Kapitulo 4

Ang Isa nga Ginpanaksihan sang Tanan nga Manalagna

1. Ano ang ginapakita sang mga katunayan nahanungod sa pagkabuhi ni Jesus sa wala pa mangin tawo tuhoy sa iya kaangtanan kay Jehova?

 SA PAGLARAGWAY sang iya mainit nga kaangtanan kay Jehova, si Jesus nagsiling: “Ang Amay nagahigugma sa Anak kag nagapakita sa iya sang tanan nga iya ginahimo.” (Juan 5:​19, 20) Ang pagkasuod sina nga kaangtanan nagsugod sang gintuga sia, indi maisip nga milenyo antes sia nangin tawo. Sia ang bugtong nga Anak sang Dios, ang lamang nga isa nga gintuga ni Jehova mismo. Ang tanan nga iban pa nga butang sa langit kag sa duta gintuga paagi sa pinalangga kag panganay nga Anak. Nag-alagad man sia subong Pulong ukon Humalambal sang Dios, ang isa nga paagi sa iya ang balaan nga kabubut-on ginpaalinton sa iban. Ining isa, ang hinigugma gid nga Anak sang Dios nangin ang tawo nga si Jesucristo.​—⁠Col. 1:​15, 16; Juan 1:​14; 12:​49, 50.

2. Tubtob sa anong kasangkaron ang mga tagna sa Biblia nagapatuhoy kay Jesus?

² Sa wala pa ang iya milagruso nga pagkatawo, madamo sang inspirado nga tagna ang ginrekord nahanungod sa iya. Si apostol Pedro nagpamatuod kay Cornelio, “Sa iya ang tanan nga manalagna nagsaksi.” (Binu. 10:​43) Tubtob sa amo sina nga kasangkaron ang kaangtanan sang katungdanan ni Jesus sa putli nga pagsimba nga ginpakita sa Biblia amo kon ngaa ang isa ka anghel nagsiling kay apostol Juan: “Simbaha ang Dios; kay ang pagpanaksi kay Jesus amo ang nagainspirar sing pagpanagna.” (Bug. 19:​10) Yadtong mga tagna maathag nga nagapakilala sa iya kag nagatawag sing igtalupangod sa mga bahin sang katuyuan sang Dios tuhoy sa iya nga may daku nga importansia sa aton karon.

 Kon Ano ang Ginpahayag sang mga Tagna

3. (a) Sa tagna sang Genesis 3:​14, 15, sin-o ang ginlaragway sang “man-ug”? Sang “babayi”? Sang ‘binhi sang man-ug’? (b) Ngaa importante gid sa mga alagad sang Dios ang ‘pagdugmok sa ulo sang man-ug’?

³ Ang una sina nga mga tagna ginhambal sa tapos sang pagrebelde sa Eden. Ginlakip ini sa paghukom ni Jehova nga ginpatuhoy sa man-ug. Si Jehova nagsiling: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Sia magadugmok sang imo ulo kag dugmukon mo ang iya tikod.” (Gen. 3:​14, 15) Ano ang kahulugan sina? Sa sibu nga tion sang Dios ang iban pa nga tagna nagpaathag sini kag nagpadaku sini. Subong resulta nahibaluan naton nga ang isa nga ginpatuhuyan sini nga ginrepresentar sang man-ug, amo si Satanas nga Yawa. “Ang babayi” amo ang matutom kag langitnon nga organisasyon ni Jehova, nga para sa iya subong sang isa ka matutom nga asawa. ‘Ang binhi sang man-ug’ nagalakip sa mga anghel kag sa mga tawo nga nagapakita sang espiritu sang Yawa, nga nagapamatok kay Jehova kag sa iya katawhan. Bangod gingamit sang Yawa ang man-ug sa Eden, sarang mahangpan gikan sa tagna nga ang ‘pagdugmok sa ulo sang man-ug’ nagapatuhoy sa kalaglagan sa ulihi sining rebelde nga anak sang Dios nga nagpasipala kay Jehova kag nagdala sing daku nga pag-antos sa katawhan. Apang tuhoy sa kon sin-o ang “binhi” nga magadugmok, madugay ini nga nagpabilin subong isa ka balaan nga tinago.​—⁠Roma 16:​25, 26.

4. Paano ang linya sang kaliwatan ni Jesus nagabulig sa pagpakilala sa iya subong ang ginsaad nga Binhi?

⁴ Pagligad sang mga 2,000 ka tuig sa maragtas sang tawo naghatag si Jehova sing dugang pa nga mga detalye. Ginpakita niya nga yadto nga Binhi magagikan sa linya sang pamilya ni Abraham. (Gen. 22:​15-18) Apang, ang linya nga magadul-ong sa Binhi wala lamang nasandig sa undanon nga relasyon kundi sa pilion sang Dios. Walay sapayan sang gugma ni Abraham sa iya anak nga si Ismael nga natawo sa ulipon nga babayi nga si Hagar, maathag nga si Jehova nagsiling: “Palig-unon ko ang akon katipan kay Isaac, nga ipanganak ni Sara sa imo.” (Gen. 17:​18-21; 21:​8-12)  Sang ulihi ina nga katipan ginpat-od, indi sa panganay nga anak ni Isaac nga si Esau, kundi kay Jacob, nga gikan sa iya naghalin ang 12 ka tribo sang Israel. (Gen. 28:​10-14) Ginpakita sang ulihi nga ang Binhi matawo sa tribo ni Juda, sa panimalay ni David.​—⁠Gen. 49:​10; 1 Cron. 17:​3, 4, 11-14.

5. Bisan sa una nga bahin sang dutan-on nga ministeryo ni Jesus, ano pa ang nagpamatuod nga sia amo ang Mesias?

⁵ Kapin sa 700 ka tuig sa wala pa, ginsambit na sang Biblia ang Betlehem subong ang duog nga sa diin matawo ang Binhi kag ginpakita man sini nga sia nagkabuhi na “kutob sang mga adlaw nga wala sing katapusan,” kutob sang tion nga gintuga sia sa langit. (Miq. 5:2) Ang tion sang iya pag-abot sa duta subong Hinaplas ni Jehova, ang Mesias, gintagna paagi kay manalagna Daniel. (Dan. 9:​24-26) Kag sang ginhaplasan sia sing balaan nga espiritu, may tingog gikan sa langit nga nagpakilala sa iya. (Mat. 3:​16, 17) Gani, sa tapos mangin sumulunod ni Jesus, si Felipe nakasiling nga may pagtuo: “Nakita namon sia nga nahanungod sa iya si Moises, sa Kasuguan, kag ang mga Manalagna man nagsulat, si Jesus nga taga-Nasaret, ang anak [paagi sa pag-adoptar] ni Jose.”​—⁠Juan 1:45.

6. (a) Sa tapos mapatay si Jesus, ano ang narealisar sang iya mga sumulunod? (b) Sin-o ang panguna nga ‘binhi sang babayi,’ kag ano ang kahulugan sang iya pagdugmok sa ulo sang man-ug?

⁶ Pagkatapos sadto, narealisar sang mga sumulunod ni Jesus nga kadamo gid sang mga tagna nga nagapatuhoy sa iya ang ginrekord sang inspirado nga Kasulatan. Sa tapos sia mapatay kag mabanhaw, personal nga iya “gintalastas  sa ila ang mga butang sa bug-os nga Kasulatan nga nahanungod sa iya kaugalingon.” (Lucas 24:​27) Maathag na karon nga si Jesus, ang panguna nga ‘binhi sang babayi,’ amo ang isa nga magadugmok sa ulo sang “man-ug” sa isa ka paagi nga si Satanas sa ulihi madula sing bug-os. Paagi kay Jesus ang tanan nga saad sang Dios sa katawhan, ang tanan nga butang nga aton gid ginakalangkagan, pagatumanon.​—⁠2 Cor. 1:20.

7. Dugang sa mga butang nga nagapakilala sa isa nga ginpatuhuyan sa sining mga tagna, ano pa ang mapuslanon nga binagbinagon?

⁷ Sang una ninyo nga mabasa ang pila sining mga tagna mahimo nga namangkot kamo, subong sang Etiopianhon nga eunuco, “Nahanungod kay sin-o bala nagapamulong ang manalagna sini?” Apang sa tapos mabatian sang eunuco ang sabat wala sia magpahimunong lamang. Sa tapos makapamati sing maayo sa pagpaathag ni Felipe, narealisar niya nga ang apresasyon sa kon paano gintuman ni Jesus ang tagna nagakinahanglan sang iya paghikot, paagi sa iya pagpabawtismo. (Binu. 8:​32-38; Isa. 53:​3-9) Amo man bala sini ang aton ginahimo? Kon kaisa ang paagi nga ginapresentar ang isa ka tagna amo ang nagapahulag sa aton sing daku, ukon ang aton tagipusuon mahimo nga matandog sang mga konklusion nga ginhinakop sa Biblia mismo sang ang katumanan ginapakita.

8. Apat ka matagnaon nga laragway ang ginbinagbinag diri. Mangatarungan sa mga pamangkot kag mga kasulatan nga ginsambit agod ipakita kon paano ining mga tagna nagaapektar sa aton. Binagbinaga sing isa-isa.

⁸ Talupangda kon paano ini matuod sa masunod nga matagnaon nga mga saad kag mga laragway tuhoy kay Jesucristo. Ang mga pamangkot gintuyo agod sabton ninyo sa bulig sang nasambit nga mga kasulatan.

 (1) Paano ang rekord nahanungod sa pagtinguha ni Abraham nga ihalad si Isaac nagabulig sa aton sa pag-apresyar sang ginhimo ni Jehova sa pag-aman sing gawad paagi sa iya Anak? (Juan 3:​16; Gen. 22:​1-18 [talupangda kon paano ginlaragway si Isaac sa bersikulo 2.])

  Ano nga pagsalig ang dapat ihatag sini sa aton? (Roma 8:​32, 38, 39)

 Apang ano ang kinahanglan sa aton bahin? (Gen. 22:​18; Juan 3:​36)

 (2) Sa pagpakilala kay Jesus subong ang manalagna kaanggid kay Moises, anong mabug-at nga salabton ang gina­pahanumdom sa aton sang Biblia? (Binu. 3:​22, 23; Deut. 18:​15-19)

 Ano ang pila sang mga butang nga ginhambal sa aton ni Jesus, kag ngaa sibu ini sa karon nga tion? (Mat. 28:​18-20; 19:​4-9; 18:​3-6)

 (3) Sa pagpaathag sang kon ano ang ginlandong sang pagkasaserdote ni Aaron, ang Biblia nagatawag sing igtalupangod sa anong makagalanyat nga mga kinaiya ni Jesus subong mataas nga saserdote? (Heb. 4:​15–5:​3; 7:​26-28)

 Gani ano ang dapat batyagon nahanungod sa pagpalapit sa Dios sa pangamuyo paagi kay Cristo sa pagpangayo sing bulig nga landason ang aton mga kaluyahon?

 (4) Bangod sang pagkalabaw sang sakripisyo ni Jesus (nagbulos sa tanan nga ginhalad sa idalom sang Mosaiko nga Kasuguan), ngaa dapat gid kita maghalong nga likawan ang batasan sa paghimo sing bisan ano nga nahibaluan naton indi kalahamut-an sa Dios? (Heb. 10:​26, 27)

 Kon ginaapresyar gid naton ang ginalauman nga kabuhi nga nangin posible bangod sang halad ni Jesus, dapat kita magmaukod sa paghimo sing ano nga mga butang? (Heb. 10:​19-25)

Paano Naton Mapakita ang Aton Pagtuo kay Cristo?

9. Ngaa wala sing kaluwasan para sa aton luwas kay Jesucristo?

⁹ Sa tapos ginpakita sa mataas nga hukmanan sang Judiyo sa Jerusalem kon paano ang tagna natuman kay Jesus, si apostol Pedro mabaskog nga naghinakop: “Wala sing kaluwasan sa bisan kay sin-o nga iban, kay wala sing iban nga ngalan sa idalom sang langit nga ginhatag sa mga tawo nga paagi sa iya kinahanglan kita maluwas.” (Binu. 4:​11, 12; Sal. 118:​22) Ang tanan nga mga anak ni Adan makasasala, gani ang ila kamatayon bunga sang pagpakamalaut sang sala kag indi takus nga mangin gawad para kay bisan sin-o. Apang si Jesus himpit, kag ang iya paghalad sang iya kabuhi  may gawad nga bili. (Sal. 49:​6-9; Heb. 2:9) Ginhalad niya sa Dios ang isa ka gawad nga katumbas gid sa bili sang nadula ni Adan para sa iya mga anak. Paano kita nakabenepisyo sa sini?​—⁠1 Tim. 2:​5, 6.

10. Ipaathag ang isa ka paagi nga ang halad ni Jesus nakahatag sa aton sing daku nga kaayuhan.

¹⁰ Paagi sa sini nakatigayon kita sing matinlo nga konsiensia bangod sang kapatawaran sang sala​—⁠butang nga labaw sa nahimo sang mga halad nga sapat sa idalom sang Mosaiko nga Kasuguan. (Binu. 13:​38, 39; Heb. 9:​13, 14) Sa pagkamatuod, ang pagtigayon sini nagakinahanglan nga dapat kita mangin bunayag sa aton kaugalingon kag dapat nga may matuod kita nga pagtuo kay Jesucristo. Personal bala nga aton ginaapresyar kon daw ano gid kadaku ang pagkinahanglan naton sa halad ni Cristo? “Kon magsiling kita: ‘Wala kita sing sala,’ ginadayaan ta ang aton kaugalingon kag ang kamatuoran wala sa aton. Kon itu-ad ta ang aton mga sala, matutom kag mata­rong sia agod patawaron ang aton mga sala kag tinluan ­kita gikan sa tanan nga pagkadimatarong.”​—⁠1 Juan 1:​8, 9.

11. Ngaa ang pagpatugmaw sa tubig importante sa pagtigayon sing maayong konsiensia sa Dios?

¹¹ Matuod, ginabaton sang iban nga sila makasasala kag nagapangangkon nga nagapati kay Cristo, kag nagapakigbahin pa gani tubtob sa pila ka kasangkaron sa pagsugid sa iban nahanungod sa Ginharian sang Dios subong sang ginhimo ni Jesus, apang indi gihapon bug-os ang ila pagtuo kay Jesus. Sa anong paagi? Bueno, subong ginpakita sa Biblia, sang ang mga tawo sang  nahaunang siglo nangin mga tumuluo, paano nila ginpakita yadto sa publiko? Nagpabawtismo sila. Ngaa? Bangod nagsugo si Jesus nga ang mga disipulo dapat bawtismuhan. (Mat. 28:​19, 20; Binu. 8:​12; 18:8) Kon ang tagipusuon sang isa ka tawo mapahulag gid sang mahigugmaon nga aman nga ginhimo ni Jehova paagi kay Jesucristo, indi sia mag-isol. Himuon niya ang kinahanglanon nga mga pagpasibu sa iya kabuhi, idedikar ang iya kaugalingon sa Dios kag simbuluhan ini paagi sa pagpatugmaw sa tubig. Subong ginapakita sa Biblia, sa pagpasundayag sing pagtuo sa sining paagi sia “nagapangabay sa Dios sing maayong konsiensia.”​—⁠1 Ped. 3:21.

12. Kon narealisar naton nga nakahimo kita sing sala, ano ang dapat himuon sa sini, kag ngaa?

¹² Sa pagkamatuod, bisan sa tapos sina, ang makasasala nga mga kinaiya magalutaw gihapon. Ano kon amo? “Nagasulat ako sa inyo sini agod nga indi kamo makasala,” siling ni apostol Juan. Gani indi naton dapat pakadiutayon lamang ang sala nga aton nahimo sa buhat, sa hambal ukon sa panimuot. “Apang, kon ang bisan sin-o makasala, may mananabang kita upod sa Amay, si Jesucristo nga matarong. Kag sia amo ang tumbas nga halad para sa aton mga sala, apang indi lamang para sa aton kundi para man sa sala sang bug-os nga kalibutan.” (1 Juan 2:​1, 2) Nagakahulugan bala ina nga, ano man ang aton mahimo, kon mangamuyo kita sa Dios, ‘Patawara kami sang amon mga sala,’ wala na sing dapat kabalak-an? Indi. Ang yabi sa kapatawaran amo ang matuod nga paghinulsol. Mahimo nga kinahanglan man ang bulig sang mga gulang sa Cristianong kongregasyon. Dapat naton kilalahon ang pagkasayop sang nahimo kag hinulsulan gid ini kag maghimo sing hanuot nga panikasog nga indi na pagliwaton ini. (Binu. 3:​19; Sant. 5:​13-16) Kon himuon naton ini, makasalig kita sa bulig ni Jesus. Pasad sa aton pagtuo sa makatumbas-sala nga bili sang iya gawad, ang pagpasag-uli sa pabor ni Jehova posible, kag importante ini kon luyag naton nga mangin kalahamut-an sa iya ang aton pagsimba.

13. (a) Ipaathag ang isa pa ka paagi nga ang halad ni Jesus nakahatag sa aton sing kaayuhan. (b) Ngaa ang aton pag-alagad sa Dios wala nagahatag sa aton sing kinamatarong sa sini nga padya? (c) Kon may pagtuo gid kita, ano ang aton ginahimo?

¹³ Ginbuksan man sa aton sang halad ni Jesus ang kahigayunan para sa dayon nga kabuhi​—⁠sa langit para sa “diutay nga panong,” kag sa Paraiso nga duta para sa binilyonbilyon ka katawhan. (Luc. 12:​32; Bug. 20:​11, 12; 21:​3, 4) Indi ini isa ka padya nga aton ginpangabudlayan. Ano man kadaku ang aton ginahimo sa pag-alagad kay Jehova, indi gid kita makatipon sing katakus nga ang aton Dios makautang sa aton sing kabuhi. Ang dayon nga kabuhi isa ka “dulot sang Dios . . . paagi kay Cristo Jesus nga aton Ginuo.” (Roma 6:​23; Efe. 2:​8-10) Walay sapayan, kon may pagtuo kita sa sina nga dulot kag mainapresyahon sa paagi nga gin-aman ini, ipakita naton ini. Bangod nahantop naton kon daw ano ka makatilingala nga  gingamit ni Jehova si Jesus sa pagtuman sang Iya kabubut-on kag kon daw ano ka importante nga sundon naton tanan ang mga tikang ni Jesus, himuon naton ang Cristianong ministeryo nga isa sang labing importante nga mga butang sa aton kabuhi. Ang aton pagtuo makita sa aton makapakombinse nga pagsugid sa iban nahanungod sining dalayawon nga dulot sang Dios.​—⁠Ipaanggid ang Binuhatan 20:24.

14. Paano ang amo nga pagtuo kay Jesucristo may makapahiusa nga epekto?

¹⁴ Daw ano kaayo kag makapahiusa ang epekto sina nga pagtuo! Paagi sa sini nagalapit kita kay Jehova, sa iya Anak kag sa isa kag isa sa sulod sang Cristianong kongregasyon. (1 Juan 3:​23, 24) Nagakalipay kita nga ginhatag ni Jehova sa iya Anak “ang ngalan nga labaw sa tanan nga ngalan [luwas sa ngalan sang Amay], agod nga sa ngalan ni Jesus ang tagsa ka tuhod magluhod sa langit kag sa duta kag sa idalom sang duta, kag ang tagsa ka dila magtu-ad nga si Jesucristo Ginuo sa himaya sang Dios nga Amay.”​—⁠Filip. 2:​9-11.

Repaso nga Paghinun-anon

● Sang maglutaw ang Mesias, ngaa madali sia nga nakilala sang mga nagtuo gid sa Pulong sang Dios?

● Paano ang matagnaon nga mga laragway nga natuman kay Jesus, subong ginlaragway sa pahina 34, dapat mag-apektar sa aton?

● Sa anong mga paagi ang halad ni Jesus nakahatag na sa aton sing kaayuhan? Paano naton mapakita ang aton apresasyon sa sini?

[Mga Pamangkot sa Pagtinuon]

 [Kahon/​Mga piktyur sa pahina 34]

Matagnaon nga Sulundan Tuhoy kay Jesus​—⁠Paano Ikaw Dapat Maapektohan?

Paghalad ni Abraham kay Isaac

Si Moises subong humalambal sang Dios

Si Aaron subong mataas nga saserdote

Mga halad nga sapat