Sin-o Sila?

HANDUM sang mga Saksi ni Jehova nga makilala ninyo sila sing maayo. Mahimo nga nasumalang ninyo sila subong mga kaingod kag mga kaupod sa trabaho ukon sa iban pa nga mga kahigayunan sa adlaw-adlaw nga pagkabuhi. Ayhan nakita ninyo sila sa kalye, nga nagatanyag sang ila mga magasin sa mga nagalalabay. Ukon mahimo nga nakapakighambal kamo sa ila sa makadali lang sa inyo ganhaan.

Ang matuod, interesado ang mga Saksi ni Jehova sa inyo kag sa inyo kaayuhan. Luyag nila makig-abyan sa inyo kag sugiran kamo tuhoy sa ila kaugalingon, sang ila mga pagtuluuhan, sang ila organisasyon, kag kon ano ang ginabatyag nila tuhoy sa mga tawo kag sa kalibutan nga ginapuy-an naton tanan. Agod mahimo ini, ginhanda nila ini nga brosyur para sa inyo.

Sa kinaandan ang mga Saksi ni Jehova kaangay lang sang tanan. May yara sila kinaandan nga mga problema​—⁠sa pangabuhi, sa panglawas, sa emosyon. Nagasala man sila kon kaisa, kay sila indi himpit, inspirado, ukon wala nagasayop. Apang nagatinguha sila nga manuto gikan sa ila mga naeksperiensiahan kag maukod nga nagatuon sang Biblia agod himuon ang kinahanglanon nga mga pagtadlong. Gindedikar nila ang ila kaugalingon sa Dios agod himuon ang iya kabubut-on, kag nagapanikasog sila nga tumanon ini nga dedikasyon. Ginapangita nila ang pagtuytoy sang Pulong sang Dios kag sang iya balaan nga espiritu sa tanan nga ginahimo nila.

Importante gid sa ila nga ang ila mga pagtuluuhan dapat nga napasad sa Biblia kag indi sa mga haumhaum lamang sang tawo ukon sa relihioso nga mga doktrina. Kaangay sila ni apostol Pablo sang magsiling sia sa idalom sang inspirasyon: “Kabay nga masapwan ang Dios nga matuod, bisan pa masapwan ang tagsa ka tawo nga butigon.” (Roma 3:​4, New World Translation⁠ a) Kon tuhoy sa mga panudlo nga ginatanyag subong kamatuoran sa Biblia, ginasakdag gid sang mga Saksi ang ginhimo anay sang mga taga-Berea sang mabatian nila si apostol Pablo nga nagabantala: “Ginbaton nila ang pulong nga may daku gid nga kalangkag sa hunahuna, nga ginausisa sing  maayo ang Kasulatan adlaw-adlaw kon bala matuod gid ini nga mga butang.” (Binuhatan 17:11) Ang mga Saksi ni Jehova nagapati nga ang tanan nga relihioso nga panudlo, naghalin man sa ila ukon sa iban, dapat ipaidalom sa sini nga pagtilaw kon bala nagahisanto sa inspirado nga Kasulatan. Ginaagda nila kamo​—⁠ginapalig-on kamo⁠—​nga himuon ini sa inyo pagpakighambal sa ila.

Sa sini maathag nga ang mga Saksi ni Jehova nagapati nga ang Biblia Pulong sang Dios. Ginakabig nila ang 66 ka tulun-an sini nga gin-inspirar kag may sibu nga kasaysayan. Ang masami ginatawag nga Bag-ong Testamento ginapatuhuyan nila subong Cristianong Griegong Kasulatan, kag ginatawag nila ang Daan nga Testamento nga Hebreong Kasulatan. Ginasaligan nila ini, ang Griego kag ang Hebreong Kasulatan, kag ginahangop ini sing literal luwas kon maathag nga ginapakita sang mga pulong ukon mga kahimtangan nga malaragwayon ini ukon simbuliko. Nahangpan nila nga madamo nga tagna sang Biblia ang natuman na, ang iban nagakatuman pa lang, kag ang iban pa gid matuman pa.

ANG ILA NGALAN

Mga Saksi ni Jehova? Huo, amo sina ang pagtawag nila sa ila kaugalingon. Isa ini ka malaragwayon nga ngalan, nga nagapakita nga nagapanaksi sila tuhoy kay Jehova, sa iya pagka-Dios, kag sa iya mga katuyuan. Ang “Dios,” “Ginuo,” kag “Manunuga”​—⁠kaangay sang “Presidente,” “Hari,” kag “Heneral”⁠—​mga titulo kag mahimo maaplikar sa nanuhaytuhay nga mga persona. Apang ang “Jehova” isa ka personal nga ngalan kag nagapatuhoy sa labing gamhanan nga Dios kag Manunuga sang uniberso. Ginapakita ini sa Salmo 83:​18, suno sa King James nga bersion sang Biblia: “Agod nga makilala ikaw sang mga tawo, nga ang lamang nga ngalan JEHOVA, amo ang labing mataas sa ibabaw sang bug-os nga duta.”

Ang ngalan nga Jehova (ukon Yahweh, nga amo ang ginapasulabi sang Romano Katoliko nga Jerusalem Bible kag sang iban nga mga iskolar) mabasa sing halos 7,000 ka beses sa orihinal nga Hebreong Kasulatan. Ang kalabanan nga Biblia wala nagapakita sini kundi sang salili nga “Dios” ukon “Ginuo” para sa sini. Apang, bisan sa sini nga mga Biblia, masami nga madali lang mahibaluan sang isa ka tawo kon ang gingamit sa orihinal nga Hebreong teksto amo ang Jehova bangod sa sini nga mga bahin ang ginsalili nga mga tinaga nasulat sa dalagku kag magagmay nga mga kapital, gani sing subong sini: DIOS, GINUO. Ang pila ka modernong mga badbad nagagamit sing ngalan nga Jehova ukon sing ngalan nga Yahweh. Busa, ang New World Translation mabasa sa Isaias 42:​8, “Ako si Jehova. Amo ina ang akon ngalan.”

 Ang Makasulatanhon nga kasaysayan nga ginakuhaan sang mga Saksi ni Jehova sang ila ngalan yara sa ika-43 nga kapitulo sang Isaias. Sa sini ang danyag sang kalibutan ginatamod subong isa ka hitabo sa sulod sang korte: Ang mga dios sang mga pungsod ginaagda sa pagdala sang ila mga saksi agod pamatud-an ang ila ginapangangkon nga mga kaso sang pagpakamatarong ukon agod pamatian ang mga saksi para kay Jehova kag kilalahon ang kamatuoran. Nagsiling diri si Jehova sa iya katawhan: “Kamo akon mga saksi, siling ni Jehova, kag ang akon alagad nga akon ginpili; agod nga magakilala kamo kag magtuo sa akon, kag agod nga makahangop kamo nga ako amo sia: una sa akon wala sing Dios nga nahuman, kag wala na sa ulihi nakon. Ako, ako gid, amo si Jehova; kag luwas sa akon wala sing manluluwas.”​—⁠Isaias 43:​10, 11, American Standard Version.

Si Jehova nga Dios may mga saksi sa duta sa sulod sang linibo ka tuig sa wala pa matawo si Jesus. Sa tapos malista sang Hebreo kapitulo 11 ang pila sining mga tawo nga may pagtuo, ang Hebreo 12:1 nagasiling: “Busa, nian, sanglit ginalibutan kita sing tama kadaku nga panganod sang mga saksi, isikway man naton ang tagsa ka kabug-atan kag ang sala nga madali nagasalawid sa aton, kag magdalagan kita nga may pagbatas sang dalaganon nga ginabutang sa aton atubangan.” Si Jesus nagsiling sa atubangan ni Poncio Pilato: “Tungod sini natawo ako, kag tungod sini nagkari ako sa kalibutan, agod magpanaksi ako sa kamatuoran.” Ginatawag sia nga “matutom kag matuod nga saksi.” (Juan 18:37; Bugna 3:14) Ginsilingan ni Jesus ang iya mga disipulo: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.”​—⁠Binuhatan 1:⁠8.

Busa, mga 6,000,000 ka tawo karon nga nagabantala sing maayong balita sang Ginharian ni Jehova paagi kay Cristo Jesus sa kapin sa 230 ka kadutaan ang nagapati nga nagakaigo ang pagtawag nila sa ila kaugalingon subong mga Saksi ni Jehova.

[Mga nota]

[Blurb sa pahina 4]

Dedikado sila sa Dios sa paghimo sang iya kabubut-on

[Blurb sa pahina 4]

Nagapati sila nga ang Biblia Pulong sang Dios

[Blurb sa pahina 5]

Ang ngalan nga may kaangtanan sa isa ka hitabo sa sulod sang korte

[Blurb sa pahina 5]

Mga 6,000,000 ka Saksi sa kapin sa 230 ka kadutaan

[Retrato sa pahina 3]

Interesado sila sa imo

[Retrato sa pahina 4]

Ang personal nga ngalan sang Dios sa dumaan nga Hebreo