Mga Pamangkot nga Masami Ginapamangkot sang Interesado nga mga Tawo

Kon ang Dios gugma, ngaa ginatugutan niya ang kalautan?

GINATUGUTAN sang Dios ang kalautan, kag minilyon sa duta ang hungod nga nagahimo sini. Halimbawa, nagadeklarar sila sing mga inaway, nagahulog sing mga bomba sa kabataan, nagahapay sang duta, kag nagatuga sing mga tiggulutom. Minilyon ang nagapanigarilyo kag ginakanser sa baga, ang nagapanghilahi kag ginatapikan sing mga balatian bangod sang seksuwal nga paghulid, ang nagainom sing sobra nga alkohol kag nagamasakit sing pagpalanig-a sang atay, kag madamo pa. Indi luyag sining mga tawo nga madula ang tanan nga kalautan. Luyag lamang nila madula ang malain nga resulta sini. Kon anihon na nila gani ang ila ginsab-ug, nagatuaw sila, “Ngaa ako pa?” Kag ginabasol nila ang Dios, subong sang ginasiling sang Hulubaton 19:3: “Ang kabuangan sang tawo nagaguba sang iya kabuhi, kag dayon nagahinakit sia sa GINUO.” (The New English Bible) Kag kon padulugon sang Dios ang ila kalautan, magaprotesta sila nga nadula ang ila kahilwayan sa paghimo sini!

Ang panguna nga rason ko ngaa ginatugutan ni Jehova ang kalautan amo agod sabton ang hangkat ni Satanas. Nagsiling si Satanas nga Yawa nga ang Dios indi makabutang sing mga tawo sa duta nga magamatutom sa Iya kon tilawan. (Job 1:​6-​12; 2:​1-​10) Ginahatagan ni Jehova si Satanas sing kahigayunan agod pamatud-an ang iya panghangkat. (Exodo 9:16) Padayon gihapon si Satanas sa pagdala sing mga kailo karon, agod patalikuron ang mga tawo sa Dios, samtang nagatinguha sia nga pamatud-an ang iya hangkat. (Bugna 12:12) Apang, ginhuptan ni Job ang iya integridad. Amo man si Jesus. Amo man karon ang matuod nga mga Cristiano.​—⁠Job 27:⁠5; 31:⁠6; Mateo 4:​1-​11; 1 Pedro 1:​6, 7.

Luyag ko patihan ang isa ka dutan-on nga paraiso diin ang mga tawo magakabuhi sing dayon, apang indi bala daw mabudlay ini patihan?

Indi suno sa Biblia. Daw mabudlay ini patihan bangod lamang nakita na sang katawhan ang kalautan sa madamo gid nga siglo. Gintuga ni Jehova ang duta kag ginsugo niya ang katawhan nga tugbon ini sing matarong nga mga lalaki kag mga babayi nga magaatipan sang mga tanom kag mga sapat sa sini kag magaamlig sang katahom sini sa baylo nga laglagon ini. (Tan-awa ang pahina 12 kag 17.) Sa baylo nga ang ginsaad nga Paraiso daw mabudlay  patihan, ang makapasubo nga kahimtangan karon tuman kalain amo kon ngaa indi ini dapat magpadayon. Buslan ini sang Paraiso.

Paano ko masabat ang mga tawo nga nagapangyaguta kag nagasiling nga ang Biblia isa ka mito kag indi sientipiko?

Ang pagtuo sa sining mga saad indi pagkamapinatihon. “Ang pagtuo nagasunod sa butang nga nabatian.” Paagi sa pagtuon sa Pulong sang Dios, ang kaalam sini nagaathag kag ang pagtuo nagatubo.​—⁠Roma 10:17; Hebreo 11:⁠1.

Ang Biblikanhon nga arkeolohiya nagapamatuod sa madamo nga sibu nga maragtas sang Biblia. Ang matuod nga siensia nagahisanto sa Biblia. Ang masunod nga mga katunayan yara na sa Biblia antes ini matukiban sang sekular nga mga iskolar: ang alagisod nga mga hugna nga gin-agihan sang duta antes ini magluntad, nga ang duta bilog, nga nagabitay ini sa kahawaan sa wala, kag ang mga pispis duna nga nagapangayaw.​—⁠Genesis, kapitulo 1; Isaias 40:22; Job 26:⁠7; Jeremias 8:⁠7.

Ang natuman nga mga tagna nagapamatuod nga gin-inspirar ang Biblia. Gintagna ni Daniel ang pagbangon kag pagkapukan sang mga kagamhanan sa kalibutan, subong man kon san-o maabot ang Mesias kag patyon. (Daniel, kapitulo 2, 8; 9:​24-​27) Sa karon, may iban pa nga mga tagna nga nagakatuman, nga nagapakilala sini subong “ang katapusan nga mga adlaw.” (2 Timoteo 3:​1-5; Mateo, kapitulo 24) Wala sing ikasarang ang tawo nga hibaluon ang palaabuton. (Isaias 41:23) Para sa dugang pa nga pamatuod, tan-awa ang mga libro nga The Bible​—⁠God’s Word or Man’s? kag Is There a Creator Who Cares About You?, nga ginbalhag sang Watchtower Bible and Tract Society.

Paano ako makatuon sa pagsabat sa mga pamangkot tuhoy sa Biblia?

Dapat mo tun-an ang Biblia kag magpamalandong sa sini, sa amo man nga tion ginapangayo ang espiritu sang Dios nga tuytuyan ka. (Hulubaton 15:28; Lucas 11:​9-​13) “Kon ang bisan sin-o sa inyo nakulangan sing kaalam,” siling sang Biblia, “padayon sia nga papangayua sa Dios, kay maalwan sia nga nagahatag sa tanan kag wala nagabasol; kag ihatag ini sa iya.” (Santiago 1:⁠5) Subong man, may yara mga bulig para sa pagtuon sa Biblia nga takus basahon. Masami nga kinahanglan ang bulig sang iban, subong sang si Felipe nagtuon upod sa Etiopianhon. (Binuhatan 8:​26-​35) Ang mga Saksi ni Jehova nagadumala sing walay bayad nga pagtuon sa Biblia upod sa interesado nga mga tawo sa ila puluy-an. Indi magpangalag-ag sa pagpangabay sini nga serbisyo.

Ngaa madamo ang nagapamatok sa mga Saksi ni Jehova kag nagasiling sa akon nga indi magtuon upod sa ila?

Ang pagbantala ni Jesus ginpamatukan anay, kag nagsiling sia nga ang iya mga sumulunod pamatukan man. Sang ang iban nagdayaw sa pagpanudlo ni Jesus, ang relihioso nga mga manugpamatok nagsiling: “Ginpatalang man bala kamo? Wala sing bisan isa sa mga manuggahom ukon sa mga Fariseo ang nagtuo sa iya, indi bala?” (Juan 7:​46-​48; 15:20) Madamo sang nagalaygay sa imo nga  indi magtuon upod sa mga Saksi ang wala lamang makahangop ukon may nadampigan nga opinyon. Magtuon upod sa mga Saksi kag tan-awa kon bala nag-uswag ukon wala ang imo paghangop sa Biblia.​—⁠Mateo 7:​17-​20.

Ngaa nagaduaw ang mga Saksi sa mga tawo nga may relihion na?

Sa paghimo sini ginasunod nila ang huwaran ni Jesus. Nagkadto sia sa mga Judiyo. Ang mga Judiyo may relihion na, apang sa madamo nga paagi nagsipak ini sa Pulong sang Dios. (Mateo 15:​1-9) Ang tanan nga pungsod may relihion na, ginatawag man nga Cristiano ukon di-Cristiano. Importante gid nga ang mga ginapatihan sang mga tawo dapat nahisanto sa Pulong sang Dios, kag ang mga panikasog sang mga Saksi sa pagbulig sa ila sa paghimo sini isa ka pagpakita sang gugma sa isigkatawo.

Nagapati bala ang mga Saksi nga ang ila relihion amo lamang ang husto?

Ang bisan sin-o nga serioso sa iya relihion dapat maghunahuna nga husto ini. Kay kon indi, ngaa aktibo sia sa sini? Ang mga Cristiano ginalaygayan: “Pat-ura ninyo ang tanan nga butang; hupti sing malig-on ang maayo.” (1 Tesalonica 5:21) Dapat pat-uron sang isa ka tawo nga ang iya mga pagtuluuhan masuportahan sang Kasulatan, kay isa lamang ang matuod nga pagtuo. Ginapamatud-an ini sang Efeso 4:​5, nga nagasambit sang “isa ka Ginuo, isa ka pagtuo, isa ka bawtismo.” Wala mag-ugyon si Jesus sa pakulahaw nga pagtamod karon nga may yara madamo nga dalan, madamo nga relihion, ang tanan nagadul-ong sa kaluwasan. Sa baylo, sia nagsiling: “Makitid ang gawang kag masipot ang dalan nga nagapadulong sa kabuhi, kag pila lamang ang mga nakatultol sini.” Nagapati ang mga Saksi ni Jehova nga nakita na nila ini. Kay kon wala pa, mangita sila sing isa pa ka relihion.​—⁠Mateo 7:⁠14.

Nagapati bala sila nga sila lamang ang maluwas?

Wala. Minilyon nga nabuhi sang una nga mga siglo kag indi mga Saksi ni Jehova ang mabanhaw kag may kahigayunan sa kabuhi. Madamo nga nagakabuhi karon ang mahimo magadampig pa sa kamatuoran kag pagkamatarong antes sang “dakung kapipit-an,” kag makatigayon sila sing kaluwasan. Dugang pa, si Jesus nagsiling nga indi naton dapat paghukman ang isa kag isa sa aton. Ginatan-aw naton ang naguwa nga panagway; ginatan-aw sang Dios ang tagipusuon. Makita niya kon ano gid ang matuod kag nagahukom sia sing maluluy-on. Gintugyan niya ang paghukom sa mga kamot ni Jesus, indi sa aton.​—⁠Mateo 7:​1-5; 24:⁠21; 25:31.

Anong pinansial nga mga amot ang ginapaabot sa mga nagatambong sa mga miting sang mga Saksi ni Jehova?

 Tuhoy sa pag-amot sing kuwarta, si apostol Pablo nagsiling: “Maghimo ang kada isa suno sa ginpamat-od niya sa iya tagipusuon, indi nga may aligutgot ukon sa pagpilit, kay ang Dios nagahigugma sa manughatag nga malipayon.” (2 Corinto 9:⁠7) Sa mga Kingdom Hall kag sa mga awditoryum sang kombension sang mga Saksi ni Jehova, wala sing mga pagpangolekta. May mga kahon nga naplastar para sa kahapusan sang bisan sin-o nga luyag mag-amot. Wala sing nakahibalo kon pila ang gin-amot ukon kon bala nag-amot ang iban. Ang iban makaamot sing kapin sangsa iban; ang iban mahimo nga wala gid sing maamot. Ginpakita ni Jesus ang husto nga pagtamod sang nagkomento sia tuhoy sa bahandian nga kahon sa templo sa Jerusalem kag sa mga nagaamot: Ang importante amo ang ikasarang sang isa sa paghatag kag ang espiritu sa paghatag, indi ang kantidad sang kuwarta.​—⁠Lucas 21:​1-4.

Kon mangin isa ako sang mga Saksi ni Jehova, ginapaabot bala ako nga magbantala kaangay nila?

Kon mahibaluan sang isa ang tuhoy sa ginsaad nga dutan-on nga Paraiso sa idalom sang Ginharian ni Cristo, luyag niya ipaambit ini sa iban. Amo man ang himuon mo. Maayong balita ini!​—⁠Binuhatan 5:​41, 42.

Ang paghimo sini isa ka importante nga paagi agod mapakita mo nga ikaw isa ka disipulo ni Jesucristo. Sa Biblia, si Jesus ginatawag nga “matutom kag matuod nga saksi.” Sang sa duta sia nagbantala sia, nga nagasiling: “Ang ginharian sang mga langit malapit na,” kag ginpadala niya ang iya mga disipulo agod himuon man ini. (Bugna 3:​14; Mateo 4:​17; 10:⁠7) Sang ulihi, ginsugo ni Jesus ang iya mga sumulunod: “Busa lakat kamo kag maghimo sing mga disipulo sa mga tawo sa tanan nga kapungsuran, . . . nagatudlo sa ila.” Gintagna man niya nga antes sang katapusan, “ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran.”​—⁠Mateo 24:⁠14; 28:​19, 20.

Madamo ang paagi sa pagbantala sing maayong balita. Ang pagpakighambal sa mga abyan kag sa mga kakilala masami nga nagabukas sang dalan sa paghimo sini. Ginahimo ini sang iban paagi sa pagpadala sing mga sulat ukon paagi sa telepono. Ang iban nagapadala sing literatura nga nagaunod sing materyal nga sa banta nila maluyagan gid sang isa ka kakilala. Bangod sang handum nga wala sila sing malipatan, nagapamalaybalay ang mga Saksi nga dala ang mensahe.

Ang Biblia nagaunod sining mainit nga pangagda: “Ang espiritu kag ang nobya padayon nga nagasiling: ‘Kari!’ Kag ang bisan sin-o nga nagapamati magsiling: ‘Kari!’ Kag ang bisan sin-o nga ginauhaw magkari; ang bisan sin-o nga maluyag sa pagkuha sing tubig sang kabuhi nga walay bayad.” (Bugna 22:17) Ang pagsugid  sa iban tuhoy sa Paraiso nga duta kag sa mga pagpakamaayo sini dapat himuon sing kinabubut-on, gikan sa tagipusuon nga puno sing handum nga ipaambit ining maayong balita.

Napat-od namon nga may mga pamangkot pa kamo tuhoy sa mga Saksi ni Jehova kag sa ila mga pagtuluuhan. Ayhan kontrobersial ang iban nga mga hulusayon. Luyag namon sabton ang inyo mga pamangkot. Limitado ang espasyo sa sini nga brosyur, gani ginaagda namon kamo nga pamangkuton ang mga Saksi sa inyo duog. Mahimo ninyo ini sa ila mga miting sa Kingdom Hall ukon kon magduaw sila sa inyo puluy-an. Ukon mahimo ninyo ipadala ang inyo mga pamangkot sa Watch Tower, nga ginagamit ang nagakaigo nga direksion nga nalista sa ubos.