Kapitulo 22

Pagkilala sa Matuod nga Relihion

1. Sin-o anay ang nagbuhat sing matuod nga relihion sang nahaunang siglo?

 INDI MADUHADUHAAN kon sin-o sadto ang nagbuhat sing matuod nga relihion sang nahaunang siglo. Amo sila ang mga sumulunod ni Jesucristo. Natungod sila tanan sa isa ka Cristianong organisasyon. Kamusta sa karon? Paano makilala ang mga nagabuhat sing matuod nga relihion?

2. Paano makilala ang mga nagabuhat sing matuod nga relihion?

² Sa pagpaathag kon paano naton mahimu ini, si Jesus nagsiling: “Sa ila mga bunga makilala ninyo sila. . . . Ang tagsa ka kahoy nga maayo nagapamunga sing maayo nga bunga, apang ang malain nga kahoy nagapamunga sing malain nga bunga; . . . Sa amo sa ila mga bunga makilala ninyo sila.” (Mateo 7:​16-20) Anong maayo nga mga bunga ang ginapaabot mo gikan sa matuod nga mga sumilimba sang Dios? Ano dapat ang ila ginahambal kag ginahimu karon?

PAGPAKABALAAN SA NGALAN SANG DIOS

3, 4. (a) Ano ang una nga pangabay sa Modelo nga Pangamuyo ni Jesus? (b) Paano ginpakabalaan ni Jesus ang ngalan sang Dios?

³ Ang matuod nga mga sumilimba sang Dios magasunod sa Modelo nga Pangamuyo nga ginhatag ni Jesus sa iya mga sumulunod. Ang una nga ginsambit didto ni Jesus amo ini: “Amay namon nga yara sa langit, pakabalaanon ang imo ngalan.” Amo sini ang pagbadbad sang isa pa ka bersion sang Biblia: “Kabay nga huptan ang imo ngalan nga balaan.” (Mateo 6:​9, Je­ru­sa­lem Bi­ble) Ano ang buot silingon sang pagpakabalaan, ukon paghupot nga balaan, sa ngalan sang Dios? Paano ini ginhimu ni Jesus?

⁴ Ginpakita ni Jesus kon paano niya ginhimu ini sang mangamuyo sia sa iya Amay: “Ginpakilala ko ang imo ngalan sa mga tawo nga ginhatag mo sa akon gikan sa kalibutan.” (Juan 17:6) Huo, ginpakilala ni Jesus sa iban ang ngalan sang Dios, nga Jehova. Wala sia magpatumbaya sa paggamit sadto nga ngalan. Nahibaloan ni Jesus ang katuyoan sang Dios nga himayaon ang Iya ngalan sa bug-os nga  duta. Gani nagpakita sia sing halimbawa sa pagpakilala sadto nga ngalan kag sa paghupot sini nga balaan.​—⁠Juan 12:​28; Isaias 12:​4, 5.

5. (a) Paano naangot ang Cristianong kongregasyon sa ngalan sang Dios? (b) Ano ang dapat naton himuon agod maluwas?

⁵ Ginapakita sang Biblia nga ang pagluntad sang matuod nga Cristianong kongregasyon naangot sa ngalan sang Dios. Si apostol Pedro nagpaathag nga ang Dios “nagliso sang iya igtalupangod sa mga pungsod sa pagkuha sa ila sing katawhan sa iya ngalan.” (Binuhatan 15:​14) Gani dapat nga pakabalaanon sang matuod nga katawhan sang Dios ang iya ngalan kag ipakilala ini sa bug-os nga duta. Ang pagkilala sa sina nga ngalan kinahanglanon gid agod maluwas, kay ang Biblia nagasiling: “Kay ‘ang bisan sin-o nga magtawag sa ngalan ni Jehova maluwas.’ ”​—⁠Roma 10:​13, 14.

6. (a) Ang mga iglesia bala sa kabilogan nagapakabalaan sa ngalan sang Dios? (b) May yara bala nga nagapanaksi sa ngalan sang Dios?

⁶ Sin-o, sa karon, ang nagapakabalaan sa ngalan sang Dios kag nagapakilala sini sa bug-os nga duta? Ang mga iglesia sa kabilogan nagalikaw sa paggamit sa ngalan nga Jehova. Ginkuha pa gani ini sang iban gikan sa ila mga badbad sang Biblia. Apang, kon magpakighambal ikaw sa imo mga isigkatawo kag pirme patuhoyan si Jehova, nga ginagamit ang iya ngalan, sa anong organisasyon iangot nila ikaw? Isa lamang ang katawhan nga nagasunod sa halimbawa ni Jesus sa sining bahin. Ang ila panguna nga katuyoan sa kabuhi amo ang mag-alagad sa Dios kag magpanaksi sa iya ngalan, subong sang ginhimu ni Jesus. Gani ginbaton nila ang Makasulatanhon nga ngalan “Mga Saksi ni Jehova.”​—⁠Isaias 43:​10-12.

 PAGWALI SANG GINHARIAN SANG DIOS

7. Paano ginpakita ni Jesus ang importansia sang ginharian sang Dios?

⁷ Sa Modelo nga Pangamuyo nga ginhatag ni Jesus, ginpakita man niya ang importansia sang ginharian sang Dios. Gintudloan niya ang katawhan nga mangamuyo: “Magkari ang imo ginharian.” (Mateo 6:​10) Makapila nga ginpadaku ni Jesus nga ang Ginharian amo lamang ang sabat sa mga palaligban sang katawhan. Ginhimu ini niya kag sang iya mga apostoles paagi sa pagwali sa katawhan tuhoy sa ginharian “sa mga minuro” kag “sa mga balay.” (Lucas 8:​1; Binuhatan 5:​42; 20:​20) Ang ginharian sang Dios amo ang tema sang ila pagwali kag pagpanudlo.

8. Paano ginpakita ni Jesus kon ano ang mangin panguna nga mensahe sang iya matuod nga mga sumulunod sa sining “katapusan nga mga adlaw”?

⁸ Kamusta sa karon? Ano ang panguna nga panudlo sang matuod nga Cristianong organisasyon sang Dios? Sa pagtagna sa sining “katapusan nga mga adlaw,” si Jesus nagsiling: “Iwali ining maayong balita sang ginharian sa bug-os napuy-an nga duta subong panaksi sa tanan nga pungsod; kag ugaling magaabot ang katapusan.” (Mateo 24:​14) Gani ang Ginharian amo dapat ang panguna nga mensahe sang katawhan sang Dios karon.

9. Sin-o nga mga tawo karon ang nagawali sang mensahe sang Ginharian?

⁹ Pamangkota ang imo kaugalingon: Kon may magduaw sa imo kag maghambal tuhoy sa ginharian sang Dios subong amo ang matuod nga paglaum sang katawhan, sa anong organisasyon ginaangot mo sia? Luwas sa mga Saksi ni Jehova may iban pa bala nga relihion nga nakahambal sa imo tuhoy sa ginharian sang Dios? Ti, pila lamang gani sa ila ang nakahibalo kon ano ini. Mahipos sila tuhoy sa  pangulohan sang Dios. Apang ina nga pangulohan isa ka balita nga nagatay-ug sa kalibutan. Gintagna ni manalagna Daniel nga ining ginharian ‘magadugmok kag magapapas sa tanan nga iban pa nga pangulohan kag ini lamang ang magagahom sa duta.’​—⁠Daniel 2:44.

PAGTAHOD SA PULONG SANG DIOS

10. Paano si Jesus nagpakita sing pagtahod sa Pulong sang Dios?

¹⁰ Ang isa pa ka paagi nga makilala ang mga nagabuhat sang matuod nga relihion amo ang ila panimuot sa Biblia. Si Jesus pirme nga nagpakita sing pagtahod sa Pulong sang Dios. Makapila niya ini gingamit subong katapusan nga awtoridad. (Mateo 4:​4, 7, 10; 19:​4-6) Nagpakita man si Jesus sing pagtahod sa Biblia paagi sa pagkabuhi nahisanto sa mga panudlo sini. Wala gid niya pagpakanubua ang Biblia. Sa baylo, ginpakamalaut niya ang mga nagtudlo sing lisa sa Biblia kag nagtinguha sa pagpaluya sa kusog sang mga panudlo sini paagi sa pag-una sang ila kaugalingon nga mga ideya.​—⁠Marcos 7:​9-13.

11. Ano nga panimuot sa Pulong sang Dios ang masami nga ginapakita sang mga iglesia?

¹¹ Ginasunod bala sang mga iglesia sang Cristiandad ang halimbawa ni Cristo sa sini? Ginatahod bala nila sing hanuot ang Biblia? Madamu nga klerigo karon ang wala nagapati sa kasaysayan sang Biblia tuhoy sa pagpakasala ni Adan, sa anaw sang adlaw ni Noe, kay Jonas kag sa daku nga isda, kag sa iban pa. Nagasiling man sila nga ang tawo nagluntad diri paagi sa ebolusyon, indi direkta nga gintuga sang Dios. Ginapalig-on bala nila ang pagtahod sa Pulong sang Dios kon amo sila sina? Ang iban nga mga lider sang iglesia nagasiling man nga ang seksuwal nga relasyon sa guwa sang pag-asawahay indi malain, amo man ang homoseksuwalidad ukon poligamiya. Masiling mo bala nga ginapalig-on nila ang mga tawo sa paggamit sa Biblia subong ila tuytoy? Wala gid nila ginasunod ang halimbawa sang Anak sang Dios kag sang iya mga apostoles.​—⁠Mateo 15:​18, 19; Roma 1:​24-27.

12. (a) Ngaa ang pagsimba sang madamu nga may yara Biblia indi kalahamut-an sa Dios? (b) Kon ang hungod nga mga nagapakasala ginatugutan sa pagpabilin nga may maayong tindog sa isa ka iglesia, ano ang dapat ihinakop naton?

¹² May mga katapo sang iglesia nga may yara Biblia kag nagatuon pa gani sini, apang ang ila pagkabuhi nagapakita nga wala nila ginasunod ini. Sa sini nga mga tawo, ang Biblia nagasiling: “Nagatu-ad sila nga kilala nila ang Dios, apang sa ila mga buhat ginapanghiwala nila sia.” (Tito 1:​16; 2 Timoteo 3:5) Kon ang mga katapo sang iglesia nga nagasugal, nagapahubog ukon nagahimu sing iban pa nga sala ginatugutan sa pagpabilin nga may maayong tindog sa sulod sang  ila iglesia, ano ang ginapakita sini? Maathag nga ang ila relihioso nga organisasyon wala nahamut-an sang Dios.​—⁠1 Corinto 5:​11-13.

13. Anong serioso nga desisyon ang dapat himuon sang isa ka tawo kon nasapwan niya nga ang mga panudlo sang iya iglesia wala nahisanto sa Biblia?

¹³ Kon ginhunahuna mo ang nagligad nga mga kapitulo sining libro kag ginbinagbinag ang mga teksto sang Biblia nga masapwan didto, naton-an mo ang sadsaran nga mga panudlo sang Pulong sang Dios. Apang ano kon ang mga panudlo sang relihioso nga organisasyon nga imo ginapasakopan wala nahisanto sa Pulong sang Dios? Nian may yara ka mabug-at nga palaligban. Amo ini ang palaligban sa pagpamat-od kon bala batunon ang pagkamaminatud-on sang Biblia ukon sikwayon ini pabor sa mga panudlo nga wala ginasakdag sang Biblia. Sa pagkamatuod, ang imo himuon imo kaugalingon nga desisyon. Apang, dapat mo timbangtimbangon sing mahalungon ang mga butang. Amo sini bangod ang desisyon nga imo himuon magaapektar sang imo tindog sa Dios kag sang imo paglaum nga mabuhi sing dayon sa paraiso sa duta.

NAPAIN GIKAN SA KALIBUTAN

14. (a) Ano pa ang isa ka tanda sang matuod nga relihion? (b) Ngaa tuman ka importante nga malab-ot sang matuod nga mga sumilimba ining kinahanglanon?

¹⁴ Ang isa pa ka tanda sang mga nagabuhat sing matuod nga relihion amo nga, siling ni Jesus, “indi sila bahin sang kalibutan.” (Juan 17:​14) Nagakahulugan ini nga ang matuod nga mga sumilimba nagapain gikan sa malaut nga kalibutan kag sa mga hilikuton sini. Nagpangindi si Jesucristo nga mangin politikal nga manuggahom. (Juan 6:​15) Mahangpan mo kon ngaa importante gid ang pagpain gikan sa kalibutan kon dumdumon mo nga ang Biblia nagasiling nga si Satanas nga Yawa amo ang manuggahom sang kalibutan. (Juan 12:​31; 2 Corinto 4:4) Ang pagkaserioso sini nga butang makita sing dugang gikan sa ginsiling sang Biblia: “Ang bisan sin-o nga luyag mangin abyan sang kalibutan nagahimu sang iya kaugalingon nga kaaway sang Dios.”​—⁠Santiago 4:4.

15. (a) Matuod gid bala nga ang mga iglesia nga inyo ginapasakopan “indi bahin sang kalibutan”? (b) May nahibaloan bala kamo nga isa ka relihion nga nagalab-ot sining kinahanglanon?

¹⁵ May yara bala mga pamatuod nga ginasunod ini sang mga iglesia sa inyo komunidad? Matuod gid bala nga ang klero kag ang mga katapo sang mga kongregasyon “indi bahin sang kalibutan”? Ukon nagapakigbahin bala sila sa nasyonalismo, politika kag pagpaindisanay sang kalibutan? Indi mabudlay sabton ining mga pamangkot, bangod kilala ang mga ginahimu sang mga iglesia. Sa pihak nga bahin, mahapos man usisaon ang mga ginahimu sang mga  Saksi ni Jehova. Sa paghimu sini, masapwan mo nga ginasunod gid nila ang halimbawa ni Cristo kag sang iya unang mga sumulunod paagi sa pagpain gikan sa kalibutan, sa politika sini kag sa makagud, imoral, masingki nga mga dalanon sini.​—⁠2 Juan 2:​15-17.

PAGHIGUGMAANAY

16. Ano ang isa ka importante nga paagi nga makilala ang matuod nga mga disipulo ni Cristo?

¹⁶ Ang labing importante nga paagi nga makilala ang matuod nga mga disipulo ni Cristo amo ang ila paghigugmaanay. Si Jesus nagsiling: “Paagi sa sini makilala sang tanan nga kamo mga disipulo ko, kon nagahigugmaanay kamo.” (Juan 13:​35) May yara bala sini nga gugma ang relihioso nga mga organisasyon nga imo ginapasakopan? Ano, halimbawa, ang ila ginahimu kon ang pungsod nga ila ginapuy-an nagapakig-away batok sa isa ka pungsod?

17. Kamusta ang relihioso nga mga organisasyon kag ang ila mga katapo sa paglab-ot sang kinahanglanon nga maghigugmaanay sila?

¹⁷ Nahibaloan mo kon ano pirme ang nagakatabo. Sa sugo sang kalibutanon nga mga tawo ang mga katapo sang nanuhaytuhay nga relihiosong organisasyon nagakadto sa patag-awayan kag nagapatay sa ila mga masigka tumuluo sa pihak nga pungsod. Sa amo ang Katoliko nagapatay sa Katoliko, Protestante sa Protestante kag Muslim sa Muslim. Sa banta mo ayhan nahisanto ini sa Pulong sang Dios kag nagapakita gid sang espiritu sang Dios?​—⁠1 Juan 3:​10-12.

18. Kamusta ang mga Saksi ni Jehova sa pagpakita sing gugma sa isa kag isa?

¹⁸ Kamusta ang mga Saksi ni Jehova kon tuhoy sa pagpakita sing gugma sa isa kag isa? Wala nila ginasunod ang dalanon sang kalibutanon nga mga relihion. Wala sila nagapatay sang ila mga masigkatumuluo sa patag-awayan. Wala sila nagapakunokuno sa pagsiling, “Ginahigugma ko ang Dios,” samtang nagadumot sa ila utod  sa lain nga nasyonalidad, tribu ukon rasa. (1 Juan 4:​20, 21) Apang nagapakita man sila sing gugma sa iban pa nga mga paagi. Paano? Paagi sa ila pagpakig-angot sa ila mga isigkatawo kag paagi sa ila mahigugmaon nga panikasog nga mabuligan ang iban sa pagtuon tuhoy sa Dios.​—⁠Galacia 6:10.

ISA KA MATUOD NGA RELIHION

19. Ngaa makatarunganon kag Makasulatanhon ang magsiling nga isa lamang ang matuod nga relihion?

¹⁹ Makatarunganon lamang nga isa ang matuod nga relihion. Nahisanto ini sa kamatuoran nga ang matuod nga Dios isa ka Dios, “indi sang kagamu, kundi sang paghidait.” (1 Corinto 14:​33) Ang Biblia nagasiling nga sa kamatuoran may yara lamang “isa ka pagtuo.” (Efeso 4:5) Sin-o, kon amo, ang mga nagahuman sa hubon sang matuod nga mga sumilimba karon?

20. (a) Sa kapawa sang pamatuod, sin-o ang ginatudlo sini nga libro subong amo ang matuod nga mga sumilimba karon? (b) Amo bala sina ang ginapatihan mo? (c) Ano ang labing maayong paagi agod makilala sing maayo ang mga Saksi ni Jehova?

²⁰ Wala kami nagapangalag-ag sa pagsiling nga sila amo ang mga Saksi ni Jehova. Agod makombinse ikaw sini ginaagda namon ikaw nga pangilalahon sila sing dugang pa. Ang labing maayo sa paghimu sini amo ang pagtambong sa ila mga miting sa Kingdom Hall sang mga Saksi ni Jehova. Sanglit ginapakita sang Biblia nga ang pagbuhat sing matuod nga relihion nagahatag sing daku nga kaayawan karon kag nagabukas sang dalan padulong sa kabuhi nga walay katapusan sa paraiso sa duta, pat-od nga mangin takus ini sang imo pag-usisa. (Deuteronomio 30:​19, 20) Mainabyanon nga ginaagda namon ikaw sa paghimu sini. Ngaa indi magpangusisa karon?

[Mga Pamangkot sa Pagtinuon]

[Piktyur sa pahina 185]

Kon hambalon mo ang iban tuhoy kay Jehova kag sa iya ginharian, sa anong relihion iangot ikaw sang mga tawo?

[Mga piktyur sa pahina 186]

Ginatahod bala sang isa ka tawo ang Pulong sang Dios kon wala sia nagakabuhi suno sa sini?

[Piktyur sa pahina 188, 189]

Nagpangindi si Jesus nga mangin politikal nga manuggahom

[Piktyur sa pahina 190]

Mainabyanon nga ginaagda ikaw sa pagtambong sa mga miting sang mga Saksi ni Jehova