Kapitulo 23

Dumduma Gid ang Adlaw ni Jehova

1. (a) Sang una mo nga maton-an nga ang kaluwasan gikan sa mga kabudlayan sining daan nga sistema malapit na, ano ang imo reaksion? (b) Anong mga pamangkot tuhoy sini ang dapat naton binagbinagon sing serioso?

 WALA sing duhaduha nga ang isa sang una nga mga butang nga naton-an mo gikan sa pagtuon sang Biblia amo nga ang kaluwasan gikan sa mga kabudlayan sang kabuhi sa karon nga sistema malapit na. (Luc. 21:​28) Naton-an mo nga ang katuyuan sang Dios amo nga himuon ang bug-os nga duta nga isa ka Paraiso. Ang krimen, inaway, balatian kag ang kamatayon madula, kag bisan ang napatay nga mga hinigugma mabuhi liwat. Daw ano ka makalilipay nga paglaum! Ang pagkalapit sini ginpadaku sang pamatuod nga ang dimakita nga presensia ni Cristo subong nagagahom nga Hari nagsugod sang 1914 C.E. kag nga kutob sadto yara na kita sa katapusan nga mga adlaw sining malauton nga kalibutan. Nagpatubas bala ina nga ihibalo sing mga pagbalhin sa imo kabuhi? Ang imo bala pagkabuhi nagapakita gid sing pagtuo nga malapit na ang “adlaw ni Jehova”?

2. (a) San-o magaabot ang “adlaw ni Jehova”? (b) Paano ang kamatuoran nga wala ginpahayag ni Jehova ang “adlaw ukon ang takna” nangin mapuslanon?

² Maathag nga ginapakita sang Kasulatan nga ang “kaliwatan” nga nakakita sang pagsugod sang presensia ni Cristo makakita man sang “dakung adlaw ni Jehova” nga sa among tion magahukom sia batok sa tanan nga dimatarong. (Mat. 24:​34; Sof. 1:​14–2:3) Ina nga “kaliwatan” tigulang na karon. Apang wala ginatudlo sang Biblia ang eksakto nga petsa sang pag-abot ni Jesucristo subong manuglaglag ni Jehova batok sa dutan-on nga sistema sang mga butang ni Satanas. “Nahanungod sadtong adlaw ukon sadtong takna wala sing isa nga nakahibalo, bisan pa ang mga manugtunda sa langit ukon ang Anak, kundi ang Amay lamang,” siling ni Jesus. (Mar. 13:​32)  Nangin mapuslanon ini. Sa anong paagi? Nakabulig ini sa pagpakita kon ano ang yara sa tagipusuon sang mga tawo. Kon wala gid sila sing gugma kay Jehova, may huyog sila nga palantangon ang iya “adlaw” sa ila hunahuna kag magliso sa sekular nga mga paghimud-os nga amo ang huyog sang ila tagipusuon. Ang ginakahamut-an lamang ni Jehova nga mangin iya mga alagad amo ang mga nagahigugma gid sa iya kag nagapakita sini paagi sa pag-alagad sa iya sing bug-os kalag, walay sapayan kon san-o magaabot ang katapusan sang malauton nga sistema. Ang Dios kag ang iya Anak wala nahamuot sa mga maalabaab ukon sa mga duha sing hunahuna.​—⁠Bug. 3:​16; Sal. 37:​4; 1 Juan 5:3.

3. Ano ang ginsiling ni Jesus subong paandam para sa aton sa sini nga butang?

³ Subong paandam sa mga nagahigugma kay Jehova, si Jesus nagsiling: “Magbantay kamo, magmata kamo, kay wala ninyo mahibalui kon san-o ang gintalana nga tion.” (Mar. 13:​33-37) Ginapalig-on niya kita nga indi pagtugutan ang pagkaon kag pag-inom ukon ang “mga kabalaka sang kabuhi” nga magkuha sing bug-os sang aton igtalupangod sa bagay nga malipatan naton ang pagkaserioso sang tion.​—⁠Luc. 21:​34-36; Mat. 24:​37-42.

4. Subong ginpaathag ni Pedro, ano ang dalhon sang “adlaw ni Jehova”?

⁴ Sang ulihi, ginlaygayan ni apostol Pedro ang tanan nga may matuod nga pagtuo nga ‘hulaton kag dumdumon gid ang pag-abot sang adlaw ni Jehova, nga bangod sini ang mga langit magahingalayo kag matunaw kag ang mga elemento matunaw sa kalayo.’ Ang pagkalapit sang “adlaw ni Jehova” isa ka kamatuoran nga indi gid naton pagpakadiutayon. Ang kitaon nga pangulohan nga mga langit kag ang malaut nga katilingban sang tawo buslan sa dili madugay sang “bag-ong mga langit kag bag-ong duta” nga paluntaron sang Dios, kag ang tanan nga “elemento” nga upod sa karon nga sistema sang kalibutan​—⁠ang independiente nga panimuot sini,  ang imoral kag materyalistiko nga pagkabuhi sini​—⁠pagatapuson sa malaglagon nga init sang “adlaw ni Jehova.” (2 Ped. 3:​10-13) Dapat kita mangin alisto, nga ginadumdom nga ining makalaglag sang kalibutan nga mga hitabo magaabot sa bisan anong tion.​—⁠Mat. 24:44.

Mangin Alisto sa mga Hitabo nga Nagatuman sang Tanda

5. (a) Tubtob sa anong kasangkaron ang sabat ni Jesus sa pamangkot nga narekord sa Mateo 24:​3 naaplikar sa katapusan sang Judiyong sistema? (b) Ano nga mga bahin sang iya sabat ang nagasentro sing igtalupangod sa mga hitabo kutob sang 1914 C.E.?

⁵ Labi na bangod sang tion nga aton ginapuy-an, dapat naton mahibaluan ang mga detalye sang madamo sing bahin nga tanda nga nagapakilala sang “katapusan nga mga adlaw,” ukon sang “katapusan sang sistema sang mga butang.” Agod mabasa naton sing husto ang tanda, dapat naton dumdumon nga sang ginsabat ni Jesus ang pamangkot sang iya mga disipulo nga narekord sa Mateo 24:​3, ang iban sang iya ginsiling naaplikar sa katapusan sang Judiyong sistema sang nahaunang siglo, apang ang daku nga aplikasyon lampas pa sa sadtong tion. Ang iya ginlaragway sa bersikulo 4 tubtob 22 natuman sa diutay nga bahin sa ulot sang 33 kag 70 C.E. Apang ang tagna may daku nga katumanan sa aton adlaw kag ginapakilala sini ang tion sugod sang 1914 C.E. subong ang tion sang “presensia [ni Cristo] kag sang katapusan sang sistema sang mga butang.” (Subong man Marcos 13:​5-20 kag Lucas 21:​8-24) Ang Mateo 24:​23-28 nagasugid sa aton kon ano ang natabo kutob sang 70 C.E. tubtob sang presensia ni Cristo. (Subong man Marcos 13:​21-23) Tuhoy sa mga hitabo nga ginlaragway halin sa Mateo 24:​29 tubtob sa katapusan sang kapitulo 25, nagatudlo ini sa tion kutob sang 1914 C.E.​—⁠Subong man Marcos 13:​24-37 kag Lucas 21:​25-36.

6. (a) Ngaa dapat kita sing personal mangin alisto sa kon paano ang mga hitabo karon nagatuman “sang tanda”? (b) Sabta ang mga pamangkot sa katapusan sining parapo sa pagpakita kon paano “ang tanda” natuman kutob sang 1914.

 ⁶ Dapat gid kita magbantay sa mga hitabo karon nga nagatuman sang “tanda.” Ang aton pag-angot sining mga hitabo sa tagna sang Biblia makabulig sa aton agod “dumdumon gid” ang adlaw ni Jehova. Makabulig ini sa aton nga mangin mahayluhon kon nagapaandam sa iban tuhoy sa pagkalapit sang “adlaw sang pagtimalos sa bahin sang aton Dios.” (Isa. 61:​1, 2) Ginatandaan ining mga tulumuron, repasoha ang pila ka bahin sang “tanda.”

 Sa anong tumalagsahon nga paagi ang gintagna nga pagtindog sang ‘pungsod batok sa pungsod kag ginharian batok sa ginharian’ natuman sugod sang 1914 C.E.? Ano ang natabo sang nagligad nga mga binulan nga nagadugang sa katumanan?

 Tubtob sa anong kasangkaron naapektohan sang kakulang sing kalan-on ang duta walay sapayan sang sientipiko nga ihibalo sang ika-20 nga siglo?

 May kinatuhayan bala sa pagkasunson sang linog sa nagkalainlain nga duog sugod sang 1914 C.E.?

 Sang 1918 ano nga pesti ang nagkutol sing kapin nga kabuhi sang sa inaway nga kalibutanon? Walay sapayan sang medikal nga ihibalo, ano nga mga balatian ang epidemya sa gihapon?

 Ano nga pamatuod ang makita mo nga ang mga tawo nagakapunaw gid sa kahadlok, subong gintagna sa Lucas 21:​26?

 Ano ang nagakombinse sa imo nga ang mga kahimtangan nga ginlaragway sa 2 Timoteo 3:​1-5 indi lamang ang pagkabuhi sadto kundi nagalain pa ini tubtob sa makapakibot nga kadakuon samtang nagahilapit kita sa pagtakop sang katapusan nga mga adlaw?

Pagpain sa Katawhan

7. (a) Ano pa nga hitabo, nga nalaragway sa Mateo 13:​36-43, ang gin-angot ni Jesus sa katapusan sang sistema sang mga butang? (b) Ano ang kahulugan sina nga ilustrasyon?

⁷ May yara iban pa importante nga mga hitabo nga gin-angot ni Jesus sa katapusan sang sistema sang mga butang. Ang isa sini amo ang pagpain sa “mga anak sang Ginharian” gikan sa “mga anak sang malauton.”  Ginhambal ini ni Jesus sa iya parabola nahanungod sa latagon sang trigo nga ginsabwagan man sang kaaway sing mga gamhon. Ang “trigo” sa ilustrasyon nagalaragway sa matuod hinaplas nga mga Cristiano. Ang “mga gamhon” amo ang imitasyon nga mga Cristiano. Sa katapusan sang sistema sang mga butang ang “mga gamhon”​—⁠yadtong nagapangangkon subong mga Cristiano apang nagapamatuod sang ila kaugalingon subong “mga anak sang malauton” bangod nagapanguyapot sila sa kalibutan nga ginagamhan sang Yawa​—⁠ginapain gikan sa “mga anak sang ginharian [sang Dios]” kag ginatandaan para sa kalaglagan. (Mat. 13:​36-43) Natabo gid bala ini?

8. (a) Sa tapos sang Inaway Kalibutanon I, anong daku nga pagpain sa tanan nga nagapangangkon subong mga Cristiano ang natabo? (b) Paano ang matuod nga hinaplas nga mga Cristiano naghatag sing pamatuod nga sila, sa pagkamatuod, “mga anak sang ginharian”?

⁸ Pagkatapos sang Inaway Kalibutanon I, natabo gid ang daku nga pagpain sa tanan nga tawo nga nagapangangkon nga mga Cristiano sa duha ka klase: (1) Ang klero sang Cristiandad kag ang ila mga sumulunod, nga nagsakdag sing mabaskog sa Liga de Nasyones (karon Nasyones Unidas), samtang nagapabilin sing malig-on sa ila nasyonalismo. (2) Ang diutay lamang nga matuod kag hinaplas nga mga Cristiano sang dag-on sa tapos sang inaway, nga nagasakdag sing bug-os sa Mesianikong Ginharian sang Dios. Paagi sa dayag nga pagsakdag sa mga pangulohan sang kalibutan subong paagi sa pagtigayon sing paghidait kag kalig-onan, maathag nga ginpakita sang nauna nga klase nga sila indi matuod nga mga Cristiano. (Juan 17:​16) Sa kabaliskaran, ang mga alagad ni Jehova maathag nga nagkilala sa Liga de Nasyones subong ang modernong adlaw nga “makangilil-ad nga butang nga nagatuga sing kahapayan,” nga ginpatuhuyan sa Mateo 24:​15. Nagapakita sang ila kaugalingon subong matuod nga “mga anak sang ginharian [sang Dios],” ginbantala nila “ining maayong balita sang ginharian . . . sa bug-os napuy-an nga duta.” (Mat. 24:​14) Ano ang mga resulta?

9. Ano ang una nga resulta sining pagwali sing Ginharian nga hilikuton?

 ⁹ Una, natipon ang nagkalabilin sang “mga pinili,” ang hinaplas sang espiritu nga mga Cristiano. Bisan pa nalapta sa tunga sang mga pungsod, nga subong bala “sa apat ka hangin,” sa idalom sang pagtuytoy sang mga anghel ginpasulod sila sa isa ka organisasyon nga may paghiusa.​—⁠Mat. 24:31.

10. (a) Paano ginhimo ang dugang pa nga pagpain nga hilikuton, kag nahisuno sa ano nga tagna? (b) Ano ang ginapahangop sang katumanan sining mga tagna?

¹⁰ Nian, subong gintagna ni Jesus, ginsugdan niya ang pagpain sa katawhan sang tanan nga kapungsuran, “subong sang manugbantay nga nagapain sang mga karnero sa mga kanding.” Ining hilikuton, nga gintuytuyan ni Cristo gikan sa iya langitnon nga trono, nagapadayon tubtob karon, kag ikaw personal nga apektado sini. Ang kalabanan sang katawhan nagasikway sa Ginharian sang Dios kag sa hinaplas sang espiritu nga “mga anak” sini kag gani dalhon sa “walay katapusan nga pagkautod” sa kamatayon. Apang, ginaagda sang Ginuo ang iban nga panublion ang dutan-on nga bahin sang iya Ginharian, nga ginalauman ang kabuhi nga wala sing katapusan. Ina nga mga tulad-karnero nagpakig-upod sa hinaplas nga “mga anak sang ginharian,” bisan pa sila mapintas nga ginhingabot. (Mat. 25:​31-46) Sing matutom ginabuligan nila sila sa pagbantala sang importante nga mensahe sang Ginharian. Isa ka dakung kadam-an nga minilyon ang kadamuon ang nagapakigbahin sa sining hilikuton. Ang mensahe sang Ginharian mabatian tubtob sa mga ukbong sang duta. Ano ang ginapahangop sining mga hitabo? Nga kita malapit na gid sa katapusan sang “katapusan nga mga adlaw” kag nga ang “adlaw ni Jehova” malapit na.

Ano ang Yara sa Unhan?

11. May yara pa bala dugang nga pagbantala nga himuon sa wala pa mag-abot ang “adlaw ni Jehova”?

¹¹ May yara pa bala mga tagna nga matuman sa wala pa ang daku kag makahaladlok nga adlaw ni Jehova? Huo!  Ang pagpain sa katawhan may kaangtanan sa hulusayon sang Ginharian wala pa matapos. Sa iban nga mga duog nga sa diin may yara mabaskog nga pagpamatok sa sulod sang mga tinuig, madamo karon ang nangin bag-o nga mga disipulo. Kag bisan sa mga duog nga ang mga tawo nagasikway sa maayong balita, ang katarungan kag kaluoy ni Jehova ginasakdag paagi sa aton pagpanaksi. Gani, padayuna ang hilikuton! Si Jesus nagapasalig sa aton nga, kon matapos na ini, “magaabot ang katapusan.”​—⁠Mat. 24:14.

12. (a) Subong ginpakita sa 1 Tesalonica 5:​2, 3, anong talalupangdon nga hitabo ang matabo pa? (b) Ano ang kahulugan sini sa aton?

¹² Ang isa pa ka importante nga tagna sang Biblia nagatagna: “Kon magsiling sila: ‘Paghidait kag kalig-onan!’ nian sa hinali ang kalaglagan magaabot sa ila subong nga ang kasakit nagaabot sa babayi nga nagadala; kag indi sila nga mas-a makalikaw.” (1 Tes. 5:​2, 3) Kon ano ang mangin porma sina nga pagproklamar sing “paghidait kag kalig-onan” tan-awon pa naton. Apang pat-od nga indi ini magkahulugan nga malubad sang mga lider sang kalibutan ang mga palaligban sang katawhan. Ang mga “nagadumdom gid” sang adlaw ni Jehova indi mapatalang sina nga proklamasyon. Nahibaluan nila nga, sa tapos gid sina, ang “hinali nga kalaglagan” magaabot.

13. Ano nga mga hitabo ang magasunod dayon sa pagproklamar sing “paghidait kag kalig-onan,” kag sa ano nga pagpasunod?

¹³ Una, subong ginapakita sang Kasulatan, ang politikal nga mga manuggahom, pasad sa bug-os nga globo, magaliso batok sa Babilonia nga Daku, ang bug-os kalibutan nga emperyo sang dimatuod nga relihion, kag laglagon sia. (Bug. 17:​15, 16) Talalupangdon gid nga ang makiawayon nga mga panimuot labi na batok sa mga relihion sang Cristiandad nagapakita karon.  Ang mga pangulohan nga may mabaskog nga pagsulundan batok sa relihion may gamhanan na nga impluwensia sa Nasyones Unidas, kag madamo nga tawo sa relihioso nga mga pungsod ang nagabiya sa mga relihion sang ila mga ginikanan. Ano ang kahulugan sini? Nga malapit na ang paghapay sa tanan dimatuod nga relihion. Pagkatapos sina, kon ang mga pungsod magaliso, sing bug-os kusog, batok sa mga nagasakdag sang pagkasoberano ni Jehova, ang balaan nga kaakig mangin batok sa politikal nga mga pangulohan kag sa ila mga sumalakdag, nga magaresulta sa bug-os nga kalaglagan nila tanan. Bilang katapusan, si Satanas kag ang iya mga demonyo itagbong sa kadadalman, nga napunggan sing bug-os sa pag-impluwensia sa katawhan. Sa pagkamatuod mangin “adlaw ni Jehova” ini, ang adlaw nga ang iya ngalan ibindikar.​—⁠Ezeq. 38:​18, 22, 23; Bug. 19:​11–20:3.

14. Ngaa indi maalamon nga mangatarungan nga ang adlaw ni Jehova malayo pa?

¹⁴ Magaabot ini sing sibu gid sa tion, suno sa iskedyul sang Dios. Indi ini magpalantang. (Hab. 2:3) Dumduma, ang kalaglagan sang Jerusalem sang 70 C.E. hinali nga nag-abot, sang wala ginapaabot sang mga Judiyo, sang pagdumdom nila nagligad na ang katalagman. Kag ano ang natabo sa dumaan nga Babilonia? Gamhanan yadto, masinaligon, kag napabakod sang mataas nga mga pader. Apang napukan ini sa isa ka gab-i. Gani man, ang “hinali nga kalaglagan” magaabot sa malauton nga sistema karon. Kon matabo ini, kabay nga masapwan kita nga nahiusa sa matuod nga pagsimba, nga “nagadumdom gid” sang adlaw ni Jehova.

Repaso nga Paghinun-anon

● Ngaa importante nga “dumdumon gid” ang adlaw ni Jehova? Paano naton mahimo ina?

● Paano kita mismo naapektohan sang pagpain sa katawhan nga nagakatabo?

● Ano ang yara pa sa palaabuton sa wala pa magsugod ang adlaw ni Jehova? Gani ano dapat ang ginahimo naton sing personal?

[Mga Pamangkot sa Pagtinuon]