel kag sa ila asawa. Apang tuhay ang ila mga lapsag. Nagdaku sila tubtob mangin mga higante, huo, malaut nga mga higante. Ang Biblia nagatawag sa ila “gamhanan nga mga lalaki nga kutob sa dumaan, mga lalaki nga bantog.” Ginapilit sining mga higante ang tanan nga magmalain subong nila. Subong resulta, ang Biblia nagasiling nga ang “kalautan sang tawo daku sa duta kag ang tagsa ka painoino sang mga hunahuna sang iya tagipusuon malaut sing dalayon.” (Genesis 6:​4, 5) Gani ginpahanabo ni Jehova ang Anaw. Ang mga higante, ukon “Nefilim,” kag ang tanan nga malauton nalumos. Apang ano ang natabo sa mga anghel nga nanaug sa duta.

¹¹ Wala sila malumos. Ginhuklas nila ang ila undanon nga lawas kag nagbalik sa langit subong mga espiritu. Apang wala sila ginbaton liwat sa organisasyon sang balaan nga mga anghel sang Dios. Sa baylo, ang Biblia nagasiling nga “ang Dios wala magpaiway sa mga anghel sang nakasala sila, kundi ginhulog sila sa Tartaro kag  gintugyan sa mga kadadalman sang kadudulman nga itigana sa paghukom.”​—⁠2 Pedro 2:4.

12. (a) Ano ang natabo sa malauton nga mga anghel sang magbalik sila sa langit? (b) Ngaa indi na sila liwat makasul-ob sing tawhanon nga lawas? (c) Gani ano karon ang ila ginahimu?

¹² Ining malauton nga mga anghel wala ginhaboy sa literal nga duog nga ginatawag Tartaro. Sa baylo, ang Tartaro, nga sala nga ginabadbad subong “impierno” sa iban nga Biblia, amo ang manubo nga kahimtangan sining mga anghel. Gin-utod sila gikan sa espirituwal nga kapawa sang organisasyon sang Dios, kag nagahulat sila sang walay katapusan nga kalaglagan. (Santiago 2:​19; Judas 6) Kutob sang Anaw, wala pagtuguti sang Dios nga magpakatawo liwat ining demonyo nga mga anghel, agod nga indi nila sing direkta mapaayawan ang ila indi kinaugali nga handum sa sekso. Apang mahimu nila gihapon magamit ang makatalagam nga gahom sa mga lalaki kag mga babayi. Sa kamatuoran, sa bulig sining mga demonyo si Satanas “nagapatalang sa bug-os napuy-an nga duta.” (Bugna 12:9) Ang daku nga pagdugang karon sang seksuwal nga krimen, kasingki kag iban pa nga sala nagapakita nga dapat kita magbantay nga indi mapatalang nila.

KON PAANO NAGAPATALANG ANG MALAUTON NGA MGA ESPIRITU

13. (a) Paano nagapatalang ang malauton nga mga espiritu? (b) Ano ang espiritismo, kag ano ang ginasiling sang Biblia tuhoy sini?

¹³ Naton-an naton nga si Satanas, subong “ang dios sining sistema sang mga butang,” nagagamit sa mga pangulohan sang kalibutan kag dimatuod nga relihion sa pagbulag sa mga tawo sa kamatuoran sang Biblia. (2 Corinto 4:4) Ang isa pa ka importante nga paagi sang malauton nga mga espiritu sa pagpatalang sa mga lalaki kag mga babayi amo ang espiritismo. Ano ang espiritismo? Amo ini ang pagpakig-angot sa malauton nga mga espiritu, sing direkta ukon paagi sa espiritista. Ginapaidalom sang espiritismo ang isa ka tawo sa impluensia sang mga demonyo. Ang Biblia nagapaandam sa aton nga maglikaw sa tanan nga buhat nga may kaangtanan sa espiritismo.​—⁠Galacia 5:​19-21; Bugna 21:8.

14. (a) Ano ang pagpamakot? (b) Ano ang ginasiling sang Biblia tuhoy sini?

¹⁴ Ang pagpamakot isa ka kinaandan nga porma sang espiritismo. Isa ini ka buhat sang paghibalo sang palaabuton, ukon sang butang nga natago, paagi sa bulig sang dimakita nga mga espiritu. Ginpakita ini sa ginsulat sang Cristianong disipulo nga si Lucas: “Ginsugata kami sang ulipon nga babayi nga may espiritu sang pagpamakot.  Nagdala sia sing madamu nga saplid sa iya mga agalon paagi sa pagpamakot.” Nahilway ni apostol Pablo ang lin-ay gikan sa gahom sining malauton nga espiritu, kag wala na magpamakot tuhoy sa palaabuton.​—⁠Binuhatan 16:​16-19.

15. (a) Ano ang pila ka butang nga may kaangtanan sa espiritismo? (b) Ngaa makatalagam ang pagpakigbahin sa sining mga butang?

¹⁵ Madamu ang interesado sa espiritismo bangod makatalanhaga ini kag makatilingala. Nawili sila sa sini. Gani nadalahig sila sa pangaswang, voo­doo­is­mo, hipnotismo, madyik, astrolohiya, mga Oui­ja ­board ukon iban pa nga butang nga may kaangtanan sa espiritismo. Nagabasa sila sing mga libro nahanungod sini, ukon nagatan-aw sing mga sine, ukon mga programa sa telebisyon nahanungod sini. Nagatambong pa gani sila sa miting nga sa diin ang isa ka espiritista nagapakig-angot sa kalibutan sang espiritu. Apang indi ini maalamon para sa tawo nga nagahandum sa pag-alagad sa matuod nga Dios. Makatalagam man ini. Mahimu ini magdul-ong sa imo sa kagamu karon. Isa pa, hukman sang Dios kag laglagon ang tanan nga nagabuhat sing espiritismo.​—⁠Bugna 22:15.

16. Paano ginapakita sang Biblia nga ang mga Cristiano may pagpakig-away batok sa malauton nga mga espiritu?

¹⁶ Bisan pa himuon sang isa ang tanan nga masarangan niya agod makapahilayo sa espiritismo, mahimu nga salakayon gihapon sia sang malauton nga mga espiritu. Dumduma nga nabatian ni Jesucristo ang tingog mismo sang Yawa, nga nagasulay sa iya sa paglapas sa sugo sang Dios. (Mateo 4:​8, 9) Ang iban nga alagad sang Dios ginsalakay sing subong sina. Si apostol Pablo nagsiling: “Nagapakig-away kita . . . batok sa kusog sang malauton nga espiritu sa langitnon nga mga duog.” Buot silingon ang tagsa ka alagad sang Dios dapat “magsuklob sing bug-os nga hinganib sang Dios, agod nga makabatok [sia].”​—⁠Efeso 6:​11-13.

PAGBATO SA PAGSALAKAY SANG MALAUTON NGA MGA ESPIRITU

17. Ano ang himuon mo kon ang “tingog” gikan sa kalibutan sang mga espiritu maghambal sa imo?

¹⁷ Ano ang himuon mo kon hambalon ka sang “tingog” gikan sa kalibutan sang mga espiritu? Ano kon ang “tingog” nagapakunokuno nga amo ang napatay nga paryente ukon maayong espiritu? Bueno, ano ang ginhimu ni Jesus sang ginhambal sia sang “manuggahom sang mga demonyo”? (Mateo 9:​34) Sia nagsiling: “Palayo ka, Satanas!” (Mateo 4:​10) Mahimu mo man ina. Makapangayo man ikaw sing bulig kay Jehova. Mangamuyo sing mabaskog kag gamita ang ngalan  sang Dios. Dumduma nga mas gamhanan sia sang sa malauton nga mga espiritu. Sunda ining maalamon nga dalanon. Dili pagpamatii ang mga tingog gikan sa kalibutan sang mga espiritu. (Hulubaton 18:​10; Santiago 4:7) Indi buot silingon nga ang tagsa nga makabati sing “tingog” ginahambal sang mga demonyo. Kon kaisa may makabati sing mga tingog bangod sang balatian sa lawas ukon hunahuna.

18. Anong halimbawa sang unang mga Cristiano sa Efeso ang maayo sundon kon luyag sang isa nga magbulag sa espiritismo?

¹⁸ Mahimu nga nagapakigbahin ka anay sa espiritismo nga buhat kag luyag mo magbulag karon. Ano ang imo mahimu? Bueno, binagbinaga ang halimbawa sang unang mga Cristiano sa Efeso. Sa tapos nila ginbaton ang “pulong ni Jehova” nga ginwali ni apostol Pablo, ang Biblia nagasiling: “Kag indi diutay sang mga naghimu  sing mga salamangka nagdala sing tingob sang ila mga tolon-an kag ginpanutdan nila ini sa itololok sang tanan.” Kag ining mga libro nagbili sing 50,000 ka bilog nga pilak! (Binuhatan 19:​19, 20) Sa pag-ilog sa mga nangin sumulunod ni Cristo sa Efeso, kon may yara ka butang nga may talangkod nga kaangtanan sa espiritismo ang maalamon nga dalanon amo nga laglagon ini bisan ano man ka mahal sini.

19. (a) Ano ang wala mahibaloan sang kalabanan nga tawo nga nagapakigbahin sa espiritismo? (b) Kon luyag naton mabuhi sing dayon sa kalipay sa duta, ano ang dapat naton himuon?

¹⁹ Sanglit daku ang interes karon sa makatilingala kag makatalanhaga, dugang kag dugang nga mga tawo ang nagakadalahig sa espiritismo. Apang, kalabanan sini sa ila wala makahibalo nga sila aktuwal nga nagapadalahig sa malauton nga mga espiritu. Indi ini inosente nga paglingawlingaw. Ang malauton nga mga espiritu may gahom sa pagpanakit kag sa paghalit. Mapintas sila. Kag antes sila bilangguon sa dayon nga kalaglagan, ginahimu nila ang tanan agod kontrolon ang mga tawo. (Mateo 8:​28, 29) Gani kon luyag mo mabuhi sing dayon sa kalipay sa duta sa tapos madula ang tanan nga kalautan, dapat ka magpalayo sa gahom sang demonyo paagi sa pagpalayo sa tanan nga sahi sang espiritismo.

[Mga Pamangkot sa Pagtinuon]

[Piktyur sa pahina 91]

Kay sin-o nakig-angot ang espiritista sang En-dor?

[Mga piktyur sa pahina 92, 93]

Natalupangdan sang angheliko nga mga anak sang Dios ang mga anak nga babayi sang mga tawo

[Piktyur sa pahina 94]

Ang nagmateryalisar nga mga anghel wala malumos. Ginhuklas nila ang ila undanon nga lawas kag nagbalik sa langit

[Piktyur sa pahina 97]

Ang Biblia nagapaandam: ‘Maglikaw sa tanan nga porma sang espiritismo’

[Piktyur sa pahina 98]

Ang mga nangin Cristiano sa Efeso nagsunog sang ila mga libro tuhoy sa espiritismo​—⁠isa ka maayong halimbawa para sa aton karon