Kapitulo 3

Manguyapot sing Hugot sa Pulong sang Dios

1. (a) Paano naeksperiensiahan sang dumaan nga Israel ang pagkamaminatud-on sang Pulong sang Dios? (b) Ngaa interesado kita sa sini?

 “NAKAHIBALO gid kamo sa bug-os ninyo nga mga tagipusuon nga wala sing isa ka pulong sa tanan nga maayong pulong nga ginpamulong sa inyo ni Jehova nga inyo Dios nga napaslawan. Ang tanan nahanabo sa inyo.” Amo ini ang pahanumdom nga ginhatag ni Josue sa mga gulang nga lalaki sang Israel sa tapos sila makasulod sa Ginsaad nga Duta. Apang sang mga tuig nga nagsunod wala nila gintanom sa ila tagipusuon ang Pulong sang Dios kag gin-aplikar ini. Ano ang resulta? Ang Biblia maathag nga nagasiling nga subong nga natuman ang mga pagpakamaayo nga ginsaad ni Jehova, iya man gintuman ang ginsiling niya nga mangin resulta sang paglalis. (Jos. 23:​14-16) Ina nga rekord, subong man ang nabilin nga bahin sang Biblia, gintipigan agod makatudlo sa aton​—⁠agod nga “may paglaum kita” kag agod nga indi kita makahimo sing butang nga magaresulta sa aton pagwasi sina nga paglaum.​—⁠Roma 15:⁠4.

2. (a) Sa anong kahulugan nga ang Biblia “inspirado sang Dios”? (b) Nahibaluan ini, ano ang aton salabton?

² Bisan pa mga 40 ka lalaki nga “mga sekretaryo” ang gingamit sa pagsulat sing Biblia, si Jehova gid ang Awtor sini. Nagakahulugan bala ini nga gintuytuyan niya ang tanan nga ginsulat sa sini? Huo. Subong maminatud-on nga ginsiling ni apostol Pablo, “Ang bug-os nga Kasulatan inspirado sang Dios.” Bangod kombinsido sa sina, ginapalig-on naton ang mga tawo bisan diin nga pamatian ini kag ipahisuno ang ila kabuhi sa ginasiling sini, subong sang aton ginatinguhaan nga himuon.​—⁠2 Tim. 3:​16; 1 Tes. 2:⁠13.

 Ano ang Magabulig sa Iban sa Pag-apresyar Sini?

3. Ano ang labing maayo nga paagi sa pagbulig sa madamo nga indi kombinsido nga ang Biblia Pulong sang Dios?

³ Sa pagkamatuod, madamo nga tawo nga aton ginahambal ang wala nagaugyon sa aton pagpati nga ang Biblia Pulong gid sang Dios. Paano naton sila mabuligan? Ang labing maayo nga paagi sa masami amo nga buksan ang Biblia kag ipakita sa ila kon ano ang ginaunod sini. “Ang pulong sang Dios buhi kag gamhanan kag matalom pa sa bisan ano nga espada nga duha sing sulab . . . kag makahantop sang mga hunahuna kag mga tinutuyo sang tagipusuon.” (Heb. 4:12) “Ang pulong sang Dios” amo ang iya pulong nga ginsaad, nga narekord sa Biblia. Indi ini isa ka patay nga maragtas kundi buhi ini kag indi mapunggan nga nagapadulong sa katumanan sini. Samtang ginahimo sini ini, ang matuod nga mga handum sang tagipusuon sang mga tawo nga makatuon sini ginapadayag tuhoy sa pagtuman sang mga kondisyon. Ang impluwensia sini mabaskog pa sa bisan anong butang nga aton masiling.

4. Anong simple nga mga paathag sang mga kamatuoran sang Biblia ang nagbag-o sang panimuot sang pila ka tawo tuhoy sa Biblia? Ngaa?

⁴ Madamo nga tawo ang nagbag-o sang ila kabuhi sang mabasa lamang nila ang ngalan sang Dios sa Biblia. Ang iban namat-od sa pagtuon sang Biblia sang ginpakita sa ila kon ano ang ginasiling sini nahanungod sa katuyuan sang kabuhi, kon ngaa ginatugutan sang Dios ang kalautan, ang kahulugan sang mga nagakatabo karon ukon ang realistiko nga paglaum nga nasentro sa Ginharian sang Dios. Sa mga pungsod nga sa diin ang relihioso nga mga buhat nagpadayag sa mga tawo sa daku nga pagsalakay sang malaut nga mga espiritu, ang paathag sang Biblia tuhoy sa kabangdanan sini kag kon paano makapalos sa sini nagpukaw sang interes. Ngaa makadalayaw gid ining mga punto para sa ila?  Bangod ang Biblia amo lamang ang tuburan sang masaligan nga impormasyon tuhoy sa sining importante nga mga butang.​—⁠Sal. 119:​130.

5. Kon magsiling ang isa ka tawo nga wala sia nagapati sa Biblia, ano mahimo ang kabangdanan? Paano naton sia mabuligan?

⁵ Apang, ano kon talangkod nga magsiling ang isa ka tawo nga wala sia nagapati sa Biblia? Tapuson na bala sina ang paghambalanay? Indi kon handa sia sa pagpangatarungan. Dapat naton batyagon nga may salabton kita sa pagpangapin sa Pulong sang Dios. Mahimo nga ginatamod niya ang Biblia subong isa ka libro sang Cristiandad. Ang iya rekord sang pagkasalimpapaw kag pagpahilabot sa politika, subong man ang iya wala untat nga pagpangayo sing kuwarta, mahimo nga amo ang kabangdanan sang iya negatibo nga reaksion sa Biblia. Ngaa indi sia pamangkuton kon ngaa amo sina ang iya pagtamod? Ang pagpakamalaut sang Biblia sa kalibutanon nga mga dalanon sang Cristiandad, subong man ang mga kinatuhayan sa ulot sang Cristiandad kag sang matuod nga Cristianismo, mahimo nga magapukaw sang iya interes.​—⁠Ipaanggid ang Mateo 15:​7-9; Santiago 4:​4; Miqueas 3:​11, 12.

6. (a) Ano ang nagkombinse sa imo mismo nga ang Biblia Pulong sang Dios? (b) Ano pa nga mga pangatarungan ang sarang magamit agod mabuligan ang mga tawo sa pag-apresyar nga ang Biblia gikan gid sa Dios?

⁶ Para sa iban, ang prangka nga paghambalanay tuhoy sa mga pamatuod sang pag-inspirar sa sini makabulig. Ano ang maathag nga nagapamatuod sa imo nga ang Biblia gikan sa Dios? Amo bala ang ginasiling gid sang Biblia tuhoy sa ginhalinan sini? (2 Tim. 3:​16, 17; Bug. 1:1) Ukon amo bala ang kamatuoran nga ang Biblia nagaunod sing madamo nga tagna nga nagapakita sing detalyado nga ihibalo tuhoy sa palaabuton, kag busa ang mga tagna pat-od nga may labaw sa tawo nga ginhalinan? (2 Ped. 1:​20, 21; Isa. 42:9) Amo bala ang nasulod nga pagsinanto sang Biblia, bisan pa ginsulat ini sang madamo nga lalaki sa sulod sang 1,610 ka tuig nga panahon? Ukon amo bala ang sientipiko nga pagkasibu sini kon ipatuhay sa iban pa nga mga sinulatan sadto nga panahon? Ukon amo bala ang pagkatampad sang mga manunulat? Ukon amo bala  ang pagtipig sa sini walay sapayan sang mapintas nga mga panikasog nga laglagon ini? Ano man ang imo nasapwan nga makadalayaw mahimo nga makabulig man sa iban nga tawo.

Ang Aton Personal nga Pagbasa sing Biblia

7, 8. (a) Ano ang dapat himuon naton subong mga indibiduwal sa Biblia? (b) Ano ang aton kinahanglan dugang pa sa personal nga pagbasa sing Biblia, kag paano ini ginapakita sang Biblia? (c) Paano ikaw sing personal nakatigayon sing paghangop sa mga katuyuan sang Dios?

⁷ Dugang sa pagbulig sa iban nga patihan ang Biblia, kita mismo dapat magpain sing tion sa pagbasa sini sing tayuyon. Ginahimo mo bala ina? Sa tanan nga libro nga nasulat, amo ini ang labing importante. Sa pagkamatuod, wala ina nagakahulugan nga kon basahon naton ini wala na kita sing kinahanglan nga iban pa. Ang Kasulatan nagapaandam batok sa pagpain sang aton kaugalingon, nagahunahuna nga mahibaluan naton ang tanan paagi sa kaugalingon nga pagpanalawsaw. Ang personal nga pagtuon kag ang tayuyon nga pagtambong sa mga miting kinahanglanon agod kita mangin balanse nga mga Cristiano.​—⁠Hulu. 18:​1; Heb. 10:​24, 25.

⁸ Para sa aton kaayuhan ang Biblia nagasugid sa aton nahanungod sa isa ka Etiopianhon nga opisyal nga para sa iya gintuytuyan sang isa ka anghel ang Cristianong ebanghelisador nga si Felipe sang ang opisyal nagabasa gikan sa tagna ni Isaias. Ginpamangkot ni Felipe ang tawo: “Nakahangop ka bala sang imo ginabasa?” Sing mapainubuson ang Etiopianhon nagsabat: “Paano bala ang pagkahangop ko kon wala sing isa nga magtuytoy sa akon?” Ginpangabay niya si Felipe nga ipaathag ang dinalan sang Kasulatan. Si Felipe indi isa ka independiente nga bumalasa sang Biblia sa iya kaugalingon lamang nga naghatag sang iya opinyon tuhoy sa Kasulatan. Indi; ginapakita sang rekord nga sia suod nga nagpakig-angot sa mga apostoles sa Jerusalem kag katapo sia sang kitaon nga organisasyon sang Dios sadto. Gani nabuligan niya ang Etiopianhon sa pagbenepisyo gikan sa instruksion nga ginahatag ni Jehova paagi sa sadto nga organisasyon. (Binu. 6:​5, 6; 8:​5, 14, 15, 26-35) Subong man sa karon, sin-o sa aton ang nakadangat sa maathag kag husto nga paghangop sang mga katuyuan ni Jehova sa iya kaugalingon lamang? Sa kabaliskaran,  nagkinahanglan kita, kag nagakinahanglan gihapon, sing bulig nga ginaaman ni Jehova sing mahigugmaon paagi sa iya kitaon nga organisasyon.

9. Ano nga mga programa sa pagbasa sing Biblia ang makahatag sa aton tanan sing benepisyo?

⁹ Agod mabuligan kita sa paggamit kag sa paghangop sa Biblia, ang organisasyon ni Jehova nagaaman sa aton sing maayo gid Makasulatanhon nga materyal sa Ang Lalantawan kag sa may kaangtanan sa sini nga mga publikasyon. Dugang pa, ginaaman para sa aton ang regular nga iskedyul sang balasahon sa Biblia may kaangtanan sa Teokratikong Eskwelahan sa Ministeryo sa mga kongregasyon sang mga Saksi ni Jehova. Ang iban nga mga Saksi ni Jehova pasunod nga nagabasa sing Biblia dugang sa sini. Daku nga kaayuhan ang matigayon gikan sa tion nga ginahinguyang sa pag-usisa sang Balaan nga Kasulatan. (Sal. 1:​1-3; 19:​7, 8) Nabasa mo na bala sing personal ang bug-os nga Biblia? Kon wala pa, maghimo sing pinasahi nga panikasog nga mahimo ini. Bisan pa indi mo mahangpan sing bug-os ang tanan nga butang, ang imo pagtigayon sang bug-os nga pagtamod sa sini may daku nga bili sa imo. Kon magbasa ka sing apat ukon lima lamang ka pahina kada adlaw, matapos mo ang Biblia sing mga isa ka tuig.

10. (a) San-o nimo ginahimo ang imo pagbasa sing Biblia? (b) Ngaa importante ang pagkatayuyon?

¹⁰ San-o mo mahimo ining personal nga pagbasa sing Biblia? Kon sarang ikaw makapain sing 10 ukon 15 ka minutos kada adlaw, daku gid ang kapuslanan sini! Kon indi, sa dimagkubos mag-iskedyul sing regular nga tion para sa sini kada semana, kag himua gid ina nga iskedyul. Ang pagbasa sing Biblia dapat nga isa ka tubtob kabuhi nga batasan nga ginahimo subong sang pagkaon. Subong nahibaluan ninyo, kon ang batasan sa pagkaon  sang isa ka tawo indi maayo, ang iya lawas magaluya. Amo man sa aton espirituwalidad. Ang aton kabuhi nasandig sa aton regular nga pagkaon sing “tagsa ka pulong nga nagaguwa sa baba ni Jehova.”​—⁠Mat. 4:4.

11. Ano ang dapat mangin tulumuron naton sa pagbasa sing Biblia?

¹¹ Ano ang dapat nga tulumuron naton sa pagbasa sing Biblia? Mangin sayop kon ang aton tulumuron amo lamang ang pagkobre sang naiskedyul nga mga pahina ukon agod lamang makatigayon sing dayon nga kabuhi. Agod makabenepisyo sing dayon, dapat nga makatigayon kita sing mas mataas nga mga motibo​—⁠ang gugma sa Dios, ang handum nga makilala sia sing maayo, nga mahangpan ang iya kabubut-on kag simbahon sia sing kalahamut-an. (Juan 5:​39-42) Ang aton panimuot dapat nga mangin subong sang iya sang manunulat sang Biblia nga nagsulat: “Ipakita sa akon ang imo mga dalanon, O Jehova; tudlui ako sang imo mga banas.”​—⁠Sal. 25:4.

12. (a) Ngaa kinahanglanon ang pagtigayon sing “sibu nga ihibalo,” kag ano nga panikasog kon nagabasa ang kinahanglanon agod matigayon ini? (b) Subong ginpakita sa kahon sa pahina 27, gikan sa anong mga pagtamod mapuslanon nga usisaon naton ang aton ginabasa sa Biblia? (c) Iilustrar ining lima ka punto, sing isa-isa, paagi sa pagsabat sa mga pamangkot nga yara sa katapusan sining parapo. Pat-ura nga gamiton ang inyo Biblia.

¹² Samtang ginabaton naton ina nga panudlo, dapat handumon naton nga makatigayon sing “sibu nga ihibalo.” Kon wala sini, paano naton maaplikar ang Pulong sang Dios sing nagakaigo sa aton kaugalingon nga kabuhi ukon mapaathag ini sing husto sa iban? (Col. 3:​10; 2 Tim. 2:​15) Ang pagtigayon sing sibu nga ihibalo nagakinahanglan nga magbasa kita sing mahalungon, kag kon ang isa ka bahin madalom mahimo nga dapat naton ini basahon sing indi lamang makaisa agod nga mahangpan ang kahulugan sini. Makabenepisyo man kita kon magpain kita sing tion sa pagpamalandong sa materyal, ginahunahuna ini gikan sa nanuhaytuhay nga mga pagtamod. Ang lima ka mapuslanon nga paagi sang paghunahuna nga dapat usisaon ginpadaku sa kahon sa pahina 27 sini nga libro. Madamo nga bahin sang Kasulatan ang mausisa sing mapuslanon paagi sa paggamit sing isa ukon kapin sini. Samtang ginasabat ninyo ang mga pamangkot sa masunod nga mga pahina makita ninyo kon paano ini makabulig.

  (1) Sa masami ang bahin sang Kasulatan nga imo ginabasa nagahatag sa imo sing ideya sa kon ano nga sahi sang persona si Jehova.

 Kon ginapamalandong naton sing mainapresyahon ang ginasugid sa aton sang Biblia nahanungod sa mga binuhatan sang pagpanuga ni Jehova, paano ina nagaapektar sa aton panimuot sa iya? (Sal. 139:​13, 14; gikan sa Job kapitulo 38⁠–​42 talupangda labi na ang 38:​1, 2 kag 40:​2, 8, nian ang 42:​1-6.)

 Bangod sang ginsiling ni Jesus sa Juan 14:​9, 10, ano ang mahinakop naton nahanungod kay Jehova gikan sa mga hitabo subong sang isa nga narekord sa Lucas 5:​12, 13?

 (2) Binagbinaga kon paano ang rekord nagaamot sa pagpasangkad sang tema sang Biblia, nga amo, ang pagbindikar sang ngalan ni Jehova paagi sa Ginharian sa idalom ni Jesucristo ang Ginsaad nga Binhi.

 Paano ang mga kalalat-an naangot sa sini nga tema? (Tan-awa ang Exodo 5:​2; 9:​16; 12:​12.)

 Ano ang kaangtanan sang makapahalipay nga rekord tuhoy kay Rut nga Moabinhon? (Rut 4:​13-17; Mat. 1:​1, 5)

 Paano nagahisanto sa sini ang balita ni Gabriel kay Maria tuhoy sa nagapakari nga pagkatawo ni Jesus? (Luc. 1:​26-33)

 Ngaa may kahulugan ang paghaplas sing balaan nga espiritu sa mga disipulo ni Jesus sang Pentecostes? (Binu. 2:​1-4; 1 Ped. 2:​4, 5, 9; 2 Ped. 1:​10, 11)

 (3) Ang konteksto may kaangtanan sa kahulugan sang espisipiko nga mga bersikulo.

 Sa kay sin-o ginpatuhoy ang mga pinamulong sa Roma 5:​1 kag 8:​16? (Tan-awa ang Roma 1:​7.)

 Ginapakita bala sang konteksto nga ang 1 Corinto 2:​9 nagakomento nahanungod sa kabuhi sa duta sa bag-ong sistema sang Dios? Subong ginpakita sa bersikulo 6-8, kay sin-o mga mata kag mga dulunggan ang wala makahangop sang mga butang nga ginsulat ni Pablo?

 (4) Pamangkuta ang imo kaugalingon kon paano mo maaplikar sa imo kaugalingon ang imo ginabasa.

 Para lamang bala sa maragtas ang rekord nahanungod sa pagpatay ni Cain kay Abel ukon may laygay bala ini para sa aton? (Gen. 4:​3-12; 1 Juan 3:​10-15; Heb. 11:4)

 Kon basahon naton (sa Exodo tubtob sa Deuteronomio) ang nahanungod sa mga eksperiensia sang Israel sa  kahanayakan, ano ang dapat naton iaplikar sa aton kaugalingon? (1 Cor. 10:​6-11)

 Ang laygay tuhoy sa paggawi nga ginsulat para sa hinaplas nga mga Cristiano naaplikar bala sa mga tawo nga may paglaum nga mabuhi sing dayon sa duta? (Ipaanggid ang Numeros 15:​16; Juan 10:​16.)

 Bisan pa maayo ang aton tindog sa sulod sang Cristianong kongregasyon, kinahanglan bala nga binagbinagon naton ang mga paagi nga maaplikar naton sing bug-os pa ang laygay sang Biblia nga aton na nahibaluan? (2 Cor. 13:​5; 1 Tes. 4:1)

 (5) Binagbinaga kon paano mo magamit ang imo ginabasa sa pagbulig sa iban.

 Sin-o ang sarang mabuligan sang rekord tuhoy sa pagkabanhaw sang anak nga babayi ni Jairo? (Luc. 8:​41, 42, 49-56)

13. Ano nga mga resulta ang aton mapaabot gikan sa dalayon nga pagbasa sing Biblia kag pagtuon upod sa organisasyon ni Jehova?

¹³ Daw ano ka makapaladya gid kon ginahimo ini sa sining paagi! Agod mapat-od, ang pagbasa sing Biblia isa ka hangkat​—⁠isa ka proyekto nga aton mapanikasugan nga may benepisyo tubtob nagakabuhi kita. Apang samtang ginahimo naton ini magabaskog kita sa espirituwal. Magalapit pa kita sa aton mahigugmaon nga Amay, si Jehova, kag sa aton Cristianong mga kauturan. Magabulig ini sa aton sa pagsunod sa laygay nga “manguyapot sing hugot sa pulong sang kabuhi.”​—⁠Filip. 2:​16.

Repaso nga Paghinun-anon

● Ngaa ginsulat kag gintipigan ang Biblia tubtob sa aton adlaw?

● Paano naton mabuligan ang iban sa pag-apresyar sini?

● Ngaa mapuslanon ang tayuyon kag personal nga pagbasa sing Biblia? Gikan sa anong lima ka pagtamod mausisa naton sing mapuslanon ang aton ginabasa?

[Mga Pamangkot sa Pagtinuon]

 [Kahon/​Piktyur sa pahina 27]

Kon Nagabasa Ikaw sing Biblia Binagbinaga—

Kon ano ang ginasugid sa imo sang tagsa ka bahin nahanungod kay Jehova subong isa ka persona

Kon ano ang kaangtanan sini sa kabug-osan nga tema sang Biblia

Kon ano ang epekto sang konteksto sa kahulugan

Kon ano ang dapat nga epekto sini sa imo mismo kabuhi

Kon paano mo ini magamit sa pagbulig sa iban