Ang Praktikal nga Kapuslanan sang Maayong Balita sa Inyo Komunidad

SA KALIBUTAN karon masami naton mabatian ang ginapabutyag nga opinyon: “Indi praktikal ang mga prinsipio sang Cristianismo. Indi ini epektibo sa masibod nga katilingban karon.” Apang, sa ginbalita nga paghambalanay sang Hindu nga lider nga si Mohandas K. Gandhi kag sang anay Britaniko nga Viceroy sang India, nga si Lord Irwin, tuhay naman ang ginsiling. Ginpamangkot kuno ni Lord Irwin si Gandhi kon ano ang ginahunahuna niya nga makalubad sa mga problema sa ulot sang Gran Britanya kag India. Ginkuha ni Gandhi ang Biblia kag ginbuksan ini sa ikalima nga kapitulo sang Mateo kag nagsiling: “Kon ang imo pungsod kag ang akon mag-ugyunay sa mga panudlo nga ginpamulong ni Cristo sa sining Sermon sa Bukid, malubad naton ang mga problema indi lamang sang aton mga pungsod kundi sang bug-os nga kalibutan man.”

Ini nga sermon nagahambal sang pagtinguha sa espirituwal nga mga butang kag pagpakita sing pagkakalmado, pagkamahidaiton, pagkamaluluy-on, paghigugma sa pagkamatarong. Ginapakamalaut sini indi lamang ang pagpatay kundi ang pagkamaakigon sa iban, indi lamang ang panghilahi kundi ang malaw-ay man nga mga panghunahuna. Nagahambal ini batok sa indi makatarunganon nga pagdiborsio nga nagaguba sang mga pamilya kag nagabiktima sa kabataan. Nagasiling ini sa aton: ‘Higugmaa bisan ang mga naugot sa imo, maghatag sa mga imol, mag-untat sa paghukom sa iban sing di-maluluy-on, himua sa iban ang luyag mo nga himuon sa imo sang iban.’ Ini tanan nga laygay, kon iaplikar, magabunga sing madamo nga kaayuhan. Kon madamo sa inyo komunidad ang nagahimo sini, magauswag sing kapin ang inyo komunidad!

Ang mga Saksi ni Jehova isa ka impluwensia sa sini. Ang Biblia nagatudlo sa ila nga tahuron ang pag-asawahay. Ang ila kabataan ginahanas sa husto nga mga prinsipio. Ginahatagan sing importansia ang pamilya. Ang nahiusa nga mga pamilya isa ka pagpakamaayo sa inyo komunidad, bisan sa inyo pungsod. Ang maragtas puno sing mga halimbawa sang kagamhanan sa kalibutan nga nalusod sang magluya ang mga higot sang pamilya kag nagdugang ang imoralidad. Samtang dugang nga mga indibiduwal kag mga pamilya ang maimpluwensiahan sang mga Saksi ni Jehova sa pagkabuhi suno sa Cristianong mga prinsipio, magadiutay ang delingkwensia, imoralidad, kag krimen sa inyo komunidad.

 Ang isa sang daku nga mga problema nga nagatublag sa mga komunidad kag mga pungsod amo ang pagdampigdampig sa rasa. Sa kabaliskaran, si apostol Pedro nagsiling: “Nahantop ko nga ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” Kag si Pablo nagsulat: “Walay Judiyo ukon Griego, walay ulipon ukon hilway, walay lalaki ukon babayi; kay kamo tanan isa ka tawo nga nahiusa kay Cristo Jesus.” (Binuhatan 10:​34, 35; Galacia 3:28) Ginabaton ini sang mga Saksi ni Jehova. Ang tanan nga rasa kag mga duag nagakabuhi kag nagapangabudlay sing tingob sa ila bug-os kalibutan nga ulong-talatapan, sa mga sanga, kag sa mga kongregasyon.

Sa Aprika ang pila ka tribo indi makaupuray nga wala nagabangigay. Apang, sa mga asambleya sang mga Saksi ni Jehova didto, ang mga tawo gikan sa nanuhaytuhay nga tribo nagakaon, nagatulog, kag nagasimba sing tingob nga may paghiusa kag kasadya. Nagakatingala ang mga opisyales sang gobierno kon makita nila ini. Ang isa ka halimbawa sang nagapahiusa nga epekto sang matuod  nga Cristianismo ginkomentuhan sa Amsterdam News sang New York sang Agosto 2, 1958. Ang komento ginpautwas sang makita ang internasyonal nga asambleya nga ginsambit kaina diin kapin sa un-kuarto sang isa ka milyon ka Saksi ang nagtipon sa New York City.

“Bisan diin ang mga Negro, mga puti, kag mga taga-Sidlangan, gikan sa tanan nga sahi sang pagkabuhi kag sa tanan nga bahin sang kalibutan, nag-updanay sing malipayon kag hilway. . . Ang nagasimba nga mga Saksi gikan sa 120 ka kadutaan nagkabuhi kag nagsimba sing tingob nga may paghidait, nga ginapakita sa mga Amerikano kon daw ano kahapos mahimo ini. . . . Ang pagtipon isa ka talalupangdon nga halimbawa kon paano ang mga tawo sarang makapangabudlay kag magkabuhi sing tingob.”

Mahimo madamo ang magasiling nga ang mga prinsipio sang Cristianismo indi praktikal para sa sining modernong kalibutan. Apang, ano gali ang nagmadinalag-on ukon magamadinalag-on pa? Ang Cristianong mga prinsipio mahimo nga mangin mapuslanon gid kon iaplikar sa inyo komunidad karon, kag mangin sadsaran ini para sa paghiusa sa tanan nga ‘pungsod, tribo, kag katawhan’ sa bug-os nga duta sa idalom sang paggahom sang Ginharian sang Dios sa katawhan.​—⁠Bugna 7:​9, 10.

[Blurb sa pahina 23]

Ang tanan nga rasa kag duag nagapangabudlay sing tingob

[Blurb sa pahina 24]

Praktikal ang Cristianismo. Ano pa ang nagmadinalag-on?