Bahin 2

Isa ka Duta nga Wala sing Pag-antos

1, 2. Ano ang tuhay nga pagtamod sang madamo?

 APANG, minilyon ka tawo sa bug-os nga kali­butan ang may tuhay gid nga pagtamod. Ginapanan-aw nila ang isa ka matahom nga palaabuton para sa katawhan. Nagasiling sila nga diri gid sa duta magaluntad sa indi madugay ang isa ka kalibutan nga wala gid sing kalautan kag pag-antos. Nagasalig sila nga ang kalautan madula sa indi madugay kag matukod ang isa ka bag-o sing bug-os nga kalibutan. Nagasiling pa gani sila nga ang pundasyon sining bag-ong kalibutan ginapasad na karon gid!

² Ining katawhan nagapati nga sa ­bag-ong ka­libutan wala sing inaway, kapintas, krimen, inhustisya, kag kaimulon. Mangin isa ini ka kalibutan nga wala sing balatian, kasubo, mga luha, kag kamatayon pa gani. Sa amo nga tion ang katawhan magauswag padulong sa kahimpitan kag magakabuhi sing dayon sa kalipay sa dutan-on nga paraiso. Ti, bisan  ang mga napatay pagabanhawon kag may kahigayunan nga mabuhi sing dayon!

3, 4. Ngaa masinaligon gid ining mga tawo sa ila pagtamod?

³ Ini nga pagtamod tuhoy sa palaabuton isa lamang bala ka damgo, isa lamang bala ka paglaum sa isa ka butang nga mahimo gid indi matabo? Indi, indi gid. Napasad ini sa malig-on nga pagtuo nga ining nagapakari nga Paraiso indi malikawan. (Hebreo 11:1) Ngaa pat-od gid sila? Bangod ginsaad ini sang labing gamhanan nga Manunuga sang uni­berso.

⁴ Tuhoy sa mga saad sang Dios, ang Biblia nagasiling: “Wala sing isa ka pulong gikan sa tanan nga maayong mga pulong nga ginpamulong sa inyo ni Jehova nga inyo Dios ang napaslawan. Sila tanan nagmatuod sa inyo. Wala sing isa ka pulong sa sini ang napaslawan.” “Ang Dios indi tawo nga magbutig sia . . . Nasiling bala niya kag indi niya paghimuon, kag napamulong bala niya kag indi niya pagtumanon?” “Si Jehova sang mga kasoldadusan nagsumpa, nga nagasiling: ‘Suno sa akon ginpainuino, amo ini ang mahanabo; kag suno sa akon gintuyo, amo ini ang mahimo.’ ”​—⁠Josue 23:​14; Numeros 23:​19; Isaias 14:⁠24.

5. Anong mga pamangkot ang dapat masabat?

⁵ Apang, kon ang katuyuan sang Dios amo ang magtukod sing isa ka dutan-on nga paraiso nga wala sing pag-antos, ngaa gintugutan niya nga matabo ang malain nga mga butang? Ngaa naghulat sia sing anum ka libo ka tuig tubtob karon sa pagtadlong sang sayop? Ini bala tanan nga siglo sang pag-antos nagapakita nga ang Dios wala gid nagaulikid sa aton, ukon nga wala sia nagaluntad?

[Mga Pamangkot sa Pagtinuon]