Kapitulo 17

“Magmainit Kamo sa Inyo Paghigugmaanay”

1, 2. (a) Ano sa masami ang nagapahamuot sa mga bag-uhan sa mga miting sang mga Saksi ni Jehova? (b) Anong iban pa nga pamatuod sining kinaiya ang makita nila sa aton mga kombension?

 SA UNA nga tion nga magtambong ang mga tawo sa mga miting sang kongregasyon sang mga Saksi ni Jehova masami sila mahamuot sa gugma nga ginapakita didto. Makita nila ang mainit nga pagpakighambal kag pag-abiabi sa ila sing personal.

² Sa aton mga kombension natalupangdan man sang mga bisita nga ang kalabanan sang mga nagatambong maayo sing pamatasan. Ang isa ka manugbalita nagsulat nahanungod sina nga kombension: ‘Wala sing bisan sin-o nga yara sa idalom sang impluwensia sang droga ukon alkohol. Wala sing nagasininggitanay. Wala sing nagatinikluranay. Wala sing nagadinis-uganay. Wala sing nagabuyayaway. Wala sing bastos nga mga lahog ukon malaw-ay nga mga hambal. Wala sing maaso nga hangin. Wala sing kawatay. Wala sing nagapanghaboy sing mga lata sa palibot. Tumalagsahon gid yadto.’ Ini tanan pamatuod sang gugma, ang sahi nga ‘wala nagagawi sing dinagakaigo kag wala nagapangita sang iya lamang kaayuhan.’​—⁠1 Cor. 13:​4-8.

3. (a) Sa ulihi, ano ang dapat mangin hayag sa aton pagpakita sing gugma? (b) Bilang pag-ilog kay Cristo, ano nga sahi sang gugma ang dapat naton palambuon?

³ Ang gugma isa ka kinaiya nga nagapakilala sa tagsa ka matuod nga Cristiano. (Juan 13:​35) Samtang nagatubo kita sa espirituwal, dapat naton ipabutyag ini sing dugang pa. Si apostol Pablo nangamuyo nga ang gugma sang iya kauturan “magbugana sing labi kag labi.” (Filip. 1:​9; 1 Tes. 3:​12) Ginlaygayan man ni Pedro ang mga masigka-Cristiano nga tugutan ang ila gugma nga maglakip sa “bug-os nga paghiliutod.” (1 Ped. 2:​17)  Ang aton gugma dapat magpahulag sa aton sa paghimo sing kapin pa sa pagtambong lamang sa mga miting upod sa mga tawo nga wala naton ginapanikasugan nga makilala sing personal. Dapat ini maglakip sing kapin pa sa pagtamyaw lamang sing “Hello” sa tion kag tion. Ginpakita ni apostol Juan nga dapat ini mangin nagasakripisyo sang kaugalingon. Sia nagsulat: “Sa sini nakilala ta ang gugma, kay ginhatag niya [Anak sang Dios] ang iya kalag tungod sa aton; kag dapat naton ihatag ang aton mga kalag tungod sa aton kauturan.” (1 Juan 3:​16; Juan 15:​12, 13) Wala pa naton mahimo ina. Apang ihatag bala naton ang aton kabuhi tungod sa aton kauturan? Bueno, tubtob sa anong kasangkaron nagatinguha kita sa pagbulig sa ila karon, bisan pa mahimo indi ini kombenyente?

4. (a) Ano ang iban pa nga paagi nga mahimo kita makapabutyag sing gugma sing kapin pa? (b) Ngaa importante nga magpakita kita sing mainit nga gugma sa isa kag isa?

⁴ Upod sa mga buhat nga nagapakita sing nagasakripisyo sang kaugalingon nga espiritu, importante man nga magpakita sing mainit gid nga gugma sa aton kauturan. Ang Pulong sang Dios nagalaygay: “Sa gugma sang paghiliutod magmalolo kamo ang isa sa isa.” (Roma 12:​10) Nagabatyag kita sing subong sina sa pila ka tawo. Aton bala malakip ang dugang pa sa grupo nga aton ginapakitaan sina nga gugma? Samtang nagahilapit ang katapusan sang daan nga sistema, importante nga kita mangin suod pa sa aton Cristianong mga kauturan. Ginapaalisto kita sang Biblia sa sini nga nagasiling: “Ang katapusan sang tanan nga butang malapit na. . . . Labaw sa tanan, magmainit kamo sa inyo paghigugmaanay, kay ang gugma nagatabon sang kadam-an nga mga sala.”​—⁠1 Ped. 4:​7, 8.

5. Ngaa sayop ang magpaabot nga wala sing problema nga mag-utwas sa ulot sang mga katapo sang kongregasyon?

⁵ Sa pagkamatuod, tubtob dihimpit kita, may mga tion nga makahimo kita sing mga butang nga magasaklaw sa iban. Sila, man, sa nanuhaytuhay nga paagi makasala batok sa aton. (1 Juan 1:8) Kon masapwan mo ang imo kaugalingon sa sina nga kahimtangan, ano ang dapat mo himuon?

 Kon Ano ang Himuon kon Mag-utwas ang mga Problema

6. (a) Ngaa ang laygay sang Biblia mahimo nga indi pirme maghisanto sa aton mga huyog? (b) Apang ano ang mangin resulta kon iaplikar naton ini?

⁶ Ang Kasulatan nagaaman sing kinahanglanon nga pagtuytoy. Apang ano kon ang laygay indi magbagay sa aton huyog nga himuon subong dihimpit nga mga tawo. (Roma 7:​21-23) Walay sapayan, ang aton hanuot nga pagtinguha sa sini magahatag sing pamatuod sa aton sinsero nga handum nga pahamut-an si Jehova, kag pauswagon man sini ang kalidad sang aton gugma sa iban.

7. (a) Kon masaklaw kita sang iban, ngaa indi kita dapat magtimalos? (b) Ngaa indi dapat nga likawan naton ang isa ka tawo nga nakasala sa aton?

⁷ Kon kaisa kon ang mga tawo masaklaw nagapangita sila sing mga paagi nga makatimalos sa nakasala. Apang nagapadaku lamang ina sa kahimtangan. Kon kinahanglan ang pagtimalos, dapat naton ina ibilin sa Dios. (Hulu. 24:​29; Roma 12:​17-21) Ang iban nagatinguha nga dulaon sa ila kabuhi ang nakasala, ginalikawan ang pagpakig-angot sa iya. Apang indi naton ina mahimo sa mga masigkasumilimba. Ang pagkahalamut-an sang aton pagsimba nasandig sa bahin, sa aton gugma sa aton kauturan. (1 Juan 4:​20) Makasiling bala kita sing bunayag nga ginahigugma naton ang isa ka tawo kon indi kita makighambal sa iya ukon kon kita indi mapahamtang kon yara sia? Dapat naton atubangon ini nga problema kag lubaron. Paano?

8, 9. (a) Kon may reklamo kita batok sa isa ka utod, ano ang husto nga butang nga himuon? (b) Paano kon sila sulitsulit nga nagapakasala batok sa aton? (c) Ngaa atubangon naton ini nga bagay sa sining paagi, kag ano ang magabulig sa aton sa paghimo sini?

⁸ Tuhoy sa sini nga bagay si apostol Pablo nagsulat: “Padayon nga nagapinaumuray kag nagapinatawaray kon ang isa may inugsumbong batok sa isa. Subong nga si Jehova nagpatawad sa inyo, amo man ang himuon ninyo.” (Col. 3:​13) Mahimo mo bala ina? Ano kon ang isa ka tawo sulitsulit nga nagapakasala batok sa imo sa nanuhaytuhay nga paagi?

⁹ Amo man sini ang ginpamangkot ni apostol Pedro, kag sia nagpanugda nga ayhan dapat niya patawaron ang isa ka utod tubtob sa makapito. Si Jesus nagsabat: “Wala ako nagasiling sa imo, Tubtob sa makapito, kundi, Tubtob sa kapituan ka pito.” Apang ngaa?  Si Jesus nagpaathag paagi sa isa ka ilustrasyon nga nagpadaku sang kadaku sang aton utang sa Dios kon ipaanggid sa nautang sa aton sang bisan sin-o nga tawo. (Mat. 18:​21-35) Sa madamo nga paagi nagapakasala kita batok sa Dios sa kada adlaw​—⁠kon kaisa paagi sa makagod nga buhat, masunson paagi sa aton ginahambal ukon ginahunahuna, subong man paagi sa aton kapaslawan sa paghimo sang dapat naton himuon. Bangod sang aton pagkawalay hinalung-ong mahimo nga indi gani naton marealisar nga ang pila sang mga butang nga aton ginhimo sayop, ukon bangod sang masako nga kabuhi mahimo nga pasapayanan lamang naton ini. Ang Dios may kinamatarong nga kuhaon ang aton kabuhi subong kabayaran sa aton sala. (Roma 6:​23) Apang padayon gihapon sia nga nagapakita sa aton sing kaluoy. (Sal. 103:​10-14) Busa makatarunganon nga ipatuman niya sa aton nga amo man ang aton himuon sa isa kag isa. (Mat. 6:​14, 15; Efe. 4:​1-3) Kon himuon naton ina, sa baylo nga magtanom sing kaakig, pamatuod ina nga natigayon na naton ang sahi sang gugma nga “wala nagaisip sing kalautan.”​—⁠1 Cor. 13:​4, 5; 1 Ped. 3:​8, 9.

10. Ano ang dapat himuon kon ang isa ka utod may reklamo batok sa aton?

¹⁰ May mga tion nga aton marealisar nga bisan pa wala kita sing malain nga buot sa aton utod, may butang sia nga batok sa aton. Ano ang dapat naton himuon? Sa wala sing pagpalantang dapat naton sia hambalon kag tinguhaon nga ipasag-uli ang mahidaiton nga kaangtanan. Ang Biblia nagalaygay sa aton nga kita ang mag-una. (Mat. 5:​23, 24) Ang paghimo sina indi mahapos. Nagakinahanglan ini sing gugma upod ang pagkamapainubuson. Nagakaigo bala ang kabaskugon sina nga mga kinaiya sa imo amo kon ngaa himuon mo ang laygay sang Biblia? Isa ini ka importante nga tulumuron nga mapanikasugan.

11. Kon ang isa ka utod nakahimo sing mga butang nga nagpaakig sa aton, ano ang dapat himuon nahanungod sini?

¹¹ Sa pihak nga bahin, mahimo nga ang isa nagahimo sing mga butang nga nagapaakig sa imo​—⁠kag ayhan sa iban. Indi bala maayo nga hambalon sia sang isa? Mahimo.  Kon imo ipaathag sa iya ang problema sa isa ka malolo nga paagi, mahimo mangin maayo ang mga resulta. Apang una anay dapat mo pamangkuton ang imo kaugalingon: ‘Indi gid bala makasulatanhon ang mga butang nga iya ginahimo? Ukon ang problema amo bala bangod ang akon ginhalinan kag paghanas sa akon tuhay sang sa isa?’ Kon amo, maghalong nga indi maghimo sang imo kaugalingon nga talaksan kag dayon hukman sia pasad sa sini. (Sant. 4:​11, 12) Si Jehova wala sing pili nga nagabaton sa mga tawo gikan sa tanan nga sahi sang ginhalinan, kag mapailubon sia sa ila samtang nagauswag sila sa espirituwal.

12. (a) Kon may kaso sang daku nga pagpakasala sa sulod sang kongregasyon, sin-o ang nagaatipan sina? (b) Apang sa idalom sang anong mga kahimtangan nga salabton sang isa nga hinimuan sing sala nga mag-una sa paghikot? Kag ano ang tulumuron?

¹² Apang, kon ang isa sa kongregasyon naulamid sa isa ka daku nga sala, dapat nga atipanon ini sa gilayon. Apang sin-o ang magaatipan? Sa masami amo ang mga gulang. Apang, kon ini tuhoy sa negosyo sa tunga sang kauturan, ukon mahimo sayop nga paggamit sang dila sa isa ka paagi nga serioso nga naghalit sa isa, nian ang isa nga hinimuan sing sala dapat anay magtinguha sa pagbulig sa nakasala sa personal nga sadsaran. Mahimo nga mabudlay ina para sa iban. Apang amo ini ang ginalaygay ni Jesus sa Mateo 18:​15-17. Ang gugma sa utod kag ang hanuot nga handum nga mahuptan sia subong isa ka utod magabulig sa isa nga himuon ini sa isa ka paagi nga, kon mahimo, malab-ot ang tagipusuon sang nakasala.​—⁠Hulu. 16:23.

13. Kon mag-utwas ang problema sa ulot naton kag sang isa pa ka utod, ano ang magabulig sa aton sa pagtamod sa mga bagay sing nagakaigo?

¹³ Kon mag-utwas ang problema, daku man ukon diutay, ginabuligan kita kon magtinguha kita sa paghangop kon paano ginatamod ini ni Jehova. Wala sia nahamuot sa bisan ano nga porma sang sala, apang makita niya ini sa aton tanan.  Sa iya sibu nga tion ang indi mahinulsulon nga makasasala ginapaguwa sa iya organisasyon. Apang kamusta kita nga nabilin? Kita tanan ginapakitaan sang iya pagkamapailubon kag kaluoy. Sia nagapahamtang sa aton sing sulundan agod ilugon naton. Kon himuon naton ini, ginapabanaag naton ang iya gugma.​—⁠Efe. 5:​1, 2.

Magpangita sing mga Paagi sa ‘Pagdaku’

14. (a) Ngaa ginpalig-on ni Pablo ang mga taga-Corinto nga “magdaku”? (b) Ano ang ginapakita sang kasulatan nga ginsambit diri nga nagakaigo nga binagbinagon naton nahanungod sini?

¹⁴ Si apostol Pablo naghinguyang sing madamo nga binulan sa pagtukod sing kongregasyon sa Corinto, Gresya. Nagpangabudlay sia sing lakas sa pagbulig sa kauturan didto kag ginhigugma gid niya sila. Apang ang iban sa ila kulang sing mainit nga gugma sa iya. Tuman sa ila ka mamulayon. Ginlaygayan niya sila nga “magdaku” sa pagpakita sing gugma. (2 Cor. 6:​11-13; 12:​15) Nagakaigo nga binagbinagon naton kon tubtob diin kita nagapakita sing gugma sa iban kag mangita sing mga paagi nga ‘padakuon’ ini.​—⁠1 Juan 3:​14; 1 Cor. 13:3.

15. Ano ang makabulig sa aton sa pag-uswag sa gugma para kay bisan sin-o nga indi malapit sa aton?

¹⁵ Nabudlayan bala kita sa pagpakigsuod sa pila sa kongregasyon? Kon tinguhaan gid naton nga indi pagsapakon ang ila diutay nga mga sala, subong nga amo man ang luyag naton nga himuon nila sa aton, makabulig ini sa pagpainit sang relasyon sa ulot naton. (Hulu. 17:​9; 19:​11) Ang aton balatyagon sa ila magauswag man kon tinguhaon naton ang ila maayong mga kinaiya kag magkonsentrar sa sini. Gintalupangod gid bala naton ang mga paagi nga ginagamit ni Jehova ining kauturan? Pat-od gid nga padakuon sini ang aton gugma sa ila.​—⁠Luc. 6:​32, 33, 36.

16. Sa kamatuoran, paano kita “magdaku” sa pagpakita sing gugma sa aton mga kaupod sa kongregasyon?

¹⁶ Matuod, may mga limitasyon ang aton mahimo para sa iban. Mahimo nga indi naton matamyaw ang tanan sa tagsa ka miting. Mahimo nga indi posible nga imbitahon ang tanan kon agdahon naton ang mga abyan sa panyaga. Kita tanan may suod nga mga abyan nga upod sa ila nagahinguyang kita sing kapin nga tion sang sa iban. Apang mahimo bala kita ‘magdaku’?  Makahinguyang bala kita sing pila lamang ka minuto kada semana sa pagkilala sa iban pa sa aton kongregasyon? Mahimo ayhan nga imbitahon naton kon kaisa ang isa sini sa ila nga mag-upod sa aton sa pag-alagad sa latagon? Kon matuod gid nga kita may mainit nga gugma sa isa kag isa, pat-od nga magapangita kita sing mga paagi sa pagpakita sini.

17. Kon yara kita sa tunga sang kauturan nga wala pa naton makilala, ano ang magapakita kon bala may yara kita mainit nga gugma para man sa ila?

¹⁷ Ang Cristianong mga kombension nagahatag sing maayong mga kahigayunan sa ‘pagdaku’ sa aton gugma. Linibolibo ang nagatambong. Indi naton sila tanan makilala. Apang makagawi kita sa isa ka paagi nga ginauna naton ang ila kaayuhan sang sa aton kasulhay, bisan pa indi pa naton sila kilala. Kag makapakita kita sing personal nga interes sa ulot sang mga sesyon paagi sa pag-una pangilala sa pila sa palibot naton. Sa pila ka adlaw ang tanan nga magapuyo sa duta mangin mag-ulutod nga lalaki kag babayi, nahiusa sa pagsimba sa Dios kag Amay sang tanan. Daw ano ka makalilipay nga makilala sila tanan, upod ang ila madamo kag nanuhaytuhay nga mga kinaiya! Ang mainit nga gugma para sa ila magapahulag sa aton nga handumon ang paghimo sina. Ngaa indi magsugod na karon?

Repaso nga Paghinun-anon

● Kon mag-utwas ang problema sa ulot sang kauturan nga mga lalaki ukon mga babayi, paano ini lubaron? Ngaa?

● Samtang nagatubo kita sa espirituwal, sa anong mga paagi ang aton gugma dapat man magtubo?

● Paano posible nga ipakita ang mainit nga gugma para sa dugang pa luwas sa aton suod nga mga abyan?