Ang Matahom nga Bag-ong Kalibutan nga Himuon sang Dios
Bahin 10
Ang Matahom nga Bag-ong Kalibutan nga Himuon sang Dios
1, 2. Ano ang matabo sa tapos sang nagatinlo nga inaway sang Armagedon?
SA TAPOS sang nagatinlo nga inaway sang Armagedon sang Dios, ano nian? Nian magasugod ang mahimayaon nga bag-ong dag-on. Ang mga maluwas sa Armagedon, bangod napamatud-an na nila ang ila katutom sa paggahom sang Dios, pasudlon sa bag-ong kalibutan. Daw ano ka makakulunyag nga bag-ong panahon sang maragtas mangin amo ina samtang ang makadalayaw nga mga benepisyo nagailig gikan sa Dios padulong sa pamilya sang tawo!
2 Sa idalom sang pagtuytoy sang Ginharian sang Dios, sugdan sang mga maluwas ang paghimo sing isa ka paraiso. Ang ila mga kusog pagagamiton para sa dimakagud nga mga hilikuton nga magabenepisyo sa tanan nga magakabuhi sa amo nga tion. Ang duta himuon nga isa ka matahom, malinong, makaalayaw nga puluy-an para sa katawhan.
Ang Pagkamatarong Magabulos sa Kalautan
3. Anong gilayon nga paumpaw ang mabatyagan sa tapos gid sang Armagedon?
3 Ini tanan mangin posible paagi sa kalaglagan sang kalibutan ni Satanas. Wala na sing nagabahinbahin nga butig nga mga relihion, sistema sang katilingban, ukon mga gobierno. Wala na sing sataniko nga propaganda nga magalimbong sa katawhan; ang tanan nga ahensia nga nagahimo sini pagalaglagon upod sa sistema ni Satanas. Hunahunaa lamang: ang bug-os makahililo nga atmospera sang kalibutan ni Satanas nadula na! Daw ano ina nga paumpaw!
4. Ilaragway ang pagbalhin sa pagpanudlo nga mahanabo.
4 Nian ang malaglagon nga mga ideya sang paggahom sang tawo pagabuslan sang makapalig-on nga panudlo nga magagikan sa Dios. “Ang tanan mo nga anak mangin mga tawo nga tinudluan ni Jehova.” (Isaias 54:13) Bangod sining mapuslanon nga panudlo tuig-tuig, “ang duta pat-od nga matugob sang pagkilala kay Jehova subong nga ang mga tubig nagatabon sang dagat.” (Isaias 11:9) Ang katawhan indi na magatuon sing malain, kundi “ang mga pumuluyo sang mapatubason nga duta pat-od nga magatuon sing pagkamatarong.” (Isaias 26:9) Ang makapalig-on nga mga panghunahuna kag mga buhat amo ang mangin kinaiya sang mga dalanon sang katawhan.—Binuhatan 17:31; Filipos 4:8.
5. Ano ang matabo sa tanan nga kalautan kag malaut nga mga tawo?
5 Sa amo, wala na sing pagpatay, kasingki, panglugos, pangawat, ukon iban pa nga krimen. Wala na sing mag-antos bangod sang malaut nga mga buhat sang iban. Ang Hulubaton 10:30 nagasiling: “Tuhoy sa matarong, indi sia mationg tubtob sa walay katubtuban; apang tuhoy sa mga malauton, indi sila magpadayon sa pagpuyo sa duta.”
Himpit nga Panglawas Napasag-uli
6, 7. (a) Anong masubo nga kamatuoran ang tapuson sang paggahom sang Ginharian? (b) Paano ini ginpasundayag ni Jesus samtang sa duta?
6 Sa bag-ong kalibutan, ang tanan nga malain nga epekto sang una nga pagrebelde pagadulaon. Halimbawa, dulaon sang paggahom sang Ginharian ang balatian kag katigulangon. Sa karon, bisan pa maayuayo ang imo panglawas, ang masubo nga kamatuoran amo nga samtang nagatigulang ikaw, ang imo mga mata nagadulom, ang imo mga ngipon nagagabok, ang imo palamatin-an nagabungol, ang imo panit nagakurinot, ang imo mga organo sa lawas nagakapierdi, tubtob sa ulihi mapatay ikaw.
7 Apang, ining nagapaantos nga mga epekto nga napanubli naton sa aton unang mga ginikanan mangin isa ka butang sang nagligad sa indi madugay. Madumduman mo bala kon ano ang ginpasundayag ni Jesus tuhoy sa panglawas sang yari sia sa duta? Ang Biblia nagasaysay: “Nagpalapit sa iya ang dakung kadam-an, nga nagadala sang mga piang, mga bulag, mga apa, mga pingkaw, kag madamong iban pa, kag gin-ayo niya sila; sa bagay nga natingala ang kadam-an sang nakita nila nga naghambal ang mga apa kag naglakat ang mga piang kag nakakita ang mga bulag.”—Mateo 15:30, 31.
8, 9. Ilaragway ang kalipay nga magaabot sa bag-ong kalibutan kon mapasag-uli na ang himpit nga panglawas.
8 Daw ano ka daku nga kalipay ang magaabot sa bag-ong kalibutan kay ang tanan naton nga balatian dulaon! Ang pag-antos bangod sa maluya nga panglawas indi na liwat magapabudlay sa aton. “Wala sing pumuluyo nga magasiling: ‘Nagamasakit ako.’ ” “Sa amo nga tion ang mga mata sang mga bulag pamuklaton, kag ang mga igdulungog sang mga bungol mabuksan. Sa amo nga tion ang piang magalumpat subong sang usa, kag ang dila sang apa magaamba sa kalipay.”—Isaias 33:24; 35:5, 6.
9 Indi bala mangin makakulunyag ang pagmata kada aga kag mabatyagan mo nga ikaw karon may mapagsik nga lawas? Indi bala mangin mapinasalamaton ang mga tigulang sa paghibalo nga napasag-uli na sila sa bug-os nga kapagsik sang pagkapamatan-on kag maagom nila ang kahimpitan anay ni Adan kag ni Eva? Ang saad sang Biblia amo: “Ang iya unod mangin linghud pa sang sa bata; nagabalik sia sa mga adlaw sang iya pagkapamatan-on.” (Job 33:25) Daw ano nga kalipay nga ihaboy ang mga antipara, ang mga hearing aid, ang mga baston, ang mga wheelchair, kag ang mga bulong! Ang mga ospital, mga doktor, kag mga dentista indi na liwat kinahanglanon.
10. Ano ang matabo sa kamatayon?
10 Ang mga tawo nga may subong sina kabaskog nga panglawas indi maluyag mapatay. Kag indi dapat, kay ang katawhan indi na mahugakom sang pinanubli nga pagkadihimpit kag kamatayon. Si Cristo “kinahanglan maghari tubtob nga mabutang sang Dios ang iya tanan nga kaaway sa idalom sang iya mga tiil. Subong katapusan nga kaaway, ang kamatayon pagalaglagon.” “Ang dulot nga ginahatag sang Dios amo ang kabuhi nga walay katapusan.”—1 Corinto 15:25, 26; Roma 6:23; tan-awa man ang Isaias 25:8.
11. Paano ginasumaryo sang Bugna ang mga benepisyo sang bag-ong kalibutan?
11 Sa pagsumaryo sang mga benepisyo nga magagikan sa nagaulikid nga Dios padulong sa pamilya sang tawo sa Paraiso, ang katapusan nga tulun-an sang Biblia nagasiling: “Kag pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”—Bugna 21:3, 4.
Mabanhaw ang mga Patay
12. Paano ginpasundayag ni Jesus ang iya hinatag sang Dios nga gahom sa pagbanhaw?
12 Wala lamang gin-ayo ni Jesus ang mga nagabalatian kag ginpalakat ang mga piang. Ginbanhaw man niya ang mga patay gikan sa lulubngan. Sa amo ginpasundayag niya ang makatilingala nga gahom sa pagbanhaw nga ginhatag sang Dios sa iya. Madumduman bala ninyo ang okasyon sang si Jesus nag-abot sa balay sang isa ka tawo nga namatyan sing anak nga babayi? Si Jesus nagsiling sa patay na nga lin-ay: “Inday, nagasiling ako sa imo, Bangon ka!” Ano ang resulta? “Sa gilayon nagtindog ang dalagita kag naglakat.” Sang makita ina, ang mga tawo didto ‘naurungan sing daku.’ Indi nila mapunggan ang ila kalipay!—Marcos 5:41, 42; tan-awa man ang Lucas 7:11-16; Juan 11:1-45.
13. Ano nga mga sahi sang katawhan ang banhawon?
13 Sa bag-ong kalibutan, “may pagkabanhaw sang mga matarong kag mga dimatarong.” (Binuhatan 24:15) Sa amo nga tion gamiton ni Jesus ang iya hinatag-Dios nga gahom sa pagbanhaw sa mga patay bangod, subong ginsiling niya, “ako ang pagkabanhaw kag ang kabuhi. Sia nga nagapakita sing pagtuo sa akon, bisan pa mapatay sia, magabalik sa kabuhi.” (Juan 11:25) Nagsiling man sia: “Ang tanan nga yara sa mga lulubngan [sa memorya sang Dios] magapamati sa iya [Jesus] tingog kag magaguwa.”—Juan 5:28, 29.
14. Bangod madula na ang kamatayon, ano nga mga butang ang dulaon?
14 Daku ang mangin kalipay sa bug-os nga duta kon ang mga grupo sang mga napatay paagisod nga mabanhaw agod magabuylog sa ila mga hinigugma! Wala na sing kolumna sang mga patay sa mga pamantalaan nga magadala sing kasubo sa mga maluwas. Sa baylo, mahimo nga baliskad ang matabo: amo ang mga pahibalo tuhoy sa bag-o nga mga binanhaw agod magdala sing kalipay sa mga nagahigugma sa ila. Gani wala na sing mga lubong, dalabukan para sa patay, mga crematorium, ukon mga sementeryo!
Isa ka Malinong Gid nga Kalibutan
15. Paano matuman sa pinakabug-os nga kahulugan ang tagna ni Miqueas?
15 Ang matuod nga kalinong sa tanan nga bahin sang kabuhi maagom. Ang mga inaway, mga sumalakdag sang mga inaway, kag ang paghimo sing mga hinganiban mangin mga butang sang nagligad. Ngaa? Bangod ang nagabahinbahin nga mga interes sang pungsod, tribo, kag rasa madula na. Nian, sa pinakabug-os nga kahulugan, “sila indi magbayaw sing espada, pungsod batok sa pungsod, kag indi na sila magtuon sing inaway.”—Miqueas 4:3.
16. Paano pat-uron sang Dios nga ang mga inaway mangin imposible na?
16 Mahimo nga daw makatilingala ini bangod sang uhaw sa dugo nga maragtas sang tawo sa pirme nga pag-ilinaway. Apang natabo ina bangod ang katawhan gingamhan sang tawo kag sang mga demonyo. Sa bag-ong kalibutan, sa idalom sang paggahom sang Ginharian, amo sini ang matabo: “Kari kamo, tan-awa ang mga binuhatan ni Jehova . . . Sia nagapatunong sang mga inaway tubtob sa ukbong sang duta. Ginabali niya ang pana kag ginautod niya ang bangkaw; ginasunog niya sa kalayo ang mga kangga [sa inaway].”—Salmo 46:8, 9.
17, 18. Sa bag-ong kalibutan, anong kaangtanan ang magaluntad sa ulot sang tawo kag sang mga sapat?
17 Ang tawo kag sapat magahidaitay man, subong amo sila anay sa Eden. (Genesis 1:28; 2:19) Ang Dios nagasiling: “Kag sa amo nga adlaw magapakigkatipan ako sa ila upod sa kasapatan sang latagon kag upod sa kapispisan sang langit kag upod sa mga butang nga nagasaug sa duta, kag . . . pahigdaon ko sila sa kalig-unan.”—Oseas 2:18.
18 Daw mangin ano ka daku ina nga paghidait? “Ang lobo magapuyo kaupod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila.” Indi na liwat ang mga sapat mangin katalagman sa tawo ukon sa ila kaugalingon. Bisan “ang leon magakaon sing dagami kaangay sang baka”!—Isaias 11:6-9; 65:25.
Ang Duta Nahimo nga Isa ka Paraiso
19. Ang duta himuon nga ano?
19 Ang bug-os nga duta himuon nga isa ka paraiso nga puluy-an para sa katawhan. Amo kon ngaa nanaad si Jesus sa isa ka tawo nga nagtuo sa iya: “Mangin kaupod ko ikaw sa Paraiso.” Ang Biblia nagasiling: “Ang kamingawan kag ang duta nga kigas magakasadya, kag ang desyerto magakalipay kag magapamulak subong sang rosa. . . . Kay ang mga tubig magaguwa sa kamingawan, kag ang mga ilig sa desyerto.”—Lucas 23:43; Isaias 35:1, 6.
20. Ngaa ang tiggulutom indi na liwat magpaantos sa katawhan?
20 Sa idalom sang Ginharian sang Dios, indi na liwat magutuman ang minilyon. “May bugana nga uyas sa duta; sa putukputukan sang kabukiran magahapayhapay ini.” “Ang kahoy sa latagon magapamunga, kag ang duta magapatubas, kag mangin malig-on sila sa ila duta.”—Salmo 72:16; Ezequiel 34:27.
21. Ano ang matabo sa pagkawalay puluy-an, mga slum, kag malain nga mga palibot?
21 Wala na sing kaimulon, walay puluy-an nga mga tawo, mga slum, ukon mga palibot nga madamo sing krimen. “Magapatindog sila sing mga balay kag puy-an sila; kag magatanum sila sing mga ulubasan kag magakaon sang bunga nila. Indi sila magapatindog kag iban ang magapuyo; kag indi sila magtanum kag iban ang magakaon.” “Magalingkod sila ang tagsa ka tawo sa idalom sang iya ubas kag sa idalom sang iya higuera, kag wala na sing magapahadlok sa ila.”—Isaias 65:21, 22; Miqueas 4:4.
22. Paano ginalaragway sang Biblia ang mga pagpakamaayo sang paggahom sang Dios?
22 Ang mga tawo pakamaayuhon sining mga butang, kag sing dugang pa, sa Paraiso. Ang Salmo 145:16 nagasiling: “Ginahumlad mo [Dios] ang imo kamot kag ginabusog ang handum sang tagsa ka butang nga buhi.” Indi katingalahan nga ang tagna sa Biblia nagasiling: “Ang mga mahagop magapanag-iya sang duta, kag magakalipay sila sa kabuganaan sang paghidait. . . . Ang mga matarong magapanag-iya sang duta, kag magapuyo sa sini sing dayon.”—Salmo 37:11, 29.
Pagtadlong sang Nagligad
23. Paano dulaon sang Ginharian sang Dios ang tanan nga pag-antos naton?
23 Dulaon sang paggahom sang Ginharian sang Dios ang tanan nga halit nga nahimo sa pamilya sang tawo sa nagligad nga anum ka libo ka tuig. Ang kalipay sa amo nga tion magalabaw sing daku sa pag-antos nga naeksperiensiahan sang katawhan. Ang kabuhi indi pagtublagon sang pagdumdom sa nagligad nga pag-antos. Ang makapalig-on nga mga panghunahuna kag mga hilikuton nga himuon sang katawhan sa adlaw-adlaw amat-amat nga magapanas sang masakit nga nagligad.
24, 25. (a) Ano ang gintagna ni Isaias nga matabo? (b) Ngaa mapat-od naton nga ang nagligad nga pag-antos indi na pagdumdumon?
24 Ang nagaulikid nga Dios nagasiling: “Ako nagatuga sing bag-ong mga langit [isa ka bag-ong langitnon nga panguluhan sa ibabaw sang katawhan] kag bag-ong duta [isa ka matarong nga katilingban sang tawo]; kag ang una nga mga butang indi na pagdumdumon, ukon mag-abot sa tagipusuon. Apang, magkasadya kamo, kag magkalipay sing dayon sa akon ginatuga.” “Ang bug-os nga duta nagapahuway kag malinong. Ang katawhan nagahinugyaw sa pag-amba.”—Isaias 14:7; 65:17, 18.
25 Gani paagi sa iya Ginharian, baliskaron sing bug-os sang Dios ang malain nga kahimtangan nga nagluntad sing tuman ka dugay. Tubtob sa walay katubtuban ipakita niya sa aton ang iya daku nga pag-ulikid paagi sa pagpaulan sing mga pagpakamaayo nga magatumbas sing labaw sa halit nga aton nabaton sang una. Ang nagligad nga mga kabudlayan nga naeksperiensiahan naton magaburon na, kon dumdumon pa naton ini tanan.
26. Ngaa tumbasan sang Dios ang aton pag-antos sang una?
26 Amo sina ang pagtumbas sang Dios sa pag-antos nga mahimo ginbatas naton sa sining kalibutan. Nahibaluan niya nga indi naton sala nga natawo kita nga dihimpit, kay napanubli naton ang pagkadihimpit gikan sa aton unang mga ginikanan. Indi naton sala nga natawo kita sa sataniko nga kalibutan, kay kon nagmatutom lamang si Adan kag si Eva, natawo kuntani kita sa isa ka paraiso. Gani upod ang dakung kaluoy tumbasan sang Dios sing labaw ang malain nga nagligad nga ginpaantos sa aton.
27. Ano nga mga tagna ang makatigayon sing matahom nga katumanan sa bag-ong kalibutan?
27 Sa bag-ong kalibutan, maeksperiensiahan sang katawhan ang kahilwayan nga gintagna sa Roma 8:21, 22: “Ang tinuga gid hilwayon sa kahiulipnan sang pagkamadinulunton kag makaagom sing mahimayaon nga kahilwayan sang mga anak sang Dios. Kay nahibaluan naton nga ang bug-os nga tinuga nagaugayong sa kasakit sing tingob tubtob karon.” Sa amo nga tion makita sang katawhan ang bug-os nga katumanan sang pangamuyo: “Magkari ang imo ginharian. Paghimuon ang imo kabubut-on, sa duta subong sang sa langit.” (Mateo 6:10) Ang matahom nga mga kahimtangan sa Paraiso nga duta magapabanaag sang mga kahimtangan sa langit.
[Mga Pamangkot sa Pagtinuon]
[Mga retrato sa pahina 23]
Sa bag-ong kalibutan, ang mga tigulang magabalik sa kapagsik sang pagkapamatan-on
[Retrato sa pahina 24]
Ang tanan nga balatian kag kasablagan dulaon sa bag-ong kalibutan
[Retrato sa pahina 25]
Sa bag-ong kalibutan, ang mga patay banhawon
[Retrato sa pahina 26]
‘Indi na sila magtuon sing inaway’
[Retrato sa pahina 27]
Ang mga tawo kag mga sapat magahidaitay sing bug-os sa Paraiso
[Retrato sa pahina 27]
‘Ihumlad sang Dios ang iya kamot kag busgon ang handum sang tagsa ka butang nga buhi’
[Retrato sa pahina 28]
Ang Ginharian sang Dios magatumbas sing labaw sa tanan nga pag-antos nga ginbatas naton
