Bahin 11

Ang Pundasyon sang Bag-ong Kalibutan nga Ginapasad Karon

1, 2. Sa katumanan sang tagna sa Biblia, ano ang makita naton nga nagakatabo?

 ANG makatilingala man karon amo ang kamatuoran nga ang pundasyon sang bag-ong kalibutan sang Dios ginatukod karon gid, samtang nagahuyang ang daan nga kalibutan ni Satanas. Makita naton nga ginatipon sang Dios ang katawhan gikan sa tanan nga kapungsuran kag ginapasad sila nga ­mangin pundasyon sang isa ka bag-ong katilingban sa duta nga sa indi madugay magatal-us sa magamo nga kalibutan karon. Sa Biblia, sa 2 Pedro 3:13, ining bag-ong katilingban ginatawag nga “bag-ong duta.”

² Ang tagna sang Biblia nagasiling man: “Sa ulihi nga mga adlaw [ang tion nga aton ginakabuhian karon] . . . , madamo nga katawhan ang magakadto kag magasiling: ‘Kari kamo, magataklad kita sa bukid ni Jehova [ang iya matuod nga pagsimba], . . . kag tudluan niya kita sang iya mga dalanon, kag magalakat kita sa iya mga banas.’ ”​—⁠Isaias 2:​2-3.

3. (a) Sa tunga nanday sin-o nagakatuman ang tagna ni Isaias? (b) Ano ang komento sa sini sang katapusan nga tulun-an sang Biblia?

³ Ina nga tagna nagakatuman na karon sa tunga sang mga nagasunod sa ‘mga dalanon sang Dios kag nagalakat sa iya mga banas.’ Ang katapusan nga ­tulun-an sang Biblia nagapatuhoy sa sining mahi­gugmaon sa paghidait nga internasyonal nga kati­lingban sang katawhan subong “isa ka dakung kadam-an . . . gikan sa tanan nga pungsod kag mga ­tribo kag mga katawhan kag mga hambal,” isa ka matuod nga bug-os globo nga paghiliutod nga nagaalagad  sa Dios nga may paghiusa. Kag ang Biblia nagasiling man: “Ini amo sila ang nagguwa sa dakung kapipit-an.” Kon sayuron, maluwas sila kon laglagon na ining malaut nga sistema sang mga butang.​—⁠Bugna 7:​9, 14; Mateo 24:⁠3.

Isa ka Matuod nga Internasyonal nga Paghiliutod

4, 5. Ngaa posible ang bug-os kalibutan nga paghiliutod sang mga Saksi ni Jehova?

⁴ Minilyon nga mga Saksi ni Jehova ang sinsero nga nagatinguha sa pagkabuhi nga nahisanto sa mga panudlo kag mga dalanon sang Dios. Ang ila paglaum sa kabuhi nga dayon ginapasad sa bag-ong kalibutan sang Dios. Paagi sa pagtuman sa kasuguan sang Dios sa ila adlaw-adlaw nga pagkabuhi, ginapakita nila ang ila kahanda sa pagpasakop sa iya paggahom sa karon kag sa bag-ong kalibutan. Bisan diin, walay sapayan sang ila nasyonalidad ukon rasa, isa lamang ka talaksan ang ila ginatuman​—⁠ang ginpahamtang sang Dios sa iya Pulong. Amo kon ngaa isa sila ka matuod nga internasyonal nga paghiliutod, isa ka bag-ong bug-os globo nga katilingban nga gintukod sang Dios.​—⁠Isaias 54:​13; Mateo 22:​37, 38; Juan 15:​9, 14.

⁵ Wala ginaangkon sang mga Saksi ni Jeho­va ang kadungganan sang ila tumalagsahon nga paghiliutod sa bug-os nga globo. Nahibaluan nila nga resulta ini sang gamhanan nga espiritu sang Dios nga nagapahulag sa katawhan nga nagasunod sa iya kasuguan. (Binuhatan 5:​29, 32; Galacia 5:​22, 23) Ang Dios ang nagahimo sini. Subong sang ginsiling ni Jesus, “ang indi mahimo sa mga tawo mahimo sa Dios.” (Lucas 18:27) Gani ang Dios nga nagpaposible sang nagapadayon nga uniberso amo man ang nagapaposible sang nagapadayon nga bag-ong kalibutan nga katilingban.

6. Ngaa matawag nga isa ka modernong milagro ang paghiliutod sang mga Saksi ni Jehova?

⁶ Sa amo, ang paggahom ni Jehova sa bag-ong kalibutan makita na karon sa pundasyon sang bag-ong kalibutan nga iya ginapasad. Kag sa isa ka kahulugan, ang nahimo na niya sa iya mga Saksi isa ka modernong milagro. Ngaa? Bangod gintukod niya ang mga Saksi ni Jehova nga mangin isa ka matuod nga bug-os kalibutan nga paghiliutod, nga indi mabungkag sang nagabahinbahin nga nasyonal, rasyal, ukon relihioso nga mga interes. Bisan pa minilyon ang kadamuon sang mga Saksi kag nagapuyo sila sa kapin sa 200 ka kadutaan, ginahugpong sila sa isa ka indi mabungkag nga higot. Ining bug-os kalibutan nga paghiliutod, nga tumalagsahon sa bug-os nga maragtas, isa matuod ka modernong milagro​—⁠nga ginahimo sang Dios.​—⁠Isaias 43:​10, 11, 21; Binuhatan 10:​34, 35; Galacia 3:⁠28.

Pagkilala sa Katawhan sang Dios

7. Paano siling ni Jesus makilala ang iya matuod nga mga sumulunod?

⁷ Paano mahibaluan sing dugang pa kon sin-o ang katawhan nga ginagamit sang Dios subong pundasyon para sa iya bag-ong kalibutan? Ti, sin-o ang nagatuman sang mga pulong ni Jesus sa Juan 13:​34, 35? Sia nagsiling: “Ako nagahatag sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay. Sa sini ang tanan nga tawo makahibalo nga kamo mga disipulo ko, kon maghigugmaanay kamo.” Ang mga Saksi ni Jehova nagapati sa mga pulong ni Jesus kag nagatuman sini. Subong ginapanugyan sang Pulong sang Dios, sila “may mainit nga gugma sa isa kag isa.” (1 Pedro 4:8) “Nagasul-ob [sila] sing gugma, kay amo ini ang himpit nga higot sang paghiusa.” (Colosas 3:14) Gani ang utudnon nga gugma amo ang “higot” nga nagahugpong sa ila sa bug-os nga kalibutan.

8. Paano ginapakilala sing dugang pa sang 1 Juan 3:​10-12 ang katawhan sang Dios?

⁸ Subong man, ang 1 Juan 3:​10-12 nagasiling: “Sa sini ginapahayag ang mga anak sang Dios kag ang mga anak sang Yawa: Ang bisan sin-o nga wala nagahimo sing matarong indi iya sang Dios, amo man ang wala nagahigugma sang iya utod. Kay amo ini ang mensahe nga nabatian ninyo kutob sa ginsuguran, nga maghigugmaanay kita; indi kaangay kay Cain, nga iya sang malauton kag nagpatay sang iya utod.” Sa amo, ang katawhan sang Dios isa ka bug-os globo nga paghiliutod nga wala sing kasingki.

Isa Pa ka Nagapakilala nga Tanda

9, 10. (a) Sa anong hilikuton makilala ang mga alagad sang Dios sa katapusan nga mga adlaw? (b) Paano gintuman sang mga Saksi ni Jehova ang Mateo 24:​14?

⁹ May isa pa ka paagi nga makilala ang mga alagad  sang Dios. Sa iya tagna nahanungod sa katapusan sang kalibutan, madamo nga butang ang ginsambit ni Jesus nga magatanda sining panahon subong katapusan nga mga adlaw. (Tan-awa ang Bahin 9.) Ang isa ka sadsaran nga bahin sining ­tagna ginasambit sa iya ginpamulong sa Mateo 24:​14: “Iwali ining maayong balita sang ginharian sa bug-os nga kalibutan, subong panaksi sa tanan nga kapungsuran; kag ugaling magaabot ang katapu­san.”

¹⁰ Nakita bala naton nga ginatuman ina nga tagna? Huo. Kutob sang magsugod ang katapusan nga mga adlaw sang 1914, ang mga Saksi ni Jehova nagabantala sing maayong balita sang Ginharian sa bug-os nga kalibutan sa paagi nga ginsugo ni Jesus, nga amo, sa mga puluy-an sang katawhan. (Mateo 10:​7, 12; Binuhatan 20:20) Minilyon ka Saksi ang nagaduaw sa katawhan sa tagsa ka pungsod agod hambalon sila nahanungod sa bag-ong kalibutan. Amo ini kon ngaa nabaton mo ining brosyur, kay ang hilikuton sang mga Saksi ni Jehova nagalakip sang pag-imprinta kag pagpanagtag sing binilyon ka literatura nahanungod sa Ginharian sang Dios. May kilala ka bala nga nagabantala sang Ginharian sang Dios sa balay kag balay sa bug-os nga kalibutan? Kag ginapakita sang Marcos 13:​10 nga ining pagbantala kag pagpanudlo nga hilikuton dapat himuon “anay,” ugaling magaabot ang katapusan.

Pagsabat sa Ikaduha nga Dakung Hulusayon

11. Ano pa ang ginahimo sang mga Saksi ni Jehova paagi sa pagpasakop sa paggahom sang Dios?

¹¹ Sa pagsunod sa kasuguan kag mga prinsipio sang Dios, ang mga Saksi ni Jehova nagahimo sing isa pa ka butang. Ginapakita nila nga si Satanas butigon sang magsiling sia nga ang mga tawo indi magmatutom sa Dios sa idalom sang pagtilaw, sa amo ginasabat nila ang ikaduha nga dakung hulusayon, nga nagadalahig sang integridad sang tawo. (Job 2:​1-5) Subong isa ka katilingban sang minilyon ka katawhan gikan sa tanan nga pungsod, ang mga Saksi nagapakita, subong isa ka hubon, sing katutom sa paggahom sang Dios. Bisan pa sila dihimpit nga mga tawo, ginasakdag nila ang bahin sang Dios sa hulusayon sang bug-os uniberso nga pagkasobe­rano, walay sapayan sang pag-ipit ni Satanas.

12. Sa ila pagtuo, sin-o ang ginailog sang mga Saksi?

¹² Sa karon, ining minilyon ka Saksi ni Jehova nagadugang pa sa pamatuod sang malaba nga linya sang iban pa nga mga Saksi sang una nga nagmatutom sa Dios. Ang iban sadto amo sanday Abel, Noe, Job, Abraham, Sara, Isaac, Jacob, Debora, Rut, David, kag Daniel, sa pagsambit sing pila lamang. (Hebreo, kapitulo 11) Subong ginasiling sang Biblia, isa sila ka ‘dakung panganod sang matutom nga mga saksi.’ (Hebreo 12:1) Ini sila kag ang iban pa lakip ang mga disipulo ni Jesus naghupot sing integridad sa Dios. Kag si Jesus mismo naghatag sing labing daku nga huwaran paagi sa paghupot sing himpit nga integridad.

13. Ano nga mga pulong ni Jesus nahanungod kay Satanas ang nagmatuod?

¹³ Ginapamatud-an sini nga ang ginsiling ni Jesus nahanungod kay Satanas sa relihioso nga mga lider matuod: “Apang karon nagatinguha kamo sa pagpatay sa akon, isa ka tawo nga nagsugid sa inyo sang kamatuoran nga akon nabatian sa Dios. . . . Kamo iya sang inyo amay nga Yawa, kag luyag ninyo himuon ang mga kailigbon sang inyo amay. Sia manugpatay kutob sa ginsuguran, kag wala nagatindog sa kamatuoran, bangod nga wala sing kamatuoran sa iya. Kon nagabutig sia, nagapamulong sia suno sa iya kinaugali, kay butigon sia kag amay sang kabutigan.”​—⁠Juan 8:​40, 44.

Ano ang Imo Pilion?

14. Ano ang nagakatabo sa pundasyon sang bag-ong kalibutan karon?

¹⁴ Ang pundasyon sang bag-ong kalibutan nga ginatukod karon sang Dios sa internasyonal nga katilingban sang mga Saksi ni Jehova nagabakod kag nagabakod. Tagsa ka tuig ginatos ka libo ka katawhan ang nagagamit sang ila kahilwayan sa pagbuot, pasad sa sibu nga ihibalo, sa pagbaton sa paggahom sang Dios. Nangin bahin sila sang bag-ong kalibutan nga katilingban, nagasakdag sang bahin sang Dios sa hulusayon sang bug-os uniberso nga pagka­soberano, kag nagapamatuod nga butigon si Satanas.

15. Anong hilikuton sa pagpain ang ginahimo karon ni Jesus sa aton adlaw?

¹⁵ Sa pagpili sa paggahom sang Dios, kalipikado sila nga ipahamtang sa “tuo” ni Cristo samtang ginapain niya “ang mga karnero” gikan sa “mga kanding.”  Sa iya tagna nahanungod sa katapusan nga mga adlaw, si Jesus nagtagna: “Tipunon sa atubangan niya ang tanan nga pungsod, kag ­painpainon niya sila, subong sang manugbantay nga ­nagapain sang mga karnero sa mga kanding. Kag ipahamtang niya ang mga karnero sa iya tuo, apang ang mga kanding sa wala.” Ang mga karnero amo ang mapainubuson nga mga tawo nga nagapakig-upod kag ­nagasakdag sa kauturan ni Cristo, nagapasakop sa paggahom sang Dios. Ang mga kanding amo ang batinggilan nga mga tawo nga nagasikway sa kauturan ni Cristo kag wala nagasakdag sa paggahom sang Dios. Ano ang resulta? Si Jesus nagsiling: “Ini sila [mga kanding] magakadto sa silot nga walay katapusan, apang ang mga matarong [mga karnero] sa kabuhi nga walay katapusan.”​—⁠Mateo 25:​31-46.

16. Ano ang dapat mo himuon kon luyag mo magpuyo sa Paraiso nga magaabot?

¹⁶ Sa pagkamatuod, ang Dios nagaulikid sa aton! Sa dili na gid madugay iaman niya ang makalilipay nga dutan-on nga paraiso. Luyag mo bala magpuyo sa sinang Paraiso? Kon amo, ipakita ang imo apresasyon sa mga aman ni Jehova paagi sa pagtuon nahanungod sa iya kag pag-aplikar sang imo natun-an. “Pangitaa ninyo si Jehova, samtang nga makita pa sia. Tawga ninyo sia samtang nga malapit pa sia. Magbiya ang malauton sang iya dalanon, kag ang makahalalit nga tawo sang iya mga painuino; kag magbalik sia kay Jehova, nga magakaluoy sa iya.”​—⁠Isaias 55:​6, 7.

17. Ngaa indi dapat mag-uyang sing tion sa pagpili kon sin-o ang alagdon?

¹⁷ Wala sing tion nga dapat uyangan. Ang katapusan sining daan nga sistema tuman na kalapit. Ang Pulong sang Dios nagalaygay: “Dili ninyo paghigugmaon ang kalibutan ukon ang mga butang nga yara sa kalibutan. Kon ang bisan sin-o nagahigugma sang kalibutan, ang gugma sang Amay wala sa iya . . . Dugang pa, ang kalibutan nagataliwan kag ang kailigbon sini, apang ang nagahimo sang kabubut-on sang Dios magapabilin sing dayon.”​—⁠1 Juan 2:​15-17.

18. Paagi sa anong paghikot mapaabot mo nga may pagsalig ang pagkabuhi sa matahom nga bag-ong kalibutan sang Dios?

¹⁸ Ang katawhan sang Dios ginahanas na karon para sa kabuhi nga walay katapusan sa bag-ong kalibutan. Ginatun-an nila ang espirituwal kag iban pa nga mga kalantip nga kinahanglanon sa paghimo sing isa ka paraiso. Ginapalig-on namon kamo nga pilion ang Dios subong Manuggahom kag sakdagon ang nagaluwas-kabuhi nga hilikuton nga ginapahimo niya karon sa bug-os nga duta. Tun-i ang Biblia upod sa mga Saksi ni Jehova, kag kilalaha ang Dios nga nagaulikid gid sa imo kag magatapos sang pag-antos. Sa sining paagi ikaw man mangin bahin sang pundasyon sang bag-ong kalibutan. Nian may pagsalig nga mapaabot mo ang pagtigayon sang kahamuot sang Dios kag magkabuhi sing dayon sa sinang matahom nga bag-ong kalibutan.

[Mga Pamangkot sa Pagtinuon]

[Retrato sa pahina 31]

Ang mga Saksi ni Jehova may matuod nga internasyonal nga paghiliutod

 [Retrato sa pahina 32]

Ang pundasyon sang bag-ong kalibutan sang Dios ginapasad na karon