Kapitulo 13

Isa ka Dakung Kadam-an sa Atubangan sang Trono ni Jehova

1. (a) Sa wala pa ang antes-Cristianong mga alagad sang Dios ukon ang 144,000 makabaton sang ila padya, ano ang dapat nila maeksperiensiahan anay? (b) Apang ano ang mahimo matabo para sa dakung kadam-an nga nagakabuhi kon ang “dakung kapipit-an” magbunal?

 BISAN pa gin-una sa kabuhi sang matutom nga mga alagad sang Dios halin kay Abel tubtob kay Juan Bautista ang paghimo sang kabubut-on sang Dios, sila tanan napatay kag nagahulat sing pagkabanhaw. Ang 144,000 nga makaupod ni Cristo sa iya langitnon nga Ginharian dapat man mapatay antes nila mabaton ang ila padya. Sa pagpatuhay, si apostol Juan ginpakitaan sa palanan-awon nga may yara isa ka dakung kadam-an nga makalampuwas sa “dakung kapipit-an” kag, indi mapatay, may paglaum nga mabuhi sing dayon.​—⁠Bug. 7:​9-17.

Pagpakilala sa “Dakung Kadam-an”

2. Ano ang nagdul-ong sa matuod nga paghangop sa pagkanakilala sang “dakung kadam-an” sang Bugna 7:​9?

² Sa sulod sang mga siglo ang pagkanakilala sining “dakung kadam-an” wala mahangpi. Apang ang amat-amat nga paghangop sa mga tagna nga may kaangtanan sa sini naghanda sang dalanon. Sang 1923 nahantop nga ang “mga karnero” sa parabola ni Jesus sa Mateo 25:​31-46 kag ang “iban nga mga karnero” nga iya ginsambit sa Juan 10:​16 mga tawo nga nagakabuhi karon kag may kahigayunan nga makapuyo sing dayon diri sa duta. Sang 1931 ang mga tawo nga ginlaragway sa Ezequiel 9:​1-11 subong tinandaan sa ila mga agtang sang tawo nga may tintirohan sang sekretaryo ginkilala subong amo ang “mga karnero” sa Mateo kapitulo 25.  Nian, sang 1935, ang “dakung guban,” ukon “dakung kadam-an,” sang Bugna 7:​9-17 nahangpan nga amo man ang “mga karnero” sa parabola ni Jesus tuhoy sa karnero kag mga kanding. Bisan pa sang 1923 nahangpan na sadto nga ang pila sang katulad karnero nga indibiduwal nagsugod na sa pagpakita sang ila kaugalingon, sang 1935 lamang nga ang ila kadamuon nagsugod sa pag-uswag sing madasig. Sa karon literal nga minilyonmilyon ang nagatinguha nga makilala subong bahin sang nahamut-an sang Dios nga “dakung kadam-an” sang “iban nga mga karnero.”

3. Ngaa ang ila “pagtindog sa atubangan sang trono” wala nagakahulugan nga sila bahin sang langitnon nga klase?

³ Ang mga bahin sang “dakung kadam-an” tuhay sa 144,000 ka katapo sang espirituwal nga Israel, nga una nga ginsambit sa amo man nga kapitulo sang Bugna. Sa iya palanan-awon wala makita ni Juan ining “dakung kadam-an” subong didto sa langit. Ang ila “pagtindog sa atubangan sang trono” (Griego: e·noʹpi·on tou throʹnou, “kit-anon sa trono”) sang Dios wala nagakinahanglan nga sila dapat sa langit. Ang ila tindog “kit-anon” lamang sa Dios, nga nagasugid sa aton nga gikan sa langit makita niya ang mga anak sang mga tawo. (Bug. 7:​9; Sal. 11:​4; ipaanggid ang Salmo 100:​1, 2, subong man ang Lucas 1:​74, 75 kag ang Binuhatan 10:​33, Kingdom Interlinear.) Subong man, indi kinahanglanon para sa “tanan nga kapungsuran” nga mangin sa langit agod sila mangin sa atubangan sang trono ni Cristo (sing literal, “sa atubangan niya”), subong ginlaragway sa Mateo 25:​31, 32. Ang kamatuoran nga ang “dakung kadam-an, nga walay tawo nga makaisip,” indi isa ka langitnon nga klase ginapakita kon ipaanggid ang Bugna 7:​4-8 kag 14:​1-4, nga sa diin ang espisipiko nga kadamuon sang ginkuha sa duta agod magpalangit ginpahayag.

4. (a) Ano ang “dakung kapipit-an” nga ila malampuwasan? (b) Subong ginsambit sa Bugna 7:​11, 12, sin-o ang nagatan-aw sa “dakung kadam-an” kag nagapakigbahin sa ila sa pagsimba?

⁴ Sa pagpakilala sa “dakung kadam-an,” si Juan nagsulat: “Ini amo sila ang nagguwa sa dakung kapipit-an.” Ang ila malampuwasan sa pagkamatuod amo ang labing dakung kapipit-an nga maeksperiensiahan sa duta. (Bug. 7:​13, 14; Mat. 24:​21)  Ang mga makalampuwas sa sinang makahaladlok nga adlaw ni Jehova indi magaduhaduha kon sin-o ang may salabton sa ila kaluwasan. Kon ila mapinasalamaton nga ipadungog ang ila kaluwasan sa Dios kag sa Kordero, nian, subong nakita ni Juan sa palanan-awon, ang tanan sang matutom nga mga tinuga sa langit magahiusa sang ila tingog upod sa ila sa pagsimba sa lamang matuod nga Dios, nga nagasiling: “Kabay pa! Ang pagpakamaayo kag himaya kag kaalam kag pagpasalamat kag dungog kag gahom kag kusog mangin sa aton Dios sing dayon kag dayon. Kabay pa.”​—⁠Bug. 7:​11, 12.

Natilawan Tuhoy sa Pagkatakus sa Kaluwasan

5. (a) Paano naton mahibaluan kon ano ang kinahanglan agod mangin bahin sang “dakung kadam-an” nga pagaamligan? (b) Sa pagsabat sang mga pamangkot sa katapusan sining parapo, ipaathag kon ano ang kinahanglanon agod makalampuwas sa “dakung kapipit-an.”

⁵ Ang kaluwasan sang “dakung kadam-an” mahanabo nahisuno sa matarong nga mga talaksan ni Jehova. Ang maathag nga mga pamatuod sang nagapakilala nga mga tanda sang mga tawo nga luwason ginsambit sa mga tagna sang Biblia nga nagapatuhoy sa ila. Sa amo posible sa mga nagahigugma sa pagkamatarong nga maghikot karon sa tuyo nga maluwas sila. Nasambit na naton ang mga kasulatan nga nagasunod. Apang karon analisaha sila sing mahalungon, upod sa bulig sang dugang pa nga mga teksto nga nasambit, kag binagbinaga kon ano ang dapat ninyo himuon agod makapahisuno sa sining matagnaon nga mga paglaragway.

 Ang “iban nga mga karnero” nga ginsambit sa Juan 10:16

 Ano ang buot silingon sang pagpamati gid sang isa ka tawo sa tingog ni Jesus? (Juan 10:​27; Mat. 9:​9; Efe. 4:​17-24)

 Paano naton mapakita nga ginakilala naton si Cristo subong aton “isa ka manugbantay”? (Mat. 23:​10, 11)

 Ang “mga karnero” sa ilustrasyon ni Jesus tuhoy sa mga karnero kag mga kanding (Mat. 25:31-46)

 Sin-o ang “mga utod” ni Cristo nga ila sini ginhimuan sing maayo? (Heb. 2:​10, 11; 3:1)

  Sa idalom sang anong mabudlay nga mga kahimtangan ginkinahanglan sila nga magpakilala sang ila kaugalingon upod sa mga kauturan ni Cristo sa duta? Kag sa anong hilikuton nagahatag sila sing matutom nga bulig? (Bug. 12:​12, 17; Mat. 24:​14; 28:​19, 20)

 Mga tawo nga tinandaan para sa kaluwasan sang tawo nga may tintirohan sang sekretaryo (Ezeq. 9:1-11)

 Paano nila ginapakita nga wala sila nagaugyon sa makangilil-ad nga mga butang nga ginahimo sang tipiko nga Jerusalem ukon Cristiandad? (Bug. 18:​4, 5)

 Ano ang nalakip sa “tanda” nga nagapatuhay sa ila gikan sa nagapakunokuno nga mga Cristiano kag nagapain sa ila para sa kaluwasan? (1 Ped. 3:​21; Mat. 7:​21-27; Juan 13:​35)

6. Paano ang paglaragway ni Juan sa “dakung kadam-an” nagabulig sa aton sa paghangop kon ngaa gin-amligan sila?

⁶ Ang paglaragway sa “dakung kadam-an” nga masapwan sa Bugna 7:​9-15 nagahatag sing dugang pa importante nga mga detalye. Sa pagsugid sa aton kon paano ang “dakung kadam-an” nagguwa sa tapos sang “dakung kapipit-an,” ginapatalupangod man sang Kasulatan ang mga kabangdanan nga nagdul-ong sa ila kaluwasan.

7. Ano ang ila ginhimo sa wala pa ang “dakung kapipit-an,” kag paano ini ginpahangop?

⁷ Bisan pa naghalin sila gikan sa tanan nga kapungsuran, mga tribo, katawhan kag mga hambal, ginpakita sila nga sing nahiusa “nagatindog sa atubangan sang trono,” nagakilala kay Jehova, ang Isa nga nagalingkod sa trono, subong ang Soberano sang Uniberso. Ginpamatud-an nila paagi sa ila dalanon sang pagkabuhi nga sila matutom nga sumalakdag sang iya paggahom. Ang kamatuoran nga ila ‘ginlabhan ang ila mga panapton nga malaba kag ginpaputi sila sa dugo sang Kordero’ nagapakita nga ginkilala nila ang ila pagkinahanglan sa nagatumbas sala nga bili sang halad ni Jesus subong Kordero sang Dios. (Juan 1:​29; 1 Juan 2:2)  Sa pagtuo gindedikar nila ang ila kaugalingon sa Dios sa sadsaran sadtong halad, ginsimbuluhan ini paagi sa pagpatugmaw sa tubig kag karon nagahupot sing matinlo nga tindog sa atubangan sang Dios, subong ginlaragway sang ila maputi kag malaba nga mga panapton. Wala sila mag-isol sa pagpakilala sa publiko sang ila pagtuo sa Anak sang Dios. (Mat. 10:​32, 33) Nahisuno sa sining tanan, ginpakita sila subong yara sa templo sang Dios, ukon bug-os uniberso nga balay sang pagsimba, subong mga sumilimba nga nagahalad sa Dios sing “balaan nga pag-alagad sa adlaw kag gab-i.” Sa amo nakahimo sila sing rekord subong matutom nga mga sumalakdag sang matuod nga pagsimba kag mga manugbantala sang iya Ginharian.​—⁠Isa. 2:​2, 3.

8. Agod makabenepisyo kita sa sining impormasyon, ano ang dapat naton himuon?

⁸ Makita bala sa imo ang mga detalye sining matagnaon nga mga laragway? May yara bala mga paagi nga dapat mo ipahisuno ang imo kabuhi sing dugang pa sa mga ginalaragway diri? Kon amo, karon na ang tion sa paghimo sini!

PAGKABUHI SA ISA KA ESPIRITUWAL NGA PARAISO

9. Paano ginlaragway ni Juan ang espirituwal nga pagpakamaayo nga ginaagom sang “dakung kadam-an” bisan sa karon?

⁹ Isa ka bala sa mga nagalaum nga makalampuwas subong bahin sang “dakung kadam-an”? Kon ikaw nagpahisuno na sa matarong nga mga dalanon ni Jehova, nian wala sing duhaduha nga ikaw nagaagom na sang ginsaad nga mga kahimtangan nga gintawag sing nagakaigo subong espirituwal nga paraiso. Si apostol Juan ginsilingan: “Indi na sila paggutumon ukon pag-uhawon pa, ang adlaw indi na magsilak sa ila ukon ang bisan ano pa nga kasingkal sang init, kay ang Kordero, nga yara sa tunga sang trono, mangin ila manugbantay, kag magatuytoy sa ila sa mga tuburan sang tubig nga nagahatag sing kabuhi. Kag ang Dios magapahid sang tagsa ka luha sa ila mga mata.” (Bug. 7:​16, 17) Paano ini nagmatuod sa imo bahin?

10. (a) Sa espirituwal nga kahulugan paano nagmatuod nga ang “dakung kadam-an” ‘wala na ginagutom ukon ginauhaw’? (b) Naeksperiensiahan mo bala ini?

 ¹⁰ Antes ikaw napaidalom sa mahigugmaon nga pag-atipan sang Maayong Manugbantay, si Jesucristo, ikaw bala gingutom kag gin-uhaw sa pagkamatarong? (Ipaanggid ang Mateo 5:​6.) Kon amo, ang imo ginkalangkagan butang nga mahatag lamang ni Jehova paagi sa iya Anak. Sang maton-an mo ang matarong nga mga dalanon ni Jehova​—⁠ang iya katuyuan sa paglaglag sa malauton, apang dibagay nga kaluoy sa pagpahanabo sang kaluwasan para sa mga anak ni Adan​—⁠wala sing duhaduha, sa nahaunang tion nakabatyag ka sa imo kabuhi sing matuod nga pagkakontento. Ang espirituwal nga kalan-on kag ilimnon gikan sa Pulong sang Dios, nga ginaserbe paagi sa iya organisasyon, padayon nga nagahatag sa imo sing kaayuhan. (Isa. 65:​13, 14) Kag kon nadedikar mo na ang imo kaugalingon sa Dios paagi kay Cristo may yara ka na karon matuod nga katuyuan sa kabuhi. (Ipaanggid ang Juan 4:​32-34.) Sa atubangan nimo amo ang makalilipay nga paglaum nga makatigayon sing dayon nga kabuhi sa Paraiso nga duta, bangod ang Kordero “magatuytoy [sa “dakung kadam-an”] sa tubig nga nagahatag sing kabuhi.”

11. (a) Sa anong paagi matuod nga ‘ang adlaw indi na magsilak sa ila ukon ang bisan ano pa nga kasingkal sang init’? (b) Daw ano ina ka importante sa imo?

¹¹ Subong masinaligon nga “mga karnero,” ang mga bahin sang “dakung kadam-an” ginaamligan man kag ginatuytuyan sang Maayong Manugbantay. Amo kon ngaa, sa malaragwayon nga paghambal, ‘ang adlaw indi na magsilak sa ila ukon ang bisan ano pa nga kasingkal sang init.’ Wala ini nagakahulugan nga, subong isa sang “dakung kadam-an,” indi na ikaw magaantos sing paghingabot gikan sa kalibutan. Sa baylo, nagakahulugan ini nga ikaw ginaamligan gikan sa makapalaso nga init sang kaakig sang Dios. Kag kon iya paulanon na ang balaan nga paglaglag sa malauton, indi ini magadala sa imo sing kalaglagan. Ining nahamut-an nga kaangtanan magapadayon tubtob sa walay katubtuban.​—⁠Ezeq. 38:​22, 23; ipaanggid ang Salmo 11:​6; 85:​3, 4.

12. Paano ang mga luha napahiran na sa imo mga mata bisan sa karon?

¹² Daw ano ka dalayawon nga mga rason nga magkalipay ikaw kon ikaw matuod nga isa sang “dakung kadam-an”! May yara ikaw dalayawon nga paglaum nga makita ang bug-os nga pagkadula sang malauton kag dayon ang imo hunahuna kag lawas aktuwal nga mahilway sa tanan nga epekto sang sala.  Apang bisan sa karon ang kasubo nga ginabatyag sang mga tawo bangod ignorante sila sa Dios wala nagapapiot sa imo. Nakilala mo na ang kalipay nga yara lamang sa katawhan nga ang ila Dios amo si Jehova. (Sal. 144:​15b) Sa sining paagi ginaagom mo na ang katumanan sang saad: “Ang Dios magapahid sang tagsa ka luha sa ila mga mata.”

13. Ano ang magadugang sa mga kalipay sang espirituwal nga paraiso samtang nagapadayon ang milenyo nga paggahom ni Cristo?

¹³ Subong nga ang “dakung kadam-an” makalampuwas sa katapusan sining sistema sang mga butang, amo man ang espirituwal nga paraiso. Kon ikaw isa sa ila, nian padayon ikaw nga magakalipay sa isa ka espirituwal nga sinalusalo sang matambok nga mga butang samtang nagapadayon ang milenyo nga paggahom ni Cristo. Ang imo ihibalo tuhoy sa Dios magadalom pa samtang ginatan-aw mo ang wala nagakapaslawan nga katuyuan nga nagakatuman sing mahimayaon. Ang imo kalipay magadugang samtang nagapakigbahin ikaw sa pag-abiabi sa nagadamo nga kadam-an gikan sa mga patay agod mahiusa upod sa inyo sa matuod nga pagsimba. Kag ang pisikal nga mga pagpakamaayo nga ihatag sa amo nga tion labi gid nga mangin hamili sa tanan nga matutom nga alagad sang Dios bangod mga ekspresyon ini sang gugma ni Jehova.​—⁠Isa. 25:​6-9; Sant. 1:17.

Repaso nga Paghinun-anon

● Upod sa anong tumalagsahon nga hitabo ginaangot sang Biblia ang “dakung kadam-an,” kag paano?

● Kon luyag gid naton malakip sa gintawag sang Dios nga “dakung kadam-an,” ano ang dapat naton himuon karon?

● Daw ano ka importante sa imo ang mga pagpakamaayo sang espirituwal nga paraiso?

[Mga Pamangkot sa Pagtinuon]