Kapitulo 18

Dapat Kita Magpakita sing Diosnon nga Debosyon sa Puluy-an

1. (a) Sa tapos maton-an ang mga talaksan ni Jehova sa pag-asawahay, ano nga mga pagbalhin ang ginhimo sang madamo nga tawo? (b) Apang ano pa ang nadalahig sa Cristianong pagkabuhi sang pamilya?

 LAKIP sa makalilipay nga mga kamatuoran nga aton anay naton-an sa Biblia amo ang may kaangtanan sa pag-asawahay kag kabuhi sang pamilya. Ginkilala naton si Jehova subong ang Ginhalinan sang pag-asawahay kag nahangpan naton nga paagi sa Biblia nag-aman sia sing labing maayo nga gabayan para sa mga pamilya. Subong resulta sina nga gabayan, madamo nga tawo ang nagbiya sa kabuhi nga may seksuwal nga imoralidad kag nagakaigo nga ginparehistro ang ila pag-asawahay. Apang kapin pa sa sini ang Cristianong pagkabuhi sang pamilya. Nadalahig man sini ang aton panimuot tuhoy sa pagkapermanente sang pag-asawahay, pagtuman sang aton mga salabton sa pamilya, kag kon paano kita nagapakig-angot sa iban nga mga katapo sang pamilya.​—⁠Efe. 5:​33–6:4.

2. (a) Ginaaplikar bala sang tanan sa puluy-an ang iya nahibaluan gikan sa Biblia? (b) Paano ginapadaku ni Jesus kag ni Pablo ang pagkaimportante sang paghimo sini?

² Minilyon ka tawo ang nakahibalo sang ginasiling sang Biblia nahanungod sining mga butang. Apang kon may problema sila sa ila kaugalingon nga puluy-an, wala nila ini ginaaplikar. Kamusta naman kita? Sa pagkamatuod wala sa aton ang maluyag mangin subong sang ginpakamalaut ni Jesus bangod ginsikway nila ang sugo sang Dios nga nagasugo sa kabataan nga tumanon ang ila mga ginikanan paagi sa pagpangatarungan nga tuman na ang pakunokuno nga relihioso nga debosyon. (Mat. 15:​4-9) Indi naton luyag mangin mga tawo nga may porma sang diosnon nga debosyon, apang wala nagabuhat sini sa “sulod sang ila panimalay.”  Sa baylo, luyag naton nga ipasundayag ang matuod nga diosnon nga debosyon, nga “isa ka dakung daug.”​—⁠1 Tim. 5:​4; 6:​6; 2 Tim. 3:5.

Tubtob San-o ang Pag-asawahay?

3. (a) Ano ang nagakatabo sa madamo nga pag-asawahay, apang ano dapat ang mangin determinasyon naton? (b) Gamita ang imo Biblia sa pagsabat sa mga pamangkot nga nalista sa ibabaw tuhoy sa pagkapermanente sang pag-asawahay.

³ Bangod sang nagadugang nga pagkasunson, ang wagkos sang pag-asawahay nagatapok. Ang iban nga magtiayon nga nagpuyuay sa sulod sang 20, 30 ukon 40 ka tuig nagapamat-od karon sa pagsugod sing isa ka “bag-ong kabuhi” upod sa lain nga tawo. Subong man indi na tumalagsahon nga mabatian nga ang mag-asawa nagbulagay sa tapos sang pila ka bulan lamang nga pag-asawahay. Walay sapayan sang ginahimo sang iban, subong mga sumilimba ni Jehova dapat naton handumon nga pahamut-an ang Dios. Ano ang ginasiling sang iya Pulong nahanungod sini?

 Kon ang lalaki kag babayi mag-asawahay, daw ano kalawig dapat nila paabuton nga magpuyuay? (Roma 7:​2, 3; Mar. 10:​6-9)

 Ano ang lamang nga kabangdanan sang diborsio nga makatarunganon sa atubangan sang Dios? (Mat. 19:​3-9; 5:​31, 32)

 Daw ano kabaskog ang ginabatyag ni Jehova nahanungod sa mga diborsio nga wala ginaaprobahan sang iya Pulong? (Mal. 2:​13-16)

 Ginasakdag bala sang Biblia ang pagbulagay subong paagi sa paglubad sang mga problema sang pag-asawahay? (1 Cor. 7:​10-13)

4. Walay sapayan sang moderno nga huyog, ngaa nagapadayon ang iban nga pag-asawahay?

⁴ Ngaa nagadugay ang iban nga pag-asawahay, samtang ang iban pa​—⁠bisan sa tunga sang nagapangangkon nga mga Cristiano​—⁠nagakabungkag? Ang paghulat sa pagminyo tubtob ang duha ka bahin hamtong na masami nga amo ang sekreto.  Ang pagpangita sing tiayon nga pareho sa imo sing mga interes kag isa nga magapakighambal sa imo sing dayag tuhoy sa mga butang importante man. Apang ang labi ka importante amo nga ang isa nagapakita sing matuod nga diosnon nga debosyon. Kon ginahigugma gid sang isa ka tawo si Jehova kag kombinsido nga ang Iya mga dalanon matarong, nian may yara malig-on nga sadsaran sa pag-atubang sa mga problema nga magautwas. (Sal. 119:​97, 104; Hulu. 22:​19) Ang pag-asawahay sang amo nga tawo indi pagpahuyangon sang panimuot nga, kon indi ini magmadinalag-on, madali sia makigbulag ukon makigdiborsio. Indi niya paggamiton ang mga kakulangan sang iya tiayon subong balibad sa pagsikway sang iya kaugalingon nga mga salabton. Sa baylo, magatuon sia nga atubangon ang mga problema sang kabuhi kag mangita sing epektibo nga mga solusyon.

5. (a) Paano nadalahig ang katutom kay Jehova? (b) Bisan pa kon masumalang ang daku nga kabudlayan, ano nga mga kaayuhan ang matigayon gikan sa malig-on nga pagpabilin sa mga talaksan ni Jehova?

⁵ Nakahibalo kita tanan nga ang Yawa nagsiling nga kon kita makaeksperiensia sing personal nga pag-antos sikwayon naton ang mga dalanon ni Jehova kag magahinakop nga maayo pa nga kita ang mamat-od para sa aton kaugalingon kon ano ang maayo kag malain. Apang ang mga tawo nga matutom kay Jehova indi subong sina. (Job 2:​4, 5; Hulu. 27:​11) Ang kalabanan sang mga Saksi ni Jehova nga nakaeksperiensia sing paghingabot gikan sa ditumuluo nga mga tiayon wala magtalikod sa ila panumpa sa pag-asawahay. (Mat. 5:​37) Ang iban, pagligad sang mga tinuig, nalipay pa gani nga ginbuligan sila sang ila mga tiayon sa pag-alagad kay Jehova. (1 Cor. 7:​16; 1 Ped. 3:​1, 2) Para sa iban, nga ang ila mga tiayon wala nagapakita sing mga tanda sa pagbag-o, ukon ang ila mga tiayon nagbiya sa ila bangod nagpabilin sila nga malig-on sa ila pagtuo​—⁠ini man sila nakahibalo nga sila bugana nga ginpakamaayo bangod sang ila pagpabilin sa mga talaksan ni Jehova. Sa anong paagi? Ang ila mga kahimtangan nagtudlo sa ila sa pagpalapit sing dugang pa kay Jehova. Nakatuon sila sa pagpakita sing diosnon nga mga kinaiya bisan sa idalom sang mga kabudlayan. Ang kabuhi sining mga tawo nagahatag sing pamatuod sa gahom sang diosnon nga debosyon.​—⁠Sal. 55:​22; Sant. 1:​2-4; 2 Ped. 1:​5, 6.

 Ang Kada Isa Nagahimo sang Iya Bahin

6. Agod magmadinalag-on ang pag-asawahay, ano nga kahimusan ang dapat tahuron?

⁶ Sa pagkamatuod, kapin pa sa pagpuyuay lamang ang kinahanglanon agod magmadinalag-on ang pag-asawahay. Ang sadsaran nga kinahanglanon amo ang pagtahod sang tagsa ka katapo sang pamilya sa iya ni Jehova kahimusan sang pagkaulo. Nagaamot ini sa maayong kahim-ong kag pagbatyag sing kalig-onan sa sulod sang puluy-an.​—⁠1 Cor. 11:​3; Tito 2:​4, 5; Hulu. 1:​8, 9; 31:​10, 28.

7. Paano dapat ipakita ang pagkaulo sa pamilya?

⁷ Paano dapat ipakita ang pagkaulo? Sa isa ka paagi nga nagapabanaag sang mga kinaiya ni Jesucristo. Si Jesus malig-on nga nagsakdag sang mga dalanon ni Jehova; ginhigugma niya ang pagkamatarong kag gindumtan ang pagkamalinapason. (Heb. 1:​8, 9) Hanuot nga ginhigugma man niya ang iya kongregasyon, ginhatagan ini sing kinahanglanon nga pagtuytoy kag pag-atipan. Indi sia bugalon kag wala sing patugsiling kundi, sa baylo, “malum-ok sing panghunahuna kag malulo sa tagipusuon,” kag ang mga yara sa idalom sang iya pagkaulo ‘nakakita sing kapahuwayan para sa ila mga kalag.’ (Mat. 11:​28, 29; Efe. 5:​25-33) Kon ang ulo kag amay nagapakig-angot sa iya panimalay sa sinang paagi, maathag nga sia nagapasakop kay Jesucristo, nga nagpahamtang sing himpit nga halimbawa sa diosnon nga debosyon. Sa pagkamatuod, ang Cristianong mga iloy dapat man magpakita sing amo man nga mga kinaiya sa pagpakig-angot sa ila kabataan.

8. (a) Sa iban nga puluy-an, ngaa daw indi madinalag-on ang Cristianong mga metodo? (b) Ano ang dapat naton himuon kon masumalang naton ina nga kahimtangan?

⁸ Apang, bangod sang tawhanon nga pagkadihimpit, mahimo nga mag-utwas ang mga problema. Sa wala pa makatuon ang bisan sin-o sa pamilya nahanungod sa pag-aplikar sang mga prinsipio sa Biblia, mahimo nga ang kinaugali nga pagpangindi sa pagkaulo nanggamot na sing tudok sa iban. Ang malolo nga mga pangabay kag mahigugmaon nga paagi mahimo nga daw wala sing resulta. Nahibaluan naton nga ang Biblia nagasiling nga isikway ang “kasingkal kag kaakig kag sininggitanay kag pagpasipala.” (Efe. 4:​31)  Apang kon ang iban nga tawo daw indi makahangop sang bisan ano, ano ang dapat himuon? Bueno, ano ang ginhimo ni Jesus sang sia mabaskog nga gin-ipit? Wala niya pag-iluga ang mga nagpamahog kag nagpasipala sa iya. Sa baylo, gintugyan niya ang iya kaugalingon sa iya Amay, nagsandig sa iya. (1 Ped. 2:​22, 23) Subong man, kon mag-utwas ang mabudlay nga mga kahimtangan sa puluy-an, nagahatag kita sing pamatuod sa diosnon nga debosyon kon magliso kita kay Jehova, nagapangayo sang iya bulig sa pangamuyo, sa baylo nga sundon ang mga dalanon sang kalibutan.​—⁠Hulu. 3:​5-7.

9. Sa baylo nga mangita sing sayop, anong mga metodo ang naton-an nga gamiton sang Cristianong mga bana?

⁹ Ang mga pagbalhin indi masami madali matabo, apang ang laygay sang Biblia epektibo gid. Madamo nga bana nga sang una nagreklamo gid nahanungod sa mga sayop sang ila asawa ang nakasapo nga ang pag-uswag nagsugod sang sila mismo kapin nga nag-apresyar sa pagpakig-angot ni Cristo sa iya kongregasyon. Yadto nga kongregasyon wala ginhuman sang himpit nga mga tawo. Apang ginhigugma ni Jesus ang kongregasyon, nagpahamtang sing husto nga halimbawa para sa sini, gintugyan pa gani ang iya kabuhi para sa sini, kag gingamit ang Kasulatan subong paagi sa pagbulig sa sini nga mag-uswag agod nga ini sa kabilugan mangin kalahamut-an. (Efe. 5:​25-27; 1 Ped. 2:​21) Ang iya halimbawa nagpalig-on sa madamong Cristianong mga bana sa pagpanikasog nga maghatag sing maayong halimbawa kag mahigugmaon personal nga bulig padulong sa pag-uswag. Ina nga mga metodo nagbunga sing mas maayo gid nga mga resulta sang sa mapait nga pagpangita sing sayop ukon pagpangindi sa paghambal.

10. (a) Sa anong mga paagi ang bana kag amay​—⁠bisan ang isa nga nagapangangkon nga Cristiano​—⁠nagahimo sang kabuhi nga mabudlay para sa iban sa iya puluy-an? (b) Ano ang mahimo sa pagpauswag sang kahimtangan?

¹⁰ Sa pagkamatuod, mahimo nga ang mga kakulangan sang bana kag amay ang nagapautwas sing mga problema sa sulod sang puluy-an. Ano kon indi sia sensitibo sa emosyonal nga mga kinahanglanon sang iya pamilya ukon wala gid nagapanguna paagi sa paghimos sang paghinun-anon sang pamilya tuhoy sa Biblia kag sa iban pa nga hilikuton? Ang iban nga panimalay nakakita sing maayong mga resulta sa tapos sang tampad, matinahuron nga paghambalanay tuhoy sa problema. (Hulu. 15:​22; 16:​23; 31:​26)  Apang bisan pa kon ang mga resulta indi amo ang ginlauman, ang kada isa makahimo sing mapuslanon nga amot padulong sa napauswag nga atmospera sa puluy-an paagi sa personal nga pagpalambo sa mga bunga sang espiritu kag pagpakita sing mahigugmaon nga kabalaka kag patugsiling para sa iban nga mga katapo sang pamilya. Ang pag-uswag matigayon, indi paagi sa paghulat sa isa ka tawo sa paghimo sing isa ka butang, kundi paagi sa paghimo sang aton kaugalingon nga bahin sing maayo, sa amo nagapamatuod nga kita gid nagapakita sing diosnon nga debosyon sa puluy-an.​—⁠Col. 3:​18-20, 23, 24.

Kon sa Diin Mangita sing mga Sabat

11, 12. (a) Anong mga aman ang ginhimo ni Jehova sa pagbulig sa aton sa mga problema sa kabuhi sang pamilya? (b) Agod makabenepisyo sing bug-os, ano ang ginarekomendar nga himuon naton?

¹¹ Ang mga tawo nagaliso sa madamo nga kuluhaan sing laygay agod magpalaygay tuhoy sa pagkabuhi sang pamilya. Apang nahibaluan naton nga ang Pulong sang Dios nagaunod sing labing maayo nga laygay, kag nagapasalamat gid kita nga paagi sa iya kitaon nga organisasyon ginabuligan niya kita sa pag-aplikar sini. Ikaw bala bug-os nga nagabenepisyo gikan sa sini nga bulig?​—⁠Sal. 119:​129, 130; Miq. 4:2.

¹² Dugang sa pagtambong sa mga miting sang kongregasyon, ikaw bala nagapain sing regular nga oras para sa pagtuon sang pamilya sa Biblia? Ang mga pamilya nga nagahimo sini sing tayuyon kada semana nangin nahiusa sa ila pagsimba. Ang kabuhi sang ila pamilya nag-uswag samtang ginahambalan nila ang pag-aplikar sang Pulong sang Dios sa ila kaugalingon nga mga kahimtangan.​—⁠Ipaanggid ang Deuteronomio 11:​18-21.

13. (a) Kon may mga pamangkot kita tuhoy sa espisipiko nga mga butang sang pag-asawahay kag pamilya, sa diin kita pirme makakita sing ginakinahanglan nga bulig? (b) Ano dapat ang ipakita sa tanan nga desisyon nga aton himuon?

¹³ Mahimo may yara mga pamangkot nahanungod sa espisipiko nga mga butang sang pag-asawahay ukon pamilya nga nagahilabot sa imo. Halimbawa, ano ang tuhoy sa pagpugong sang pagpamata?  Nagakaigo bala para sa mga Cristiano ang pagpabaog? Makatarunganon bala ang aborsion kon may posibilidad nga ang bata nga mabun-ag mangin abnormal? May yara bala limitasyon sa sahi sang seksuwal nga relasyon nga nagakaigo sa ulot sang bana kag asawa? Kon ang isa ka pamatan-on nga tin-edyer nagapakita sing diutay nga interes sa espirituwal nga mga butang, tubtob sa anong kasangkaron nga obligahon sia sa pagpakig-upod sa pamilya sa pagsimba? Wala sing duhaduha nga may opinyon ikaw tuhoy sa kada isa sini. Apang masabat mo bala ini pasad sa mga prinsipio sang Biblia? Ang kada isa sining mga pamangkot ginpaathag na sa Ang Lalantawan. Ton-i ang paggamit sa mga indese sa pagpangita sina nga materyal. Kon wala ikaw sing daan nga mga publikasyon nga ginapatuhuyan sa indese, tan-awa ang librarya sa King­dom Hall. Indi magpaabot sing Huo ukon Indi sa tagsa ka pamangkot. Kon kaisa dapat ikaw mamat-od​—⁠subong indibiduwal ukon subong mag-asawa. Apang ton-i ang paghimo sing mga desisyon nga nagapakita sing gugma kay Jehova kag sa mga katapo sang imo pamilya. Maghimo sing mga desisyon nga nagahatag sing pamatuod sa imo hanuot nga handum nga pahamut-an ang Dios. Kon himuon mo ina, mangin hayag kay Jehova kag sa iban nga imo nakilala nga ikaw gid nagapakita sing diosnon nga debosyon indi lamang sa publiko kundi subong man sa imo puluy-an.​—⁠Efe. 5:​10; Roma 14:19.

Repaso nga Paghinun-anon

● Paano ang katutom kay Jehova nadalahig sa pagkatutom sa sumpa sa pag-asawahay?

● Kon nabudlayan ikaw bangod sang mga problema sa pamilya, ano ang magabulig sa aton sa paghimo sing kalahamut-an sa Dios?

● Bisan pa kon makasala ang iban sa pamilya, ano ang aton mahimo sa pagpauswag sang kahimtangan?

[Mga Pamangkot sa Pagtinuon]