Ngaa Gintugutan sang Dios ang Kalautan?
Kapitulo 11
Ngaa Gintugutan sang Dios ang Kalautan?
1. (a) Ano ang kahimtangan karon sa duta? (b) Ano ang ginareklamo sang iban nga tawo?
BISAN DIIN ka magtulok sa kalibutan, may yara krimen, dumot kag kagamu. Masami nga ang wala sala ang nagaantos. Ginabasol sang iban ang Dios. Nagasiling sila: ‘Kon may Dios, ngaa ginatugutan niya nga matabo ining tanan nga kalautan?’
2. (a) Sin-o ang nagahimu sing kalautan? (b) Paano malikawan ang daku nga pag-antos sa duta?
2 Apang sin-o ang nagahimu sining kalautan sa iban? Amo ang mga tawo, indi ang Dios. Ginapakamalaut sang Dios ang malaut nga mga buhat. Sa kamatuoran, malikawan ang daku nga pag-antos sa duta kon ginatuman sang tawo ang kasugoan sang Dios. Ginasugo niya kita nga maghigugma. Ginadumilian niya ang pagpatay, pagpangawat, pagpakighilawas, kakagud, pagpahubog kag iban pa nga kalainan nga nagapaantos sa tawo. (Roma 13:9; Efeso 5:3, 18) Gintuga sang Dios sanday Adan kag Eva nga may makatilingala nga utok kag lawas kag may ikasarang sa pagkalipay sing bug-os sa kabuhi. Wala gid sia maghandum nga sila ukon ang ila mga anak mag-antos ukon mabudlayan.
3. (a) Sin-o ang may salabton sa kalautan? (b) Ano ang nagapakita nga mahimu kuntani napamatokan nanday Adan kag Eva ang mga pagsulay ni Satanas?
3 Si Satanas nga Yawa ang nagsugod sang kalautan sa duta. Apang balasulon man sanday Adan kag Eva. Indi sila anay tuman kaluya nga indi sila makapamatok sang ginsulay sila sang Yawa. Kuntani ginsilingan nila si Satanas nga “palayo ka,” subong sang ginhimu sang ulihi sang himpit nga tawo nga si Jesus. (Mateo 4:10) Apang indi amo sini ang ila ginhimu. Subong resulta, nangin dihimpit sila. Ang tanan nila nga anak, lakip kita, nakapanubli sinang pagkadihimpit, nga nagdala sing balatian, kasubo kag kamatayon. (Roma 5:12) Apang ngaa gintugutan sang Dios nga magpadayon ang pag-antos?
4. Ano ang nagabulig sa aton sa paghangop nga ang mahigugmaon nga Dios umalagi nga magatugot sa kalautan?
4 Mahimu hunahunaon sang isa sa umpisa nga ang Dios wala sing nagakaigo nga rason sa pagtugot sa tawo nga mag-antos sa sulod sang mga siglo. Apang, husto bala ang maghinakop sina? Indi bala ang mga ginikanan nga may gugma gid sa ila anak nagatugot sa ila nga operahan bisan masakit agod lamang tadlungon ang diperensya? Huo, bangod sang pagtugot sa umalagi nga pag-antos, nakatigayon ang kabataan sing mas maayo nga panglawas sa kabuhi sa ulihi. Anong kaayohan ang nahimu paagi sa pagtugot sang Dios sa kalautan?
ISA KA IMPORTANTE NGA HULUSAYON NGA DAPAT MAHUSAY
5. (a) Paano ginsupak ni Satanas ang Dios? (b) Ano ang ginsaad ni Satanas kay Eva?
5 Ang pagrebelde batok sa Dios sa katamnan sang Eden nagpautwas sing importante nga hulusayon ukon pamangkot. Dapat naton usisaon ini agod mahangpan kon ngaa gintugutan sang Dios ang kalautan. Ginsingganan ni Jehova si Adan nga indi magkaon gikan sa isa ka kahoy sa katamnan. Kon magkaon si Adan, ano ang matabo? Ang Dios nagsiling: “Mapatay ka nga totoo.” (Genesis 2:17) Apang, baliskad ang ginsiling ni Satanas. Ginsingganan niya ang asawa ni Adan, nga si Eva, nga magkaon gikan sa ginadumilian nga kahoy. “Dili kamo mapatay nga totoo,” siling ni Satanas. Sa kamatuoran, nagsiling pa sia kay Eva: “Kay ang Dios nakahibalo nga sa adlaw nga magkaon kamo sa sini, nian magamuklat ang inyo mga mata kag mangin kaangay sang Dios kamo, nga nakakilala sang maayo kag malain.”—Genesis 3:1-5.
6. (a) Ngaa ginlalis ni Eva ang Dios? (b) Ano ang buot silingon sang pagkaon gikan sa gindumilian nga kahoy?
6 Naglalis si Eva sa Dios kag nagkaon. Ngaa? Nagpati si Eva kay Satanas. Makagud nga nagdumdom sia nga magaayohan sia paagi sa paglalis sa Dios. Nangatarungan sia nga sia ukon si Adan indi na manabat sa Dios. Indi na sila dapat magpasakop sa iya kasugoan. Sila na ang mamat-od kon ano ang “maayo” kag “malain.” Nagbuylog si Adan kay Eva kag nagkaon man. Nagapaathag sang orihinal nga sala sang tawo batok sa Dios, ang footnote sa The Jerusalem Bible nagasiling: “Gahom ini sa pagpamat-od kon ano ang maayo kag malaut kag sa pagpanghikot sing nagakahisuno, isa ka pagpangangkon sing bug-os nga kahilwayan sa moral . . . Ang una nga sala isa ka pagsalakay sa pagkasoberano sang Dios.” Kon sayoron, isa yadto ka pagsalakay sa kinamatarong sang Dios nga mangin bug-os nga manuggahom ukon superyor sang tawo.
7. (a) Anong hulusayon ang ginpautwas sang paglalis sang tawo? (b) Anong mga pamangkot ang dapat sabton may kaangtanan sa sining hulusayon?
7 Gani paagi sa pagkaon sing gindumilian nga bunga, nagguwa sanday Adan kag Eva sa paggahom sang Dios. Nagkinaugalingon sila, naghimu sang kon ano ang “maayo” ukon “malain” suno sa ila desisyon. Gani ang importante nga hulusayon ukon pamangkot amo: May kinamatarong bala ang Dios nga mangin ang bug-os nga manuggahom sang katawhan? Sa iban nga pulong, si Jehova bala ang mamat-od kon ano ang maayo ukon malain para sa tawo? Sia bala ang magasiling kon ano ang matarong nga paggawi kag kon ano ang indi? Ukon mas maayo bala ang mahimu sang tawo kon sia ang maggahom sa iya kaugalingon? Kay sin-o paggahom ang labing maayo? Ang tawo bala, sa idalom sang dimakita nga pagtuytoy ni Satanas, makagahom sing madinalag-on nga wala sing pagtuytoy ni Jehova? Ukon kinahanglan bala ang pagtuytoy sang Dios agod makapatindog sing matarong nga pangulohan nga magadala sing dayon nga paghidait sa duta? Ina tanan nga pamangkot ginpautwas sa sining pagsalakay sa pagkasoberano sang Dios, sa iya kinamatarong subong amo ang lamang kag bug-os nga manuggahom sang katawhan.
8. Ngaa wala dayon paglaglaga ni Jehova ang mga rebelde?
8 Sa pagkamatuod, sang matabo ang pagrebelde mahimu kuntani laglagon ni Jehova ang tatlo ka rebelde. Indi maduhaduhaan nga mas mabaskog sia sang sa kay Satanas ukon kanday Adan kag Eva. Apang indi mahusay sa maayong paagi ang hulusayon kon ginlaglag sila. Halimbawa, indi kuntani masabat ang pamangkot kon bala ang tawo makagahom sa iya kaugalingon sing madinalag-on nga wala sing bulig sang Dios. Gani naghatag si Jehova sing tion sa paghusay sa importante nga hulusayon nga ginpautwas.
PAGHUSAY SA HULUSAYON
9, 10. Ano ang nangin mga resulta sang paggahom sang mga tawo sa ila kaugalingon nga wala sing pagtuytoy sang Dios?
9 Sa pagligad sang tion, ano karon ang resulta? Bueno, ano ang masiling mo? Ginpakita bala sang 6,000 ka tuig sang maragtas nga ang mga tawo nagmadinalag-on sa paggahom sa ila kaugalingon nga wala sing pagtuytoy sang Dios? Nakaaman bala ang tawo sing maayong pangulohan para sa kabulahanan kag kalipay sang tanan? Ukon ginpakita bala sang maragtas nga husto ang mga pulong ni manalagna Jeremias: “Wala sa tawo nga nagalakat ang pagmando sa iya mga tikang”?—Jeremias 10:23.
10 Sa bug-os nga maragtas natilawan na ang tanan nga sahi sang pangulohan, apang wala sing nakadala sing kalig-onan kag kalipay sa tanan nga nagapuyo sa idalom sang ila paggahom. Ginatudlo sang iban ang mga tanda sang pag-uswag. Apang masiling bala nga pag-uswag kon ang baslay kag pana ginbuslan sing bomba atomika, kag kon ang kalibutan karon nagakahadlok sing daku sa isa naman ka kalibutanon nga inaway? Ano nga sahi sang pag-uswag kon ang tawo makalakat sa bulan apang indi maghilidait sa duta? Ano ang kaayohan sa tawo sa pagpatindog sing balay nga puno sing tanan nga sahi sang modernong kasangkapan apang ang pamilya nga nagapuyo diri nabahinbahin sang mga palaligban? Mapabugal bala ang kinagubot sa kalye, ang paglaglag sa propiedad kag kabuhi kag ang paglapnag sang pagkamalinapason? Indi gid! Apang mga resulta ini sang paggahom sang tawo nga napain sa Dios.—Hulubaton 19:3.
11. Gani, maathag nga ano ang kinahanglan sang mga tawo?
11 Dapat nga maathag sa tanan ang pamatuod. Ang panikasog sang tawo sa paggahom sa iya kaugalingon nga hilway sa Dios napaslawan. Nagresulta ini sa pag-antos sang tawo. “Ang tawo naggahom sa tawo sa iya kasamaran,” paathag sang Biblia. (Manugwali 8:9) Maathag nga kinahanglan sang tawo ang pagtuytoy sang Dios sa ila mga hilikuton. Subong nga gintuga sang Dios ang tawo nga may kinahanglanon sa pagkaon kag sa pag-inum, ginhimu man ang tawo nga may kinahanglanon sa pagtuman sa kasugoan sang Dios. Kon sikwayon sang tawo ang kasugoan sang Dios, mabudlayan sia, subong nga sia pat-od nga magaantos kon sikwayon niya ang pagkinahanglan sang iya lawas sa kalan-on kag tubig.—Hulubaton 3:5, 6.
NGAA KADUGAY GID?
12. Ngaa malawig gid nga tion ang gintugot sang Dios sa paghusay sa hulusayon?
12 Apang, mahimu mamangkot ang isa, ‘Ngaa kalawig gid, mga 6,000 ka tuig na karon, ang gintugot sang Dios sa paghusay sining hulusayon? Indi bala ini mahusay sing nagakaigo madugay na?’ Indi. Kon nagpahilabot ang Dios madugay na, mahimu may magsumbong nga ang tawo wala ginhatagi sing nagakaigo nga tion sa pag-eksperimento. Apang subong amo gid, nakatigayon ang tawo sing daku nga tion sa paghimu sing pangulohan nga magapaayaw sa kinahanglanon sang tanan nga sakop sini, subong man sa paghimu sing sientipiko nga mga tukib nga makaamot sa kabuganaan sang tanan. Sa sulod sang mga siglo natilawan na sang tawo ang halos tanan nga pangulohan. Kag talalupangdon ang ila pag-uswag sa latagon sang siensia. Natukiban nila ang madamu nga kapuslanan sang atomo kag nakalakbay sa bulan. Apang ano ang nangin resulta? Nagdala bala ini sing matahom nga bag-ong sistema para sa kaayohan sang katawhan?
13. (a) Walay sapayan sang tanan nga sientipikong pag-uswag sang tawo, ano ang kahimtangan karon? (b) Ano ang maathag nga ginapamatod-an sini?
13 Wala gid! Sa baylo, nagdugang pa gid ang kasubo kag kagamu sa duta. Sa kamatuoran, ang krimen, pagdagta, inaway, pagkalusod sang pamilya kag ang iban pa nga palaligban nakalab-ot sa makatalagam nga kahimtangan sa bagay nga ang mga sientipiko nagapati nga yara sa katalagman ang pagluntad sang tawo. Huo, pagligad sang mga 6,000 ka tuig nga paggahom sa kaugalingon, kag sa tapos malab-ot ang putokputokan sa sientipiko nga “pag-uswag,” ang katawhan nagaatubang karon sing paglaglag sa kaugalingon! Daw ano kaathag nga ang tawo indi makagahom sing madinalag-on nga napain sa Dios! Wala man sing makareklamo nga ang Dios wala magtugot sing nagakaigo nga tion sa paghusay sa hulusayon.
14. Ngaa dapat kita mapalig-on sa pag-usisa sa isa pa ka importante nga hulusayon nga ginpautwas ni Satanas?
14 May maayo gid nga rason ang Dios sa pagtugot sa tawo sa idalom sang paggahom ni Satanas sa pagpahanabo sang kalautan nga nagluntad madugay na. Paagi sa iya pagrebelde nagpautwas si Satanas sing isa pa ka hulusayon nga nagakinahanglan man sing tion. Ang pag-usisa sa sining hulusayon makabulig sing dugang pa sa aton paghangop kon ngaa gintugutan sang Dios ang kalautan. Dapat nga mangin interesado gid ikaw sa sining hulusayon bangod personal nga nadalahig ikaw.
[Mga Pamangkot sa Pagtinuon]
[Piktyur sa pahina 100]
May maayong rason ang ginikanan nga paoperahan ang iya palangga nga anak bisan pa masakit. May maayo man nga mga rason ang Dios sa umalagi nga pagtugot sa tawo nga mag-antos
[Piktyur sa pahina 101]
Sanday Adan kag Eva, paagi sa pagkaon sa gindumilian nga bunga, nagbiya sa paggahom sang Dios. Sila na ang nagdesisyon para sa ila kaugalingon kon ano ang maayo ukon malain
[Mga piktyur sa pahina 103]
Subong nga ang tawo gintuga nga may kinahanglanon sa pagkaon kag sa pag-inum, gintuga man sia nga may kinahanglanon sa pagtuytoy sang Dios
