Ang Ginharian nga “Indi Malaglag”
Kapitulo 10
Ang Ginharian nga “Indi Malaglag”
1, 2. (a) Ano nga kamatuoran ang ginapadaku sa kada adlaw sang mga hitabo sa kalibutan, kag paano? (b) Ano ang lamang nga solusyon?
ANG mga hitabo sa kalibutan sa kada adlaw nagapadaku sa kamatuoran nga ang mga tawo wala makasapo sing kalipay sa pagsikway sa pagkasoberano ni Jehova kag, sa baylo, nagtinguha sa paggahom sa ila kaugalingon. Wala sing sistema sang tawhanon nga pangulohan ang nakahatag sing palareho nga kaayuhan sa katawhan. Bisan pa napauswag sang mga tawo ang ila sientipiko nga ikasarang nga wala sing katulad, wala nila madula ang sala, malandas ang balatian kag ang kamatayon, wala bisan sa isa sang ila mga sakop. Sa kabaliskaran, ang mga pungsod nagpadayon sa pag-imbento sing bag-o kag kapin ka makahaladlok nga mga hinganiban. Ang kriminal nga kasingki nagbugana. Ang teknolohiya, kakagod kag pagkawala sing hinalung-ong nagdagta tanan sa duta, tubig kag hangin. Ang nagatimbuok nga implasyon kag ang pagkawala sing trabaho nagpabudlay gid para sa madamo sa pagtigayon sing mga kinahanglanon sang kabuhi. Wala na sing paglaum ang mga tawo nga makaguwa gikan sa sining kahimtangan.—Manugw. 8:9.
2 Ano ang sabat? Amo ang Ginharian sang Dios, nga gintudlo ni Jesus nga ipangamuyo sang iya mga sumulunod. (Mat. 6:9, 10) Daw ano kita ka mapasalamaton nga ang paumpaw nga dalhon sini tuman na kalapit karon!
3. (a) May kaangtanan sa sining Ginharian, ano ang natabo sa langit sang 1914 C.E.? (b) Ngaa importante yadto sa aton?
3 Sugod pa sang 1914 C.E., ang Ginharian sang Dios sa mga kamot ni Jesucristo nagpanghikot na. * Sadto nga tuig ang mga hitabo nga nakita ni Daniel sa matagnaon nga palanan-awon aktuwal nga natabo sa langit. Ang “Dumaan sang mga Adlaw,” si Jehova nga Dios, naghatag sa Anak sang tawo, si Jesucristo, sing “pagbulut-an kag himaya kag ginharian, agod nga ang tanan nga katawhan, mga pungsod kag mga hambal mag-alagad sa iya.” Nagreport tuhoy sa sini nga palanan-awon, si Daniel nagsulat: “Ang iya pagbulut-an dayon nga pagbulut-an nga indi magtaliwan, kag ang iya ginharian indi malaglag.” (Dan. 7:13, 14) Paagi sa sining Ginharian pahanabuon sang Dios nga ang mga mahigugmaon sa pagkamatarong makaagom sing dimaisip nga maayong mga butang nga iya gintuyo sang ginbutang niya ang aton unang tawhanon nga mga ginikanan sa Paraiso.
4. Interesado gid kita sa anong mga detalye sang Ginharian, kag ngaa?
4 Ang matutom nga mga sakop sang Ginharian interesado gid sa balayan kag sa pagpanghikot sining pangulohan. Luyag nila mahibaluan kon ano ang ginahimo sini karon, kon ano ang himuon sini sa palaabuton kag kon ano ang ginakinahanglan sa ila. Ginausisa nila ini sing maayo, kag samtang ginahimo nila ini, ang ila apresasyon sa sini nagadugang kag ginasangkapan nila ang ila kaugalingon agod sugiran ang iban nahanungod sini.—Salmo 48:12, 13.
Ang Makapapagsik-tagipusuon nga Pag-usisa
5. (a) Paano ginapakita sang Kasulatan kon kay sin-o pagkasoberano ang ginpabutyag paagi sa Mesianikong Ginharian? (b) Gani paano kita naapektohan sang aton naton-an nahanungod sa Ginharian?
5 Ang isa sang una nga mga butang nga ginapahayag sina nga pag-usisa amo nga ining Mesianikong Ginharian isa ka ekspresyon sang pagkasoberano ni Jehova. Sia ang naghatag sing “pagbulut-an kag himaya kag ginharian” sa iya Anak. Sa amo, sang maggahom ining Ginharian, ang mga tingog sa langit nagakaigo nga nagsiling: “Ang ginharian sang kalibutan nangin ginharian sang aton Ginuo [Jehova nga Dios] kag sang iya Cristo, kag sia [Jehova] magahari tubtob sa walay katubtuban.” (Bug. 11:15) Gani ang tanan nga butang nga aton makita nahanungod sining Ginharian kag ang ginahimo sini nagapapalapit sa aton kay Jehova. Nagapatubo ini sa aton sing handum nga magpasakop sa iya pagkasoberano tubtob sa walay katubtuban.
6. Ngaa interesado gid kita nga si Jesucristo amo ang kabulig nga Manuggahom ni Jehova?
6 Daw ano kaayo nga ginpalingkod ni Jehova sa trono si Jesucristo subong Iya kabulig nga manuggahom! Subong ang Batid nga Manugpangabudlay nga gingamit sang Dios sa paghimo sang duta kag sang tawo, labaw kay bisan sin-o nahibaluan ni Jesus ang aton mga kinahanglanon. Dugang pa, ginpakita niya kutob sa ginsuguran sang maragtas sang tawo ang iya ‘kalipay para sa mga anak sang mga tawo.’ (Hulu. 8:30, 31; Col. 1:15-17) Daku gid ina nga gugma amo kon ngaa sia mismo nagkari sa duta kag ginhatag ang iya kabuhi subong gawad para sa ila. Sa amo ginbuksan niya para sa aton ang paagi nga kita mahilway gikan sa sala kag kamatayon kag ang kahigayunan para sa dayon nga kabuhi.—Mat. 20:28.
7. (a) Tuhay sa paggahom sang bisan sin-o nga tawo, ngaa ining pangulohan magapadayon? (b) Ano ang kaangtanan sang “matutom kag mainandamon nga ulipon” sa langitnon nga pangulohan?
7 Isa ini ka malig-on, nagapadayon nga pangulohan. Ang nagapadayon nga kinaiya sini ginapasalig sang kamatuoran nga si Jehova mismo wala sing kamatayon. (Hab. 1:12; Sal. 146:3-5, 10) Tuhay sa tawhanon nga mga hari, si Jesucristo, ang isa nga gintugyanan ni Jehova sing pagkahari, indi man mamalatyon. (Roma 6:9; 1 Tim. 6:15, 16) Kaupod kay Cristo sa langitnon nga trono amo ang 144,000 ka iban pa, matutom nga mga alagad sang Dios nga ginkuha gikan sa “tagsa ka tribo kag hambal kag pungsod.” Ini sila man, ginhatagan sing dimamalatyon nga kabuhi. (Bug. 5:9, 10; 1 Cor. 15:42-44, 53) Ang kalabanan sa ila didto na sa mga langit, kag ang nagkalabilin sa ila nga yari pa sa duta nagahuman sa “matutom kag mainandamon nga ulipon” nga klase, nga sing matutom nagapauswag sang mga interes sina nga Ginharian diri.—Mat. 24:45-47.
8, 9. (a) Anong nagabahinbahin, makapalain nga mga impluwensia ang dulaon sang Ginharian? (b) Gani, kon indi naton luyag mangin mga kaaway sang Ginharian sang Dios, ano nga mga organisasyon kag mga hilikuton ang dapat naton likawan?
8 Sa dili madugay karon, sa gintangdo nga tion ni Jehova, ang iya hubon nga manuglaglag magahikot sa pagtinlo sang duta. Laglagon nila sing dayon ang mga tawo nga bangod sang ila kaugalingon nga pagpili wala nakakilala sa Dios, nagadumili sa pagkilala sang iya pagkasoberano, kag nagayaguta sa mahigugmaon nga mga aman nga iya ginhimo paagi kay Jesucristo. (2 Tes. 1:6-9) Mahanabo ini sa adlaw ni Jehova, ang madugay na ginahulat nga tion sa pagbindikar sa iya subong ang Soberano sang Uniberso.
9 Ang tanan dimatuod nga relihion, kag subong man ang tanan nga pangulohan sang tawo kag ang ila hangaway, nga ginmaniobra sang dimakita malauton nga manuggahom sining kalibutan, laglagon sing dayon. Ang tanan nga nagapakilala sang ila kaugalingon subong bahin sining kalibutan paagi sa pagpaduyog sa maiyaiyahon, dibunayag, imoral nga paagi sang pagkabuhi utdon sa kamatayon. Si Satanas kag ang iya mga demonyo painon gikan sa mga pumuluyo sang duta, kag bilangguon sa sulod sang isa ka libo ka tuig. Daw ano nga paumpaw ina para sa tanan nga nagahigugma sang pagkamatarong!—Bug. 18:21, 24; 19:11-16, 19-21; 20:1, 2.
Ang mga Tulumuron Sini—Kon Paano Malab-ot
10. (a) Paano himuon sang Mesianikong Ginharian ang katuyuan ni Jehova para sa duta? (b) Ano ang mangin kahulugan sini para sa katawhan nga nagapuyo sa duta sa amo nga tion?
10 Bug-os nga tumanon sining Mesianikong Ginharian ang orihinal nga katuyuan sang Dios para sa duta. (Gen. 2:8, 9, 15; 1:28) Tubtob sa karon, napaslawan ang tawo sa pagtuman sina nga katuyuan. Apang, “ang napuy-an nga duta” ginpasakop sa Anak sang tawo, si Jesucristo. Ang tanan nga makalampuwas sa paghukom ni Jehova sa sining daan nga sistema magapanghikot sing nahiusa sa idalom ni Cristo subong Hari, malipayon nga magahimo sang tanan nga iya isugo agod nga ang duta mangin bug-os globo nga Paraiso. (Heb. 2:5-9) Ang tanan nga katawhan magakalipay sa binuhatan sang ila mga kamot kag magabenepisyo sing bug-os gikan sa bugana nga patubas sang duta.—Sal. 72:1, 7, 8, 16-19; ipaanggid ang Isaias 65:21, 22.
11. (a) Paano ang pagkahimpit sang hunahuna kag lawas mahanabo para sa mga sakop sang Ginharian? (b) Ano ang ilakip sini?
11 Sang gintuga si Adan kag si Eva himpit sila, kag katuyuan sadto sang Dios nga ang duta pun-on sang ila mga anak, tanan may himpit nga hunahuna kag lawas. Sa idalom sang paggahom sang Ginharian, ina nga katuyuan mahimayaon nga matuman. Kinahanglan sini dulaon ang tanan nga epekto sang sala, kag sa sina nga katuyuan si Cristo nagaalagad indi lamang subong Hari kundi subong Mataas nga Saserdote man. Sing mapailubon buligan niya ang iya matinumanon nga mga sakop sa pagbenepisyo gikan sa nagatumbas-sala nga bili sang iya ginhalad nga tawhanon nga kabuhi. Ang bulag nga mga mata magamuklat. Ang bungol nga mga dulunggan mabuksan. Ang unod nga ginpakurinot sang edad ukon balatian magalab-as subong sang isa ka bata. Ang balatian nga indi na mapaayo magahatag sing dalan sa mapagsik nga kapagros. Magaabot ang adlaw nga wala na sing isa ang may rason sa pagsiling, “Nagamasakit ako,” bangod ang mahinadlukon sa Dios nga mga tawo hilwayon gikan sa lulan sang sala kag sa makapasubo nga mga epekto sini.—Ipaanggid ang Isaias 33:22, 24; 35:5, 6; Job 33:25; Lucas 13:11-13.
12. (a) Ano pa ang kinahanglanon sang tawhanon nga pagkahimpit? (b) Paano ina matigayon, kag ano ang mangin resulta sini?
12 Apang, agod malab-ot ang kahimpitan, indi lamang lawas kag hunahuna ang papagruson. Nagalakip ini sing nagakaigo nga pagpakita sing mga kinaiya sang persona ni Jehova, bangod ang tawo ginhimo sa ‘dagway sang Dios, suno sa iya kaangay.’ (Gen. 1:26) Sa sina nga katuyuan, daku nga edukasyon ang kinahanglanon. Isa ini ka bag-ong sistema nga sa diin “magapuyo ang pagkamatarong,” gani, subong gintagna ni manalagna Isaias, “ang mga pumuluyo sang mapatubason nga duta magatuon sing pagkamatarong.” (2 Ped. 3:13; Isa. 26:9) Ining kinaiya nagadul-ong sa paghidait—sa ulot sang katawhan sang tanan nga pungsod, sa tunga sang suod nga mga magkaupod, sa pamilya kag, labaw sa tanan, sa Dios mismo. (Isa. 32:17; Sal. 85:10-13) Sila nga magatuon sing pagkamatarong amat-amat nga tudluan sing kabubut-on sang Dios para sa ila. Samtang ang gugma para sa mga dalanon ni Jehova amat-amat nga magapanggamot sa ila tagipusuon, sundon nila ini sa tagsa ka bahin sang ila kabuhi. Ang himpit nga tawo nga si Jesus nakasiling, ‘Nahimo ko pirme ang kalahamut-an sa akon Amay.’ (Juan 8:29) Daw ano ka makalilipay ang kabuhi kon mangin matuod ina sa tanan nga katawhan!
Ang mga Katigayunan nga Hayag Na
13. Gamita ang mga pamangkot sa ibabaw sa pagpadaku sang mga katigayunan sang Ginharian kag kon ano busa ang dapat naton ginahimo.
13 Ang kalahamut-an nga mga katigayunan sang Ginharian hayag na sa mga tawo nga may mga mata sang pagtuo. Ang masunod nga mga pamangkot kag mga Kasulatan nga binalikwat magapahanumdom sa inyo sang pila sini, subong man sing mga butang nga sarang kag dapat himuon karon sang tanan nga sakop sang Ginharian:
Batok kay sin-o ang hari una nga naghikot, kag ano ang resulta? (Bug. 12:7-10, 12)
Ang pagtipon sa katapusan nga mga katapo sang ano nga grupo ginhatagan sing gilayon nga igtalupangod sa tapos si Cristo naglingkod sa trono? (Mat. 24:31; Bug. 7:1-4)
Sa Mateo 25:31-33, ano pa nga hilikuton ang gintagna ni Jesus nga himuon niya sa tapos sang iya paglingkod sa trono kag antes laglagon ang malauton?
Paano ining hilikuton ginahimo? Sin-o ang nagapakigbahin sa sini? (Mat. 24:14; Sal. 110:3; Bug. 14:6, 7)
Ngaa wala ini mapunggi sang politikal kag relihioso nga mga manugpamatok? (Binu. 5:38, 39; Zac. 4:6)
Subong resulta sang edukasyonal nga hilikuton nga ginahimo, ano nga mga pagbalhin ang natabo na sa kabuhi sang mga tawo nga nagapasakop sa paggahom sang Ginharian? (Isa. 2:4; 1 Cor. 6:9-11)
Ang Nagapadayon nga Kinaiya sang Ginharian
14. (a) Daw ano kadugay magagahom si Cristo? (b) Ano ang mahimo sa sulod sinang tion?
14 Sa tapos sang pagtagbong kay Satanas kag sa iya mga demonyo sa kadadalman, si Jesucristo upod sa iya 144,000 ka kaupod nga mga manunubli magagahom sa sulod sang isa ka libo ka tuig. (Bug. 20:6) Sa sulod sina nga tion ang katawhan dalhon sa kahimpitan. Ang tanan nga pangulohan kag awtoridad kag gahom nga batok kay Jehova pagadulaon. Sa tapos sina, ibalik ni Jesus ang Ginharian sa iya Amay, “agod nga ang Dios mangin tanan sa tanan.”—1 Cor. 15:24, 28.
15. Paano matuod nga ining Ginharian ‘indi nga mas-a malaglag’?
15 Busa ang palangakuan ni Jesus may kaangtanan sa duta magabalhin. Walay sapayan, ang iya paggahom mangin “walay katapusan” kag ang iya Ginharian “indi malaglag.” (Dan. 7:14) Sa anong kahulugan? Sa kahulugan nga ang awtoridad sa paggahom indi pag-ihatag sa mga kamot sang iban nga may tuhay nga mga tulumuron. Ang mga katigayunan sang Ginharian ‘indi nga mas-a malaglag.’ Ang himuon sang Ginharian sa pagbindikar sang ngalan ni Jehova kag sang iya katuyuan sa sini nga duta magatindog tubtob sa walay katubtuban.
[Footnote]
^ Tan-awa ang libro nga “Let Your Kingdom Come,” pahina 127-139.
Repaso nga Paghinun-anon
● Ngaa ang Ginharian sang Dios amo lamang ang solusyon sa mga palaligban sang tawo? San-o ini nagsugod sa paggahom?
● Ano ang labi na nga makagalanyat sa imo nahanungod sa Ginharian sang Dios kag ano ang himuon sini? Ngaa?
● Ano nga mga katigayunan sang Ginharian ang makita na naton? Ano ang aton bahin sa sini?
[Mga Pamangkot sa Pagtinuon]
[Piktyur sa pahina 84, 85]
Pagkamatarong ang maton-an sang katawhan
