Kapitulo 7

Kon Ano ang Aton Maton-an Gikan sa Pagtugot sang Dios sa Kalautan

1. (a) Kon ginlaglag sa gilayon ni Jehova ang mga rebelde sa Eden, paano kuntani kita naapektohan? (b) Sa baylo, anong mahigugmaon nga mga aman ang gin-aman sa aton ni Jehova?

 WALAY sapayan sang mga kabudlayan nga mahimo mag-abot sa aton kabuhi, ang aton pagkatawo indi inhustisya sa bahin sang Dios. Ginsangkapan niya ang una nga mga tawo sing kahimpitan kag ginhatag sa ila ang Paraiso subong ila puluy-an. Kon ginlaglag niya dayon sila pagkatapos sila magrebelde, wala kuntani sing tawhanon nga kaliwatan karon nga may balatian, kaimulon kag krimen. Apang sing maluluy-on, gintugutan ni Jehova sanday Adan kag Eva nga magpatubas sing pamilya sa wala pa sila mapatay, bisan pa nakapanubli sila sing pagkadihimpit. Paagi kay Cristo naghimo sia sing aman para sa nagatuo nga mga anak ni Adan agod nga ila matigayon ang nadula ni Adan​—⁠ang dayon nga kabuhi sa idalom sang mga kahimtangan nga sa diin mahimo nga matigayon ang daku nga kalipay sa kabuhi.​—⁠Deut. 32:​4, 5; Juan 10:10.

2. Ginhimo bala ining tanan para lamang sa aton kaluwasan?

² Indi matakus ang personal nga mga benepisyo nga matigayon naton sa sini. Apang gikan sa rekord sang Biblia aton naton-an nga nadalahig ang kapin pa ka importante nga butang sang sa aton personal nga kaluwasan.

Bangod sang Iya Daku nga Ngalan

3. Ano ang nadalahig may kaangtanan sa katumanan sang katuyuan ni Jehova para sa duta sa katawhan?

³ Ang ngalan ni Jehova, ang iya kadungganan subong ang Soberano sang Uniberso kag subong Dios sang kamatuoran, nadalahig sa katumanan sang iya katuyuan tuhoy sa duta kag katawhan. Bangod sang palangakuan ni Jehova,  ang paghidait kag ang kaayuhan sang bug-os nga uniberso nagakinahanglan nga ang iya ngalan hatagan sing bug-os nga pagtahod nga takus sa sini kag nga ang tanan dapat magtuman sa iya.

4. Ano gid ang ginlakip sa sadto nga katuyuan?

⁴ Sa tapos gintuga si Adan kag si Eva, ginhatagan niya sila sing tulumanon. Maathag nga ginsambit niya nga ang iya katuyuan indi lamang nga gamhan ang bug-os nga duta, sa amo pasangkaron ang mga dulunan sang Paraiso, kundi pun-on ini sing mga kaliwat sang una nga lalaki kag babayi, si Adan kag si Eva. (Gen. 1:​28) Mapaslawan bala ini nga katuyuan bangod sang ila sala, nga magaresulta sa kahuy-anan sa ngalan sang Dios?

5. (a) Suno sa Genesis 2:​17, san-o mapatay ang isa nga magakaon gikan sa kahoy sang ihibalo sang maayo kag malaut? (b) Paano ina gintuman ni Jehova, samtang nagatahod man sa iya katuyuan tuhoy sa pagpuno sa duta sing pumuluyo?

⁵ Si Jehova nagpaandam kay Adan nga kon sia malalison nga magkaon gikan sa kahoy sang ihibalo sang maayo kag malaut mapatay sia nga totoo “sa adlaw” sang iya pagkaon. (Gen. 2:​17) Suno gid sa ginhambal sang Dios, sang adlaw nga nakasala si Adan si Jehova nakighusay sa mga nakalapas kag ginpamatbatan sila sing kamatayon. Ang silot indi malikawan. Sing hudisyal, gikan sa pagtamod sang Dios, sanday Adan kag Eva napatay sadto nga adlaw. (Ipaanggid ang Lucas 20:​37, 38.) Apang agod tumanon ang iya ginsiling nga katuyuan tuhoy sa pagpuno sa duta sing mga pumuluyo, gintugutan sila ni Jehova nga magpatubas sing isa ka pamilya antes sila mapatay sing literal. Walay sapayan, gikan sa pagtamod sang Dios nga ang 1,000 ka tuig subong sang isa ka adlaw, sang magdulog ang kabuhi ni Adan sa edad nga 930 ka tuig, sa sulod gihapon ini sang isa ka “adlaw.” (Gen. 5:​3-5; ipaanggid ang Salmo 90:​4; 2 Pedro 3:​8.) Sa amo ang pagkamaminatud-on ni Jehova ginbayaw tuhoy sa tion nga ginhimo ang silot kag ang iya katuyuan nga  pun-on ang duta sing mga anak ni Adan wala mabalabagi. Apang nagkahulugan yadto nga, sa sulod sang isa ka tion, ang makasasala nga katawhan gintugutan nga magkabuhi.

6, 7. (a) Ano ang ginapakita sang Exodo 9:​15, 16 sa kon ngaa gintugutan ni Jehova ang kalautan nga magpadayon sa sulod sang isa ka tion? (b) Sa bahin ni Paraon, paano ang gahom ni Jehova ginpakita kag paano ginpahayag ang Iya ngalan? (c) Gani ano ang mangin resulta sa katapusan sang karon nga malaut nga sistema?

⁶ Ang ginsiling ni Jehova sa manuggahom sang Egipto sang kaadlawan ni Moises nagapakita sing dugang pa kon ngaa gintugutan sang Dios nga ang kalautan magpadayon sa sulod sang isa ka tion. Sang wala magtugot si Paraon nga palakton ang kaanakan sang Israel gikan sa Egipto, wala sia sa gilayon ginlaglag ni Jehova. Napulo ka kalalat-an ang ginpahanabo sa pungsod, nga nagapakita sang gahom ni Jehova sa makatilingala kag nanuhaytuhay nga paagi. Sang nagapaandam tuhoy sa ikapito, ginsilingan ni Jehova si Paraon nga mahapos niya malaglag si Paraon kag ang iya katawhan gikan sa nawong sang duta. “Apang, sa kamatuoran,” siling ni Jehova, “tungod sining katuyuan ginbuhi ko ikaw, sa pagpakita sa imo sang akon gahom agod nga mapahayag ang akon ngalan sa bug-os nga duta.”​—⁠Ex. 9:​15, 16.

⁷ Sang ginluwas ni Jehova ang Israel, ang iya ngalan nakilal-an sing lapnag. Sa karon, halos mga 3,500 ka tuig sang ulihi, ang iya ginhimo anay wala malipatan. Indi lamang nga ginpahayag ang iya personal nga ngalan nga Jehova kundi ang kamatuoran man nahanungod sa Isa nga nagadala sina nga ngalan. Ginpalig-on sini ang kadungganan ni Jehova subong isa ka Dios nga nagatuman sang iya mga katipan kag nagahikot para sa iya mga alagad. Ginpakita sini nga bangod sang iya labing gamhanan nga gahom wala sing makabalabag sa iya katuyuan. Ang labi pa nga makadalayaw amo ang nagapakari nga kalaglagan sang bug-os nga malaut nga sistema, kitaon kag indi kitaon. Ina nga pagpasundayag sang labing gamhanan nga gahom kag ang himaya nga dalhon sini sa ngalan ni Jehova indi gid pagkalipatan sa maragtas sang uniberso. Ang mga kaayuhan sini mangin walay katapusan!​—⁠Ezeq. 38:​23; Bug. 19:​1, 2.

 ‘O Pagkadalom sang Kaalam sang Dios!’

8. Anong dugang pa nga mga butang ang ginalaygay sa aton ni Pablo nga binagbinagon?

⁸ Sa iya sulat sa mga taga-Roma, si apostol Pablo nagpamangkot: “May pagkadimatarong bala sa Dios?” Nian nagsabat sia paagi sa pagpadaku sa kaluoy sang Dios kag paagi sa pagpatuhoy sa ginsiling ni Jehova kay Paraon. Ginapahanumdom man niya ang kamatuoran nga kita nga mga tawo subong sang daga sa kamot sang isa ka maninihon. Nagareklamo bala ang daga nahanungod sa kon paano sia ginagamit? Si Pablo nagadugang: “Kon, karon, ang Dios nga buot magpakita sang iya kasingkal kag magpakilala sang iya gahom, nagbatas nga may dakung pagpailob sa mga suludlan sang kasingkal nga takus sa kalaglagan, agod nga mapakilala niya ang kamanggaran sang iya himaya sa mga suludlan sang kaluoy, nga gin-aman niya nga daan nga para sa himaya, kita nga iya gintawag, indi gikan sa mga Judiyo lamang kundi sa mga Gentil, ano nian?”​—⁠Roma 9:​14-24.

9. (a) Sin-o ang “mga suludlan sang kasingkal nga takus sa kalaglagan”? (b) Ngaa nagpakita si Jehova sing daku nga pagpailob walay sapayan sang ila kapintas, kag paano ang katapusan nga resulta mangin sa kaayuhan sang mga nagahigugma sa iya?

⁹ Sugod sang ginpahayag ni Jehova ang matagnaon nga pulong nga narekord sa Genesis 3:​15, si Satanas kag ang iya binhi nangin “mga suludlan sang kasingkal nga takus sa kalaglagan.” Sa sulod sadtong bug-os nga tion si Jehova nagpailob. Ang malauton nagyaguta sang iya mga dalanon; ginhingabot nila ang iya mga alagad, kag ginpatay pa ang iya Anak. Apang si Jehova nagpakita sing daku nga pagpugong, nga may dayon nga kaayuhan sa iya mga alagad. Ang tanan nga tinuga may kahigayunan nga makita ang malaglagon nga mga resulta sang pagrebelde batok sa Dios. Sa amo man nga tion, ang kamatayon ni Jesus nag-aman sing paagi para sa pagluwas sa matinumanon nga katawhan kag para sa ‘paglaglag sang mga binuhatan sang Yawa.’​—⁠1 Juan 3:​8; Heb. 2:​14, 15.

10. Ngaa padayon nga ginbatas ni Jehova ang kalautan sa sulod sang nagligad nga 1,900 ka tuig?

¹⁰ Sa sulod sang kapin sa 1,900 ka tuig kutob sang pagkabanhaw ni Jesus si Jehova nagbatas sing dugang pa sa “mga suludlan sang kasingkal,” kag ginpunggan ang ila kalaglagan. Ngaa?  Bangod iya ginahanda ang ikaduha nga bahin sang binhi sang babayi, sila nga makaupod ni Jesucristo sa iya langitnon nga Ginharian. (Gal. 3:​29) Ini sila, nga may kadamuon nga 144,000 amo ang “mga suludlan sang kaluoy” nga ginsambit ni apostol Pablo. Una, ang mga indibiduwal gikan sa mga Judiyo gin-agda sa paghuman sini nga klase. Nian gindugang ang mga nasirkunsidar nga mga Samaritano kag, sang ulihi, ang katawhan sang Gentil nga mga pungsod. Upod ang daku nga pagpailob gintuman ni Jehova ang iya katuyuan, nga wala ginapilit ang bisan sin-o sa pag-alagad, apang nagahatag sing daku nga pagpakamaayo sa ila nga nagbaton sing mainapresyahon sa iya mahigugmaon nga mga aman. Sa karon ang paghanda sa sinang langitnon nga hubon halos kompleto na.

11. Anong isa pa ka grupo ang nagabenepisyo karon gikan sa pagpailob ni Jehova?

¹¹ Apang kamusta naman ang mga pumuluyo? Sa sibu nga tion sang Dios binilyonbilyon ang pagabanhawon subong mga sakop sang Ginharian. Subong man, labi na sugod sang 1935 C.E. bangod sang pagpailob ni Jehova nahimo ang pagtipon sa “dakung kadam-an” gikan sa tanan nga pungsod agod nga sila maluwas.​—⁠Bug. 7:​9, 10; Juan 10:16.

12. (a) Subong resulta, ano ang aton naton-an nahanungod kay Jehova mismo? (b) Ano ang imo reaksion sa kon paano ginhusay ni Jehova ining mga butang?

¹² May yara bala pagkadimatarong sa sining tanan? Wala gid! Kon ginapunggan sang Dios ang kalaglagan sang malauton, ang “mga suludlan sang kasingkal,” agod nga makapakita sia sing kaluoy sa iban pa nahisuno sa iya katuyuan, paano ang bisan sin-o makareklamo sing makatarunganon? Sa baylo, samtang makita naton ang pagbuyagyag sang iya katuyuan, daku ang maton-an naton nahanungod kay Jehova mismo. Ginadayaw naton ang mga kinaiya sang iya personalidad nga nangin dayag​—⁠ang iya pagkamatarong, ang iya kaluoy, ang iya pagbatas, ang pagkananuhaytuhay sang iya kaalam.  Ang maalamon nga paghusay ni Jehova sa hulusayon magatindog sa walay katubtuban subong isa ka pamatuod sa kamatuoran nga ang iya paagi sang paggahom amo ang labing maayo. Upod kay apostol Pablo kita makasiling: “O pagkadalom sang kamanggaran kag kaalam kag ihibalo sang Dios! Pagkadimatungkad sang iya paghukom kag pagkadimausoy sang iya mga dalanon!”​—⁠Roma 11:33.

Kahigayunan sa Pagpakita sang Aton Debosyon

13. (a) Kon kita personal nga nagaantos ano nga kahigayunan ang ginapresentar sini sa aton? (b) Ano ang magabulig sa aton sa paghikot sing maalamon?

¹³ May yara mga kahimtangan nga dapat personal nga antuson bangod wala pa ginalaglag sang Dios ang malauton kag pahanabuon ang gintagna nga pagpasag-uli sang katawhan. Ano ang aton reaksion sa sina? Makakita bala kita sa sini sing mga kahigayunan sa pag-ambit sa pagbayaw sang ngalan ni Jehova gikan sa kahuluy-an kag pamatud-an ang Yawa nga isa ka butigon? Mapalig-on kita sing daku sa paghimo sini paagi sa pagdumdom sang laygay: “Anak ko, magmaalam ka, kag pasadyaha ang akon tagipusuon, agod nga masabat ko sia nga nagapakahuya sa akon.” (Hulu. 27:​11) Si Satanas, ang isa nga nagapakahuya kay Jehova, nagapanumbungon nga kon ang katawhan madulaan sing materyal ukon magaantos sa pisikal, basulon nila ang Dios kag sumpaon pa gani sia. (Job 1:​9-11; 2:​4, 5) Aton ginapahalipay ang tagipusuon ni Jehova kon paagi sa aton katutom sa Dios walay sapayan sang mga kabudlayan, ginapakita naton nga indi ina matuod sa aton bahin. May yara kita bug-os nga pagsalig nga si Jehova may malum-ok nga gugma para sa iya mga alagad kag nga, subong sang natabo kay Job, sa sibu nga tion si Jehova maalwan nga magapadya sa aton kon magmatutom kita.​—⁠Sant. 5:​11; Job 42:​10-16.

14. Kon magsalig kita kay Jehova kon yara kita sa idalom sang pagtilaw, anong iban pa nga mga benepisyo ang magaabot sa aton?

¹⁴ Kon magsalig kita kay Jehova kon yara kita sa mabudlay nga mga pagtilaw, makapalambo kita sing indi mabilihan nga mga kinaiya. Subong resulta sang mga butang nga gin-antos ni Jesus, sia “nakatuon sa pagtuman” sa isa ka paagi nga wala pa niya mahibalui sang una. Kita man, makatuon​—⁠makapalambo sing pagkamainantuson, pagbatas kag sing tudok nga apresasyon sa  matarong nga mga dalanon ni Jehova. Aton bala mapailubon nga batunon ina nga paghanas?​—⁠Heb. 5:​8, 9; 12:​11; Sant. 1:​2-4.

15. Samtang mapailubon nga ginabatas naton ang kabudlayan, paano ang iban pa makabenepisyo?

¹⁵ Maobserbahan sang iban ang aton ginahimo. Bangod sang ginabatas naton nga resulta sang aton gugma sa pagkamatarong, ang iban sa ila mahimo nga sa ulihi makaapresyar kon sin-o gid ang “mga utod” ni Cristo sa karon, kag paagi sa pagpakighiusa upod sa iya “mga utod” sa pagsimba, sila man mahimo nga makaagom sing mga pagpakamaayo sang dayon nga kabuhi. (Mat. 25:​34-36, 40, 46) Luyag ni Jehova kag sang iya Anak nga matigayon nila ina nga kahigayunan. Amo man bala kita? Handa bala kita sa pagbatas sing kabudlayan agod mangin posible ina?

16. Paano ang aton pagtamod sa aton personal nga kabudlayan naangot sa paghiusa?

¹⁶ Daw ano kaayo kon amo kon aton ginatamod bisan ang mabudlay nga mga kahimtangan sa kabuhi subong mga kahigayunan sa pagpakita sang aton debosyon kay Jehova kag sa pag-ambit man sa pagtuman sang iya kabubut-on! Ang aton paghimo sini makahatag sing pamatuod nga kita sa pagkamatuod nagahikot padulong sa paghiusa upod sa Dios kag kay Cristo nga para sa amo si Jesus nangamuyo para sa tanan nga matuod nga mga Cristiano.​—⁠Juan 17:​20, 21.

Repaso nga Paghinun-anon

● Samtang ginatugutan ang kalautan, paano si Jehova nagakaigo nga nagpakita sing daku nga pagtahod sa iya kaugalingon nga ngalan?

● Paano ang pagbatas sang Dios sa “mga suludlan sang kasingkal” naghimo sang iya kaluoy nga makalab-ot sa aton?

● Ano ang dapat naton tinguhaan nga makita sa aton kahimtangan nga nagadalahig sing personal nga pag-antos?

[Mga Pamangkot sa Pagtinuon]