Kapitulo 30

Kon Ano ang Dapat Mo Himuon Agod Mabuhi sing Dayon

1. (a) Anong duha ka dalanon ang bukas sa imo? (b) Paano mo mapili ang matarong nga dalanon?

 SI JEHOVA NGA DIOS nagatanyag sa imo sing butang nga makatilingala​—⁠kabuhi nga walay katapusan sa iya matarong nga bag-ong sistema sang mga butang. (2 Pedro 3:​13) Apang ang pagkabuhi didto nasandig sa imo paghimu sang kabubut-on sang Dios karon. Ang malauton nga kalibutan karon, lakip ang tanan nga bahin sini, malapit na magtaliwan, “apang ang nagahimu sang kabubut-on sang Dios magapabilin tubtob sa walay katubtuban.” (1 Juan 2:​17) Gani dapat ka magpili sa duha ka dalanon. Ang isa nagadul-ong sa kamatayon kag ang isa sa dayon nga kabuhi. (Deuteronomio 30:​19, 20) Diin ang imo pilion?

2. (a) Kon may yara ka matuod nga pagtuo, sa ano ikaw kombinsido? (b) Paano ang pagsalig sa Dios subong sang pagsalig sang anak sa isa ka mahigugmaon nga amay makabulig sa imo sa pag-alagad sa iya?

² Paano mo ginapakita nga kabuhi ang imo ginapili? Una sa tanan, dapat may pagtuo ka kay Jehova kag sa iya mga saad. Kombinsido gid bala ikaw nga ang Dios nagaluntad “kag nga sia manugpadya sa mga nagapangita sa iya”? (Hebreo 11:6) Dapat ka magsalig sa Dios subong sang anak nga nagasalig sa isa ka mahigugmaon kag maluluy-on nga amay. (Salmo 103:​13, 14; Hulubaton 3:​11, 12) Bangod may yara sina nga pagtuo, indi mo pagduhaduhaan nga ang iya laygay maalamon ukon nga ang iya dalanon amo ang matarong, bisan pa kon kaisa indi mo ini mahangpan sing bug-os.

3. (a) Dugang sa pagtuo, ano pa ang kinahanglanon? (b) Anong mga buhat ang kinahanglanon sa pagpakita nga ginapili mo ang kabuhi?

³ Apang, kapin pa sa pagtuo ang kinahanglan. Dapat may mga buhat man agod ipakita kon ano ang matuod nga ginabatyag mo nahanungod kay Jehova. (Santiago 2:​20, 26) May nahimu ka na bala sa pagpakita nga ginakasubo mo ang indi paghimu sing matarong sang una? Napahulag ka na bala sa paghinulsol ukon sa paghimu sing mga pagbag-o agod ipahisuno ang imo kabuhi sa kabubut-on ni Jehova? Nagliso ka na bala, kon sayoron, ginsikway mo na ang malain  nga dalanon nga imo anay ginalaktan, kag nagsugod sa paghimu sang mga butang nga ginapatuman sang Dios? (Binuhatan 3:​19; 17:​30) Ina nga mga buhat magapakita nga ginapili mo ang kabuhi.

DEDIKASYON KAG BAWTISMO

4. (a) Ano ang dapat magpahulag sa imo sa paghimu sang kabubut-on sang Dios? (b) Kon mamat-od ka sa pag-alagad sa Dios, ano ang nagakaigo nga himuon mo?

⁴ Ano ang dapat magpahulag sa imo sa pagpili sing kabuhi paagi sa paghimu sang kabubut-on sang Dios? Dapat amo ang apresasyon. Hunahunaa lamang: Nangita sing paagi si Jehova nga mahilway ka gikan sa tanan nga balatian, pag-antos, kag kamatayon pa! Paagi sa hamili nga dulot sang iya Anak ginbuksan niya sa imo ang dalan padulong sa dayon nga kabuhi sa paraiso nga duta. (1 Corinto 6:​19, 20; 7:​23; Juan 3:​16) Kon ang gugma ni Jehova nagapahulag sa imo sa paghigugma man sa iya, ano ang dapat mo himuon? (1 Juan 4:​9, 10; 5:​2, 3) Dapat ka magpalapit sa Dios sa ngalan ni Jesus kag sugiran sia sa pangamuyo nga luyag mo mangin alagad niya, nga luyag mo mangin iya ikaw. Sa sining paagi ginadedikar mo ang imo kaugalingon sa Dios. Isa ini ka personal, pribado nga butang. Wala sing iban nga makahimu sini para sa imo.

5. (a) Sa tapos ka makadedikar sa Dios, ano ang ginapaabot niya nga himuon mo? (b) Anong bulig ang matigayon mo sa pagkabuhi suno sa imo dedikasyon?

⁵ Sa tapos makadedikar sa Dios, paabuton ka niya sa pagkabuhi nahisuno sa sini. Gani pamatod-i nga ikaw isa ka tawo nga may hinambalan paagi sa pag-unong sa sining desisyon, ukon dedikasyon, tubtob buhi ikaw. (Salmo 50:​14) Kon magpabilin ka nga suod sa makita nga organisasyon sang Dios, mabuligan ikaw sang mga masigka Cristiano nga malipay sa paghatag sa imo sing mahigugmaon nga pagpalig-on kag pagsakdag.​—⁠1 Tesalonica 5:11.

6. (a) Kon idedikar mo ang imo kabuhi sa Dios, ano nian nga tikang ang kinahanglanon? (b) Ano ang kahulugan sang bawtismo?

⁶ Apang, kapin pa ang himuon mo sa pribado nga pagsugid kay Jehova nga luyag mo mangin iya ikaw. Dapat mo ipakita sa iban nga  nagdedikar ka na sa pag-alagad sa Dios. Paano mo ini himuon? Paagi sa pagpabawtismo sa tubig. Inang pagpabawtismo sa tubig isa ka dayag nga pagpakita nga gindedikar sang isa ka tawo ang iya kabuhi kay Jehova kag ginapresentar ang iya kaugalingon sa paghimu sang Iya kabubut-on.

7. (a) Anong halimbawa ang ginhatag ni Jesus para sa mga Cristiano? (b) Ngaa indi para sa mga lapsag ang bawtismo nga ginsugo ni Jesus?

⁷ Ang halimbawa ni Jesucristo nagapakita nga ang pagpabawtismo sa tubig isa ka importante nga tulumanon. Wala lamang pagsugiri ni Jesus ang iya Amay nga nagkari sia sa paghimu sang Iya kabubut-on. (Hebreo 10:7) Sang sugdan na niya ang iya pag-alagad subong manugwali sang ginharian sang Dios, ginpresentar ni Jesus ang iya kaugalingon kay Jehova kag ginbawtismohan sa tubig. (Mateo 3:​13-17) Sanglit ginpahamtang ni Jesus ang sulundan, ang mga nagadedikar karon sang ila kaugalingon kay Jehova sa paghimu sang iya kabubut-on dapat magpabawtismo. (1 Pedro 2:​21; 3:​21) Sa kamatuoran, ginsugo ni Jesus ang iya mga sumulunod sa paghimu sing mga disipulo sang katawhan sang tanan nga pungsod kag dayon bawtismohan ining bag-ong mga disipulo. Indi ini pagbawtismo sa mga lapsag. Pagbawtismo ini sa mga tawo nga nangin mga tumuluo, sa tapos makadesisyon sa pag-alagad kay Jehova.​—⁠Mateo 28:​19; Binuhatan 8:12.

8. Kon luyag mo magpabawtismo, sin-o sa kongregasyon ang dapat mo pahibaluon, kag ngaa?

⁸ Kon nakadesisyon ka na sa pag-alagad kay Jehova kag luyag mo bawtismohan, ano ang dapat mo himuon? Dapat mo pahibaluon ang nagadumala nga manugtatap sa kongregasyon sang mga Saksi ni Jehova nga imo ginapakig-updan. Sia, upod sa iban pa nga mga gulang sa kongregasyon, malipay nga magarepaso upod sa imo sang impormasyon nga dapat mahibaloan mo agod makaalagad sa Dios sa kalahamut-an nga paagi. Nian sarang na mahimus ang pagbawtismo sa imo.

ANG KABUBUT-ON SANG DIOS PARA SA IMO KARON

9. Ano ang ginhimu ni Noe sa wala pa ang Anaw nga amo ang kabubut-on sang Dios nga himuon mo karon?

⁹ Sa wala pa ang anaw, gingamit ni Jehova si Noe, “isa ka manugbantala sang pagkamatarong,” sa pagpaandam sang nagapakari nga kalaglagan kag sa pagtudlo sa isa lamang ka duog sang kalig-onan, ang arka. (Mateo 24:​37-39; 2 Pedro 2:​5; Hebreo 11:7) Kabubut-on sang Dios nga magbantala man ikaw. Si Jesus nagtagna tuhoy sa aton tion: “Iwali ining maayong balita sang ginharian sa bug-os napuy-an nga duta subong panaksi sa tanan nga pungsod; kag  ugaling magaabot ang katapusan.” (Mateo 24:​14) Dapat mahibaloan sang iban ang imo naton-an tuhoy sa mga katuyoan sang Dios agod maluwas sila sa katapusan sining sistema kag mabuhi sing dayon. (Juan 17:3) Wala bala napahulag ang imo tagipusuon sa pagpaambit sining makahatag-kabuhi nga ihibalo sa iban?

10. (a) Anong halimbawa ni Jesus ang dapat naton sundon bangod sang gugma naton sa mga tawo? (b) Paano ginahimu ang daku nga bahin sang pagbantala nga hilikuton?

¹⁰ Sunda ang halimbawa ni Cristo. Wala niya paghulata ang mga tawo, kundi ginpangita niya ang mga luyag magpamati sa mensahe sang Ginharian. Kag amo man ang iya ginpahimu sa iya mga sumulunod​—⁠sa ila tanan. (Mateo 28:​19; Binuhatan 4:​13; Roma 10:​10-15) Sa pagsunod sa sugo kag halimbawa ni Cristo, ang nahaunang mga Cristiano nagduaw sa mga tawo sa ila mga balay. Sila “nagpamalaybalay” nga dala ang mensahe sang Ginharian. (Lucas 10:​1-6; Binuhatan 20:​20) Amo gihapon ini ang pangunang paagi nga ginagamit sang matuod nga mga Cristiano sa pagtuman sa ila ministeryo sa aton adlaw.

11. (a) Ngaa kinahanglan ang kaisog sa pagbantala sang ginharian sang Dios, apang ngaa indi kita dapat magkahadlok? (b) Paano ginatamod ni Jehova ang hilikuton nga aton ginahimu?

¹¹ Kinahanglan ang kaisog sa paghimu sining hilikuton. Si Satanas kag ang iya kalibutan pat-od nga magatinguha sa pagpugong sa inyo, subong nga ginpunggan nila ang mga sumulunod anay ni Cristo sa pagbantala. (Binuhatan 4:​17-21; 5:​27-29, 40-42) Apang indi ka dapat magkahadlok. Subong nga ginsakdag kag ginpalig-on ni Jehova ang nahaunang mga Cristiano, amo man ang iya himuon para sa imo karon. (2 Timoteo 4:​17) Gani magpakaisog! Pamatod-i nga ginahigugma mo gid si Jehova kag ang imo mga isigkatawo paagi sa pagpakigbahin sing bug-os sa makaluwas-kabuhi nga pagbantala kag pagpanudlo nga hilikuton. (1 Corinto 9:​16; 1 Timoteo 4:​16) Indi pagkalipatan ni Jehova ang imo binuhatan, kundi padyaan ka niya sing bugana.​—⁠Hebreo 6:​10-12; Tito 1:2.

12. Ano ang maton-an naton gikan sa halimbawa sang asawa ni Lot?

¹² Wala gid sing hamili nga butang nga matanyag ining daan nga sistema, gani dili maghunahuna nga may nawasi ikaw sa pagtalikod sa sini. “Dumduma ang asawa ni Lot,” siling ni Jesus. (Lucas 17:​32) Sa tapos sia kag ang iya pamilya makapalagyo sa Sodoma, nagbalikid sia nga may pagkanugon sa mga butang nga ila ginbilin. Nakita sang Dios kon sa diin ang iya  tagipusuon, gani nangin haligi sia nga asin. (Genesis 19:​26) Dili pag-iloga ang asawa ni Lot! Ituon ang imo mga mata sa palaabuton, sa “matuod nga kabuhi” sa matarong nga bag-ong kahimusan sang Dios.​—⁠1 Timoteo 6:19.

PILIA ANG DAYON NGA KABUHI SA PARAISO SA DUTA

13. Paano ginpresentar ni Jesus ang pagpili nga dapat naton tanan himuon?

¹³ Sa pagkamatuod, duha lamang ang pililian. Ginpaanggid ini ni Cristo sa pagpili sa duha ka dalan. Ang isa ka dalan, siling niya, “masangkad kag malapad.” Ang mga nagalakbay diri may kahilwayan sa pagpahamuot sa ila kaugalingon. Apang, ang ikaduha nga dalan “makitid.” Huo, ang yara sa sini nga dalan ginaobligar sa pagtuman sa mga instruksion kag kasugoan sang Dios. Ang kalabanan, siling ni Jesus, nagapili sa masangkad nga dalan, pila lamang ang yara sa makitid nga dalan. Diin nga dalan ang pilion mo? Sa imo pagpili, dumduma ini: Ang masangkad nga dalan hinali nga magadangat sa katapusan sini​—⁠ang kalaglagan! Sa pihak nga bahin, ang makitid nga dalan magadul-ong sa imo sa bag-ong sistema sang Dios. Didto makaambit ka sa paghimu sa duta nga isa ka mahimayaon nga paraiso, nga sa diin mahimu ka mabuhi sing dayon sa kalipay.​—⁠Mateo 7:​13, 14.

14. Dapat mangin bahin ka sang ano agod maluwas pasulod sa bag-ong sistema sang Dios?

¹⁴ Dili maghinakop nga may yara nanuhaytuhay nga dalan, ukon paagi, nga imo malaktan agod makatigayon sing kabuhi sa bag-ong sistema sang Dios. May isa lamang. Isa lamang ka arka ang naluwas sa Anaw, indi pila ka barko. Kag isa lamang ka organisasyon​—⁠ang makita nga organisasyon sang Dios​—⁠ang maluwas sa madasig nagahilapit nga “dakung kapipit-an.” Indi matuod nga ang tanan nga relihion nagapadulong sa pareho nga tulumuron. (Mateo 7:​21-23; 24:​21) Dapat mangin bahin ka sang organisasyon ni Jehova, nga nagahimu sang kabubut-on sang Dios, agod mabaton mo ang iya pagpakamaayo nga kabuhi nga walay katapusan.​—⁠Salmo 133:​1-3.

15. (a) Ano ang dapat naton himuon adlaw-adlaw? (b) Anong paglaum ang indi isa ka damgo lamang?

¹⁵ Gani hupti nga masanag pirme sa imo hunahuna kag tagipusuon ang laragway sang bag-ong sistema sang mga butang nga ginsaad sang Dios. Hunahunaa sa adlaw-adlaw ang daku nga padya nga ginatanyag sa imo ni Jehova nga Dios​—⁠ang mabuhi sing dayon sa Paraiso sa duta. Indi ini damgo. Matuod ini! Kay ang saad sang Biblia pat-od nga matuman: “Ang mga matarong magapanubli sang duta, kag magapuyo diri sing dayon. . . . Kon ang malauton utdon, makita mo ini.”​—⁠Salmo 37:​29, 34.

[Mga Pamangkot sa Pagtinuon]

[Piktyur sa pahina 251]

Idedikar ang imo kaugalingon kay Jehova . . . kag magpabawtismo

[Piktyur sa pahina 253]

“Dumduma ang asawa ni Lot”

 [Mga piktyur sa pahina 254]

Hupti nga masanag sa imo hunahuna kag tagipusuon ang bag-ong sistema sang Dios