Sa Tapos sang Armagedon, Isa ka Paraiso nga Duta
Kapitulo 19
Sa Tapos sang Armagedon, Isa ka Paraiso nga Duta
1. (a) Ano ang kinaandan nga pagtamod sa Armagedon? (b) Ano ang ginasiling sang Biblia tuhoy sini?
ANG “ARMAGEDON” isa ka makahaladlok nga tinaga sa madamu. Masami ini ginagamit sang mga lider sang kalibutan sa pagpatuhoy sa mahimu matabo nga Inaway Kalibutanon III. Apang, ang Biblia nagahambal sing Armagedon subong amo ang duog sang isa ka matarong nga inaway nga himuon sang Dios. (Bugna 16:14, 16, King James Version) Ining inaway sang Dios magahanda sang dalan para sa isa ka matarong nga bag-ong kahimusan.
2. (a) Sin-o ang laglagon sa Armagedon? (b) Gani anong mga buhat ang maalamon nga dapat likawan?
2 Tuhay sa mga inaway sang tawo, nga nagapatay sa maayo kag malain, ang Armagedon magalaglag sa malain lamang. (Salmo 92:7) Si Jehova nga Dios ang mangin Hukom, kag laglagon niya ang bisan sin-o nga hungod nga nagalalis sa iya matarong nga kasugoan. Madamu karon ang wala nagapakalain sa pagpakighilawas, pagpahubog, pagbutig ukon pagdaya. Apang, suno sa Dios, malain ining mga butang. Gani sa Armagedon indi niya pagluwason ang mga nagapadayon sa paghimu sini. (1 Corinto 6:9, 10; Bugna 21:8) Nahibaloan ang kasugoan sang Dios sa sining mga butang, importante para sa mga tawo nga nagabuhat sining malain nga mga butang nga bag-uhon ang ila mga dalanon.
3. (a) Sa ano ginpaanggid ni Jesus ang katapusan sang karon nga kalibutan? (b) Ano ang matabo kay Satanas kag sa iya mga demonyo? (c) Suno sa mga kasulatan sa masunod nga pahina, ano nga sahi sang mga kahimtangan ang matigayon sa paraiso nga duta?
3 Sa tapos sang Armagedon wala sing mabilin nga bahin sining malauton nga kalibutan. Ang mga tawo lamang nga nagaalagad sa Dios ang padayon nga magakabuhi. (1 Juan 2:17) Ginpaanggid ni Jesucristo ang kahimtangan sa adlaw ni Noe. (Mateo 23:37-39; 2 Pedro 3:5-7, 13; 2:5) Sa tapos sang Armagedon, ang ginharian sang Dios lamang ang magagahom nga pangulohan sa duta. Wala na si Satanas kag ang iya mga demonyo. (Bugna 20:1-3) Binagbinaga, sa masunod nga mga pahina, ang pila sang mga pagpakamaayo nga ginapakita sang Biblia matigayon sang matinumanon nga mga tawo.
MAHIDAITON ANG TANAN NGA KATAWHAN
“Sa aton natawo ang isa ka bata, sa aton ginhatag ang isa ka anak nga lalaki; kag ang paggahom mangin sa iya abaga. Kag tawgon ang iya ngalan . . . Prinsipe sang Paghidait. Sa kabuganaan sang paggahom kag sang paghidait wala sing katapusan.”—Isaias 9:6, 7.
“Sa iya mga adlaw magalambo ang matarong, kag ang bugana nga paghidait tubtob wala na ang bulan. Kag sia magatigayon sing mga sakop kutob sa dagat pa dagat kag kutob sa Suba tubtob sa kaukbungan sang duta.”—Salmo 72:7, 8.
WALA NA SING INAWAY
“Kari kamo, mga tawo, tan-awa ang mga binuhatan ni Jehova, kon paano niya ginahimu ang makatilingala nga mga butang sa duta. Ginapauntat niya ang mga inaway tubtob sa ukbong sang duta.”—Salmo 46:8, 9.
MATAHOM NGA MGA BALAY KAG MAKALILIPAY NGA TRABAHO PARA SA TANAN
“Magapatindog sila sing mga balay kag sila ang magapuyo . . . Indi sila magpatindog kag iban ang magapuyo; indi sila magtanum kag iban ang magakaon . . . ang akon mga pinili magakalipay sing bug-os sa binuhatan sang ila mga kamut. Indi sila magpangabudlay sa wala sing pulos, ukon magpanganak nga sa kalalat-an; kay sila kaliwat sang mga pinili ni Jehova, kag ang ila mga anak upod sa ila.”—Isaias 65:21-23.
WALA NA SING KRIMEN, KASINGKI KAG KALAUTAN
“Kay utdon ang mga manughikot sing malaut . . . Kag sa diutay pa nga tion, kag ang malauton wala na; kag pat-od nga usisaon mo ang iya duog, apang wala na sia didto.”—Salmo 37:9, 10.
“Tuhoy sa malauton, utdon sila gikan sa duta; kag ang maluib gabuton sa sini.”—Hulubaton 2:22.
ANG BUG-OS NGA DUTA ISA KA PARAISO
Si Jesus nagsiling: “Mangin kaupod ko ikaw sa Paraiso.”—Lucas 23:43.
“Ang mga matarong magapanubli sang duta, kag magapuyo sila didto sing dayon.”—Salmo 37:29.
BUGANA NGA KALAN-ON PARA SA TANAN
“Si Jehova sang mga kasoldadosan magaaman para sa tanan nga katawhan sing . . . isa ka bangkite sang matambok nga mga butang, isa ka bangkite sang mga alak sa labud, sang matambok nga mga butang nga puno sing utok sa tul-an.”—Isaias 25:6.
“Mangin bugana ang uyas sa duta; sa putokputokan sang kabukiran magahapayhapay ini.” “Ang duta magahatag sang iya patubas; ang Dios, nga aton Dios, magapakamaayo sa aton.”—Salmo 72:16; 67:6.
4, 5. (a) Anong mga kahimtangan ang madula na sa paraiso nga duta? (b) Ano ang mahimu sang mga tawo nga, sa madamung duog, indi nila mahimu karon?
4 Pat-od nga luyag mo mabuhi sa paraiso nga duta katulad sang katamnan anay nga sa diin gintuga ang nahaunang tawo nga si Adan. (Genesis 2:8; Lucas 23:43) Hunahunaa ini—wala na sing inaway, krimen ukon kasingki. Makalakat ka bisan diin sa bisan anong oras sang adlaw ukon gab-i nga wala sing kahadlok nga ikaw mahalitan. Wala na ang malauton.—Salmo 37:35-38.
5 Nagakahulugan ini nga wala na ang dibunayag nga mga politiko kag makagud nga mga negosyante nga nagapigos sa mga tawo. Indi na mabug-atan ang mga tawo sa pagbayad sing mataas nga mga buhis para sa militar nga mga hinganiban. Indi na matabo nga ang isa wala sing maayong kalan-on kag masulhay nga balay bangod indi sia makasarang sini. Wala na sing kakulang sing trabaho, implasyon kag mataas nga mga bili. Wala na ang mga palaligban nga nagapaantos sa mga pamilya karon. Ang tanan makatigayon sing makalilipay nga trabaho, kag makita nila kag maagom ang mga bunga sang ila pinangabudlayan.
6. (a) Ano ang himuon sang mga makalampuwas sa Armagedon? (b) Paano pakamaayuhon sang Dios ang hilikuton nga himuon?
6 Una sa tanan, ang mga makalampuwas sa Armagedon maninlo anay sa duta kag hawanon nila ang mga kagulub-an sining daan nga sistema. Kag nian makatigayon sila sing pribilehiyo, sa idalom sang pagtuytoy sang Ginharian, sa pagkultibar sa duta kag himuon ini nga isa ka matahom nga puluy-an. Daw ano ina ka mangin makalilipay nga hilikuton! Pakamaayuhon sang Dios ang tanan nga himuon. Iaman niya ang nagakaigo nga klima sa pagpatubo sa mga tanum kag sa pagsagud sa mga sapat, kag pat-uron niya nga maamligan ini sila gikan sa balatian kag halit.
7. (a) Anong saad sang Dios ang matuman? (b) Ano ang ginahulat sang mga Cristiano suno sa saad sang Dios?
7 Ining saad sang mahigugmaon nga Manunuga, nga ginhatag paagi sa salmista sa Biblia, matuman: “Ginahumlad mo ang imo kamut kag ginabusog ang handum sang tagsa ka butang nga buhi.” (Salmo 145:16) Huo, ang tanan sang nagakabagay nga handum sang mahinadlukon sa Dios nga mga tawo busgon sing bug-os. Indi naton mahanduraw kon daw ano ka mangin makalilipay ang kabuhi sa paraiso sa duta. Nagasugid tuhoy sa kahimusan sang Dios sa pagpakamaayo sa iya katawhan, si apostol Pedro nagsulat: “May yara bag-ong mga langit kag bag-ong duta nga aton ginahulat suno sa saad [sang Dios], kag sa sini magapuyo ang pagkamatarong.”—2 Pedro 3:13; Isaias 65:17; 66:22.
8. (a) Ngaa indi naton kinahanglan ang bag-o pisikal nga mga langit? (b) Ano ang “bag-ong mga langit”?
8 Ano ining “bag-ong mga langit”? Indi ini bag-o pisikal nga mga langit. Gintuga sang Dios nga himpit ang aton pisikal nga mga langit, kag nagahimaya ini sa iya. (Salmo 8:3; 19:1, 2) Ang “bag-ong mga langit” nagapatuhoy sa isa ka bag-ong paggahom sa ibabaw sang duta. Ang “mga langit” karon ginahuman sang hinimu sang tawo nga mga pangulohan. Magataliwan ini sa Armagedon. (2 Pedro 3:7) Ang “bag-ong mga langit” nga magabulos sa ila amo ang langitnon nga pangulohan sang Dios. Si Jesucristo ang magahari sa sini. Apang magagahom upod sa iya subong bahin sang “bag-ong mga langit” ang 144,000 sang iya matutom nga mga sumulunod.—Bugna 5:9, 10; 14:1, 3.
9. (a) Ano ang “bag-ong duta”? (b) Ano ang duta nga pagalaglagon?
9 Ano, kon amo, ang “bag-ong duta”? Indi ini isa ka bag-ong planeta. Gintuga sang Dios ang planeta nga Duta nga nagakabagay puy-an sang mga tawo, kag kabubut-on niya nga magapabilin ini tubtob san-o. (Salmo 104:5) Ang “bag-ong duta” nagapatuhoy sa isa ka bag-ong grupo ukon katilingban sang mga tawo. Ang Biblia masami nga nagagamit sing tinaga nga “duta” sa sinang paagi. Halimbawa, ini nagasiling: “Ang bug-os nga duta [kon sayoron, ang katawhan] padayon nga isa sing hambal.” (Genesis 11:1) Ang “duta” nga pagalaglagon amo ang katawhan nga nangin bahin sining malauton nga sistema sang mga butang. (2 Pedro 3:7) Ang “bag-ong duta” nga magabulos sa ila pagatapoan sang matuod nga mga alagad sang Dios nga nagpain gikan sa mga malauton sining kalibutan.—Juan 17:14; 1 Juan 2:17.
10. (a) Sin-o karon ang ginatipon, kag pasulod sa ano? (b) Suno sa mga teksto sa masunod nga mga pahina, ano ang himuon sa paraiso nga duta nga indi mahimu sang pangulohan sang tawo?
10 Sa karon gid ang mga tawo gikan sa tanan nga rasa kag pungsod nga magahuman sa “bag-ong duta” ginatipon pasulod sa Cristianong kongregasyon. Ang paghiusa kag paghidait sa tunga nila isa lamang ka diutay nga laragway sang makalilipay nga kabuhi sa paraiso nga duta sa tapos sang Armagedon. Huo, pahanabuon sang ginharian sang Dios ang wala man lang ginlauman nga himuon sang mga pangulohan sang tawo. Binagbinaga lamang ang pila sinang mga pagpakamaayo sa masunod nga mga pahina.
MAHIGUGMAON NGA PAG-ULULUTOD SANG TANAN NGA KATAWHAN
“Ang Dios wala sing ginapasulabi, kundi sa tagsa ka pungsod ang nagakahadlok sa iya kag nagahimu sing katarungan kalahamut-an sa iya.”—Binuhatan 10:34, 35.
“Yari karon! ang dakung kadam-an, nga wala sing tawo nga makaisip, gikan sa tagsa ka pungsod kag tribu kag katawhan kag hambal . . . Indi na sila paggutumon ukon pag-uhawon pa.”—Bugna 7:9, 16.
PAGHIDAIT SA ULOT SANG TAWO KAG SAPAT
“Ang lobo magapuyo kaupod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila.”—Isaias 11:6; Isaias 65:25.
WALA NA SING BALATIAN, PAGTIGULANG UKON KAMATAYON
“Sa sadtong tion ang mga mata sang mga bulag pamuklaton, kag ang mga dulunggan sang mga bungol mabuksan. Sa sadtong tion ang piang magalumpat subong sang usa, kag ang dila sang apa magaamba sa kalipay.”—Isaias 35:5, 6.
“Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”—Bugna 21:3, 4.
BANHAWON ANG MGA PATAY
“Ang takna magaabot nga ang tanan nga yara sa mga lulubngan magapamati sang iya tingog kag magaguwa.”—Juan 5:28, 29.
“Ginhatag sang dagat ang mga patay nga yara sa iya, kag ginhatag sang kamatayon kag Hades ang mga patay nga yara sa ila.”—Bugna 20:13.
11. Ano sa masami ang nagapierdi sa sahi sang paraiso nga ginahimu karon sang mga tawo?
11 Daw ano ka mas maayo ang paraiso sa idalom sang ginharian sang Dios sang sa bisan anong butang nga mahatag sining daan nga sistema! Matuod, ginhimu sang iban nga tawo karon ang duog nga ila ginapuy-an nga daw paraiso. Apang ang mga tawo nga nagapuyo sa sining mga duog mahimu nga mapintas kag makagud, kag mahimu nga nagadinumtanay pa sila. Kag, sa ulihi, nagamasakit sila, nagatigulang kag nagakapatay. Apang, sa tapos sang Armagedon, ang paraiso sa duta magalakip sing kapin pa sa matahom nga mga balay, mga katamnan kag mga parke.
12, 13. (a) Ano nga mga kahimtangan sang paghidait ang magaluntad sa tapos sang Armagedon? (b) Ano ang kinahanglanon agod pahanabuon ining mga kahimtangan?
12 Hunahunaa ini. Ang mga tawo gikan sa tanan nga rasa kag pungsod magatuon sa pagpuyo sing tingob subong isa ka pamilya sang mag-ulutod. Magahigugmaanay gid sila. Wala sing mangin dalok ukon mapintas. Wala sing isa nga magadumot sa isa bangod lamang sang iya rasa, duag, ukon sang duog nga iya ginhalinan. Wala na sing pagdampigdampig. Ang tanan sa duta mangin isa ka matuod nga abyan kag isigkatawo sang tanan. Mangin isa gid ini ka paraiso sa espirituwal nga paagi. Luyag mo bala mabuhi sa sining paraiso sa idalom sang “bag-ong mga langit”?
13 Ang mga tawo karon masami nga nagahambal tuhoy sa pagkabuhi sing tingob sa paghidait, kag nagtukod sing “Nasyones Unidas” nga organisasyon. Apang labi pa nga nabahinbahin ang mga tawo kag mga pungsod. Ano ang kinahanglan? Dapat nga magbag-o ang tagipusuon sang mga tawo. Apang imposible nga mahimu sang mga pangulohan sining kalibutan ina nga milagro. Apang, ginahimu ini sang mensahe sang Biblia tuhoy sa gugma sang Dios.
14. Ano ang nagakatabo karon sa pagpamatuod nga ining paraiso nga mga kahimtangan matuman?
14 Sa tapos maton-an ang tuhoy sa matarong nga bag-ong sistema, ang tagipusuon sang madamu napahulag sa paghigugma sa Dios. Gani sila man nagahikot sing mahigugmaon sa iban, subong sang Dios. (1 Juan 4:9-11, 20) Daku ini nga pagbaylo sa ila kabuhi. Sa amo madamu sang mapintas kag madinumtanon anay, subong sang mapintas nga sapat, ang nangin mahagop kag mahidaiton. Subong sang matinumanon nga karnero, ginatipon sila sa Cristianong panong.
15. (a) Ano ang duha ka grupo sang mga Cristiano karon? (b) Sin-o ang mangin una nga mga katapo sang “bag-ong duta”?
15 Sang nagligad nga 1,900 ka tuig ang “diutay nga panong” sang 144,000 ka Cristiano nga magagahom upod kay Cristo gintipon. Pila na lamang sa ila ang nabilin sa duta; ang kalabanan nagagahom na upod kay Cristo sa langit. (Lucas 12:32; Bugna 20:6) Apang tuhoy sa iban pa nga mga Cristiano, si Jesus nagsiling: “May iban ako nga mga karnero, nga indi sa sining toril [sang “diutay nga panong”]; sila man dapat ko dalhon, kag magapamati sila sa akon tingog, kag sila mangin isa ka panong, isa ang manugbantay.” (Juan 10:16) Ginatipon na karon ang “dakung kadam-an” sining “iban nga mga karnero.” Sila ang una nga mga katapo sang “bag-ong duta.” Amligan sila ni Jehova sa “dakung kapipit-an” sa katapusan sining sistema sang mga butang agod magpuyo sa dutan-on nga paraiso.—Bugna 7:9, 10, 13-15.
16. Anong milagro ang magahimu sang pagkabuhi upod sa mga sapat nga makalilipay?
16 Sa tapos sang Armagedon may dugang pa nga milagro sa paraiso nga kahimtangan. Ang mga sapat subong sang leon, tigre, leopardo kag oso, nga makatalagam karon, mangin mahidaiton. Daw ano katahom ang maglakat sa kagulangan upod sa leon kag ayhan upod sa daku nga oso! Indi na mahadlok ang bisan sin-o sa isa ka buhi nga tinuga.
17, 18. (a) Ano nga kabangdanan sang kasubo ang madula sa paraiso nga duta? (b) Ngaa mapat-od naton nga ang tanan makatigayon sing himpit nga panglawas?
17 Apang bisan pa daw ano katahom ang mga balay kag mga hardin, daw ano kabuot kag mahigugmaon ang mga tawo, ukon daw ano ka mainabyanon ang mga sapat, kon nagamasakit kita, nagatigulang kag nagakapatay yara gihapon ang kasubo. Apang sin-o ang makahatag sing himpit nga panglawas sa tanan? Ang pangulohan sang tawo napaslawan sa pagdula sang kanser, balatian sa tagipusuon kag sang iban pa nga balatian. Apang kon mahimu man nila, ginabaton sang mga doktor nga indi sini mapunggan ang pagtigulang. Magatigulang gihapon kita. Sa ulihi ang aton mga mata magadulom, ang aton kaunoran magaluya, ang aton panit magakurinot kag ang mga organo sa sulod sang aton lawas mapierdi. Magasunod ang kamatayon. Daw ano ka makapasubo!
18 Sa tapos sang Armagedon, ina tanan bag-uhon sang daku nga milagro sang Dios sa paraiso nga duta, kay ang Biblia nanaad: “Wala sing pumuluyo nga magasiling: ‘Nagamasakit ako.’ ” (Isaias 33:24) Sang si Jesucristo yari sa duta ginpamatod-an niya ang iya gahom sa pag-ayo sing tanan nga sahi sang balatian, nga bunga sang sala nga aton napanubli kay Adan. (Marcos 2:1-12; Mateo 15:30, 31) Wala man sing pagtigulang sa idalom sang paggahom sang Ginharian. Kundi ang tigulang mangin bataon liwat. Huo, ‘ang unod sang tawo mangin linghod pa sang sa iya pagkapamatan-on.’ (Job 33:25) Daw ano ka makakulunyag ang pagmata sa kada aga kag mabatyagan mo nga mas maayo ang imo lawas sang sa nagligad nga adlaw!
19. Ano ang katapusan nga kaaway nga laglagon, kag paano?
19 Pat-od nga wala sing bisan sin-o nga may batan-on kag himpit nga panglawas sa paraiso nga duta ang magahandum nga mapatay. Kag wala na sing mapatay! Ang ila pagbaton sing mga benepisyo sang halad nga gawad magakahulugan sa katapusan sing pag-agom sang daku nga regalo sang Dios nga “kabuhi nga walay katapusan paagi kay Cristo Jesus nga aton Ginuo.” (Roma 6:23) Subong ginasiling sang Biblia, si Cristo “kinahanglan nga maghari tubtob nga mabutang sang Dios ang iya tanan nga kaaway sa idalom sang iya mga tiil. Ang katapusan nga kaaway nga laglagon amo ang kamatayon.”—1 Corinto 15:25, 26; Isaias 25:8.
20. Sin-o, luwas sa mga tawo nga nagakabuhi karon, ang magakalipay sa paraiso nga duta, kag paano ina mahimu?
20 Bisan ang mga napatay magakalipay sa paraiso nga duta. Banhawon sila! Gani, sa sadtong tion, sa baylo sang balita kon sin-o ang napatay, amo ang makalilipay nga balita kon sin-o ang nabanhaw. Daw ano ka makalilipay nga abiabihon gikan sa lulubngan ang napatay nga amay, iloy, anak kag iban pa nga hinigugma! Wala sing punerarya, lulubngan ukon lungon nga mabilin sa pagdagta sa katahom sang paraiso nga duta.
21. (a) Sin-o ang magabulig sa pagpat-od nga ang kasugoan kag instruksion sang “bag-ong mga langit” ginatuman? (b) Paano naton mapakita nga luyag gid naton ang “bag-ong mga langit” kag “bag-ong duta”?
21 Sin-o ang magadumala sang mga hilikuton sa paraiso nga duta? Ang tanan nga kasugoan kag instruksion magagikan sa “bag-ong mga langit” sa hitaas. Apang magatangdo sing matutom nga mga lalaki sa duta agod pat-uron nga ining kasugoan kag instruksion ginatuman. Bangod ining mga lalaki nagatiglawas sa langitnon nga ginharian sa isa ka pinasahi nga paagi, ang Biblia nagatawag sa ila nga “mga prinsipe.” (Isaias 32:1, 2; Salmo 45:16) Bisan sa Cristianong kongregasyon karon may yara mga lalaki nga gintangdo sang balaan nga espiritu sang Dios sa pag-atipan kag sa pagdumala sa mga hilikuton sini. (Binuhatan 20:28) Sa tapos sang Armagedon makasalig kita nga pat-uron ni Cristo nga matangdo ang nagakabagay nga mga lalaki agod magtiglawas sa Ginharian nga pangulohan, kay sa sadtong tion talangkod nga magapahilabot sia sa mga matabo sa duta. Paano mo mapakita nga ginakalangkagan mo ang “bag-ong mga langit” kag “bag-ong duta” sang Dios? Paagi sa paghimu sing tanan nga masarangan mo agod matuman ang mga kinahanglanon sa pagkabuhi sa matarong nga bag-ong sistema.—2 Pedro 3:14.
[Mga Pamangkot sa Pagtinuon]
