Kon Paano Mangin Sakop sang Pangulohan sang Dios
Kapitulo 15
Kon Paano Mangin Sakop sang Pangulohan sang Dios
1, 2. Ano ang kinahanglanon agod mangin sakop sang pangulohan sang Dios?
LUYAG MO BALA mabuhi sing dayon sa duta sa idalom sang pangulohan sang Dios? Ang bisan sin-o nga tawo nga husto sing pensar magasabat, Huo! Makatilingala nga mga kaayohan ang maagom. Apang indi mo ini matigayon paagi lamang sa pagbayaw sang imo kamut kag magsiling: ‘Luyag ko mangin sakop sang pangulohan sang Dios.’ Kapin pa ang kinahanglanon.
2 Halimbawa, ibutang ta nga luyag mo mangin banwahanon sang iban nga pungsod. Agod mahimu ini, dapat mo tumanon ang mga ginakinahanglan sang mga manuggahom sang pangulohan sina nga pungsod. Apang antes sini, dapat mo anay ton-an kon ano ining mga kinahanglanon. Sa amo man nga paagi, dapat mo ton-an ang mga ginakinahanglan sang Dios sa mga luyag magpasakop sa iya pangulohan. Nian dapat mo tumanon ining mga kinahanglanon.
KINAHANGLAN ANG IHIBALO
3. Ano ang isa ka kinahanglanon agod mangin sakop sang pangulohan sang Dios?
3 Ang isa ka importante gid nga kinahanglanon agod mangin sakop sang pangulohan sang Dios amo ang pagtuon sa “hambal” sini. Makatarunganon gid ini. Ang pila ka pangulohan sang tawo nagakinahanglan man nga ang bag-o nga mga banwahanon makahambal sang hambal sang ila pungsod. Ano, nian, nga “hambal” ang dapat ton-an sang luyag magbaton sing kabuhi sa idalom sang pangulohan sang Dios?
4. Anong “putli nga hambal” ang dapat ton-an sang katawhan sang Dios?
4 Talupangda ang ginasiling ni Jehova tuhoy sini sa iya Pulong, ang Biblia: “Bangod ipasag-uli ko sa katawhan ang putli nga hambal, agod nga sila tanan magtawag sa ngalan ni Jehova, agod nga mag-alagad sila sa iya nga may paghilisugot.” (Sofonias 3:9) Ining “putli nga hambal” amo ang kamatuoran sang Dios nga masapwan sa Biblia. Ini labi na amo ang kamatuoran tuhoy sa Ginharian nga pangulohan sang Dios. Gani agod mangin sakop sang pangulohan sang Dios, dapat mo ton-an ining “hambal” paagi sa pagkuha sing ihibalo tuhoy kay Jehova kag sa iya kahimusan sa Ginharian.—Colosas 1:9, 10; Hulubaton 2:1-5.
5. (a) Ano ang dapat ton-an naton tuhoy sa pangulohan sang Dios? (b) Anong ihibalo ang kinahanglan naton agod matigayon ang kabuhi nga walay katapusan?
5 Ang iban nga pangulohan sang tawo karon nagakinahanglan nga ang mga luyag mangin banwahanon nila dapat magtuon tuhoy sa maragtas sang ila pangulohan, subong man sang mga kamatuoran tuhoy sa pagpalakat sini. Gani, dapat mo man ton-an ina nga mga butang tuhoy sa pangulohan sang Dios agod mangin sakop sini. Ining ihibalo makadul-ong sa dayon nga kabuhi. Sa pangamuyo sa iya Amay, si Jesus nagsiling: “Nagakahulugan ini sing kabuhi nga walay katapusan, ang ila pagkuha sing ihibalo tuhoy sa imo, ang lamang matuod nga Dios, kag tuhoy sa imo ginpadala, si Jesucristo.”—Juan 17:3.
6. (a) Ano ang pila ka pamangkot nga dapat masabat sang mga sakop sang pangulohan sang Dios? (b) Masabat mo bala ini?
6 Kon naton-an mo na ang nagligad nga mga kapitulo sining libro, dapat nga nakuha mo na karon ang daku nga bahin sining importante gid nga ihibalo. Amo bala? Mapamatod-an mo bala ina, paagi sa pagsabat sa mga pamangkot subong sang: San-o una nga ginsambit sang Dios ang iya katuyoan para sa Ginharian nga pangulohan? Sin-o ang pila sa mga alagad sang Dios nga nagalaum nga mangin mga sakop sa duta? Pila ang manuggahom, ukon mga hari sa pangulohan sang Dios? Gikan diin magagahom ining mga hari? Sin-o ang una nga mga ginpili agod mangin mga hari sa pangulohan sang Dios? Paano ginpamatod-an ni Jesus nga sia mangin maayong hari? Apang, agod mangin sakop sang pangulohan sang Dios, indi lamang ini nga ihibalo ang kinahanglan.
KINAHANGLAN ANG MATARONG NGA PAGGAWI
7. Tuhoy sa mga pangulohan sang tawo, paano nagakatuhay ang mga kinahanglanon para sa pagkabanwahanon?
7 Ang mga pangulohan karon nagakinahanglan sa bag-ong mga banwahanon nga magsunod sa isa ka talaksan sang paggawi. Halimbawa, mahimu ipatuman nila nga dapat isa lamang ang asawa sang lalaki kag isa lamang ang bana sang babayi. Apang tuhay sa iban nga pangulohan. Ginatugutan nila ang ila mga banwahanon nga mangasawa sing kapin sa isa. Anong paggawi ang ginapaabot sa mga luyag mangin sakop sang pangulohan sang Dios? Ano ang ginasiling sang Dios nga husto tuhoy sa pag-asawahay?
8. (a) Ano ang talaksan sang Dios para sa pag-asawahay? (b) Ano ang panghilahi, kag ano ang ginasiling sang Dios tuhoy sa sini?
8 Sa ginsuguran ginpatok ni Jehova ang talaksan para sa pag-asawahay sang ginhatagan niya si Adan sing isa lamang ka asawa. Ang Dios nagsiling: “Bayaan sang lalaki ang iya amay kag ang iya iloy kag maghiusa sa iya asawa kag mangin isa sila ka unod.” (Genesis 2:21-24) Ginpaathag ni Jesus nga amo ini ang husto nga talaksan para sa mga Cristiano. (Mateo 19:4-6) Sanglit ang mag-asawa nangin “isa ka unod,” ginapakahuy-an nila ang pag-asawahay kon maghulid sila sa iban. Ginatawag ini nga panghilahi, kag ang Dios nagasiling nga silotan niya ang mga makilahion.—Hebreo 13:4; Malaquias 3:5.
9. (a) Ano ang pagtamod sang Dios sa mga tawo nga nagahuliray nga indi kasal? (b) Ano ang pagpakighilawas?
9 Sa pihak nga bahin, madamu ang nagapuyoay kag nagahuliray, apang wala sila nagapakasal. Apang, wala gintuyo sang Dios nga ining suod nga kaangtanan sa ulot sang lalaki kag babayi mangin tilawtilaw lamang. Gani ang pagpuyoay nga indi kasal isa ka sala batok sa Dios, nga naghimu sa kahimusan sang pag-asawahay. Ginatawag ini nga pagpakighilawas. Ang pagpakighilawas amo ang paghulid sa isa ka tawo nga indi ka kasal. Kag ang Biblia nagasiling: “Ini amo ang kabubut-on sang Dios, . . . nga maglikaw kamo sa pagpakighilawas.” (1 Tesalonica 4:3-5) Gani, sala para sa mga indi minyo nga maghimu sing seksuwal nga relasyon sa iban.
10. Ano pa nga seksuwal nga mga buhat ang batok sa kasugoan sang Dios?
10 Madamu karon nga lalaki kag babayi ang nagahulid sa ila pareho—lalaki sa lalaki kag babayi sa babayi. Ginatawag sila nga mga homoseksuwal. Kon kaisa ang homoseksuwal nga mga babayi ginatawag nga Lesbian. Apang ang Pulong sang Dios nagasiling nga sala ang ila ginabuhat, nga ini “malaw-ay.” (Roma 1:26, 27) Batok man sa sugo sang Dios nga ang tawo maghimu sing seksuwal nga relasyon sa sapat. (Levitico 18:23) Ang bisan sin-o nga luyag magpuyo sa idalom sang pangulohan sang Dios dapat magpalayo gikan sa sining imoral nga mga buhat.
11. (a) Ano ang pagtamod sang Dios sa pag-inum sing alkoholiko nga mga ilimnon? (b) Ang mga luyag mangin sakop sang pangulohan sang Dios dapat maglikaw sa anong mga buhat nga makahalalit sa lawas?
11 Ang haganhagan nga pag-inum sing alak ukon serbesa indi batok sa sugo sang Dios. Ginapakita gani sang Biblia nga ang diutay nga alak maayo sa lawas sang tawo. (Salmo 104:15; 1 Timoteo 5:23) Apang batok sa sugo sang Dios ang magpahubog, ukon magbuylog sa magaris nga mga ininum nga sa diin ang mga tawo nagahimu sing imoral nga paggawi. (Efeso 5:18; 1 Pedro 4:3, 4) Dugang sa paggamit sing alkoholiko nga ilimnon agod mahubog, madamu karon ang nagagamit sing nanuhaytuhay nga droga para sa sini man nga katuyoan. Agod makapangalipay sila nagayupyop sila sing marijuana ukon tabako, samtang ang iban nagausang sing mama ukon maskada. Apang ginahigkuan sini ang ila lawas kag ginapierdi ang ila lawas. Gani kon luyag mo mangin sakop sang pangulohan sang Dios, dapat mo likawan ining makahalalit nga mga butang.—2 Corinto 7:1.
12. (a) Ano ang pila ka dibunayag nga mga buhat nga batok sa kasugoan sang Dios? (b) Paano ang isa ka tawo nga nagahimu sining mga buhat makatigayon sang kahamuot sang Dios?
12 Maathag nga indi luyag sang mga pangulohan sang tawo ang mga kriminal nga mangin bag-ong mga banwahanon. Kag mataas pa ang mga talaksan ni Jehova. Ginakinahanglan niya nga dapat kita mangin “bunayag sa tanan nga butang.” (Hebreo 13:18) Kon indi pagtumanon sang mga tawo ang kasugoan sang Dios, indi sila pagtugutan sa pagpuyo sa idalom sang iya ginharian. Ang mga tawo karon masami nga nagapakunokuno subong bunayag, apang ginalapas nila ang madamung kasugoan. Apang, makita sang Dios ang tanan. Wala sing bisan sin-o nga makadaya sa iya. (Hebreo 4:13; Hulubaton 15:3; Galacia 6:7, 8) Gani pat-uron ni Jehova nga ang mga tawo nga nagalapas sa iya kasugoan, subong sang mga kasugoan batok sa pagbutig kag pagpangawat, indi mangin mga sakop sang iya pangulohan. (Efeso 4:25, 28; Bugna 21:8) Apang ang Dios mapailubon kag mapinatawaron. Gani kon mag-untat ang makasasala sa paghimu sang iya malain nga buhat kag maghimu sing maayo, batunon sia sang Dios.—Isaias 55:7.
13. Anong pagtamod ang dapat huptan sang mga alagad sang Dios sa kasugoan sang mga pangulohan sang tawo?
13 Apang kamusta ang pagtuman sa kasugoan sang mga pangulohan sang tawo? Tubtob nagaluntad ang mga pangulohan sang tawo, ginakinahanglan sang Dios nga magpasakop ang iya mga alagad sa sining “superyor nga mga awtoridad.” Dapat bayaran sila sing buhis, bisan pa mataas ang buhis kag ang isa indi ugyon sa paagi sang paggamit sa kuarta nga ginabayad sa buhis. Dapat man tumanon ang kasugoan sang pangulohan. (Roma 13:1, 7: Tito 3:1) Ang lamang nga eksepsion diri amo kon ang pagtuman sa sugo magapalalis sa isa sa sugo sang Dios. Sa sina nga bahin, subong sang ginsiling ni Pedro kag sang iban nga apostoles, “Dapat naton tumanon ang Dios subong manuggahom sa baylo sang mga tawo.”—Binuhatan 5:29.
14. Paano naton mapakita nga nahuptan naton ang pagtamod sang Dios sa bili sang kabuhi?
14 Daku ang pagtahod sang Dios sa kabuhi. Dapat ini mahangpan sang mga luyag mangin sakop sang iya pangulohan. Ang pagpatay maathag nga batok sa sugo sang Dios. Apang ang dumot masami nga nagadul-ong sa pagpatay, kag bisan kon ang isa padayon nga nagadumot sa iya isigkatawo indi sia mangin sakop sang pangulohan sang Dios. (1 Juan 3:15) Busa, importante nga iaplikar ang ginasiling sa Biblia sa Isaias 2:4 tuhoy sa indi pag-uyat sing mga hinganiban sa pagpatay sa aton isigkatawo. Ginapakita sang Biblia nga bisan ang kabuhi sang wala pa matawo nga bata sa tiyan sang iya iloy bilidhon kay Jehova. (Exodo 21:22, 23; Salmo 127:3) Apang minilyon ka aborsion ang ginahimu kada tuig. Ining pag-utod sa kabuhi batok sa sugo sang Dios, bangod ang tawo nga yara sa sulod sang iya iloy isa ka buhi nga tawo kag indi dapat patyon.
15. Ano nga mga sugo sang Hari sang Dios ang dapat tumanon sang tanan nga sakop sang Ginharian?
15 Apang, sa mga mangin sakop sang pangulohan sang Dios, kapin pa ang kinahanglanon sang sa indi lamang paghimu sing malain ukon imoral. Dapat sila mangin mabuot kag mabinuligon sa iban. Dapat sila mabuhi suno sa diosnon nga talaksan nga ginhatag sang Hari, si Jesucristo: “Busa ang tanan nga butang nga buot ninyo nga himuon sang mga tawo sa inyo, himua man ninyo sa ila.” (Mateo 7:12) Naghatag si Cristo sing huwaran sa pagpakita sing gugma sa iban. Ginhatag niya gani ang iya kabuhi para sa katawhan, kag nagsugo sa iya mga sumulunod: “Maghigugmaanay kamo; subong nga akon naghigugma sa inyo.” (Juan 13:34; 1 Juan 3:16) Ining dimakagud nga gugma kag kabalaka sa iban amo ang magahimu sang kabuhi nga makalilipay gid sa idalom sang paggahom sang ginharian sang Dios.—Santiago 2:8.
16, 17. (a) Ano ang maayong mga rason nga magbaylo kita sa aton kabuhi agod malab-ot ang mga kinahanglanon sang Dios? (b) Ngaa makapat-od kita nga mahimu naton ang bisan anong kinahanglanon nga mga pagbaylo?
16 Ginapakita sang Biblia nga dapat maghimu ang mga tawo sing mga pagbaylo sa ila kabuhi agod matuman ang mga kinahanglanon para mangin mga sakop sang pangulohan sang Dios. (Efeso 4:20-24) Nagapanikasog ka bala sa paghimu sing mga pagbaylo? Takus gid ang bisan anong panikasog sa sini! Ngaa? Bangod indi lamang magaayo ang imo kabuhi sa pila ka tuig sa idalom sang pangulohan sang tawo. Indi, kundi magabaton ikaw sing kabuhi nga walay katapusan nga may himpit nga panglawas sa isa ka paraiso nga duta sa idalom sang pangulohan sang Dios!
17 Bisan karon, kon sundon mo ang mga kinahanglanon sang Dios, mangin mas malipayon ikaw. Apang dapat ka magbaylo. Ti, madamu nga tawo nga madinumtanon ukon makagud anay ang nagbaylo. Ang mga makihilawason, makilahion, homoseksuwal, palahubog, manugpatay, kawatan, nagiyan sa droga kag mga nagapanabako nagbaylo sang ila pagkabuhi. Nahimu nila ini paagi sa matuod nga pagpanikasog kag sa bulig sang Dios. (1 Corinto 6:9-11; Colosas 3:5-9) Gani kon daku nga pagbaylo ang dapat mo himuon agod matuman ang mga kinahanglanon sang Dios, indi mag-ampo. Masarangan mo ini!
KATUTOM SA PANGULOHAN SANG DIOS
18. Sa anong pinasahi nga paagi nga ginapaabot kita sang Dios sa pagpakita sang aton matutom nga pagsakdag sa iya ginharian?
18 Indi makatilingala nga ginakinahanglan ni Jehova nga Dios nga sakdagon sing matutom sang iya mga sakop ang iya Ginharian nga pangulohan. Amo man sini ang ginakinahanglan sang mga pangulohan sang tawo gikan sa ila mga banwahanon. Apang sa anong pinasahi nga paagi ginapaabot sang Dios nga ipakita ang matutom nga pagsakdag? Paagi bala sa pag-uyat sang iya mga sakop sing mga hinganiban agod makig-away para sa iya ginharian? Indi. Sa baylo, subong ni Jesucristo kag sang iya unang mga sumulunod, dapat sila mangin matutom nga mga humalambal ukon manugwali sing ginharian sang Dios. (Mateo 4:17; 10:5-7; 24:14) Kabubut-on ni Jehova nga mahibaloan sang tanan kon ano ang iya ginharian kag kon paano sini lubaron ang mga palaligban sang katawhan. Napaambit mo na bala ang imo mga naton-an gikan sa Pulong sang Dios sa imo mga paryente, mga abyan kag sa iban? Kabubut-on sang Dios nga himuon mo ini.—Roma 10:10; 1 Pedro 3:15.
19. (a) Ngaa makapaabot kita sing pagpamatok kon ginahambal ang iban tuhoy sa ginharian sang Dios? (b) Anong mga pamangkot ang dapat mo sabton?
19 Si Cristo kag ang iya unang mga sumulunod nagkinahanglan sing kaisog sa paghambal sa iban tuhoy sa Ginharian, bangod masami sila ginpamatokan. (Binuhatan 5:41, 42) Amo man sa karon. Indi luyag sining ginagamhan-sang-Yawa nga kalibutan nga mabantala ang maayong balita sang Ginharian. Gani ang mga pamangkot amo: Sa diin ka nagatindog? Sakdagon mo bala sing matutom ang ginharian sang Dios? Ang iya kabubut-on amo nga mahatag ang daku nga panaksi sa Ginharian sa wala pa ang katapusan. Magapakigbahin ka bala sa sini?
[Mga Pamangkot sa Pagtinuon]
[Piktyur sa pahina 128]
Ang mga luyag mangin sakop sang pangulohan sang Dios dapat anay nga may ihibalo tuhoy sini
[Mga piktyur sa pahina 131]
Ang mga sakop sang pangulohan sang Dios dapat maglikaw sa mga buhat nga ginapakamalaut sang Dios
[Piktyur sa pahina 133]
Ang mga sakop sang pangulohan sang Dios dapat magbantala sini sa iban
