Si Jesucristo—Ginpadala sang Dios?
Kapitulo 6
Si Jesucristo—Ginpadala sang Dios?
1, 2. (a) Ano ang pamatuod nga si Jesucristo isa ka matuod nga persona? (b) Anong mga pamangkot ang ginapautwas tuhoy kay Jesus?
HALOS tanan karon nakabati na tuhoy kay Jesucristo. Ang iya impluensia sa maragtas mas daku sang sa kay bisan sin-o nga tawo. Sa pagkamatuod, ang kalendaryo nga ginagamit sa kalabanan nga bahin sang kalibutan ginpasad sa tuig sang iya pagkatawo! Ang The World Book Encyclopedia nagsiling: “Ang mga petsa antes sadto nga tuig ginlista nga B.C., ukon sa wala pa si Cristo. Ang mga petsa sa tapos sadto nga tuig ginlista nga A.D., ukon anno Domini (tuig sang aton Ginuo).”
2 Gani si Jesus indi isa ka handurawan lamang. Nagkabuhi sia sa duta subong tawo. “Sang dumaan nga panahon bisan gani ang mga kasumpong sang Cristianismo wala magduhaduha sa [aktual nga pagluntad] ni Jesus,” siling sang Encyclopædia Britannica. Gani sin-o gid si Jesus? Ginpadala gid bala sia sang Dios? Ngaa kilala gid sia?
NAGKABUHI NA SIA SANG UNA
3. (a) Suno sa mga pulong sang anghel, kay sin-o anak ang ibun-ag ni Maria? (b) Paano ang ulay nga si Maria nagmabdos kay Jesus?
3 Indi subong sang bisan sin-o nga tawo, natawo si Jesus sa isa ka ulay. Si Maria ang iya ngalan. Ang anghel nagsiling tuhoy sa iya anak: “Mangin daku sia kag tawgon nga Anak sang Labing Mataas.” (Lucas 1:28-33; Mateo 1:20-25) Apang paano manganak ang isa ka babayi nga wala matandog sang lalaki? Paagi yadto sa balaan nga espiritu sang Dios. Ginsaylo ni Jehova ang kabuhi sang iya gamhanan espiritu nga Anbk gikan sa langit pakadto sa taguangkan sang ulay nga si Maria. Milagro yadto! Ang Isa nga nagtuga sa unang babayi nga may makatilingala nga ikasarang sa pagpanganak makapaanak sa isa ka babayi bisan wala sing tawhanon nga amay. Ang Biblia nagapaathag: “Pag-abot sang kabug-osan sang tion, ginpadala sang Dios ang iya Anak, nga natawo sa babayi.”—Galacia 4:4.
4. (a) Ano ang kabuhi ni Jesus antes sia matawo subong lapsag? (b) Ano ang ginsiling ni Jesus agod ipakita nga nagkabuhi sia sa langit sadto?
4 Gani antes natawo si Jesus sa duta didto sia sa langit subong isa ka gamhanan espiritu nga persona. May espiritu sia nga lawas nga indi makita sang tawo, subong sang Dios. (Juan 4:24) Masami nga ginsambit ni Jesus ang iya mataas nga palangakoan didto anay sa langit. Nangamuyo sia kis-a: “Amay, himayaa ako kaupod nimo sang himaya nga naagom ko sadto anay kaupod nimo sa wala pa ang kalibutan.” (Juan 17:5) Nagsiling man sia sa iya mga manugpalamati: “Kamo gikan sa idalom; ako gikan sa ibabaw.” “Ano bala kon makita ninyo ang Anak sang tawo nga nagakayab sa diin sia sadto anay?” “Sa wala pa matawo si Abraham, amo na ako.”—Juan 8:23; 6:62; 8:58; 3:13; 6:51.
5. (a) Ngaa gintawag si Jesus nga “Pulong,” “Panganay” kag “bugtong”? (b) Ano nga hilikuton ang gin-ambitan ni Jesus upod sa Dios?
5 Sa wala pa magkari sa duta gintawag si Jesus nga Pulong sang Dios. Nagapakita ini nga sia anay humalambal sang Dios sa langit. Gintawag man sia nga “Panganay” sang Dios, subong man ang iya “bugtong” nga Anak. (Juan 1:14; 3:16; Hebreo 1:6) Nagakahulugan ini nga gintuga sia sa wala pa ang tanan espiritu nga anak sang Dios, kag sia lamang ang talangkod nga gintuga sang Dios. Ang Biblia nagasiling nga ining “panganay” nga Anak nag-ambit kay Jehova sa pagtuga sang tanan iban pa nga butang. (Colosas 1:15, 16) Sa amo sang magsiling ang Dios, “Himuon ta ang tawo sa dagway naton,” kahambal niya ining Anak. Huo, ang isa nga nagkari sang ulihi sa duta kag natawo sa babayi nag-ambit sa pagtuga sing tanan nga butang! Nagkabuhi na sia sa langit upod sa iya Amay sa sulod sang indi maisip nga tinuig!—Genesis 1:26; Hulubaton 8:22, 30; Juan 1:3.
ANG IYA KABUHI SA DUTA
6. (a) Ano ang mga natabo antes kag pagkatapos sang pagkatawo ni Jesus? (b) Sa diin natawo si Jesus kag sa diin sia nagdaku?
6 Kalaslon na sadto si Maria kay Jose. Apang sang mahibal-an niya nga nagamabdos sia nagdumdom si Jose nga natandog sia sang iban nga lalaki, kag busa indi na magdayon sa iya. Apang, sang ginsugiran sia ni Jehova nga ang bata ginpanamkon paagi sa Iya balaan nga espiritu, ginpakaslan ni Jose si Maria. (Mateo 1:18-20, 24, 25) Sang ulihi, samtang nagaduaw sila sa siudad sang Betlehem, natawo si Jesus. (Lucas 2:1-7; Miqueas 5:2) Sang lapsag pa si Jesus, gintinguhaan ni Hari Herodes nga patyon sia. Apang ginpaandaman ni Jehova si Jose amo kon ngaa ginpalagyo niya ang iya pamilya padulong sa Egipto. Sang mapatay si Hari Herodes, si Jose kag si Maria nagbalik kaupod ni Jesus sa siudad sang Nasaret sa Galilea. Diri sia nagdaku.—Mateo 2:13-15, 19-23.
7. (a) Ano ang natabo sang si Jesus 12 anyos? (b) Ano nga trabaho ang naton-an ni Jesus samtang nagadaku sia?
7 Sang 12 anyos si Jesus naglakbay sia kaupod sang iya pamilya pa Jerusalem agod magtambong sa pinasahi nga pagsaulog sing Paskua. Samtang didto tatlo ka adlaw nga namati sia sa templo sa mga manunudlo kag nagapamangkot sa ila. Ang tanan nga tawo nga namati sa iya nakibot sa iya nahibal-an. (Lucas 2:41-52) Samtang nagadaku si Jesus sa Nasaret, nagtuon sia sing pamanday. Wala duhaduha nga ginhanas sia sa sini sang iya tiyo, nga si Jose, nga isa man ka panday.—Marcos 6:3; Mateo 13:55.
8. Ano ang natabo sang 30 anyos si Jesus?
8 Sa edad nga 30 anyos natabo ang daku nga pagbalhin sa kabuhi ni Jesus. Nagkadto sia kay Juan Bautista kag nagpabawtismo, agod bug-os nga itum-oy sa tubig sang Suba sang Jordan. Ang Biblia nagasiling: “Sang mabawtismohan na si Jesus, sa gilayon nagtakas sia sa tubig; kag, yari karon! nabuksan ang mga langit kag iya nakita ang espiritu sang Dios nga nagapanaug subong sang salampati nga nagakunsad sa ibabaw niya. Kag yari karon! May tingog gikan sa langit nga nagasiling: ‘Ini ang akon Anak, ang hinigugma, nga akon nahamut-an.’ ” (Mateo 3:16, 17) Napat-od diri ni Juan nga si Jesus ginpadala sang Dios.
9. (a) San-o, sa kamatuoran, nangin Cristo si Jesus, kag ngaa sadto? (b) Paagi sa iya pagpabawtismo, sa ano ginpresentar ni Jesus ang iya kaugalingon?
9 Sa pagbubo sang Iya balaan nga espiritu kay Jesus, ginhaplas sia ukon gintangdo ni Jehova nga mangin hari sa Iya nagapakari nga ginharian. Bangod hinaplas sang espiritu, si Jesus nangin “Mesias,” ukon “Cristo,” nga sa Hebreo kag Griegong pamulong nagakahulugan “Hinaplas.” Busa, sia nangin Jesucristo, ukon Jesus nga Hinaplas. Gani si apostol Pedro naghambal tuhoy kay “Jesus nga Nasaretnon, kon paano sia ginhaplas sang Dios sing balaan nga espiritu kag gahom.” (Binuhatan 10:38) Paagi sa pagpabawtismo sa tubig ginpresentar man ni Jesus ang iya kaugalingon sa Dios sa pagtuman sang hilikuton nga ginpahimu sa iya sang Dios sa duta. Ano yadtong importante nga hilikuton?
KON NGAA NAGKARI SIA SA DUTA
10. Anong mga kamatuoran ang ginkari ni Jesus sa duta agod itudlo?
10 Sang nagapaathag kon ngaa nagkari sia sa Duta, nagsiling si Jesus sa Romanong gobernador nga si Poncio Pilato: “Tungod sini natawo ako, kag sa sining [katuyoan] nagkari ako sa kalibutan, agod magpanaksi sa kamatuoran.” (Juan 18:37) Apang anong mga kamatuoran ang itudlo ni Jesus? Una, ang mga kamatuoran tuhoy sa iya langitnon nga Amay. Gintudloan niya ang iya mga sumulunod sa pagpangamuyo nga “simbahon” ukon pakabalaanon ang ngalan sang iya Amay. (Mateo 6:9, King James Version) Kag nangamuyo sia: “Ginpahayag ko ang imo ngalan sa mga tawo nga ginhatag mo sa akon.” (Juan 17:6) Nagsiling man sia: “Dapat ko iwali ang maayong balita sang ginharian sang Dios, bangod ginpadala ako para sa sini.”—Lucas 4:43.
11. (a) Ngaa ginkabig ni Jesus ang iya hilikuton nga tuman ka importante? (b) Sa ano si Jesus wala gid magpugong sa paghimu? Gani ano ang dapat naton himuon?
11 Daw ano ka importante kay Jesus ang pagpakilala sa ngalan kag ginharian sang iya Amay? Nagsiling sia sa iya mga disipulo: “Ang akon kalan-on amo ang paghimu sang kabubut-on sang nagpadala sa akon kag tapuson ang iya buluhaton.” (Juan 4:34) Ngaa ginkabig ni Jesus ang hilikuton sang Dios nga subong ka importante sa kalan-on? Bangod ang Ginharian ang gamiton sang Dios sa pagtuman sang iya dalayawon nga mga katuyoan para sa tawo. Amo ini ang magalaglag sa tanan nga kalautan kag magadula sang tanan nga pakahuya sa ngalan sang Dios. (Daniel 2:44; Bugna 21:3, 4) Gani wala magpugong si Jesus sa pagpakilala sang ngalan kag ginharian sang Dios. (Mateo 4:17; Lucas 8:1; Juan 17:26; Hebreo 2:12) Ginhambal niya ang kamatuoran, batunon man ukon indi. Sa amo naghatag sia sing huwaran nga dapat naton sundon agod mapahamut-an ang Dios.—1 Pedro 2:21.
12. Ano pa ang importante nga rason nga nagkari si Jesus sa duta?
12 Apang agod makatigayon kita sing kabuhi nga walay katapusan sa idalom sang ginharian sang Dios, ginbubo ni Jesus ang iya dugo sa kamatayon. Ang duha ka apostoles ni Jesus nagsiling: “Ginpakamatarong kita karon paagi sa iya dugo.” “Ang dugo ni Jesus nga Anak [sang Dios] nagatinlo sa aton sa tanan nga sala.” (Roma 5:9; 1 Juan 1:7) Gani ang importante nga rason kon ngaa nagkari si Jesus sa duta amo agod mapatay para sa aton. Sia nagsiling: “Ang Anak sang tawo wala magkari nga alagdon kundi sa pag-alagad kag sa paghatag sang iya kalag [ukon, kabuhi] nga gawad sang madamu.” (Mateo 20:28) Ano ang buot silingon sang paghatag ni Cristo sang iya kabuhi nga “gawad”? Ngaa kinahanglanon ang pagbubo sang iya dugo sa kamatayon para sa aton kaluwasan?
GINHATAG NIYA ANG IYA KABUHI SUBONG GAWAD
13. (a) Ano ang gawad? (b) Ano ang bili sang gawad nga ginbayad ni Jesus agod hilwayon kita gikan sa sala kag kamatayon?
13 Ang tinaga nga “gawad” masami nga ginagamit kon may nakidnap. Sa tapos sang pagkidnap, mahimu magasiling ang kidnaper nga iuli niya ang iya biktima kon bayaran sia sing kantidad subong gawad. Ang gawad kon amo isa ka butang nga nagahilway sa isa ka tawo nga nabihag. Butang ini nga ginabayad agod indi sia mapatay. Ang himpit tawhanon nga kabuhi ni Jesus ginhatag agod mahilway ang tawo gikan sa pagkaulipon sa sala kag kamatayon. (1 Pedro 1:18, 19; Efeso 1:7) Ngaa kinahanglan ining paghilway?
14. Ngaa kinahanglanon ang gawad nga ginhatag ni Jesus?
14 Bangod si Adan, nga katigulangan naton tanan, nagrebelde sa Dios. Ang iya paglapas naghimu sa iya nga makasasala, kay ang Biblia nagasiling nga ang “sala amo ang pagkamalinapason.” (1 Juan 3:4; 5:17) Gani, indi sia takus sa pagbaton sing dulot sang Dios nga kabuhi nga walay katapusan. (Roma 6:23) Sa amo nadula ni Adan ang himpit tawhanon nga kabuhi sa paraiso nga duta. Nadula man niya ining dalayawon nga paglaum para sa iya mangin mga anak. ‘Apang ngaa,’ mamangkot ka, ‘nagakapatay ang tanan niya nga mga anak, samtang si Adan ang nakasala?’
15. Sanglit si Adan ang nakasala, ngaa nagaantos kag nagakapatay ang iya mga anak?
15 Bangod si Adan, sang makasala sia, nagpaliton sing sala kag kamatayon sa iya mga anak, lakip ang tanan nga tawo karon. (Job 14:4; Roma 5:12) “Ang tanan nagpakasala kag nawad-an sang himaya sang Dios,” siling sang Biblia. (Roma 3:23; 1 Hari 8:46) Bisan ang diosnon nga si David nagsiling: “Sa kalautan natawo ako, kag sa sala ginpanamkon ako sang akon iloy.” (Salmo 51:5) Busa, nagakapatay ang tawo bangod sang sala nga napanubli kay Adan. Paano, nian, ang kabuhi nga halad ni Jesus makahilway sa tanan nga tawo gikan sa pagkaulipon sa sala kag kamatayon?
16. (a) Sa pag-aman sing gawad, paano ang Dios nagpakita sing pagtahod sa iya kasugoan nga ‘kabuhi ang ibayad sa kabuhi’? (b) Ngaa si Jesus lamang ang tawo nga makabayad sing gawad?
16 Nadalahig ang isa ka legal nga prinsipio sa kasugoan sang Dios para sa pungsod sang Israel. Ini nagasiling nga ‘kabuhi ang ibayad sa kabuhi.’ (Exodo 21:23; Deuteronomio 19:21) Bangod sang paglalis nadula ni Adan ang himpit nga kabuhi sa paraiso nga duta para sa iya kag sa tanan niya nga mga anak. Ginhatag ni Jesucristo ang iya himpit nga kabuhi agod gawaron ang nadula ni Adan. Huo, si Jesus “naghatag sang iya kaugalingon subong tumbas nga gawad para sa tanan.” (1 Timoteo 2:5, 6) Bangod himpit sia nga tawo, subong amo anay si Adan, gintawag si Jesus “ang katapusan nga Adan.” (1 Corinto 15:45) Wala sing iban nga tawo luwas kay Jesus ang makagawad. Bangod si Jesus lamang ang tawo nga nabuhi nga tupong kay Adan subong isa ka himpit tawhanon nga anak sang Dios.—Salmo 49:7; Lucas 1:32; 3:38.
17. San-o ginbayad sa Dios ang gawad?
17 Napatay si Jesus sa edad nga 331⁄2 anyos. Apang sang ikatlo nga adlaw sang iya pagkapatay ginbanhaw sia. Kap-atan ka adlaw sang ulihi nagbalik sia sa langit. (Binuhatan 1:3, 9-11) Didto, subong isa ka espiritu nga persona liwat, sia “nagpahayag sa atubangan sang Dios tungod sa aton,” nga dala ang bili sang iya halad nga gawad. (Hebreo 9:12, 24) Sadto ginbayad ang gawad sa Dios sa langit. Mahilway na karon ang tawo. Apang san-o maagom ang mga benepisyo sini?
18. (a) Paano kita makabenepisyo bisan karon gikan sa gawad? (b) Ano ang pahanabuon sang gawad sa palaabuton?
18 Makabenepisyo na kita bisan karon gikan sa halad nga gawad ni Jesus. Paano? Paagi sa pagtuo sa sini makatigayon kita sing matinlo nga tindog sa Dios kag mangin sa idalom sang iya mahigugmaon kag malolo nga pag-atipan. (Bugna 7:9, 10, 13-15) Ayhan madamu sa aton ang nakahimu sing mabug-at nga mga sala antes naton makilala ang Dios. Kag bisan karon nagapakasala kita, kon kaisa mabug-at nga mga sala. Apang makapangayo kita sing kapatawaran sa Dios pasad sa gawad, nga nagasalig nga pamatian niya kita. (1 Juan 2:1, 2; 1 Corinto 6:9-11) Sa palaabuton, buksan sang gawad ang dalan agod mabaton naton ang dulot sang Dios nga kabuhi nga walay katapusan sa iya matarong nga bag-ong kahimusan. (2 Pedro 3:13) Sa amo nga tion ang tanan nga nagatuo sa gawad mahilway sing bug-os gikan sa pagkaulipon sa sala kag kamatayon. Makapaabot sila sa pagkabuhi sing dayon sa kahimpitan!
19. (a) Ano ang epekto sa imo sang gawad nga aman? (b) Paano siling ni apostol Pablo dapat naton ipakita ang aton pagpasalamat tungod sa gawad?
19 Ano ang ginabatyag ninyo karon nga nahangpan na ninyo ang gawad? Indi bala naglapit ang inyo tagipusuon kay Jehova nga Dios sa pagkahibalo nga sia nagaulikid sa inyo sa bagay nga ginhatag niya ang iya hinigugma nga Anak para sa inyo? (Juan 3:16; 1 Juan 4:9, 10) Apang hunahunaa man ang gugma ni Cristo. Kinabubut-on nga nagkari sia sa duta agod mapatay tungod sa aton. Indi bala dapat kita magpasalamat? Si apostol Pablo nagpaathag kon paano kita magpasalamat sang sia nagsiling: “Napatay sia tungod sa tanan agod nga ang mga nagakabuhi indi na magkabuhi para sa ila kaugalingon, kundi para sa iya nga napatay tungod sa ila kag nabanhaw.” (2 Corinto 5:14, 15) Ipakita bala ninyo ang inyo pagpasalamat paagi sa paggamit sang inyo kabuhi sa pag-alagad sa Dios kag sa iya langitnon nga Anak nga si Jesucristo?
KON NGAA NAGHIMU SI JESUS SING MGA MILAGRO
20. Ano ang maton-an naton tuhoy kay Jesus sang gin-ayo niya ang aruon?
20 Kilala si Jesus sa mga milagro nga iya nahimu. Naluoy sia sa mga tawo nga ginabudlayan, kag nalangkag sia nga gamiton ang hinatag sa iya sang Dios nga gahom sa pagbulig sa ila. Halimbawa, ang isa ka aruon nga tawo nagpalapit sa iya kag nagsiling: “Kon buot mo, mapaayo mo ako.” Si Jesus “naluoy, kag gin-untay niya ang iya kamut kag gintandog sia kag nagsiling sa iya: ‘Buot ako. Mag-ayo ka.’ ” Kag nag-ayo ang aruon!—Marcos 1:40-42.
21. Paano ginbuligan ni Jesus ang kadam-an?
21 Binagbinaga ang isa pa ka danyag sa Biblia, kag handurawa ang kaluoy ni Jesus para sa katawhan nga ginlaragway: “Nagpalapit sa iya ang dakung kadam-an, nga nagadala sang mga piang, mga bulag, mga apa, mga pingkaw, kag madamung iban pa, kag ginpahamtang nila sila sa iya tiilan, kag gin-ayo niya sila; sa bagay nga natingala ang kadam-an, sang nakita nila nga naghambal ang mga apa, nag-ayo ang mga pingkaw, naglakat ang mga piang, kag nakakita ang mga bulag, kag ginhimaya nila ang Dios sang Israel.”—Mateo 15:30, 31.
22. Ano ang nagapakita nga si Jesus nagaulikid gid sa mga tawo nga iya ginbuligan?
22 Nga si Jesus nagaulikid gid sa sining nagaantos nga mga tawo kag luyag gid magbulig sa ila makita sa iya masunod nga ginsiling sa iya mga disipulo. Sia nagsiling: “Naluoy ako sa kadam-an, kay tatlo na ka adlaw nga sila kaupod nakon kag walay bisan ano nga kaunon; kag indi ako luyag nga magpauli sila nga gutom. Basi magkalalipong sila sa dalanon.” Gani, paagi sa pito ka bilog nga tinapay kag pila ka isda, milagruso nga ginpakaon ni Jesus ang “apat ka libo ka mga lalaki, luwas sa mga babayi kag mga kabataan.”—Mateo 15:32-38.
23. Ano ang nagpahulag kay Jesus nga banhawon ang napatay nga anak nga lalaki sang isa ka balo nga babayi?
23 Sa isa pa ka okasyon nasugata ni Jesus ang isa ka lubong nga manugguwa sa siudad sang Nain. Ginalaragway ini sang Biblia: “May patay nga ginadala paguwa, ang bugtong nga lalaking anak sang iya iloy. Luwas pa balo ang iloy. . . . Kag sang nakita sia sang Ginuo, naluoy sia sa iya.” Ginbatyag gid ni Jesus ang kasubo sang balo. Gani nagsiling sia sa bangkay: “Pamatan-on, nagasiling ako sa imo, Bangon ka!” Kag makatilingala gid! “Ang patay nagbangon kag nagsugod sa paghambal, kag ginhatag sia ni Jesus sa iya iloy.” Hunahunaa kon ano ang ginbatyag sadtong iloy! Ano ang batyagon ninyo? Ang balita tuhoy sa sining talalupangdon nga hitabo naglapnag. Indi katingalahan nga si Jesus kilala gid.—Lucas 7:11-17.
24. Ano ang ginpakita sang mga milagro ni Jesus tuhoy sa palaabuton?
24 Apang temporaryo lamang ang kaayohan sang mga milagro nga ginhimu ni Jesus. Ang mga tawo nga iya gin-ayo nagmasakit liwat. Kag ang iya mga ginbanhaw napatay liwat. Apang ang mga milagro ni Jesus nagpamatuod nga sia gikan sa Dios, nga sia Anak gid sang Dios. Kag nagapamatuod ini nga, paagi sa gahom sang Dios, ang tanan nga palaligban sang tawo malubad. Huo, ginpakita sini sa diutay nga kasangkaron ang mahanabo sa duta sa idalom sang ginharian sang Dios. Sa amo nga tion ang ginagutom pakan-on, ang nagabalatian ayuhon, kag ang patay banhawon! Kag indi na sa liwat ang balatian, kamatayon ukon bisan ano nga palaligban magtuga sing kasubo. Daw ano ina nga pagpakamaayo!—Bugna 21:3, 4; Mateo 11:4, 5.
MANUGGAHOM SA GINHARIAN SANG DIOS
25. Ano ang tatlo ka bahin sang kabuhi ni Jesus?
25 May tatlo ka bahin ang kabuhi sang Anak sang Dios. Una, amo ang indi mahibal-an nga kadamuon sang tinuig nga ginhinguyang niya upod sa Amay sa langit antes sia mangin tawo. Masunod, ang 331⁄2 ka tuig nga ginhinguyang niya sa duta pagkatawo niya. Kag karon amo ang kabuhi niya sa langit subong espiritu nga persona. Ano ang iya palangakoan sa langit sugod sang iya pagkabanhaw?
26. Paagi sa iya katutom sa duta, ginpamatod-an ni Jesus nga takus sia sa ano?
26 Maathag nga si Jesus mangin hari. Bisan ang anghel nagsiling kay Maria: “Magahari sia . . . sing dayon, kag ang iya ginharian walay katapusan.” (Lucas 1:33) Sa tion sang iya ministeryo sa duta pirme niya ginasambit ang ginharian sang Dios. Gintudloan niya ang iya mga sumulunod nga mangamuyo: “Magkari ang imo ginharian. Paghimuon ang imo kabubut-on, subong sang sa langit, amo man sa duta.” Kag ginpalig-on niya sila nga “padayon nga pangitaon anay ang ginharian.” (Mateo 6:10, 33) Paagi sa iya katutom sa duta, ginpamatod-an ni Jesus nga sia takus maghari sa ginharian sang Dios. Naghari bala sia dayon sang pagbalik niya sa langit?
27. (a) Ano ang ginhimu ni Jesus sang pagbalik niya sa langit? (b) Ano ang una nga ginhimu ni Jesus subong hari sa ginharian sang Dios?
27 Wala pa. Ginbalikwat ni apostol Pablo ang Salmo 110:1, nga nagapaathag: “Ining tawo [si Jesus] naghalad sing isa ka halad tungod sa mga sala sing dayon kag naglingkod sia sa tuo sang Dios, nian sa paghulat tubtob nga ang iya mga kaaway mahimu nga tulungtungan sang iya mga tiil.” (Hebreo 10:12, 13) Naghulat si Jesus sa sugo ni Jehova: “Maggahom ka sa imo mga kaaway.” (Salmo 110:2) Sang mag-abot yadto nga tion, ginpalayas niya sa langit si Satanas kag ang iya mga anghel. Ang resulta sadto nga inaway sa langit ginhambal sa sining mga pulong: “Karon nag-abot ang kaluwasan kag ang gahom kag ang ginharian sang aton Dios kag ang paggahom sang iya Cristo, kay ginhulog ang manunumbong sang aton mga kautoran nga nagasumbong sa ila sa atubangan sang aton Dios sa adlaw kag gab-i!” (Bugna 12:10) Subong sang nakita naton sa nauna nga kapitulo sining libro, ang mga kamatuoran nagapakita nga ining inaway sa langit natabo na, kag nagagahom karon si Jesucristo sa tunga sang iya mga kaaway.
28. (a) Ano ang himuon ni Cristo sa indi madugay? (b) Ano ang dapat naton himuon agod maamligan niya?
28 Sa indi madugay si Cristo kag ang iya langitnon nga mga anghel magahulag agod laglagon sa duta ang tanan kalibutanon nga pangulohan karon. (Daniel 2:44; Bugna 17:14) Ang Biblia nagasiling nga sia may “malaba nga espada nga matalom, nga ilabo niya sa mga pungsod, kag gahoman niya sila sa bilugon nga salsalon.” (Bugna 19:11-16) Agod takus amligan sa sining nagapakari nga kalaglagan, dapat kita magtuo kay Jesucristo. (Juan 3:36) Dapat kita mangin mga disipulo niya kag magpasakop sa iya subong aton langitnon nga Hari. Himuon mo bala ina?
[Mga Pamangkot sa Pagtinuon]
[Piktyur sa pahina 58]
Ginbiyaan ni Jesus ang iya pagpamanday agod mabawtismohan kag mangin hinaplas ni Jehova
[Piktyur sa pahina 63]
Si Jesus ang katumbas sang himpit nga tawo nga si Adan
[Mga piktyur sa pahina 64]
Ginpahulag si Jesus sang kaluoy nga buligan ang mga may balatian kag ginagutom
[Piktyur sa pahina 67]
Paagi sa pagbanhaw sa patay, ginpakita ni Jesus kon ano ang iya himuon sa dakung kasangkaron kon maggahom ang ginharian sang Dios
