Paghinangpanay sa Isa kag Isa sa Gugma
Kapitulo 28
Paghinangpanay sa Isa kag Isa sa Gugma
1. (a) Paano ikaw mangin bahin sang organisasyon sang Dios? (b) Ano nian nga sugo ang tumanon mo?
SAMTANG nagauswag ang imo ihibalo kag apresasyon kay Jehova nga Dios kag sa iya mga katuyoan, luyag mo nga magpakig-upod sing tayuyon sa mga tawo nga nagahupot sini man nga pagtuo kag paglaum. Sa paghimu sini, mangin bahin ikaw sang makita nga organisasyon sang Dios, isa ka matuod nga Cristianong paghiliutod. “Higugmaa ang bug-os nga paghiliutod” mangin isa ka sugo nian nga dapat mo tumanon.—1 Pedro 2:17; 5:8, 9.
2. (a) Ano nga bag-ong sugo ang ginhatag ni Jesus sa iya mga sumulunod? (b) Ano ang maathag nga ginapakita sang mga tinaga nga “isa kag isa” kag “sa tunga ninyo”? (c) Daw ano ka importante ang magpakita sing gugma?
2 Ginpadaku ni Jesucristo kon daw ano ka importante nga maghigugmaanay ang iya mga sumulunod. Sia nagsiling sa ila: “Ako nagahatag sa inyo sing bag-ong sugo, nga maghigugmaanay kamo sa isa kag isa . . . Sa sini ang tanan nga tawo makahibalo nga kamo mga disipulo ko, kon may gugma kamo sa tunga ninyo.” (Juan 13:34, 35) Ang mga tinaga nga “isa kag isa” kag “sa tunga ninyo” maathag nga nagapakita nga ang tanan matuod nga mga Cristiano dapat magtingob sa isa ka grupo ukon organisasyon. (Roma 12:5; Efeso 4:25) Kag ining organisasyon makilal-an paagi sa gugma sang mga katapo sini para sa isa kag isa. Kon ang isa ka tawo wala sing gugma, ang tanan wala sing pulos.—1 Corinto 13:1-3.
3. Paano ginapadaku sang Biblia ang importansia sang paghigugma kag pag-ulikid sa mga masigka-Cristiano?
3 Busa, ang unang mga Cristiano anay masami ginpahanumdom sing subong sini: “Magmalolo kamo sa isa kag isa.” “Magbinatonay kamo.” “Mag-inalagaray kamo.” “Magmainayuhon kamo sa isa kag isa, malolo.” “Magpinaumuray kamo kag magpinatawaray kon ang isa may inugsumbong batok sa isa.” “Maglinaygayay kamo kag maglinig-onay kamo.” “Magpakighidaitay kamo.” “Magmainit kamo sa inyo paghigugmaanay.”—Roma 12:10; 15:7; Galacia 5:13; Efeso 4:32; Colosas 3:13, 14; 1 Tesalonica 5:11, 13; 1 Pedro 4:8; 1 Juan 3:23; 4:7, 11.
4. (a) Ano ang nagapakita nga dapat higugmaon sang mga Cristiano ang iban pa luwas sa “isa kag isa”? (b) Sin-o labi na ang higugmaon sang mga Cristiano?
4 Apang, wala ini nagakahulugan nga ang higugmaon lamang sang matuod nga mga Cristiano amo ang mga katapo sang organisasyon sang Dios. Higugmaon man nila ang iban. Ang Biblia, sa kamatuoran, nagapalig-on sa ila nga magbugana “sa gugma ayon sa isa kag isa kag ayon sa tanan.” (1 Tesalonica 3:12; 5:15) Sa paghatag sing timbang nga pagtamod, si apostol Pablo nagsulat: “Magbuhat kita sing maayo ayon sa tanan nga tawo, apang labi na gid sa mga tagapanimalay sang pagtuo.” (Galacia 6:10) Gani samtang dapat higugmaon sang mga Cristiano ang tanan, lakip ang ila mga kaaway, dapat nila higugmaon labi na ang mga masigkakatapo sang organisasyon sang Dios, ang ila espirituwal nga kautoran nga lalaki kag babayi.—Mateo 5:44.
5. Ano ang nagapakita nga ang matuod nga mga Cristiano, sang una kag sa karon, kilala sa ila gugma?
5 Ang unang mga Cristiano anay kilala sa ila gugma sa isa kag isa. Suno sa ikaduhang-siglong manunulat nga si Tertullian, ang mga tawo nagasiling tuhoy sa ila: ‘Tan-awa kon daw ano ang ila paghigugmaanay kag kon daw ano ang kahanda nila nga manginmatay para sa isa kag isa!’ Ina nga gugma makita man sa tunga sang matuod nga mga Cristiano karon. Apang nagakahulugan bala ini nga ang matuod nga mga Cristiano wala gid sing palaligban ukon kabudlayan?
ANG MGA RESULTA SANG PAGKADIHIMPIT
6. Ngaa bisan ang matuod nga mga Cristiano nagahimu sing sala kon kaisa batok sa isa kag isa?
6 Gikan sa imo pagtuon sa Biblia naton-an mo nga kita tanan nakapanubli sing pagkadihimpit gikan sa aton nahaunang mga ginikanan, sanday Adan kag Eva. (Roma 5:12) Gani may huyog kita sa paghimu sing malain. “Kita tanan masami nagakasandad,” siling sang Biblia. (Santiago 3:2; Roma 3:23) Kag dapat mo mahibaloan nga ang mga katapo sang organisasyon sang Dios dihimpit man kag kon kaisa nagahimu sing mga butang nga indi husto. Mahimu ini magresulta sa mga palaligban kag mga kabudlayan bisan sa tunga sang matuod nga mga Cristiano.
7. (a) Ngaa ginsilingan sanday Eudias kag Sintique nga “maghisugot”? (b) Ano ang nagapakita nga, sa kamatuoran, maayo ini sila nga Cristianong mga babayi?
7 Binagbinaga ang natabo sa duha ka babayi nga sanday Eudias kag Sintique sa unang kongregasyon sang Filipos. Si apostol Pablo nagsulat: “Nagapangabay ako kay Eudias kag nagapangabay ako kay Sintique nga maghisugot sila sa Ginuo.” Ngaa ginpalig-on ni Pablo ining duha ka babayi nga “maghisugot”? Maathag nga may problema sa tunga nila. Wala ginasugid sang Biblia kon ano yadto. Ayhan nagahisaay sila. Apang, sa kamatuoran maayo ini sila nga mga babayi. Madugay na sila nga nangin mga Cristiano kag sa sulod sang nagligad nga tinuig nangin kabulig sila ni Pablo sa pagwali nga hilikuton. Gani nagsulat sia sa kongregasyon: “Buligi ining mga babayi nga nagpangabudlay upod sa akon sa maayong balita.”—Filipos 4:1-3.
8. (a) Anong problema ang nag-utwas sa ulot nanday Pablo kag Bernabe? (b) Kon nataboan nga didto ka kag nakita mo ining natabo, ano ang masiling mo?
8 Sang isa ka tion may problema man nga nag-utwas sa tunga ni apostol Pablo kag sang iya kaupod sa paglakbay nga si Bernabe. Manuglakat sila sadto sa ila ikaduha nga paglakbay subong misyonero kag luyag paupdon ni Bernabe ang iya pakaisa nga si Marcos. Apang, wala magsugot si Pablo, bangod ginbiyaan sila anay ni Marcos kag nagpauli sa tion sang ila una nga paglakbay subong misyonero. (Binuhatan 13:13) Ang Biblia nagasiling: “May isa ka matigdas nga pagbanggianay, sa bagay nga nagbulag ang isa sa isa.” (Binuhatan 15:37-40) Hunahunaa lang! Kon nataboan nga didto ka kag nakita mo ining “matigdas nga pagbanggianay,” masiling ka bala nga sanday Pablo kag Bernabe indi bahin sang organisasyon sang Dios bangod sini?
9. (a) Ano nga sala ang nahimu ni Pedro, kag ngaa amo sini ang iya ginhimu? (b) Ano ang ginhimu ni Pablo sang makita niya ang natabo?
9 Sang isa pa ka okasyon nagsayop si apostol Pedro. Nag-untat sia sa pagpakig-upod sa Gentil nga mga Cristiano bangod nahadlok sia nga basi pakalainon ini sang pila ka Judiyong mga Cristiano nga sing sayop nagatamay sa ila Gentil nga kautoran. (Galacia 2:11-14) Sang makita ni apostol Pablo ang ginhimu ni Pedro, ginpakamalaut niya ang dinagakaigo nga paggawi ni Pedro sa atubangan sang tanan nga didto sadto. Ano ang ginbatyag mo kon ikaw si Pedro?—Hebreo 12:11.
PAGLUBAD SA MGA PROBLEMA PAAGI SA GUGMA
10. (a) Ano ang ginhimu ni Pedro sang ginsabdong sia? (b) Ano ang maton-an naton gikan sa halimbawa ni Pedro?
10 Mahimu nga maakig si Pedro kay Pablo. Mahimu nga masaklaw sia sa pagsabdong ni Pablo sa iya sa atubangan sang iban. Apang indi amo sini ang iya ginbatyag. (Manugwali 7:9) Mapainubuson si Pedro. Ginbaton niya ang pagsabdong, kag wala ini pagtuguti nga mag-ugdaw ang iya gugma kay Pablo. (1 Pedro 3:8, 9) Talupangda kon paano sang ulihi ginsambit ni Pedro si Pablo sa isa ka sulat sang pagpalig-on sa mga masigka-Cristiano: “Kabiga ninyo nga ang pagbatas sang aton Ginuo kaluwasan, subong sang ginsulat man sa inyo sang aton hinigugma nga utod nga si Pablo suno sa kaalam nga ginhatag sa iya.” (2 Pedro 3:15) Huo, gintabonan ni Pedro ang problema sing gugma, nga sa sini nga kaso ginpautwas sang iya sayop nga paggawi.—Hulubaton 10:12.
11. (a) Walay sapayan sang ila matigdas nga pagbanggianay, paano ginpakita nanday Pablo kag Bernabe nga sila matuod nga mga Cristiano? (b) Paano kita makabenepisyo gikan sa ila halimbawa?
11 Kamusta ang problema sa ulot nanday Pablo kag Bernabe? Nalubad man ini paagi sa gugma. Kay sang ulihi, sang magsulat si Pablo sa kongregasyon sang Corinto, ginsambit niya si Bernabe subong isa ka suod nga masigkamanugpangabudlay. (1 Corinto 9:5, 6) Kag bisan pa daw may maayo nga rason si Pablo sa pagduhaduha sa ikasarang ni Marcos subong kaupod sa paglakbay, ining pamatan-on nga lalaki naghamtong sang ulihi tubtob sa punto nga si Pablo nagsulat kay Timoteo: “Kuhaa si Marcos kag paupda sia sa imo, kay mapuslanon gid sia sa pag-alagad sa akon.” (2 Timoteo 4:11) Makabenepisyo kita gikan sa sining halimbawa sang paglubad sa mga indi paghangpanay.
12. (a) Ngaa makapati kita nga nahusay nanday Eudias kag Sintique ang ila indi paghangpanay? (b) Suno sa Galacia 5:13-15, ngaa importante nga lubaron sang mga Cristiano ang ila indi paghangpanay paagi sa gugma?
12 Bueno, kamusta si Eudias kag Sintique? Nahusay bala nila ang ila indi paghangpanay, kag gintugutan ang gugma nga tabonan ang bisan ano nga sala nga ayhan nahimu nila batok sa isa kag isa sa ila? Wala ginasugid sang Biblia kon ano sang ulihi ang natabo sa ila. Apang, bangod maayo sila nga mga babayi nga nagbulig kay Pablo sa iya Cristianong ministeryo, makapati kita nga ginbaton nila sing mapainubuson ang laygay. Sang mabaton ang sulat ni Pablo, mahanduraw naton nga nagpalapit sila sa isa kag isa kag ginlubad ang ila problema sa espiritu sang gugma.—Galacia 5:13-15.
13. Anong halimbawa sa pagpakita sing gugma ang ginapahamtang ni Jehova nga Dios?
13 Ayhan ikaw, man, indi makasaho sa isa ka tawo, ukon mga tawo, sa kongregasyon. Bisan pa mahimu daku pa ang ila hilimuon agod mapauswag ang matuod nga Cristianong mga kinaiya, hunahunaa ini: Nagahulat bala si Jehova nga Dios tubtob nga madula sang mga tawo ang ila malain nga paggawi antes sila higugmaon niya? Wala; ang Biblia nagasiling: “Ang Dios nagapakilala sang iya kaugalingon nga gugma sa aton nga, sang makasasala pa kita, si Cristo napatay para sa aton.” (Roma 5:8) Dapat naton sundon ina nga halimbawa sang Dios kag magpakita sing gugma sa mga nagahimu sing malain kag binuang nga mga butang.—Efeso 5:1, 2; 1 Juan 4:9-11; Salmo 103:10.
14. Anong laygay ang ginhatag ni Jesus tuhoy sa indi paghikay sa iban?
14 Sanglit dihimpit kita tanan, nagtudlo si Jesus nga indi kita dapat mangin hikayan. Matuod, ang iban may mga kakulangan, apang amo man kita. “Ngaa ginamulalong mo ang puling nga yara sa mata sang imo utod, apang wala mo pagsapaka ang balayanon nga yara sa imo kaugalingon nga mata?” pamangkot ni Jesus. (Mateo 7:1-5) Paagi sa pagdumdom sinang maalamon nga laygay, mabuligan kita sa paghangop sa aton kautoran nga lalaki kag babayi.
15. (a) Ngaa importante nga patawaron naton ang iban bisan pa may rason kita sa pagreklamo batok sa ila? (b) Sa iya ilustrasyon sa Mateo kapitulo 18, paano gintudlo ni Jesus ang kinahanglanon nga mangin mapinatawaron?
15 Kinahanglanon gid nga mangin maluluy-on kita kag mapinatawaron. Matuod, mahimu nga may rason ikaw sa pagreklamo batok sa isa ka utod nga lalaki ukon babayi. Apang dumduma ang laygay sang Biblia: “Magpinaumuray kamo kag magpinatawaray kon ang isa may inugsumbong batok sa isa.” Apang ngaa dapat mo patawaron ang iban bisan pa may rason ikaw sa pagreklamo batok sa ila? Bangod si “Jehova nagpatawad sa imo,” sabat sang Biblia. (Colosas 3:13) Kag agod patawaron niya kita, siling ni Jesus, dapat man naton patawaron ang iban. (Mateo 6:9-12, 14, 15) Si Jehova, subong sang hari sa isa sang mga ilustrasyon ni Jesus, nagpatawad sa aton sing linibo na ka beses, gani indi bala naton mapatawad ang aton kautoran sing makapila?—Mateo 18:21-35; Hulubaton 19:11.
16. (a) Suno sa 1 Juan 4:20, 21, paano ang gugma sa Dios may kaangtanan sa gugma sa mga masigka-Cristiano? (b) Ano nga buhat ang kinahanglanon kon ang imo utod may reklamo batok sa imo?
16 Indi naton maaplikar ang kamatuoran kag sa amo man nga tion tratahon ang aton kautoran nga lalaki kag babayi sa isa ka indi mahigugmaon, indi mapinatawaron nga paagi. (1 Juan 4:20, 21; 3:14-16) Gani, nian, kon may problema ka sa isa ka masigka-Cristiano, indi mag-untat sa pagpakighambal sa iya. Dili magtanum sing malain nga buot, kundi husaya ang problema sa espiritu sang gugma. Kon nasaklaw mo ang imo utod, mangin handa sa pagpangayo sing pasaylo kag sa pagpangayo sing patawad.—Mateo 5:23, 24.
17. Ano ang nagakaigo nga himuon kon ang isa nakasala sa imo?
17 Apang ano kon insultohan ka sang isa, ukon makasala sa imo sa iban nga paagi? Ang Biblia nagalaygay: “Dili ka magsiling: ‘Himuon ko sa iya ang subong sang ginhimu niya sa akon, magabalos ako sa tawo suno sa iya binuhatan.’ ” (Hulubaton 24:29; Roma 12:17, 18) Si Jesucristo naglaygay: “Ang bisan sin-o nga magtampa sa imo guya nga tuo, itaya man ang imo pihak nga guya sa iya.” (Mateo 5:39) Ang tampa wala ginatuyo sa paghalit sa pisikal, kundi sa pag-insulto lamang ukon sa pagpaakig. Sa amo gintudloan ni Jesus ang iya mga sumulunod nga likawan ang maulamid sa away ukon sa baisay. Sa baylo sang ‘pagbalos sing malaut sa malaut ukon pasipala sa pasipala,’ dapat mo ‘pangitaon ang paghidait kag sundon ini.’—1 Pedro 3:9, 11; Roma 12:14.
18. Ano ang dapat maton-an naton gikan sa halimbawa sang Dios sa paghigugma sa tanan nga tawo?
18 Dumduma nga dapat naton ‘higugmaon ang bug-os nga paghiliutod.’ (1 Pedro 2:17) Si Jehova nga Dios nagapahamtang man sing halimbawa. Wala sia sing ginapasulabi. Ang tanan nga rasa palareho sa iya panulok. (Binuhatan 10:34, 35; 17:26) Ang mga tawo nga amligan sa nagapakari nga “dakung kapipit-an” magahalin sa “tanan nga pungsod kag tribu kag katawhan kag hambal.” (Bugna 7:9, 14-17) Gani, sa pag-ilog sa Dios, indi naton dapat higugmaon sing kubos ang iban bangod tuhay ang ila rasa, nasyonalidad ukon tindog sa katilingban, ukon tuhay ang duag sang ila panit.
19. (a) Paano naton dapat kabigon kag tratahon ang mga masigka-Cristiano? (b) Anong daku nga pribilehiyo ang matigayon naton?
19 Kilalaha sing maayo ang tanan sa Cristianong kongregasyon, kag mahigugma mo sila kag maapresyar. Kabiga ang mga may edad subong mga amay kag iloy, ang mga bata pa subong kautoran nga lalaki kag babayi. (1 Timoteo 5:1, 2) Isa gid ka pribilehiyo nga mangin bahin sang katulad-pamilya kag makita nga organisasyon sang Dios, nga ang mga katapo sini nagahinangpanay sa isa kag isa sa gugma. Daw ano kaayo nga mabuhi sing dayon sa paraiso sa duta upod sa sining mahigugmaon nga pamilya!—1 Corinto 13:4-8.
[Mga Pamangkot sa Pagtinuon]
[Piktyur sa pahina 233]
Ano ang maton-an naton sa natabo kay Eudias kag Sintique?
[Piktyur sa pahina 235]
Ang pagbaisay nanday Pablo kag Bernabe nagkahulugan bala nga indi sila mga katapo sang organisasyon sang Dios?
[Piktyur sa pahina 236]
Ginatugutan sang matuod nga mga Cristiano nga tabonan sang gugma ang mga kabangdanan sang reklamo
[Piktyur sa pahina 237]
Sa sulod sang organisasyon sang Dios, ginapahulag ang mga Cristiano sang gugma nga maghilisugot subong palareho
