Bahin 8

Ang Katuyuan sang Dios Nagapanghikot Padulong sa Katumanan

1, 2. Ano ang ginahimo sang Dios sa pagdula sang pag-antos?

 SA SULOD sang madamo nga siglo ginabutong paubos sang paggahom sang rebelyuso nga mga tawo kag mga demonyo ang pamilya sang tawo. Apang, wala magpabaya ang Dios sa aton pag-antos. Sa baylo, sa sulod sang tanan nga siglo, may ginahimo sia agod hilwayon ang mga tawo gikan sa paghugakom sang kalautan kag pag-antos.

² Sa tion sang pagrebelde sa Eden, ginsugdan sang Dios nga ipahayag ang iya katuyuan nga magtukod sing isa ka panguluhan nga magahimo sining duta nga isa ka paraiso nga puluy-an para sa katawhan. (Genesis 3:15) Sang ulihi, subong puno nga humalambal sang Dios, ginhimo ni Jesus ining nagapakari nga panguluhan sang Dios nga tema sang iya pagpanudlo. Nagsiling sia nga amo ini ang lamang nga paglaum sang katawhan.​—⁠Daniel 2:​44; Mateo 6:​9, 10; 12:⁠21.

3. Ano ang gintawag ni Jesus sa nagapakari nga panguluhan para sa duta, kag ngaa?

³ Gintawag ni Jesus inang nagapakari nga panguluhan sang Dios nga “ginharian sang mga langit,” kay magagahom ini gikan sa langit. (Mateo 4:17) Gintawag man niya ini nga “ginharian sang Dios,” kay ang Awtor sini amo ang Dios. (Lucas 17:20) Sa sulod sang mga siglo gin-inspirar sang Dios ang iya mga manunulat nga isulat ang mga tagna sa kon sin-o ang magahuman sina nga panguluhan kag kon ano ang himuon sini.

Ang Bag-o nga Hari sang Duta

4, 5. Paano ginpakita sang Dios nga si Jesus amo ang iya nahamut-an nga Hari?

⁴ Halos duha ka libo ka tuig na ang nagligad, si Jesus amo ang nagtuman sang madamo nga tagna tuhoy sa isa nga mangin Hari sa Ginharian sang Dios. Ginpamatud-an niya nga sia ang pinili sang Dios nga mangin Manuggahom sinang langitnon nga panguluhan sa ibabaw sang katawhan. Kag sang ma­patay sia, ginbanhaw sang Dios si Jesus padulong sa ­kabuhi sa langit subong isa ka gamhanan, dimamalatyon nga espiritu nga tinuga. Madamo ang nakasaksi sang iya pagkabanhaw.​—⁠Binuhatan 4:​10; 9:​1-9; Roma 1:​1-4; 1 Corinto 15:​3-8.

⁵ Nian si Jesus “naglingkod sa tuuhan sang Dios.” (Hebreo 10:12) Didto ginhulat niya ang tion nga hatagan sia sang Dios sing gahom sa paghikot subong Hari sang langitnon nga Ginharian sang Dios. Gintuman sini ang tagna sa Salmo 110:​1, diin ang Dios nagasiling sa iya: “Lingkod ka sa akon tuo tubtob nga mahimo ko ang imo mga kaaway nga imo palatungan.”

6. Paano ginpamatud-an ni Jesus nga kalipikado sia nga mangin Hari sa Ginharian sang Dios?

⁶ Samtang sa duta, ginpamatud-an ni Jesus nga kalipikado sia para sa sina nga katungdanan. Walay sapayan sang paghingabot, namat-od sia nga tipigan ang iya integridad sa Dios. Sa paghimo sini, ginpamatud-an niya nga si Satanas nagbinutig sang nangangkon sia nga wala sing tawo ang magmatutom sa Dios kon tilawan. Ginpamatud-an ni Jesus, isa ka himpit nga tawo, ang ‘ikaduha nga Adan,’ nga wala magsayop ang Dios sa pagtuga sing himpit nga mga tawo.​—⁠1 Corinto 15:​22, 45; Mateo 4:​1-11.

7, 8. Anong maayong mga butang ang ginhimo ni Jesus samtang sa duta, kag ano ang iya ginpakita?

⁷ Sin-o nga manuggahom ang nakahimo sing daku nga kaayuhan subong sang nahimo ni Jesus sa sulod sang iya pila lamang ka tuig nga pagministeryo? Nasangkapan sang gahom sang balaan nga espiritu sang Dios, gin-ayo ni Jesus ang may balatian, ang piang, ang bulag, ang bungol, ang apa. Ginbanhaw pa gani niya ang mga patay! Ginpakita niya sa diutay nga kasangkaron kon ano ang himuon niya para sa katawhan sa bug-os nga globo kon maggahom sia sa Ginharian.​—⁠Mateo 15:​30, 31; Lucas 7:​11-16.

⁸ Daku gid nga kaayuhan ang nahimo ni Jesus sang yari sia sa duta amo kon ngaa ang iya disipulo  nga si Juan nagsiling: “Sa kamatuoran, may madamo pa man nga iban nga mga butang nga ginhimo ni Jesus, nga, kon isulat ini sa bug-os nga detalye, ginabanta ko nga bisan sa kalibutan indi makaigo ang mga linukot nga sulaton.”​—⁠Juan 21:⁠25.⁠ a

9. Ngaa ang bunayag-tagipusuon nga mga tawo nagpanong kay Jesus?

⁹ Si Jesus maluluy-on kag mainawaon, kay ginahigugma niya sing daku ang katawhan. Ginbuligan niya ang mga imol kag ginapigos, apang wala niya gintamay ang mga may manggad ukon katungdanan. Ang bunayag-tagipusuon nga katawhan nagsabat sa mahigugmaon nga imbitasyon ni Jesus sang nagsiling sia: “Kari sa akon, tanan kamo nga gi­nabudlayan kag ginabug-atan, kag papahuwayon ko kamo. Itakud ang akon gota sa inyo kag magtuon kamo sa akon, kay ako malum-ok sing panghunahuna kag malulo sa tagipusuon, kag makakita kamo sing kapahuwayan sa inyo mga kalag. Kay ang akon gota mahulas kag ang akon lulan mamag-an.” (Mateo 11:​28-30) Ang mahinadlukon sa Dios nga mga tawo nagpanong sa iya kag nagpaabot sang iya paggahom.​—⁠Juan 12:⁠19.

Kaupod nga mga Manuggahom

10, 11. Sin-o ang magaambit kay Jesus sa paggahom sa ibabaw sang duta?

¹⁰ Subong nga ang tawhanon nga mga panguluhan may kaupod nga mga administrador, amo man ang langitnon nga Ginharian sang Dios. Ang iban pa luwas kay Jesus magaambit upod kay Jesus sa paggahom sa ibabaw sang duta, kay ginsaaran ni Jesus ang iya suod nga mga kaupod nga sila magahari upod sa iya sa ibabaw sang katawhan.​—⁠Juan 14:​2, 3; Bugna 5:​10; 20:⁠6.

¹¹ Busa, upod kay Jesus, ang isa ka limitado nga kadamuon sang mga tawo ginabanhaw man padulong sa langitnon nga kabuhi. Mangin mga katapo sila sang Ginharian sang Dios nga magadala sing dayon nga mga pagpakamaayo sa katawhan. (2 Corinto 4:​14; Bugna 14:​1-3) Gani sa sulod sang mga dag-on, ginpasad ni Jehova ang sadsaran para sa paggahom nga magadala sing walay katapusan nga mga pagpakamaayo sa pamilya sang tawo.

Ang Independiente nga Paggahom Matapos

12, 13. Ano karon ang handa nga himuon sang Ginharian sang Dios?

¹² Sa sini nga siglo direkta nga naghilabot ang Dios sa mga nagakatabo sa duta. Subong ipaathag sang Bahin 9 sining brosyur, ginapakita sang tagna sang Biblia nga ang Ginharian sang Dios sa idalom ni Cristo gintukod sang 1914 kag handa na karon sa pagdugmok sa bug-os nga sistema ni Satanas. Ina nga Ginharian handa na sa ‘paggahom sa tunga sang mga kaaway [ni Cristo].’​—⁠Salmo 110:⁠2.

¹³ Sa sining kaangtanan ang tagna sa Daniel 2:​44 nagasiling: “Sa mga adlaw sadto nga mga hari [nga nagaluntad karon] magapatindog ang Dios sang langit sing ginharian [sa langit] nga dili gid malaglag, ukon ang pagkasoberano sini ibilin sa iban nga katawhan [paggahom sang tawo nga indi na gid liwat pagtugutan]. Dugmukon sang [Ginharian sang Dios] ini tanan nga ginharian kag laglagon sila, kag ini magapadayon tubtob sa walay katubtuban.”​—⁠Revised Standard Version.

14. Ano ang pila ka kaayuhan nga magaabot subong resulta sang katapusan sang paggahom sang tawo?

¹⁴ Sa tapos madula ang tanan nga paggahom nga independiente sa Dios, ang paggahom sang Ginharian sang Dios sa ibabaw sang duta mangin bug-os. Kag bangod ang Ginharian nagagahom gikan sa langit, indi gid ini mapatiko sang mga tawo. Ang nagagahom nga kusog mangin sa duog diin una ini nga nagluntad, sa langit, upod sa Dios. Kag sanglit ang paggahom sang Dios magakontrol sa bug-os nga duta, wala na sing bisan sin-o nga mapatalang sang butig nga mga relihion ukon sang dimakaalayaw nga mga pilosopiya sang tawo kag sang politikal nga mga teoriya. Wala sing bisan ano sining mga butang ang tugutan sa pagluntad.​—⁠Mateo 7:​15-23; Bugna, kapitulo 17 tubtob 19.

[Nota]

[Mga Pamangkot sa Pagtinuon]

[Retrato sa pahina 18]

Samtang sa duta gin-ayo ni Jesus ang may balatian kag ginbanhaw ang mga patay agod ipakita kon ano ang iya himuon sa bag-o nga kalibutan

 [Retrato sa pahina 19]

Dugmukon sang langitnon nga Ginharian sang Dios ang tanan nga porma sang paggahom nga independiente sa iya