Ang Amon Imbitasyon sa Inyo

Nakunyag kami sa pagpakighambal sa inyo paagi sa mga pahina sining brosyur. Nagalaum kami nga naluyagan ninyo ang inyo dugang nga nahibal-an tuhoy sa mga Saksi ni Jehova. Batuna palihug ang amon imbitasyon nga duawon kami sa amon lokal nga Kingdom Hall. Tan-awa kon paano namon ginahiwat ang amon mga miting. Tan-awa kon paano kami nagtinguha sa pagpaambit sa iban sang maayong balita tuhoy sa isa ka paraiso nga duta sa idalom sang Ginharian ni Cristo.

Ginsaad ini sang Dios. “Nagahulat kita sing bag-ong mga langit kag bag-ong duta suno sa iya saad, kag sa sini magapuyo ang pagkamatarong.” (2 Pedro 3:​13) Madamo na nga siglo ang nagligad. Ang panahon sa paghulat malapit na matapos. Ginapakita ini sang mga kahimtangan sa kalibutan.

“Samtang ginatan-aw ninyo nga nagapalapit ang adlaw,” siling ni apostol Pablo, ‘binagbinaga ninyo ang isa kag isa agod pukawon sa gugma kag sa maayong mga buhat, nga wala ginapabay-an ang inyo pagtilipon sing tingob.’ (Hebreo 10:​24, 25) Ginaagda namon kamo nga sundon ang laygay ni Pablo paagi sa pagtipon upod sa amon.