Kon Ngaa Ginatugutan sang Dios ang Pag-antos
Bahin 6
Kon Ngaa Ginatugutan sang Dios ang Pag-antos
1, 2. Paano ginguba sang aton unang mga ginikanan ang maayo nga panugod nga ginhatag sang Dios sa ila?
ANO ang malain nga natabo? Ano ang natabo nga naghalit sang maayong panugod nga ginhatag sang Dios sa aton unang mga ginikanan sa Paraiso sang Eden? Ngaa, sa baylo sang paghidait kag kalinong sa Paraiso, nagluntad ang kalautan kag pag-antos sa linibo ka tuig?
2 Ang rason amo nga gin-abusuhan ni Adan kag ni Eva ang ila kahilwayan sa pagbuot. Wala nila ginbinagbinag ang kamatuoran nga sila wala gintuga nga magmadinalag-on nga nahamulag sa Dios kag sa iya kasuguan. Namat-od sila nga mangin independiente sa Dios, nagahunahuna nga magapauswag ini sang ila kabuhi. Gani nagguwa sila sa ginbutang sang Dios nga mga latid sang kahilwayan sa pagbuot.—Genesis, kapitulo 3.
Ang Hulusayon sa Bug-os Uniberso nga Pagkasoberano
3-5. Ngaa wala na lang paglaglaga sang Dios si Adan kag si Eva kag nagsugod liwat?
3 Ngaa wala na lang paglaglaga sang Dios si Adan kag si Eva kag nagsugod liwat paagi sa isa pa ka tawhanon nga mag-asawa? Bangod ang iya bug-os uniberso nga pagkasoberano, kon sayuron, ang iya indi makuha nga kinamatarong sa paggahom, ginhangkat.
4 Ang pamangkot amo: Sin-o ang may kinamatarong sa paggahom, kag kay sin-o paggahom ang husto? Ang iya pagkalabing gamhanan kag Pagkamanunuga sang tanan nga tinuga nagahatag sa Dios sing kinamatarong sa paggahom sa ila. Sanglit sia ang labing maalam, ang iya paggahom amo ang labing maayo para sa tanan nga tinuga. Apang ang paggahom sang Dios ginhangkat karon. Subong man, may diperensia bala sa iya gintuga—ang tawo? Usisaon naton sa ulihi kon paano nadalahig ang pamangkot tuhoy sa integridad sang tawo.
5 Bangod nagpain ang tawo sa Dios, ang isa pa ka pamangkot ginpahangop: Magaayuhan bala sing labi pa ang mga tawo kon wala ginagamhan sang Dios? Pat-od nga nahibaluan sang Manunuga ang sabat, apang ang isa ka pat-od nga paagi agod mahibaluan ini sang mga tawo amo ang pagtugot sa ila sang bug-os nga kahilwayan nga ginahandum nila. Ginpili nila ina nga dalanon sing kinabubut-on, gani gintugutan ini sang Dios.
6, 7. Ngaa gintugot sang Dios sa mga tawo ang bug-os nga kahilwayan sing tuman kalawig?
6 Paagi sa pagtugot sa mga tawo sing bastante nga tion sa pag-eksperimento sa bug-os nga kahilwayan, mapamatud-an sang Dios sing dayon kon bala magaayuhan ang mga tawo sa idalom sang paggahom sang Dios ukon sang ila kaugalingon. Kag ang tion nga gintugot dapat may bastante nga kalawigon agod tugutan ang mga tawo nga makalab-ot sa ila ginakabig nga putukputukan sang ila politikal, industriyal, sientipiko, kag medikal nga mga katigayunan.
7 Busa, gintugot sang Dios sa tawo ang bug-os nga kahigayunan tubtob sa aton adlaw karon agod ipakita sing maathag kon bala ang paggahom sang tawo nga nahamulag sa iya magamadinalag-on. Sa amo ang tawo makapili sa ulot sang pagkamaluluy-on kag kapintas, sa ulot sang gugma kag dumot, sa ulot sang pagkamatarong kag pagkadimatarong. Apang gin-atubang man sia sang mga resulta sang iya pagpili: kaayuhan kag paghidait ukon kalautan kag pag-antos.
Pagrebelde sang Espiritu nga mga Tinuga
8, 9. (a) Paano nagdabdab ang pagrebelde sa duog sang mga espiritu? (b) Sin-o pa luwas kay Adan kag kay Eva ang naimpluwensiahan ni Satanas sa pagrebelde?
8 May isa pa ka butang nga dapat binagbinagon. Indi lamang ang aton unang mga ginikanan ang nagrebelde sa paggahom sang Dios. Apang sin-o pa ang nagakabuhi sadto? Amo ang espiritu nga mga tinuga. Antes gintuga sang Dios ang mga tawo, nagtuga sia sing mas mataas nga porma sang kabuhi, ang madamo nga mga anghel, agod magpuyo sa langit. Sila man gintuga nga may kahilwayan sa pagbuot kag may kinahanglanon man nga magpasakop sa paggahom sang Dios.—Job 38:7; Salmo 104:4; Bugna 5:11.
9 Ginapakita sang Biblia nga ang pagrebelde una nga nagdabdab sa duog sang mga espiritu. Ginhandum sang isa ka espiritu nga tinuga ang bug-os nga kahilwayan. Luyag pa gani niya nga simbahon sia sang mga tawo. (Mateo 4:8, 9) Ining espiritu nga rebelde amo ang nag-impluwensia kay Adan kag kay Eva nga magrebelde, nagbutangbutang nga ang Dios may ginadingot sa ila nga isa ka maayong butang. (Genesis 3:1-5) Gani ginatawag sia nga Yawa (Manugpasipala) kag Satanas (Manugpamatok). Sang ulihi, ginhaylo niya ang iban nga espiritu nga mga tinuga nga magrebelde man. Gintawag sila nga mga demonyo.—Deuteronomio 32:17; Bugna 12:9; 16:14.
10. Ano ang resulta sang pagrebelde sang mga tawo kag sang espiritu nga mga tinuga?
10 Bangod nagrebelde ang mga tawo sa Dios, ginpadayag nila ang ila kaugalingon sa impluwensia ni Satanas kag sang iya mga demonyo. Amo kon ngaa ginatawag sang Biblia si Satanas nga “dios sining sistema sang mga butang,” nga “nagbulag sa mga painuino sang mga ditumuluo.” Busa, ang Pulong sang Dios nagasiling nga “ang bug-os nga kalibutan yara sa gahom sang isa nga malauton.” Si Jesus mismo nagtawag kay Satanas nga “manuggahom sining kalibutan.”—2 Corinto 4:4; 1 Juan 5:19; Juan 12:31.
Duha ka Hulusayon
11. Tuhoy sa anong hulusayon ginhangkat ni Satanas ang Dios?
11 Nagpautwas si Satanas sing isa pa ka hulusayon nga naghangkat sa Dios. Sa epekto, nagsumbong sia nga nagsala ang Dios sa paagi nga gingamit Niya sa pagtuga sa mga tawo kag nga wala sing isa nga magahandum sa paghimo sing husto kon pabudlayan. Sa kamatuoran, nangangkon sia nga kon tilawan sila pakamalauton pa gani nila ang Dios. (Job 2:1-5) Sa sining paagi ginduhaduhaan ni Satanas ang integridad sang mga tawo nga tinuga.
12-14. Paano ipahayag sang panahon ang kamatuoran tuhoy sa duha ka hulusayon nga ginbangon ni Satanas?
12 Busa, nagtugot ang Dios sing bastante nga tion agod makita sang tanan intelihente nga mga tinuga kon paano malubad ini nga hulusayon subong man ang hulusayon tuhoy sa pagkasoberano sang Dios. (Ipaanggid ang Exodo 9:16.) Ang mga hitabo sa maragtas sang tawo magapahayag sang kamatuoran sa sining duha ka hulusayon.
13 Una sa tanan, ano ang ipahayag sang panahon tuhoy sa hulusayon sang bug-os uniberso nga pagkasoberano, ang pagkahusto sang paggahom sang Dios? Mas maayo bala maggahom ang mga tawo sa ila kaugalingon sang sa Dios? May yara bala bisan ano nga sistema sang paggahom sang tawo nga napain sa Dios nga makatukod sing isa ka malipayon nga kalibutan nga wala sing inaway, krimen, kag inhustisya? May yara bala nga makadula sang kaimulon kag makahatag sing kabuganaan para sa tanan? May yara bala nga makadaug sa balatian, katigulangon, kag kamatayon? Ang paggahom sang Dios gindesinyo sa paghimo sina tanan.—Genesis 1:26-31.
14 Tuhoy sa ikaduha nga hulusayon, ano ang ipahayag sang panahon tuhoy sa bili sang tawhanon nga tinuga? Nagsala bala ang Dios sa paagi nga gingamit niya sa pagtuga sa mga tawo? May yara bala sa ila nga magahimo sing husto nga butang sa idalom sang pagtilaw? May katawhan bala nga magapakita nga ang luyag nila amo ang paggahom sang Dios sa baylo sang independiente nga paggahom sang tawo?
[Mga Pamangkot sa Pagtinuon]
[Retrato sa pahina 13]
Nagtugot ang Dios sing tion agod makadangat ang mga tawo sa putukputukan sang ila katigayunan
[Credit Line]
Shuttle: Ginpasad sa laragway nga kuha sang NASA
