Sin-o ang Makadto sa Langit, kag Ngaa?
Kapitulo 14
Sin-o ang Makadto sa Langit, kag Ngaa?
1. Paano ginasabat sang madamu ang pamangkot nga, Sin-o ang makadto sa langit, kag ngaa?
MADAMU ang nagasiling, ‘Ang tanan nga maayong tawo magakadto sa langit.’ Apang, kon pamangkuton kon ngaa, mahimu masiling sila: ‘Agod makaupod sang Dios,’ ukon, ‘Padya ini sa ila pagkaayo.’ Ano ang ginatudlo sang Biblia sa sini?
2, 3. (a) Ngaa makapat-od kita nga ang iban nga tawo magakadto sa langit? (b) Anong pamangkot ang dapat sabton?
2 Maathag nga ginasiling sang Biblia nga si Jesus ginbanhaw kag nagsaka sia sa langit. Nagasiling man ini nga ang iban pa nga mga tawo dalhon didto. Sang gab-i antes sia mapatay, si Jesus nagsiling sa iya matutom nga apostoles: “Sa balay sang akon Amay may madamung hulot. Kon wala, ginsugiran ko kamo kuntani, bangod magakadto ako didto sa pag-aman sa inyo sing duog. Kag kon ako magakadto kag magaaman sing duog para sa inyo, magabalik ako kag batunon ko kamo sa akon kaugalingon, agod nga kon diin ako didto man kamo.”—Juan 14:1-3.
3 Maathag nga ginasiling ni Jesus sa iya mga apostoles nga dalhon sila sa langit agod makaupod niya. Si apostol Pablo masami nga nagsugid sa unang mga Cristiano tuhoy sinang makatilingala nga paglaum. Halimbawa, sia nagsulat: “Ang aton pagkabanwahanon yadto sa langit, kag gikan sini ginahulat naton ang Manluluwas, si Ginuong Jesucristo.” (Filipos 3:20, 21; Roma 6:5; 2 Corinto 5:1, 2) Pasad sa sina nga mga saad, minilyon ka tawo ang nagalaum nga mabuhi sa langit. Apang makadto bala sa langit ang tanan nga maayong tawo?
NAGAKADTO BALA SA LANGIT ANG TANAN MAAYONG TAWO?
4, 5. Ano ang pamatuod nga sanday David kag Job wala magkadto sa langit?
4 Wala madugay sa tapos mabanhaw si Jesus, si apostol Pedro nagsiling sa kadam-an sang mga Judiyo: “Ang patriarka nga si David . . . napatay kag ginlubong kag ang iya lulubngan yari sa aton tubtob karon nga adlaw. Si David wala magkayab sa mga langit.” (Binuhatan 2:29, 34) Gani ang maayong tawo nga si David wala magkadto sa langit. Kamusta naman ang matarong nga si Job?
5 Samtang nagaantos, si Job nangamuyo sa Dios: “O kabay pa kuntani nga taguon mo ako sa Sheol [lulubngan] kag taguon mo ako tubtob nga mag-ugdaw ang imo kaakig, agod nga magtalana ka sa akon sing tion kag dumdumon mo ako!” Nagpaabot si Job nga kon mapatay sia madula ang iya pangalibotan sa lulubngan. Nahibaloan niya nga indi sia magkadto sa langit. Apang may paglaum sia, subong iya ginpaathag: “Kon ang tawo mapatay, mabuhi pa bala sia? Sa tanan nga adlaw sang akon pilit nga pag-alagad [gintalana nga tion sa lulubngan] magahulat ako, tubtob nga mabuhian ako. Magapanawag ka kag ako magasabat sa imo.”—Job 14:13-15.
6, 7. (a) Ano ang nagapakita nga wala sing isa nga napatay sa wala pa si Cristo ang nagkadto sa langit? (b) Ano ang matabo sa tanan nga matutom nga napatay sa wala pa si Cristo?
6 Si Juan, nga nagbawtismo kay Jesus, isa man ka maayong tawo. Apang si Jesus nagsiling: “Ang labing diutay sa ginharian sang langit daku pa sa iya.” (Mateo 11:11) Amo sini bangod si Juan Bautista indi magakadto sa langit. Sang yari si Jesus sa duta, nga kapin na sa 4,000 ka tuig sa tapos sang pagrebelde nanday Adan kag Eva, sia nagsiling: “Wala sing tawo nga nakasaka sa langit kundi ang nanaug gikan sa langit, ang Anak sang tawo.”—Juan 3:13.
7 Busa, suno sa ginsiling ni Jesus, wala sing tawo nga nakakadto sa langit sa sulod sadtong 4,000 ka tuig sang maragtas sang tawo tubtob sa iya adlaw. Sanday David, Job kag Juan Bautista banhawon sa duta. Sa kamatuoran, ang tanan nga matutom nga lalaki kag babayi nga napatay antes mapatay si Jesus may paglaum nga mabuhi liwat sa duta, indi sa langit. Banhawon sila agod mangin dutan-on nga mga sakop sang ginharian sang Dios.—Salmo 72:7, 8; Binuhatan 17:31.
KON NGAA MAKADTO SA LANGIT ANG IBAN NGA MGA MATUTOM
8. Importante ang mga sabat sa anong mga pamangkot, kag ngaa?
8 Ngaa nagkadto si Jesus sa langit? Anong hilikuton ang himuon niya didto? Importante ang mga sabat sa sining mga pamangkot. Amo sini bangod ang mga magakadto sa langit magapakigbahin kay Jesus sa iya hilikuton. Magakadto sila sa langit para sa sina gid nga katuyoan.
9, 10. Suno kay Daniel, sin-o pa luwas kay Cristo ang magagahom sa pangulohan sang Dios?
9 Naton-an naton sa nauna nga mga kapitulo nga si Jesus magagahom sa paraiso nga bag-ong duta subong hari sang langitnon nga pangulohan sang Dios. Madugay pa antes si Jesus nanaug sa duta, ang tolon-an nga Daniel sang Biblia nagtagna nga ang “anak sang tawo” “hatagan sing paggahom.” Ang “Anak sang tawo” amo si Jesucristo. (Marcos 14:41, 62) Kag si Daniel nagpadayon: “Ang iya paggahom dayon nga paggahom nga indi magtaliwan, kag ang iya ginharian indi malaglag.”—Daniel 7:13, 14.
10 Apang, importante nga talupangdon diri sa tolon-an ni Daniel nga ang “anak sang tawo” indi magagahom sing isahanon. Ang Biblia nagasiling: “Kag ang ginharian kag ang paggahom . . . ginhatag sa katawhan nga amo ang mga balaan sang Isa nga Supremo. Ang ila ginharian dayon nga ginharian.” (Daniel 7:27) Ang mga pulong nga “katawhan” kag “ila ginharian” nagapahibalo sa aton nga may yara iban nga magagahom upod kay Cristo sa pangulohan sang Dios.
11. Ano ang nagapakita nga ang unang mga sumulunod ni Cristo magagahom kaupod niya?
11 Sang katapusan nga gab-i ni Jesus upod sa iya matutom nga 11 ka apostoles ginpakita niya sa ila nga sila magagahom upod sa iya sa ginharian sang Dios. Sia nagsiling sa ila: “Kamo ang nag-unong sa akon sa mga pagtilaw sa akon; gani nagapakigkatipan ako sa inyo, subong nga ang akon Amay nagpakigkatipan sa akon, para sa isa ka ginharian.” (Lucas 22:28, 29) Sang ulihi, si apostol Pablo kag si Timoteo ginlakip sa sining katipan, ukon kasugtanan, para sa isa ka ginharian. Bangod sina ginsulatan ni Pablo si Timoteo: “Kon magbatas kita, kita man dungan nga magagahom subong mga hari.” (2 Timoteo 2:12) Nagsulat man si apostol Juan tuhoy sa ila nga “magagahom subong mga hari sa ibabaw sang duta” upod kay Jesucristo.—Bugna 5:9, 10; 20:6.
12. Anong kamatuoran tuhoy sa “binhi” ni Abraham ang nagapahayag nga si Cristo may yara kaupod nga mga manuggahom?
12 Gani ang mga magakadto sa langit magakadto didto agod mag-alagad subong kaupod nga mga manuggahom ni Cristo sa langitnon nga pangulohan sang Dios. Samtang si Jesus amo ang pangunang “binhi” sang saad, nagapili ang Dios sing iban pa gikan sa katawhan agod maggahom upod kay Jesus sa ginharian. Sa amo sila mangin bahin sang “binhi,” kay ang Biblia nagasiling: “Kon kamo iya ni Cristo, nian binhi gid kamo ni Abraham, mga manunubli suno sa saad.”—Galacia 3:16, 29; Santiago 2:5.
PILA ANG MAKADTO SA LANGIT?
13. (a) Ngaa indi makadto sa langit ang mga lapsag? (b) Paano ginlaragway ni Jesus ang kadamuon nga magabaton sang Ginharian?
13 Sanglit magagahom sila sa ibabaw sang duta, maathag nga ang mga magakadto sa langit amo ang natilawan kag matuod nga mga sumulunod ni Cristo. Nagakahulugan ini nga ang mga lapsag ukon mga bata, nga wala pa matilawi sa tion sang madamung tinuig sang Cristianong pag-alagad, indi pagdalhon sa langit. (Mateo 16:24) Apang, ang mga bata nga mapatay may paglaum nga banhawon sa duta. (Juan 5:28, 29) Gani diutay lamang ang bug-os nga kadamuon sang magakadto sa langit kon ipaanggid sa madamu nga magabaton sing kabuhi sa duta sa idalom sang paggahom sang Ginharian. Si Jesus nagsiling sa iya mga disipulo: “Dili mahadlok, diutay nga panong, kay nahamut-an sang inyo Amay ang paghatag sa inyo sang ginharian.”—Lucas 12:32.
14. Pila ang katapo sang “diutay nga panong” nga magakadto sa langit?
14 Daw ano ka diutay ang kadamuon sang hubon sang mga manuggahom sa Ginharian? Ang mga apostoles kag ang unang sumulunod lamang bala ni Jesus ang malakip sa sini? Indi, ginapakita sang Biblia nga ang “diutay nga panong” magalakip sa dugang pa. Sa Bugna 14:1, 3 ang Biblia nagasiling: “Nian nagtulok ako, kag, yari karon! ang Kordero [si Jesucristo] nagatindog sa Bukid nga Sion, kag kaupod niya ang isa ka gatos kag kap-atan kag apat ka libo . . . nga ginbakal [ukon, ginkuha] gikan sa duta.” Talupangda nga 144,000 lamang ang nakita kaupod sa Kordero, si Jesucristo, sa langitnon nga Bukid nga Sion. (Hebreo 12:22) Gani sa baylo nga makadto sa langit ang tanan nga maayong tawo, ginapahayag sang Biblia nga 144,000 lamang sang natilawan kag matutom nga mga tawo ang dalhon didto agod maggahom kaupod ni Cristo.
KON NGAA GINPILI GIKAN SA DUTA
15. Ngaa ginapili sang Dios ang mga manuggahom sa Ginharian gikan sa katawhan?
15 Apang ngaa ginpili sang Dios ining mga manuggahom gikan sa katawhan? Ngaa indi mga anghel ang ginpagahom upod kay Cristo? Ti, diri sa duta nga ginhangkat ang kinamatarong ni Jehova sa paggahom. Diri ginatilawan ang katutom sang mga tawo sa Dios sa idalom sang pagpamatok sang Yawa. Diri ginpamatod-an ni Jesus ang iya bug-os nga katutom sa Dios sa idalom sang pagtilaw kag ginhatag ang iya kabuhi subong gawad para sa katawhan. Gani gikan diri sa duta nga si Jehova nagkuha sing “diutay nga panong” sang mga tawo agod makaupod sang iya Anak sa langitnon nga ginharian. Sila amo ang, paagi sa ila katutom sa Dios, nagpamatuod nga indi matuod ang panumbungon sang Yawa nga ang mga tawo nagaalagad sa Dios bangod lamang sang makagud nga mga rason. Busa, nagakaigo nga ginagamit ni Jehova ining mga tawo para sa iya himaya.—Efeso 1:9-12.
16. Ngaa makapasalamat kita nga ang mga manuggahom sa Ginharian nabuhi sa duta?
16 Hunahunaa man kon daw ano katahom nga ang mga manuggahom mga tawo nga nangin matutom sa Dios sa duta, madamu sa ila nagsakripisyo pa gani sang ila kabuhi para sa ginharian. (Bugna 12:10, 11; 20:4) Ang mga anghel wala makaatubang sina nga sahi sang mga pagtilaw. Wala man sila makaeksperiensia sang mga palaligban nga kinaandan sa tawo. Gani indi nila mahangpan sing bug-os ang kahimtangan sang makasasala nga tawo kag ang iya mga palaligban. Apang mahangpan sang 144,000 bangod naeksperiensiahan nila ining mga palaligban. Ang iban sa ila naglandas sang sala gid nga mga buhat, kag nahibaloan nila kon daw ano ini kabudlay. (1 Corinto 6:9-11) Busa, mangin mahinangpanon sila sa pagpakig-angot sa ila dutan-on nga mga sakop.—Hebreo 2:17, 18.
ANG KONGREGASYON SANG DIOS
17. Sa ano nagapatuhoy ang tinaga nga “kongregasyon”?
17 Ginasiling sa aton sang Biblia nga si Cristo amo ang ulo sang kongregasyon sang Dios, kag ang mga katapo sini mga sakop ni Jesus. (Efeso 5:23, 24) Gani ang tinaga nga “iglesia,” ukon “kongregasyon sang Dios,” wala nagapatuhoy sa tinukod. Sa baylo, nagapatuhoy ini sa isa ka grupo sang mga Cristiano. (1 Corinto 15:9) May ginatawag kita karon nga kongregasyon sang mga Cristiano nga aton ginapakig-updan. Sa amo man nga paagi, mabasa naton sa Biblia “ang kongregasyon sang mga taga-Laodicea,” kag, sa sulat ni apostol Pablo kay Filemon, “ang kongregasyon nga [yara sa iya] balay.”—Colosas 4:16; Filemon 2.
18. (a) Sin-o ang nagahuman sa “kongregasyon sang buhi nga Dios”? (b) Ano pa ang pagtawag sa sining kongregasyon sa Biblia?
18 Apang, kon nagahambal ang Biblia tuhoy sa “kongregasyon sang buhi nga Dios,” nagapatuhoy ini sa isa ka pinasahi nga grupo sang mga sumulunod ni Cristo. (1 Timoteo 3:15) Ginatawag man sila “ang kongregasyon sang mga panganay nga nalista sa langit.” (Hebreo 12:23) Gani ining “kongregasyon sang Dios” ginahuman sang tanan nga Cristiano sa duta nga may paglaum sa langitnon nga kabuhi. Sa kabilogan, 144,000 lamang ang nagahuman sa “kongregasyon sang Dios.” Sa karon pila na lamang sa ila, isa ka nagkalabilin, ang yari pa sa duta. Ang mga Cristiano nga nagalaum sa pagkabuhi sing dayon sa duta nagapaabot sing espirituwal nga pagtuytoy gikan sa mga katapo sining “kongregasyon sang buhi nga Dios.” Ginatawag man sang Biblia ining kongregasyon sang 144,000 ka katapo subong “ang nobya, ang asawa sang Kordero,” “ang lawas ni Cristo,” “ang templo sang Dios,” “ang Israel sang Dios,” kag ang “Bag-ong Jerusalem.”—Bugna 21:9; Efeso 4:12; 1 Corinto 3:17; Galacia 6:16; Bugna 21:2.
ANG BAG-O NGA BUTANG SA KATUYOAN SANG DIOS
19. Anong bag-o nga butang ang gindugang sang Dios agod matuman ang iya orihinal nga katuyoan para sa duta?
19 Wala pagbaylohi ni Jehova nga Dios ang iya katuyoan para sa duta kag sa katawhan sini sa tapos madala ni Adan ang kaliwatan sang tawo sa banas sang sala kag kamatayon. Kon ginbaylohan ini sang Dios, magakahulugan ini nga indi sia makasarang sa pagtuman sang iya orihinal nga katuyoan. Ang iya katuyoan kutob sa ginsuguran amo nga tugbon ang bug-os-duta nga paraiso sing malipayon, mapagros nga katawhan, kag amo gihapon sina ang katuyoan. Ang bag-o lamang nga butang nga gindugang sang Dios amo ang iya kahimusan para sa bag-ong pangulohan sa pagtuman sang iya katuyoan. Subong aton nakita na, ang iya Anak, si Jesucristo, amo ang pangunang manuggahom sa sining pangulohan, kag 144,000 ang kuhaon gikan sa katawhan agod maggahom sa langit kaupod niya.—Bugna 7:4.
20. (a) Sin-o ang nagahuman sa “bag-ong mga langit” kag sa “bag-ong duta”? (b) Ano ang dapat mo himuon agod mangin bahin sang “bag-ong duta”?
20 Ining mga manuggahom sa langit magahuman sa “bag-ong mga langit” sang bag-ong sistema sang Dios. Apang maathag nga kon may yara matarong nga mga manuggahom sa ibabaw sang duta, nian may yara man sila sakop nga pagagamhan nila. Ang Biblia nagapatuhoy sa sining mga tawo subong ang “bag-ong duta.” (2 Pedro 3:13; Bugna 21:1-4) Magalakip sila kanday Job, David kag Juan Bautista—huo, ang tanan nga matutom nga nagkabuhi sa wala pa si Cristo magkari sa duta. Apang madamu pa ang magahuman sa “bag-ong duta,” lakip ang mga tawo nga makalampuwas sa katapusan sining malauton nga sistema sang mga butang. Mangin isa ka bala sa sining makalampuwas? Luyag mo bala mangin sakop sang pangulohan sang Dios? Kon amo, may mga kinahanglanon nga dapat mo lab-uton.
[Mga Pamangkot sa Pagtinuon]
[Mga piktyur sa pahina 121]
Nagkadto bala sa langit ining maayong mga tawo?
Hari David
Job
Juan Bautista
[Piktyur sa pahina 122]
Sang iya hingapusan nga gab-i upod sa mga apostoles, nagsiling si Jesus nga sila magagahom upod sa iya sa ginharian sang iya Amay
