Bahin 5

Ang Kahilwayan sa Pagbuot nga Isa ka Matahom nga Dulot

1, 2. Anong matahom nga dulot ang bahin sang aton pagkahuman?

 AGOD mahangpan kon ngaa ginatugutan sang Dios ang pag-antos kag kon ano ang iya himuon sa sini, dapat naton mahangpan kon paano niya kita ginhimo. Wala niya kita gintuga nga may lawas kag utok lamang. Ginhatagan man niya kita sing pinasahi nga mga kinaiya sa hunahuna kag emosyon.

² Ang sadsaran nga bahin sang aton mental kag emosyonal nga pagkahuman amo ang kahilwayan sa pagbuot. Huo, ginhatagan kita sang Dios sing kahilwayan sa pagpili. Isa ini matuod ka matahom nga dulot gikan sa iya.

Kon Paano Kita Ginhimo

3-5. Ngaa ginaapresyar naton ang kahilwayan sa pagbuot?

³ Binagbinagon naton kon paano nadalahig ang kahilwayan sa pagbuot sa pagtugot sang Dios sa pag-antos. Una, hunahunaa ini: Ginaapresyar mo bala nga may kahilwayan ikaw sa pagpili sang ­luyag mo himuon kag ihambal, kon ano ang imo kaunon kag isul-ob, kon ano nga sahi sang trabaho ang himuon mo, kag kon diin kag kon paano ka magkabuhi? Ukon luyag mo bala nga may magdikta pirme sa imo kon ano ang imo ihambal kag himuon sa imo kabuhi?

⁴ Wala sing normal nga tawo ang maluyag nga kuhaon sa iya sing bug-os ang iya pagkontrol sa iya kabuhi. Ngaa wala? Bangod sang paagi nga ginhimo kita sang Dios. Ang Biblia nagasiling sa aton nga gintuga sang Dios ang tawo sa iya ‘dagway kag kaangay,’ kag ang isa sang mga kinaiya sang Dios amo ang kahilwayan sa pagpili. (Genesis 1:​26; Deuteronomio 7:6) Sang gintuga niya ang mga tawo, ginhatag niya sa ila ina man nga matahom nga kinaiya​—⁠ang kahilwayan sa pagbuot nga dulot. Isa ina ka rason kon ngaa nasubuan kita kon ulipunon sang mapiguson nga mga gumalahom.

⁵ Gani indi aksidente ang handum sa kahil­wayan, kay ang Dios isa ka Dios sang kahilwayan. Ang Biblia nagasiling: “Kon diin ang espiritu ni Jehova, may kahilwayan.” (2 Corinto 3:17) Busa, ginhatagan kita sang Dios sing kahilwayan sa pagbuot subong bahin sang aton pagkahuman. Sanglit nahibaluan  niya kon paano magapanghikot ang aton hunahuna kag emosyon, nahibaluan niya nga magamalipayon gid kita kon may kahilwayan sa pagbuot.

6. Paano gintuga sang Dios ang aton utok sa pagpanghikot nahisanto sa kahilwayan sa pagbuot?

⁶ Upod sa kahilwayan sa pagbuot nga dulot, ginhatagan kita sang Dios sing ikasarang sa paghunahuna, sa pagtimbangtimbang sang mga butang, sa paghimo sing mga desisyon, kag sa pagkilala sang husto kag sayop. (Hebreo 5:14) Sa amo, ang kahilwayan sa pagbuot dapat ipasad sa intelihente nga pagpili. Wala kita ginhimo kaangay sang wala sing pensar nga mga robot nga wala sang ila kaugalingon nga pagbuot. Wala man kita gintuga sa paghikot suno sa duna subong sang mga sapat. Sa baylo, ang aton makatilingala nga utok gindesinyo nga magpanghikot nahisuno sa aton kahilwayan sa pagpili.

Ang Labing Maayo nga Panugod

7, 8. Anong maayong panugod ang ginhatag sang Dios sa aton unang mga ginikanan?

⁷ Sa pagpakita kon daw ano ka mainulikdon ang Dios, upod sa kahilwayan sa pagbuot nga dulot, ang aton unang mga ginikanan, si Adan kag si Eva, ginhatagan sang tanan nga butang nga makatarunganon nga handumon sang bisan sin-o. Ginbutang sila sa isa ka daku, tulad-parke nga paraiso. Bugana sila sa materyal. May himpit sila nga hunahuna kag lawas, agod indi sila magtigulang ukon magmasakit ukon mapatay​—⁠mahimo sila magkabuhi sing dayon. Makatigayon sila sing himpit nga mga anak nga may makalilipay man kag walay katapusan nga palaabuton. Kag ang nagadamo nga populasyon may yara kuntani makaalayaw nga hilikuton nga pasangkaron sa ulihi ang paraiso sa bug-os nga duta.​—⁠Genesis 1:​26-30; 2:⁠15.

⁸ Tuhoy sa mga butang nga gin-aman, ang Biblia nagasaysay: “Nakita sang Dios ang tagsa ka butang nga nahimo niya kag, yari karon! tama gid kaayo.” (Genesis 1:31) Ang Biblia nagasiling man tuhoy sa Dios: “Himpit ang iya binuhatan.” (Deuteronomio 32:4) Huo, ginhatagan sang Dios ang pamilya sang tawo sing himpit nga panugod. Wala na sing maayo pa sa sini. Daw ano sia ka mainulikdon nga Dios!

Kahilwayan sa Sulod sang mga Latid

9, 10. Ngaa dapat kontrolon sing nagakaigo ang kahilwayan sa pagbuot?

⁹ Apang, gintuyo bala sang Dios nga wala sing mga latid ang kahilwayan sa pagbuot? Handurawa ang isa ka masako nga siudad nga wala sing kasuguan sa trapiko, diin ang tagsatagsa makamaneho sa bisan anong direksion sa bisan anong kadasigon. Luyag mo bala magmaneho sa sining mga kahimtangan? Indi, isa ina ka magamo nga trapiko kag pat-od nga magaresulta sa madamo nga aksidente.

¹⁰ Amo man sa kahilwayan sa pagbuot nga gindulot sang Dios. Ang wala sing latid nga kahil­wayan magakahulugan sing kagamo sa katilingban. Kinahanglan may kasuguan nga magatuytoy sa ginahimo sang tawo. Ang Pulong sang Dios nagasiling: “Maggawi kaangay sang hilway nga mga tawo, kag indi gid paggamita ang imo kahilwayan subong balibad para sa kalautan.” (1 Pedro 2:​16, JB) Luyag sang Dios kontrolon ang kahilwayan sa pagbuot para sa kaayuhan sang tanan. Gintuyo niya nga makatigayon kita, indi sing bug-os nga kahilwayan, kundi sing relatibo nga kahilwayan, sakop sang paggahom sang kasuguan.

Kay Sin-o Kasuguan?

11. Kay sin-o kasuguan gindesinyo kita nga tumanon?

¹¹ Kay sin-o kasuguan gindesinyo kita nga tumanon? Ang isa pa ka bahin sang teksto sa 1 Pedro 2:​ 16 ( JB) nagasiling: “Mga ulipon kamo indi sang bisan sin-o kundi sang Dios.” Wala ini nagakahulugan sing mapiguson nga pagkaulipon, kundi, sa baylo, nagakahulugan ini nga gindesinyo kita nga mangin malipayon gid kon nagapasakop kita sa kasuguan sang Dios. (Mateo 22:​35-40) Ang iya kasuguan, labaw sa bisan anong kasuguan nga ginhimo sang mga tawo, nagahatag sing labing maayo nga tuytoy. “Ako, si Jehova, nga imo Dios, ang Isa nga nagatudlo sa imo para sa imo kaayuhan, ang Isa nga nagapalakat sa imo sa banas nga dapat mo laktan.”​—⁠Isaias 48:⁠17.

12. Ano ang aton kahilwayan sa pagpili sa sulod sang kasuguan sang Dios?

¹² Sa amo man nga tion, ang kasuguan sang Dios nagatugot sang dakung kahilwayan sa pagpili sa sulod sang ila mga dulunan. Nagaresulta ini sa pagkananuhaytuhay kag nagahimo sa pamilya sang tawo nga makawiwili. Hunahunaa ang nanuhaytuhay nga sahi sang kalan-on, panapton, musika, arte, kag mga puluy-an sa bug-os nga kalibutan. Sa pagkamatuod ginapasulabi naton ang aton desisyon sa sina nga mga butang sa baylo nga iban nga tawo ang magdesisyon para sa aton.

13. Anong pisikal nga kasuguan ang dapat naton tumanon para sa aton kaayuhan?

¹³ Sa amo gintuga kita nga mangin malipayon gid kon nagapasakop sa kasuguan sang Dios tuhoy sa tawhanon nga paggawi. Kaanggid ini sa pagpasakop sa pisikal nga kasuguan sang Dios. Halimbawa, kon sikwayon naton ang kasuguan sang grabidad kag maglumpat gikan sa isa ka mataas nga duog, mahalitan kita ukon mapatay. Kon sikwayon naton ang kasuguan sang aton lawas kag mag-untat sa pagkaon, pag-inum sing tubig, ukon pagginhawa, mapatay kita.

14. Paano naton nahibaluan nga ang mga tawo wala gintuga nga mangin independiente sa Dios?

¹⁴ Subong kapat-od nga gintuga kita nga may kinahanglanon nga magpasakop sa pisikal nga kasuguan sang Dios, gintuga man kita nga may kina­hanglanon nga magpasakop sa moral kag sosyal nga kasuguan sang Dios. (Mateo 4:4) Ang mga tawo wala gintuga nga mangin independiente sa ila Magbubuhat kag magmadinalag-on. Ang manalagna nga si Jeremias nagasiling: “Indi iya sang tawo nga nagalakat bisan ang pagtuytoy sang iya tikang. Tadlunga ako, O Jehova.” (Jeremias 10:​23, 24) Gani sa tagsa ka paagi, gintuga ang mga tawo nga magkabuhi sa idalom sang paggahom sang Dios, indi sang ila kaugalingon.

15. Mabug-at bala ang kasuguan sang Dios nga ginhatag kay Adan kag kay Eva?

¹⁵ Ang pagtuman sa kasuguan sang Dios indi mabug-at para sa aton unang mga ginikanan. Sa baylo, para pa ini kuntani sa ila kaayuhan kag sang bug-os nga pamilya sang tawo. Kon nagpabilin lamang ang unang mag-asawa sa sulod sang mga latid sang kasuguan sang Dios, maayo kuntani ang tanan. Sa kamatuoran, nagapuyo na kita kuntani karon sa isa ka matahom nga paraiso sang kalipay subong isa ka mahigugmaon, nahiusa nga pamilya sang tawo! Wala kuntani sing kalautan, pag-antos, kag kamatayon.

[Mga Pamangkot sa Pagtinuon]

[Retrato sa pahina 11]

Ang Manunuga naghatag sa mga tawo sing himpit nga panugod

[Retrato sa pahina 12]

Luyag mo bala magmaneho sa isa ka masako nga trapiko kon wala sing kasuguan sa trapiko?