Bahin 7

Ano ang Nangin Resulta sang Pagrebelde?

1-3. Paano ginpamatud-an sang panahon nga husto si Je­hova?

 SA HULUSAYON tuhoy sa kinamatarong sang Dios sa paggahom, ano ang resulta sang paggahom sang tawo nga napain sa Dios sa sulod sining mga siglo? Napamatud-an bala sang mga tawo nga mas maayo sila nga mga manuggahom sang sa Dios? Kon maghukom kita pasad sa rekord sang kapintas sang tawo sa tawo, wala sa pagkamatuod.

² Sang ginsikway sang aton unang mga ginikanan ang paggahom sang Dios, nagsunod ang kalamidad. Nagdala sila sing pag-antos sa ila kaugalingon kag sa tanan nga pamilya sang tawo nga naghalin sa ila. Kag wala sila sing mabasol kundi ang ila kaugalingon. Ang Pulong sang Dios nagasiling: “Naghikot sila sing malaglagon; sila indi niya mga anak, ang depekto ila.”​—⁠Deuteronomio 32:⁠5.

³ Ginpakita sang maragtas ang pagkahusto sang paandam sang Dios kay Adan kag kay Eva nga kon magguwa sila sa latid sang Dios, magaluya sila kag sa ulihi mapatay. (Genesis 2:​17; 3:19) Nagguwa sila matuod sa paggahom sang Dios, kag sang ulihi nagluya sila kag napatay.

4. Ngaa natawo kita tanan nga dihimpit, nagabalatian kag nagakapatay?

⁴ Ang natabo sa tapos sadto sa tanan nila nga mga anak amo ang ginapaathag sang Roma 5:​12:  “Paagi sa isa ka tawo [si Adan, ang ulo sang pamilya sang katawhan] nagsulod ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo.” Gani sang magrebelde ang aton unang mga ginikanan batok sa pagkamanugtatap sang Dios, sila nangin may depekto nga mga makasasala. Nahisuno sa kasuguan sang genetiko, ang nagresulta nga dikahimpitan amo lamang ang ila napaliton sa ila mga anak. Amo kon ngaa kita tanan natawo nga may depekto, nagabalatian kag nagakapatay.

5, 6. Ano ang ginpakita sang maragtas nahanungod sa mga panikasog sang tawo sa pagdala sing matuod nga paghidait kag kabuganaan?

⁵ Madamo nga siglo ang nagligad. Ang mga emperyo nag-abot kag nagtaliwan. Ang tagsa ka mahunahuna nga sahi sang panguluhan natilawan na. Apang, sa liwat kag liwat, natabo ang makahaladlok nga mga butang sa pamilya sang tawo. Sa tapos sang anum ka libo ka tuig, ang isa magahunahuna nga ang mga tawo dapat nag-uswag na kuntani tubtob sa punto nga makatukod sing paghidait, hustisya, kag kabuganaan sa bug-os nga duta kag sa karon dapat nga napalambo na nila sing bug-os ang positibo nga mga kinaiya sang kalulo, kaluoy, kag pagbuligay.

⁶ Apang, ang kabaliskaran sini amo ang natabo. Wala sing bisan ano nga sahi sang tawhanon nga panguluhan nga natukod ang nakadala sing matuod nga paghidait kag kabuganaan para sa tanan. Sa sining ika-20 nga siglo lamang, nakita naton ang sistematiko nga pagpamatay sa minilyon sa tion sang Holocaust kag ang pagpamatay sa kapin sa 100 milyones sa mga inaway. Sa aton tion dimaisip nga katawhan ang ginpaantos, ginpatay, kag ginbilanggo bangod sang pagkapanatiko kag politikal nga mga kinatuhayan.

Ang Kahimtangan Karon

7. Paano malaragway ang kahimtangan sang pamilya sang tawo karon?

⁷ Dugang pa, binagbinaga ang kabilugan nga kahimtangan sang pamilya sang tawo karon. Lapnag ang krimen kag kasingki. Ang pag-abuso sa droga isa ka epidemya. Ang mga balatian sa sekso nga ginapaliton sang paghuliray lapnag sa kalibutan. Ang ginakahadlukan nga AIDS nga balatian nagaapektar sa minilyon ka tawo. Tignapulo ka milyon ka tawo ang nagakapatay sa gutom ukon balatian kada tuig, samtang ang pila lamang may daku nga kamanggaran. Ginadagtaan kag ginaguba sang mga tawo ang duta. Ang kabuhi sang pamilya kag ang moral nga mga talaksan nalusod bisan diin. Sa pagkamatuod, ginapakita sang kabuhi karon ang malaut nga paggahom sang ‘dios sining kalibutan,’ si Satanas. Ang kalibutan nga iya ginagamhan wala sing gugma, mapintas, kag malaut gid.​—⁠2 Corinto 4:⁠4.

8. Ngaa indi naton matawag nga matuod nga kauswagan ang mga nahimuan sang katawhan?

⁸ Nagtugot ang Dios sing bastante nga tion agod ang mga tawo makadangat sa putukputukan sang ila pag-uswag sa siensia kag sa materyal. Apang isa bala ka matuod nga pag-uswag kon ang baslay kag pana ginbuslan sang mga machine gun, mga tangke, mga jet bomber, kag mga nuklear nga misil? Pag-uswag bala kon ang mga tawo makalakbay sa espasyo apang indi makapuyo sing mahidaiton sa duta? Pag-uswag bala kon ang mga tawo nahadlok sa paglakat sa mga  kalye kon gab-i, ukon bisan kon adlaw sa iban nga mga duog?

Kon Ano ang Ginpakita sang Tion

9, 10. (a) Ano ang maathag nga ginpakita sang nagligad nga mga siglo? (b) Ngaa indi pagkuhaon sang Dios ang kahilwayan sa pagbuot?

⁹ Ang ginpakita sang pagtilaw sang mga siglo sang tion amo nga indi mahimo nga tuytuyan sang mga tawo ang ila kaugalingon nga mga tikang sing madinalag-on nga napain sa paggahom sang Dios. Indi nila mahimo ini subong nga indi sila mabuhi kon indi sila magkaon, mag-inum, kag magginhawa. Ang pamatuod maathag: Gindesinyo kita nga nagasandig sa pagtuytoy sang aton Manunuga sing subong kapat-od nga gintuga kita nga nagasandig sa kalan-on, tubig, kag hangin.

¹⁰ Sa pagtugot sa kalautan, dimasuay nga ginpakita sang Dios ang masubo nga mga resulta sang pag-abuso sa kahilwayan sa pagbuot. Kag ang kahilwayan sa pagbuot isa gid ka hamili nga dulot amo kon ngaa nga sa baylo nga kuhaon ini sa mga tawo ginpakita sa ila sang Dios kon ano ang buot silingon sang pag-abuso sa sini. Ang Pulong sang Dios nagahambal sing kamatuoran sang nagasiling ini: “Indi iya sang tawo nga nagalakat bisan ang pagtuytoy sang iya tikang.” Matuod man ini sang nagasiling ini: “Ang tawo naggahom sa tawo sa iya kasamaran.”​—⁠Jeremias 10:​23; Manugwali 8:⁠9.

11. May porma bala sang paggahom sang tawo nga nakadula sang pag-antos?

¹¹ Ang pagtugot sang Dios sa paggahom sang tawo sing anum ka libo ka tuig mabaskog nga nagailustrar nga indi mapunggan sang tawo ang pag-antos. Wala niya ini mahimo sa bisan ano nga tion. Halimbawa, sang panahon ni Hari Solomon sang Israel, walay sapayan sang iya tanan nga kaalam, manggad, kag gahom, wala niya malubad ang pag-antos nga resulta sang paggahom sang tawo. (Manugwali 4:​1-3) Sa aton man adlaw ang mga lider sang kalibutan, walay sapayan sang pinakaulihi nga mga pag-uswag sa teknolohiya, indi makasarang sa pagdula sang pag-antos. Malain pa, ginpakita sang maragtas nga ginpagrabe sang mga tawo nga napain sa paggahom sang Dios ang pag-antos sa baylo nga dulaon ini.

Ang Masangkad nga Pagtamod sang Dios

12-14. Anong masangkad nga mga benepisyo ang magaabot bangod sang pagtugot sang Dios sa pag-antos?

¹² Ang pagtugot sang Dios sa pag-antos nangin masakit para sa aton. Apang masangkad ang iya pagtamod, kay nahibaluan niya nga mangin maayo ang mga resulta sa ulihi. Ang pagtamod sang Dios makahatag sing kaayuhan sa mga tinuga, indi lamang sa pila ka tuig ukon pila ka libo, kundi sa minil­yon ka tuig, huo, tubtob sa walay katubtuban.

¹³ Kon sa palaabuton mag-utwas ang kahim­tangan diin sayop nga gamiton sang isa ang iya kahilwayan sa pagbuot bilang pagduhaduha sa paagi sang pagpanghikot sang Dios, indi na kinahanglan nga hatagan sia sing tion sa pagpamatuod sang iya mga pagtamod. Bangod nahatagan na niya ang mga rebelde sing linibo ka tuig, nakatukod ang Dios sing legal nga talaksan nga sarang maaplikar tubtob sa walay katubtuban bisan diin sa uniberso.

 ¹⁴ Bangod gintugutan ni Jehova ang kalautan kag pag-antos sa sining tion, mapamatud-an na sing daku nga wala sing bisan ano nga indi nahisanto sa iya ang magamadinalag-on. Indi maduhaduhaan nga mapakita na sini nga wala sing independiente nga plano sang mga tawo ukon sang espiritu nga mga tinuga ang makadala sing dayon nga mga benepisyo. Busa, sa amo nga tion mapakamatarong sing bug-os ang Dios sa madasig nga pagdugmok sa bisan sin-o nga rebelde. “Ang mga malauton laglagon niya.”​—⁠Salmo 145:​20; Roma 3:⁠4.

[Mga Pamangkot sa Pagtinuon]

[Retrato sa pahina 15]

Sa tapos ginpili sang aton unang mga ginikanan ang pagkaindependiente gikan sa Dios, sila sa ulihi nagtigulang kag napatay

[Retrato sa pahina 16]

Ang paggahom sang tawo nga napain sa Dios napamatud-an nga malaglagon

[Credit Line]

Laragway nga kuha sang U.⁠S. Coast Guard